தேர்தல் ஆணையரை நியமிக்க ஆலோசனை நடத்துவது இதுவே முதல் முறை. உச்சநீதிமன்ற தீர்ப்பு மற்றும் புதிய சட்டத்திற்கு பிறகு இது அமலுக்கு கொண்டு வரப்பட்டது. மாற்றம் என்ன, அதைத் தூண்டியது எது என்பதை இங்கே காணலாம்.
தேர்தல் ஆணையர் அனுப் சந்திர பாண்டே பிப்ரவரி 14ம் தேதி ஓய்வு பெற உள்ளார். மேலும் அவருக்கு பிறகு, புதிய ஆலோசனை செயல்முறை மூலம் ஒருவர் தேர்வு செய்யப்படுவார்.
பிரதமர் நரேந்திர மோடி, மக்களவை எதிர்க்கட்சித் தலைவர் ஆதிர் ரஞ்சன் சவுத்ரி மற்றும் மத்திய அமைச்சர் ஆகியோர் அடங்கிய குழு இந்தத் தேர்வை மேற்கொள்ளும். லோக்பால் மற்றும் மத்திய கண்காணிப்பு ஆணையரை நியமிக்க பிரதமர், மக்களவை எதிர்க்கட்சித் தலைவர் சவுத்ரி மற்றும் உள்துறை அமைச்சர் அமித் ஷா ஆகியோர் அடங்கிய இதேபோன்ற குழு புதன்கிழமை கூடியது.
இதற்கு முன், தேர்தல் ஆணைய உறுப்பினர்களை நியமிக்க அரசுக்கு முழு அதிகாரம் இருந்தது.
இந்த ஆணையத்தின் மற்ற இரு உறுப்பினர்கள் தலைமை தேர்தல் ஆணையர் ராஜீவ் குமார் மற்றும் அருண் கோயல் ஆகியோர் அடங்குவர்.
மாற்றத்தைத் தூண்டியது எது?
2015, 2017, 2021 மற்றும் 2022 ஆம் ஆண்டுகளில் நான்கு மனுக்களை பரிசீலித்து உச்ச நீதிமன்றம் அரசாங்கத்தை நடவடிக்கை எடுக்க வலியுறுத்தியது. இந்த மனுக்களில் தேர்தல் ஆணையர்களை தேர்வு செய்ய நியாயமான மற்றும் வெளிப்படையான முறையை கோரியது.
அக்டோபர் 23, 2018 அன்று, 2015 மனுவை பரிசீலித்தபோது, இரண்டு நீதிபதிகள் கொண்ட அமர்வு, தேர்தல் ஆணையத்தின் பங்கைக் கையாளும் அரசியலமைப்பின் 324 வது பிரிவுக்கு விளக்கம் தேவை என்று உணர்ந்தது. இந்த விவகாரம் இதற்கு முன்பு விவாதிக்கப்படவில்லை. எனவே இது அரசியல் சாசன அமர்வுக்கு அனுப்பப்பட்டது. செப்டம்பர் 2022 இல், நீதிபதி கே.எம்.ஜோசப் தலைமையிலான ஐந்து நீதிபதிகள் கொண்ட அரசியலமைப்பு அமர்வு மனுக்களை விசாரிக்கத் தொடங்கியது.
நாடாளுமன்றத்தால் நிறைவேற்றப்பட்ட எந்தவொரு சட்டத்திற்கும் உட்பட்டு, தேர்தல் ஆணையாளர்களை நியமிப்பதில் குடியரசுத்தலைவரின் பங்கைக் குறிப்பிடும் பிரிவு 324(2) ஐ மனுதாரர்கள் சுட்டிக்காட்டியுள்ளனர். ஆனால், அடுத்தடுத்து வந்த அரசாங்கங்களால் அப்படி எந்த சட்டமும் இயற்றப்படவில்லை. தற்போதைய நியமன முறை ஒளிபுகாதாக இருப்பதாக அவர்கள் விமர்சித்தனர் மற்றும் இது நிறுவனத்தின் சுதந்திரம் குறித்து சந்தேகத்தை எழுப்புகிறது என்று கூறினார். தேர்தல் ஆணையர்களைத் தேர்ந்தெடுக்க ஒரு கொலீஜியம் அல்லது ஒரு அமைப்பை உள்ளடக்கிய ஆலோசனை செயல்முறை தேவை என்று அவர்கள் அழைப்பு விடுத்தனர்.
அப்போது எப்படி தேர்தல் ஆணையர்கள் நியமிக்கப்பட்டார்கள்?
நியமனங்கள் மீது மத்திய அரசுக்கு முழு அதிகாரமும் இருந்தது. அவர்கள் தற்போதைய மற்றும் முன்னாள் அதிகாரிகளின், முக்கியமாக இந்திய அரசின் செயலாளர்கள் மற்றும் தலைமைச் செயலாளர்களின் பதிவேடுகளை வைத்திருந்தனர். சட்ட அமைச்சகம் இந்த தரவுத்தளத்திலிருந்து ஒரு குறுகிய பட்டியலை உருவாக்கும். நியமிப்பதில் இறுதி முடிவு எடுக்கும் அதிகாரம் பிரதமருக்கு இருந்தது, மேலும் தேர்ந்தெடுக்கப்பட்ட நபரை குடியரசுத்தலைவர் அதிகாரப்பூர்வமாக உறுதிப்படுத்துவார்.
குறிப்பிடத்தக்க வகையில், கடந்த தேர்தல் ஆணையர்கள் பெரும்பாலோர் ஓய்வு பெற்ற இந்திய ஆட்சிப் பணி (Indian Administrative Services (IAS)) அதிகாரிகளாக இருந்தனர்.
உச்ச நீதிமன்றத்தில் மத்திய அரசின் நிலைப்பாடு என்ன?
உச்ச நீதிமன்றம் நியமனங்களில் தலையிடுவதை அரசு ஏற்கவில்லை. சட்டப்பிரிவு 324(2)ன்படி நாடாளுமன்றத்தில் சட்டம் இன்றி தேர்தல் ஆணையர்களை நியமிக்க குடியரசுத்தலைவரை அனுமதி வழங்கப்பட்டுள்ளது. பல்வேறு அரசாங்கங்களால் பயன்படுத்தப்படும் தற்போதைய செயல்முறை தொடர வேண்டும் என்றும், ஒரு இலட்சியவாத மாதிரியின் அடிப்படையில் அதை மாற்றுவது நியாயமானதல்ல என்றும் அவர்கள் வாதிட்டனர்.
தேர்தல் ஆணையத்தின் சுதந்திரம் ஆபத்தில் உள்ளது என்பதை மனுதாரர்களால் நிரூபிக்க முடியவில்லை, எனவே நீதிமன்றம் தலையிட உடனடி காரணம் எதுவும் இல்லை என்றும் அரசாங்கத்தின் சட்டக் குழு கூறியது. அடிப்படையில், தேவையில்லாமல் தலையிடுவதைத் தவிர்க்குமாறு அவர்கள் நீதிமன்றத்தை கேட்டுக்கொண்டனர்.
உச்ச நீதிமன்றத்தின் தீர்ப்பு என்ன?
மார்ச் 2, 2023 அன்று, ஐந்து நீதிபதிகள் கொண்ட அமர்வு இந்த விஷயத்தில் தீர்ப்பளித்தது.
தேர்தல் ஆணையத்தின் பங்கு மற்றும் உறுப்பினர் நியமனங்கள் குறித்து அரசியலமைப்பு சபையில் நடந்த விவாதங்கள் உட்பட 324 வது பிரிவின் வரலாற்றை உச்ச நீதிமன்றம் ஆராய்ந்தது. தேர்தல் ஆணைய உறுப்பினர்களை நியமிப்பதில் நிர்வாகத்திற்கு அனைத்து அதிகாரங்களும் இருப்பதை அரசியலமைப்பின் வடிவமைப்பாளர்கள் விரும்பவில்லை என்று அது கண்டறிந்தது. எனவே, பிரிவு 324(2) இல் "நாடாளுமன்றத்தால் இயற்றப்படும் எந்தவொரு சட்டத்திற்கும் உட்பட்டது" என்பது நாடாளுமன்றம் இது குறித்து சட்டங்களை இயற்ற வேண்டியதன் அவசியத்தை பிரதிநிதித்துவப்படுத்துகிறது.
அப்படி ஒரு சட்டம் இல்லாததால், இடைவெளி இருப்பதாக நீதிமன்றம் கூறியது. நியமனங்களை நிர்வாகத்திடம் மட்டுமே விட்டுவிடுவதால் ஏற்படும் கடுமையான விளைவுகளைக் கருத்தில் கொண்டு, தேர்தல் ஆணையர்களை நியமிக்கும் செயல்முறையை நிறுவ நீதிமன்றம் முடிவு செய்தது. பிரதமர், மக்களவை எதிர்க்கட்சித் தலைவர் இல்லையென்றால், மக்களவையில் மிகப்பெரிய எதிர்க்கட்சியின் தலைவர் மற்றும் இந்திய தலைமை நீதிபதி ஆகியோரை உள்ளடக்கிய குழுவின் ஆலோசனையின் அடிப்படையில் குடியரசுத் தலைவர் அவர்களை நியமிக்க வேண்டும் என்று அது தீர்ப்பளித்தது.
இருப்பினும், இந்த விதிமுறைகள் "நாடாளுமன்றத்தால் இயற்றப்படும் எந்தவொரு சட்டத்திற்கும் உட்பட்டவை" என்று குறிப்பிடுவதில் நீதிமன்றம் கவனமாக இருந்தது. வேறு வார்த்தைகளில் கூறுவதானால், எதிர்காலத்தில் நியமன செயல்முறை குறித்த சட்டத்தை இயற்றுவதற்கு பாராளுமன்றத்திற்கு சுதந்திரம் உள்ளது.
ஆலோசனை செயல்முறை பரிசீலிக்கப்படுவது இதுவே முதல் முறையா?
உச்ச நீதிமன்றத்தின் ஆலோசனை நடைமுறை ஒன்றும் புதிதல்ல. இது 1990 ஆம் ஆண்டு அப்போதைய சட்ட அமைச்சர் தினேஷ் கோஸ்வாமி தலைமையிலான குழுவின் பரிந்துரையை ஒத்திருந்தது. தலைமைத் தேர்தல் ஆணையரை நியமிக்கும் போது, குடியரசுத் தலைவர் இந்தியத் தலைமை நீதிபதி, எதிர்க்கட்சித் தலைவர் அல்லது மிகப்பெரிய எதிர்க்கட்சித் தலைவருடன் கலந்தாலோசிக்க வேண்டும் என்று இந்தக் குழு முன்மொழிந்தது. மற்ற இரண்டு தேர்தல் ஆணையர்களைப் பொறுத்தவரை, இந்த ஆலோசனையில் உச்ச நீதிமன்ற தலைமை நீதிபதி, எதிர்க்கட்சித் தலைவர் மற்றும் தலைமை தேர்தல் ஆணையர் ஆகியோர் பங்கேற்க வேண்டும்.
2015 ஆம் ஆண்டில், 20 வது சட்ட ஆணையத்தின் 255 வது அறிக்கையும் ஆலோசனையின் அவசியத்தை வலியுறுத்தியது. பிரதமர், எதிர்க்கட்சித் தலைவர் அல்லது மக்களவையில் மிகப்பெரிய எதிர்க்கட்சியின் தலைவர் மற்றும் இந்திய தலைமை நீதிபதி உள்ளிட்ட மூன்று பேர் கொண்ட கொலீஜியம் அல்லது தேர்வுக் குழுவை குடியரசுத் தலைவர் கலந்தாலோசிக்க வேண்டும் என்று அது பரிந்துரைத்தது.
உச்சநீதிமன்ற தீர்ப்புக்குப் பிறகு நடந்தது என்ன?
கடந்த ஆகஸ்டில், தேர்தல் ஆணையாளர்கள் எவ்வாறு நியமிக்கப்படுவார்கள் என்பதை கோடிட்டுக் காட்டும் ஒரு மசோதாவை அரசாங்கம் பாராளுமன்றத்தில் முன்வைத்தது. அதன் நியமன விதிகளை நாடாளுமன்றத்தால் மாற்ற முடியும் என்று நீதிமன்றம் கூறியதால், மசோதாவை அறிமுகப்படுத்த அரசாங்கத்திற்கு உரிமை உண்டு. எவ்வாறாயினும், மசோதாவில் முன்மொழியப்பட்ட நியமன செயல்முறை நீதிமன்றத்தின் சீர்திருத்தங்களை செயலிழக்கச் செய்வது குறித்த கவலைகளை எழுப்பியது.
டிசம்பர் 2023 இல், பாராளுமன்றம் மசோதாவை நிறைவேற்றியது. இது பிரதமர், மக்களவையில் எதிர்க்கட்சித் தலைவர் மற்றும் பிரதமரால் தேர்ந்தெடுக்கப்பட்ட அமைச்சரவை அமைச்சர் ஆகியோரை உள்ளடக்கிய ஒரு குழுவை அமைக்கிறது. சட்ட அமைச்சர் தலைமையிலான தேர்வுக் குழு (screening panel) மற்றும் இரண்டு மத்திய செயலாளர்கள் உட்பட ஐந்து பெயர்களில் இருந்து இந்த குழு தேர்ந்தெடுக்கும்.
அரசியலமைப்பை உருவாக்கியவர்களின் கூற்றுப்படி, தேர்தல் ஆணையம் சுத்ந்திரமாக இருக்க வேண்டும் என்பதால் குழுவின் அமைப்பை எதிர்க்கட்சிகள் விமர்சித்தன. முன்மொழியப்பட்ட குழுவின் அமைப்பு எதிர்க்கட்சித் தலைவரை ஓரங்கட்டக்கூடும். மேலும், அவர் தொடர்ந்து பிரதமராலும் மத்திய அமைச்சராலும் புறக்கணிக்கப்படலாம்.
இந்த மசோதா 2023 டிசம்பரில் நாடாளுமன்றத்தில் நிறைவேற்றப்பட்டு, ஒரு வாரத்திற்குள் குடியரசுத் தலைவர் ஒப்புதல் அளித்தார்.