வரவு செலவு திட்டம்-2026 : நிதியமைச்சரின் முன்னிருக்கும் மூன்று பெரிய பொருளாதாரக் கவலைகள் -உதித் மிஸ்ரா

வரவு செலவுத் திட்டத்தைத் தயாரிக்கும்போது அரசாங்கம் என்ன செய்ய நோக்கமாகக் கொண்டுள்ளது? இந்தியாவின் தற்போதைய பொருளாதார நிலைமையைக் கருத்தில் கொண்டு, ஞாயிற்றுக்கிழமை வரவிருக்கும் வரவு செலவுத் திட்டத்திற்கான முக்கியக் கவலைகள் என்னவாக இருக்கும்?

ஞாயிற்றுக்கிழமை, பிப்ரவரி 1 அன்று, நிதியமைச்சர் நிர்மலா சீதாராமன் ஏப்ரல் 2026 முதல் மார்ச் 2027 வரையிலான அடுத்த நிதியாண்டிற்கான வரவு செலவு திட்டத்தை தாக்கல் செய்யவுள்ளார். இந்த வரவு செலவுத் திட்டம் மூன்று முக்கிய விவரங்களை வழங்குகிறது. அவை,

ஒன்று, வரும் ஆண்டில் பொருளாதாரத்தின் வளர்ச்சி விகிதம் என்னவாக இருக்கும் என்று அரசாங்கம் எதிர்பார்க்கிறது. மேலும், பல்வேறு திட்டங்கள் மற்றும் துறைகளுக்கு அரசாங்கம் எவ்வளவு செலவிடும் என்பதையும் இது காட்டுகிறது.

இரண்டு, வரி (வருமான வரி அல்லது பெருநிறுவன வரி போன்றவை) மற்றும் வரி அல்லாத (அதன் பொதுத்துறை நிறுவனங்களிலிருந்து ஈவுத்தொகை அல்லது அலைக்கற்றை போன்ற அதன் சொத்துக்களை விற்பனை செய்வதன் மூலம் ஈட்டப்படும் பணம் போன்றவை) என பல்வேறு ஆதாரங்களில் இருந்து அரசாங்கம் எவ்வளவு வருவாயை திரட்டும்.

மூன்றாவதாக, அரசாங்கம் எவ்வளவு பணம் கடன் வாங்க வேண்டும் என்பதைக் இது காட்டுகிறது. எதிர்பார்க்கப்படும் வருவாயைவிட அரசாங்கத்தின் செலவுகள் அதிகமாக இருப்பதால், இந்தக் கடன் வாங்குதல் அவசியமாகிறது. செலவுக்கும் வருவாய்க்கும் இடையிலான இந்த இடைவெளி நிதிப் பற்றாக்குறை என்று அழைக்கப்படுகிறது.

பொதுவான கண்ணோட்டத்தில், புதிய நிதியாண்டிற்கான வரவு செலவு திட்டம் முற்றிலும் புதியதாக இருக்க வேண்டும். நிதியமைச்சர் ஒரு தெளிவான வெள்ளை காகிதத்தை எடுத்துக்கொண்டு புதிய நிதியாண்டிற்கான முற்றிலும் புதிய வரவு செலவு திட்டத்தை உருவாக்க முடிவு செய்வதை ஒருவர் கற்பனை செய்யலாம். ஆனால் உண்மையில், அது அரிதாகவே நிகழ்கிறது. பெரும்பாலும், ஒரு புதிய வரவு செலவு திட்ட அடிப்படையில் இதற்கான திட்டங்களை மாற்றுவதற்கு வரையறுக்கப்பட்ட இடம், நிதி மற்றும் கொள்கை ஆகிய இரண்டையும் கொண்டுள்ளது.

ஏன்?

இதற்குப் பல காரணங்கள் உள்ளன. ஒன்று, கடந்தகால வரவு செலவு திட்டங்கள் அனைத்தும் வருடாந்திர நிதிநிலை அறிக்கைகளாக இருந்தபோதிலும், அவை ஒவ்வொன்றிலும், அரசாங்கத்திற்கு ஏராளமான செலவினங்கள் உள்ளன. உதாரணமாக, அதன் பணியாளர்களின் சம்பளத்தை ஒரு வருடத்திலிருந்து மற்றொரு வருடத்திற்கு மாற்ற முடியாது அல்லது வரி விகிதங்களை ஒவ்வொரு ஆண்டும் மாற்றியமைக்க முடியாது.

மேலும், பெரும்பாலும் நிதியமைச்சர் என்ன செய்ய முடியும்? அல்லது செய்ய முடியாது என்பது மிகவும் முக்கியமானது. அவர் என்ன செய்ய வேண்டும் அல்லது செய்யக்கூடாது என்பதும் முக்கியம். இவை அனைத்தும், முடிவடையவிருக்கும் ஆண்டின் அரசாங்க நிதி நிலவரத்தால் பெரிதும் பாதிக்கப்படுகின்றன. இது தற்போதைய நிதியாண்டைக் குறிக்கிறது. தற்போதைய நிதியாண்டு கடந்த ஆண்டு ஏப்ரல் மாதம் தொடங்கியது. அது 2026 மார்ச் மாதம் முடிவடையும்.

உதாரணமாக, இந்தியப் பொருளாதாரத்தின் ஒரு பகுதி தற்போதைய நிதியாண்டில் கடுமையாகப் பாதிக்கப்படலாம். இந்திய ஏற்றுமதிகள் இதற்கு ஒரு சிறந்த எடுத்துக்காட்டு. அமெரிக்காவின் பெரும் வரிவிதிப்புகளால் இந்த ஆண்டு அவை கடுமையாகப் பாதிக்கப்பட்டுள்ளன. இத்தகைய நிகழ்வுகள் நிதி அமைச்சரின் முன்னுரிமைகளை வடிவமைக்கக்கூடும். அடுத்த வரவுசெலவுத் திட்டத்தில் இந்தச் சிக்கல்களைக் கையாள அவரைத் தூண்டக்கூடும். எனவே, இப்போதுதான் கடந்து சென்ற ஆண்டை திரும்பிப் பார்ப்பது பெரும்பாலும் பயனுள்ள குறிப்புகளை அளிக்கிறது. அடுத்த ஆண்டு வரவுசெலவுத் திட்டத்தில் நிதி அமைச்சர் கையாள முயற்சிக்கும் முக்கியப் பிரச்சினைகளைப் புரிந்துகொள்ள இது நமக்கு உதவுகிறது.

நடப்பு ஆண்டின் தரவுகள் நமக்கு என்ன சொல்கின்றன?

பல சிக்கல்களை நாம் சுட்டிக்காட்டலாம். இருப்பினும், பேரியல் பொருளாதார மட்டத்தில், மூன்று முக்கியக் கவலைகள் உள்ளன:

1. பலவீனமான மொத்த உள்நாட்டு உற்பத்தி வளர்ச்சி

இந்தியாவின் பொருளாதார வளர்ச்சி குறித்த பெரும்பாலான செய்திகள் மிகவும் நேர்மறையாக இருப்பதால், இது கற்பனையாகாத் தோன்றலாம். இந்தச் செய்திகள் பொதுவாக மொத்த உள்நாட்டு உற்பத்தி அல்லது ஜிடிபி-யைப் பயன்படுத்தி வளர்ச்சியை அளவிடுகின்றன. இந்தியா வேகமாக வளரும் முக்கியப் பொருளாதாரம் என்று பல அறிக்கைகள் கூறுகின்றன. இருப்பினும், இந்த அறிக்கைகள் பெரும்பாலும் "உண்மையான" மொத்த உள்நாட்டு உற்பத்தி வளர்ச்சியைக் (real GDP growth) குறிப்பிடுகின்றன. மத்திய வரவு செலவுத் திட்டம் தயாரிக்கப்படும்போது, ​​ஒரு வேறுபட்ட அளவீடு அதிக முக்கியத்துவம் பெறுகிறது. "பெயரளவிலான" மொத்த உள்நாட்டு உற்பத்தியும் (nominal GDP) அதன் வளர்ச்சி விகிதமுமே அதிக முக்கியத்துவம் பெறுகின்றன.

நிச்சயமாக, நாம் முதலில் கணக்கிடுவது பெயரளவு மொத்த உள்நாட்டு உற்பத்தி (nominal GDP) ஆகும். அதாவது, இன்றைய விலைகளில் உள்ள அனைத்து பொருட்கள் மற்றும் சேவைகளின் மொத்த மதிப்பு ஆகும். "உண்மையான" மொத்த உள்நாட்டு உற்பத்தியை அடைய, விலைகளின் விளைவை நாம் எடுத்துக்கொள்கிறோம். இதன் மூலம், கடந்த ஆண்டைவிட இந்த ஆண்டு எத்தனை அதிக ஆப்பிள்கள், லாரிகள், சட்டைகள் போன்றவற்றை உற்பத்தி செய்தோம் என்பது போல, நாம் 'உண்மையில்' எவ்வளவு வளர்ந்தோம் என்பதை அறிந்துகொள்கிறோம்.

பெயரளவிலான மொத்த உள்நாட்டு உற்பத்தி ஏன் முக்கியமானது என்பதற்கு ஒரு காரணம் உள்ளது. ஏனெனில், அது கவனிக்கப்பட்ட மதிப்பாகும் மற்றும் அனைத்து வரவு செலவுத் திட்டக் கணக்கீடுகளுக்கும் தொடக்கப் புள்ளியாக அமைகிறது. உதாரணமாக, ஒரு அரசாங்கம் அடுத்த நிதியாண்டில் வரி வருவாயில் எவ்வளவு சம்பாதிக்கும் என்பதை அறிய விரும்பினால், அது ஒரு வரி விகிதத்தைப் பயன்படுத்தி அதன் வரி வருவாயைக் கணக்கிடுவதற்கு முன்பு பெயரளவிலான மொத்த உள்நாட்டு உற்பத்தியின் அளவை அறிந்திருக்க வேண்டும்.

அரசாங்கத்தின் மொத்த உள்நாட்டு உற்பத்தி எதிர்பார்த்த அளவுக்கு வேகமாக வளரவில்லை என்றால், அது அதன் அனைத்து கணக்கீடுகளையும் தலைகீழாக மாற்றிவிடும். அது எப்படி என்பதைப் பார்ப்போம்.

அரசாங்கம் இந்தியாவின் பெயரளவு மொத்த உள்நாட்டு உற்பத்தி 100 ரூபாய் அதிகரிக்கும் என்று எதிர்பார்க்கிறது என்று வைத்துக்கொள்வோம். 15% வரி விகிதத்தில், அடுத்த ஆண்டு செலவிடுவதற்கு அரசாங்கத்திற்கு கூடுதலாக 15 ரூபாய் கிடைக்கும். ஆனால், ஏதேனும் காரணத்தால், பெயரளவிலான மொத்த உள்நாட்டு உற்பத்தி ரூ.50 மட்டுமே வளர்ந்தால், அரசாங்கத்தின் கைகளில் உள்ள மொத்த கூடுதல் பணம் ரூ.7.50 ஆக இருக்கும்.

இது அரசாங்கம் சந்தையில் இருந்து கூடுதலாக ரூ.7.50 கடன் வாங்க வேண்டிய கட்டாயத்திற்கு வழிவகுக்கும். இதன் விளைவாக, உங்கள் கார் அல்லது வீடு வாங்குவதற்கு நீங்கள் கடன் வாங்கக்கூடிய நிதி குறைவாக இருக்கும். இதன் விளைவாக, பொருளாதாரத்தில் உள்ள அனைவருக்கும் அதிக வட்டி விகிதங்கள் ஏற்படும். அல்லது, அரசாங்கம் அதிகமாக கடன் வாங்க வேண்டாம் என்று தேர்வுசெய்தால், அது அதன் செலவினங்களைக் குறைக்க வேண்டியிருக்கும். இந்தக் குறைப்பு இந்தியாவின் பாதுகாப்புத் துறையில் ஆராய்ச்சி மற்றும் மேம்பாட்டு நிதி குறைப்பு அல்லது ஏழைகளுக்கான மானியங்கள் குறைப்பு போன்ற வடிவங்களில் இருக்கலாம்.

முக்கியமான விஷயம் என்னவென்றால், மத்திய வரவு செலவுத் திட்டத்தை உருவாக்கும் போது, ​​பெயரளவிலான மொத்த உள்நாட்டு உற்பத்தியும் அதன் வளர்ச்சி விகிதமும்தான் முக்கியம். நீங்கள் பொதுவாகக் கேள்விப்படும் உண்மையான மொத்த உள்நாட்டு உற்பத்தி வளர்ச்சி விகிதம் அல்ல.

இந்தியாவின் பெயரளவிலான மொத்த உள்நாட்டு உற்பத்தி வளர்ச்சி விகிதம் பல ஆண்டுகளாகக் குறைந்து வருகிறது. இந்த சவால் எவ்வளவு பெரியது என்பதை விளக்கப்படம் 1 காட்டுகிறது.

விளக்கப்படம் 1.

நடப்பு ஆண்டில், பெயரளவு மொத்த உள்நாட்டு உற்பத்தி 8% மட்டுமே வளரும் என்று எதிர்பார்க்கப்படுகிறது. கடந்த 20 ஆண்டுகளுடன் ஒப்பிடும்போது இது குறைவு என்பதை விளக்கப்படம் காட்டுகிறது. இது வளர்ச்சியில் ஒரு நீண்டகால மந்தநிலையை பிரதிபலிக்கிறது.

கடந்த பிப்ரவரி மாதம், இந்தியாவின் பெயரளவு மொத்த உள்நாட்டு உற்பத்தி 10.1% அதிகரிக்கும் என்று நிதியமைச்சர் எதிர்பார்த்தார். இது ஏற்கனவே கடந்த கால அளவை விட குறைவாக இருந்தது. இப்போது, ​​புள்ளிவிவர அமைச்சகத்தால் வெளியிடப்பட்ட முதல் முன்கூட்டிய மதிப்பீடுகள் பெயரளவு மொத்த உள்நாட்டு உற்பத்தி வளர்ச்சியை 8% ஆகக் கணித்துள்ளன.

அப்படியானால், நிதி அமைச்சரின் முதல் முன்னுரிமை, அடுத்த நிதியாண்டில் பெயரளவு மொத்த உள்நாட்டு உற்பத்தியையும் அதன் வளர்ச்சியையும் அதிகரிப்பதற்கான ஒரு வழியைக் கண்டுபிடிப்பதாகும்.

2. பலவீனமான வரி மீள்தன்மை

மேலே உள்ள எடுத்துக்காட்டில், 15% வரி விகிதத்தில், அரசாங்கம் கூடுதலாக ரூ.15 வருவாய் ஈட்டும் என்று எதிர்பார்த்தது. இது வரி மீள்தன்மை 1 என்று அனுமானிக்கிறது. மீள்தன்மை 1 என்றால், மொத்த உள்நாட்டு உற்பத்தி 10% அதிகரித்தால், வரி வசூலும் 10% அதிகரிக்கும் என்று பொருள்.

ஆனால் இது நடக்கவில்லை என்றால் என்ன செய்வது? ஒருவேளை பெயரளவு மொத்த உள்நாட்டு உற்பத்தி 100 ரூபாய்க்குப் பதிலாக 50 ரூபாயாக மட்டுமே உயர்ந்தால், மற்றும் வரி மீட்சித்திறன் 1-க்கு பதிலாக 0.5 ஆக இருந்தால், கூடுதல் வரி வருவாய் வெறும் 3.75 ரூபாயாக மட்டுமே இருக்கும். இது எதிர்பார்க்கப்பட்ட 15 ரூபாயை விட மிகக் குறைவு.

இதேபோன்ற ஒரு சூழ்நிலை நடப்பு நிதியாண்டில் அரசாங்கத்தின் நிதிநிலையைப் பாதித்து வருகிறது.

விளக்கப்படம் 2 காட்டுவது போல, ஆண்டின் தொடக்கத்தில் அரசாங்கம் எதிர்பார்த்த வேகத்தில் வரி வசூல் வளரவில்லை. கருப்பு நிறக் கட்டங்கள் ஒவ்வொரு வரிக்கும் அரசாங்கம் கணித்த வளர்ச்சி விகிதத்தைக் காட்டுகின்றன. சிவப்பு நிறக் கட்டங்கள் இந்த ஆண்டு இன்றுவரை (year-to-date (YTD) உள்ள உண்மையான வளர்ச்சி விகிதத்தைக் காட்டுகின்றன.

விளக்கப்படம் 2.

தலைமை இந்தியப் பொருளாதார நிபுணர் பிரஞ்சூல் பண்டாரியின் சமீபத்திய HSBC அறிக்கையிலிருந்து பெறப்பட்ட விளக்கப்படம்-2 ஆனது, மற்றொரு விவரத்தைக் காட்டுகிறது. இதில், அரசாங்கத்தின் மொத்த வரி வருவாய் வளர்ச்சி விகிதம், 8% என்ற அளவில் புள்ளியிட்ட கோடாகக் காட்டப்பட்டுள்ள ஏற்கனவே பலவீனமான பெயரளவு மொத்த உள்நாட்டு உற்பத்தி வளர்ச்சி விகிதத்தைவிட மிகக் குறைவாக உள்ளது. இதன் பொருள் வரி நெகிழ்ச்சித்தன்மை சரிந்துவிட்டது என்பதாகும். இதைத் தெளிவாகக் காட்டும் விளக்கப்படம் 3-ஐப் பாருங்கள்.

 

விளக்கப்படம் 3.

நிதியாண்டின் தொடக்கத்தில், வரி மீட்சி விகிதம் 1.1 ஆக இருக்கும் என்று கணிக்கப்பட்டது. இதன் பொருள், பெயரளவு மொத்த உள்நாட்டு உற்பத்தி 1% உயர்ந்தால், வரி வருவாய் 1.1% வளரும் என்று எதிர்பார்க்கப்பட்டது. இருப்பினும், உண்மையான வரி மீட்சி விகிதம் கணிசமாகக் குறைவாக, வெறும் 0.6 ஆகவே இருந்தது.

3. பலவீனமான தனியார் நிறுவன முதலீடுகள்

தற்போதைய அரசாங்கத்திற்கு நிலையான கொள்கை இலக்கு ஒன்று இருந்தால், அது பொருளாதாரத்தில் தனியார் துறையின் ஈடுபாட்டை அதிகரிப்பதாகும். இது பிரதமர் மோடியின் "குறைந்தபட்ச அரசு" (Minimum Government) என்ற கருத்திலிருந்து பின்பற்றப்படுகிறது. இதன் பொருள், பொருளாதாரத்தை நிர்வகிப்பதில் அரசாங்கத்தின் பங்கு குறைக்கப்பட வேண்டும். மேலும் பொருட்கள் மற்றும் சேவைகளை உற்பத்தி செய்வதிலும், அந்த செயல்பாட்டில், வேலைவாய்ப்புகள் மற்றும் செழிப்பை உருவாக்குவதிலும் தனியார் துறை முதன்மைப் பங்கை எடுக்க ஊக்குவிக்க முயற்சிகள் மேற்கொள்ளப்பட வேண்டும்.

இந்தக் கவனம் 2019 முதல் குறிப்பாக வலுவாக இருந்து வருகிறது. நிதியமைச்சர் நிர்மலா சீதாராமன், தனியார் நிறுவனங்களை மேலும் முதலீடு செய்ய ஊக்குவிக்கும் வகையில் பெருநிறுவன வரி விகிதங்களைக் கடுமையாகக் குறைத்தார். அரசாங்கம் தனது மூலதனச் செலவினங்களையும் அதிகரித்தது, சாலைகள், பாலங்கள் மற்றும் துறைமுகங்கள் போன்ற உள்கட்டமைப்புகளில் செலவிட்டது. இது தனியார் நிறுவனங்களுக்கு வணிகம் செய்வதற்கான செலவுகளைக் குறைப்பதற்காகவே செய்யப்பட்டது. பின்னர், உற்பத்தி சார்ந்த ஊக்கத்தொகை (Production Linked Incentive (PLI)) திட்டம் மூலம் தனியார் நிறுவனங்களுக்கு அரசாங்கம் நேரடி மானியங்களை வழங்கியது.

இந்த நடவடிக்கைகள் எதிர்பார்த்தபடி பலனளிக்காதபோது, ​​அரசாங்கம் நுகர்வோர் மீதான வரிச்சுமையைக் குறைத்தது. முதலில், அது வருமான வரி விலக்கு வரம்புகளைத் திரும்பத் திரும்ப உயர்த்தியது. பின்னர், சரக்கு மற்றும் சேவை வரி (ஜிஎஸ்டி) விகிதங்களைக் குறைத்தது. இதன் நோக்கம் தேவையை அதிகரிப்பதும், பொருளாதாரத்தில் தனியார் துறை முதலீட்டை ஊக்குவிப்பதும் ஆகும்.

இருப்பினும், இந்த மாற்றங்கள் மற்றும் உயர் பொருளாதார வளர்ச்சி இருந்தபோதிலும், தரவுகள் (விளக்கப்படம் 4-ஐக் காண்க) பெருந்தொற்றுக்கு முந்தைய காலத்துடன் (2019) ஒப்பிடும்போது தனியார் பெருநிறுவன முதலீடு குறைந்துவிட்டதைக் காட்டுகிறது.

விளக்கப்படம் 4.

உண்மை என்னவென்றால், இவ்வளவு முயற்சிகள் இருந்தபோதிலும், இந்திய நிறுவனங்கள் பரவலான புதிய முதலீடுகளை நியாயப்படுத்துவதை முன்வைக்க போதுமான அளவு விற்பனை செய்யவில்லை. 

இந்திய நிறுவனங்கள் மட்டும் இல்லாமல், கடந்த ஒரு வருடமாக உலக முதலீட்டாளர்களும் இந்தியாவை புறக்கணிக்கத் தொடங்கியுள்ளனர் என்பதும் கவலையளிக்கிறது என்பதை விளக்கப்படம் 5 குறிப்பிடுகிறது. இது ரூபாயின் மாற்று விகிதத்தைப் பாதித்து, நிதியமைச்சருக்கு பொருளாதார மற்றும் அரசியல் சிக்கல்களையும் உருவாக்கியுள்ளது.

விளக்கப்படம் 5.

இப்போது கேள்வி என்னவென்றால்: வளர்ச்சியை அதிகரிக்க இந்த வரவு செலவு திட்டத்தில் நிதி அமைச்சர் என்ன செய்ய வேண்டும்? தனியார் நிறுவனங்களை மேலும் நம்பிக்கையுடன் முதலீடு செய்ய ஊக்குவிக்க நிதி அமைச்சர் என்ன புதிய சலுகைகளை வழங்க முடியும்?

 Original Article : Budget 2026: Three macro worries for the Finance Minister. -Udit Misra

Read More →

இந்திய குடிமக்கள் விருதுகள் (Indian Civilian Awards) பற்றி . . . -ரோஷ்னி யாதவ்

 முக்கிய அம்சங்கள் :

ஜார்க்கண்ட் மாநிலம் உருவாக்கப்படுவதற்கு வழிவகுத்த ஜார்க்கண்ட் இயக்கத்தின் (Jharkhand movement) முகமான முன்னாள் ஜார்க்கண்ட் முதல்வர் ஷிபு சோரனுக்கு, மரணத்திற்குப் பின் பத்ம பூஷண் (Padma Bhushan) விருது வழங்கப்பட்டது. வி.எஸ். அச்சுதானந்தன் மற்றும் ஷிபு சோரனுக்கான விருதுகள், இந்த இரண்டு எதிர்க்கட்சித் தலைவர்களும் ஆற்றிய பங்களிப்புகளை அரசாங்கம் அங்கீகரிக்கிறது என்பதைக் காட்டுகிறது.

இந்த ஆண்டு மொத்தம் 131 பத்ம விருதுகளுக்கு குடியரசுத் தலைவர் ஒப்புதல் அளித்துள்ளார். இதில் 5 பத்ம விபூஷன் விருதுகள், 13 பத்ம பூஷன் விருதுகள் மற்றும் 113 பத்மஸ்ரீ விருதுகள் அடங்கும். இந்த பட்டியலில் 19 பெண் விருது பெற்றவர்கள் உள்ளனர். இதில் ஆறு வெளிநாட்டினர் (foreigners), வெளிநாடு வாழ் இந்தியர்கள் (NRI), இந்திய வம்சாவளியினர் (PIO) அல்லது வெளிநாட்டு இந்தியக் குடியுரிமை (OCI) பெற்றவர்களும் அடங்குவர். மேலும் இதில் 16 விருதுகள் மரணத்திற்குப் பிறகு வழங்கப்பட்டுள்ளன. ஆண்டுதோறும் குடியரசு தினத்தன்று அறிவிக்கப்படும் இந்த விருதுகள், பொதுவாக மார்ச் அல்லது ஏப்ரல் மாதங்களில் குடியரசுத் தலைவரால் ராஷ்டிரபதி பவனில் நடைபெறும் விழாக்களில் வழங்கப்படுகின்றன.

பத்ம விபூஷண் விருது பெற்ற நீதிபதி கே.டி. தாமஸ் அவர்கள் 1995 மற்றும் 2002-க்கு இடையில் உச்சநீதிமன்றத்தில் பணியாற்றியபோது அவர் வழங்கிய, பேச்சு சுதந்திரம், தண்டனை வழங்கும் கொள்கைகள் மற்றும் நீதித்துறை பொறுப்புணர்வு ஆகியவற்றுடன் தொடர்புடைய முக்கிய தீர்ப்புகளுக்காக நினைவுகூரப்படுகிறார். ஓய்வு பெற்ற பிறகு, அவர் சட்ட மற்றும் நீதித்துறை சீர்திருத்தங்கள் தொடர்பான பல குழுக்களுக்குத் தலைமை தாங்கினார் மற்றும் அவற்றில் பணியாற்றினார். இந்த பணிகள் மூலம், அவர் குற்றவியல் நீதி மற்றும் அரசியலமைப்பு விளக்கம் குறித்த கொள்கை உருவாக்கத்திற்குப் பங்களித்தார்.

பத்ம விபூஷண் விருதும் பெற்ற பி. நாராயணன், ஆர்.எஸ்.எஸ் உடன் நெருங்கிய தொடர்புகளைக் கொண்ட தினசரி செய்தித்தாளான ஜன்மபூமியின் தலைமை ஆசிரியராகப் பணியாற்றினார். அவர் வட கேரளாவில் பிரச்சாரகராகப் பணியாற்றினார் மற்றும் சுதேசி ஜாக்ரன் மஞ்சின் மாநில ஒருங்கிணைப்பாளராகவும் இருந்தவர்.

பத்ம பூஷண் விருது பெற்றவர்களில், நாற்பதாண்டு சமகால மலையாளத் திரையுலகை வடிவமைத்த மூத்த நடிகர் மம்மூட்டி மற்றும் 130-க்கும் மேற்பட்ட கல்வி நிறுவனங்களை நிறுவி, இதர பிற்படுத்தப்பட்ட சமூகங்களிடையே கணிசமான செல்வாக்கைப் பெற்ற பெருமைக்குரிய மூத்த ஈழவத் தலைவரும் ஸ்ரீ நாராயண தர்ம பரிபாலன யோகத்தின் பொதுச் செயலாளருமான வெள்ளப்பள்ளி நடேசன் ஆகியோர் அடங்குவர்.

பத்ம பூஷண் பட்டியலில் முன்னாள் உத்தரகண்ட் முதல்வரும், மகாராஷ்டிரா முன்னாள் ஆளுநருமான பகத் சிங் கோஷ்யாரி பொது விவகாரங்களுக்காக கௌரவிக்கப்பட்டார். பத்ம பூஷன் விருது பெற்றவர்களில், மறைவுக்குப் பின் கௌரவிக்கப்பட்ட விளம்பரத் துறை மூத்த நிபுணர் பியூஷ் பாண்டே, வங்கியாளர் உதய் கோட்டக், மறைவுக்குப் பின் கௌரவிக்கப்பட்ட மூத்த பாஜக தலைவர் வி. கே. மல்ஹோத்ரா, பின்னணி பாடகி அல்கா யாக்னிக் மற்றும் டென்னிஸ் ஜாம்பவான் விஜய் அமிர்தராஜ் ஆகியோர் அடங்குவர்.

பத்மஸ்ரீ விருது பெற்றவர்களில், இந்திய அணியை உலகக் கோப்பை வெற்றிகளுக்கு இட்டுச் சென்ற கிரிக்கெட் வீரர்கள் ரோஹித் சர்மா மற்றும் ஹர்மன்ப்ரீத் கவுர் புல்லர்; பெண்கள் ஹாக்கி கோல்கீப்பர் சவிதா புனியா; நடிகர்கள் ஆர். மாதவன் மற்றும் சதீஷ் ஷா (இறப்புக்குப் பிறகு); முன்னாள் பல்கலைக்கழக மானியக் குழுவின் (UGC) தலைவர் மாமிடலா ஜெகதேஷ் குமார்; கடத்தல் வீரப்பனுக்கு எதிரான குழுவை வழிநடத்திய ஓய்வுபெற்ற ஐபிஎஸ் அதிகாரி கே.விஜய் குமார்; மும்பையில் ஆசியாவின் முதல் மனித பால் வங்கியை நிறுவிய குழந்தைகள் நல மருத்துவர் அர்மிதா பெர்னாண்டஸ்; அயோத்தி அகழ்வாராய்ச்சி தொல்பொருள் ஆய்வாளர் புத்த ரஷ்மி மணி; முன்னாள் பிரசார் பாரதி தலைமைச் செயல் அதிகாரி சஷி சேகர் வேம்பதி மற்றும் உள்துறை அமைச்சகத்தின் முன்னாள் துணைச் செயலாளர் ஆர்.வி.எஸ். மணி ஆகியோர் அடங்குவர்.

சர்வதேச விண்வெளி நிலையத்திற்கு (International Space Station (ISS)) சென்ற முதல் இந்தியரான குரூப் கேப்டன் சுபன்ஷு சுக்லா, இந்தியாவின் மிக உயர்ந்த அமைதிக்கால வீரதீர விருதான (India’s highest peacetime gallantry award) அசோக சக்ரா விருதுக்கு கௌரவிக்கப்பட்டார். குடியரசு தினத்தை முன்னிட்டு, குடியரசுத் தலைவர் திரௌபதி முர்மு, 69 ஆயுதப்படை வீரர்களுக்கு வீரதீர விருதுகளை வழங்க ஒப்புதல் அளித்தார். அவர்களில், ஆறு விருதுகள் மறைவுக்குப் பின் வழங்கப்பட உள்ளன.

வீரதீரச் செயல்களுக்கான அலங்காரங்களில் மூன்று கீர்த்தி சக்கர விருதுகள்; 13 சௌரிய சக்கர விருதுகளும் இதில் அடங்கும், அவற்றில் ஒன்று மறைவுக்குப் பின் வழங்கப்படுகிறது; ஒரு சேனா பதக்கத்திற்கான (வீரதீரச் செயல்) பட்டை விருது; 44 சேனா பதக்கங்கள் (வீரதீரச் செயல்) இதில் ஐந்து விருதுகள் மறைவுக்குப் பின் வழங்கப்படுபவை; ஆறு நாவோ சேனா பதக்கங்கள் (வீரதீரச் செயல்) மற்றும் இரண்டு வாயு சேனா பதக்கங்கள் (வீரதீரச் செயல்) ஆகியவை அடங்கும்.

கடந்த ஆண்டு ஜூன் மாதம் ஆக்சியம்-4 பயணத்தின் ஒரு பகுதியாக குரூப் கேப்டன் சுக்லா சர்வதேச விண்வெளி நிலையத்திற்கு (ISS) பயணம் மேற்கொண்டார். இந்திய விமானப்படை (IAF) அதிகாரி மற்றும் விண்வெளி வீரர் குரூப் கேப்டன் பிரசாந்த் பாலகிருஷ்ணன் நாயர், 1 அசாம் ரைபிள்ஸ் படைப்பிரிவின் மேஜர் அர்ஷ்தீப் சிங் மற்றும் 2 பாரா (SF) படைப்பிரிவின் நாயப் சுபேதார் டோலேஷ்வர் சுப்பா ஆகியோருக்கு கீர்த்தி சக்ரா விருது வழங்கப்பட்டுள்ளது.

பத்து ராணுவ வீரர்களுக்கும், இரண்டு பெண் கடற்படை அதிகாரிகளுக்கும் சௌர்ய சக்ரா விருது வழங்கப்பட்டுள்ளது. பெண் கடற்படை அதிகாரிகளில் லெப்டினன்ட் கமாண்டர் தில்னா கே மற்றும் லெப்டினன்ட் கமாண்டர் ரூபா ஏ ஆகியோர் அடங்குவர்.

அக்டோபர் 2, 2024 முதல் மே 29, 2025 வரை ஐஎன்எஸ்வி தாரிணி கப்பலில் இரட்டைக் கைகளால் பயணிக்கும் முன்னோடியான நவிகா சாகர் பரிக்ரமா-II பயணத்திற்குத் தேர்ந்தெடுக்கப்பட்ட லெப்டினன்ட் கமாண்டர் தில்னா கே-க்கான பாராட்டுப் பத்திரம், அவர் இந்திய, பசிபிக், அட்லாண்டிக் மற்றும் தெற்குப் பெருங்கடல்கள் வழியாக 25,600 கடல் மைல்களுக்கு மேல் பயணம் செய்ததாகக் கூறுகிறது.

உங்களுக்குத் தெரியுமா?

நாட்டின் மிக உயர்ந்த குடிமை விருதுகளில் ஒன்றான பத்ம விருதுகள், பத்ம விபூஷண், பத்ம பூஷண் மற்றும் பத்மஸ்ரீ என மூன்று பிரிவுகளில் வழங்கப்படுகின்றன.

கலை, சமூகப் பணி, பொது விவகாரங்கள், அறிவியல் மற்றும் பொறியியல், வர்த்தகம் மற்றும் தொழில், மருத்துவம், இலக்கியம் மற்றும் கல்வி, விளையாட்டு, குடிமைப் பணி போன்ற பல்வேறு துறைகள் மற்றும் செயல்பாடுகளில் விருதுகள் வழங்கப்படுகின்றன.

1978, 1979 மற்றும் 1993 முதல் 1997 வரையிலான காலகட்டத்தில் ஏற்பட்ட குறுக்கீடுகளைத் தவிர, ஒவ்வொரு ஆண்டும் குடியரசு தினத்திற்கு முந்தைய நாளில் பத்ம விருதுகளைப் பெறுபவர்களின் பெயர்கள் அறிவிக்கப்பட்டு, ஒவ்வொரு ஆண்டும் மார்ச் அல்லது ஏப்ரல் மாதங்களில் ராஷ்டிரபதி பவனில் நடைபெறும் விழாக்களில் இந்தியக் குடியரசுத் தலைவரால் வழங்கப்படுகின்றன.

விருது பெறுபவர்களுக்கு குடியரசுத் தலைவர் கையொப்பமிட்ட சான்றிதழைத் தவிர வேறு எந்த ரொக்கப் பரிசும் கிடைக்காது. மேலும் இது பொது மற்றும் அரசு நிகழ்ச்சிகளில் அணியக்கூடிய ஒரு பதக்கமும் வழங்கப்படுகிறது.

பத்ம விருது பெற்ற ஒருவர் பின்னர் உயர்வான பத்ம விருதைப் பெறலாம். உதாரணமாக, பத்மஸ்ரீ விருது பெற்றவர் பத்ம பூஷன் அல்லது பத்ம விபூஷன் விருதைப் பெறலாம். இருப்பினும், இது முந்தைய விருது வழங்கப்பட்ட தேதியிலிருந்து ஐந்து ஆண்டுகளுக்குப் பிறகு மட்டுமே சாத்தியமாகும்.

குறிப்பிடத்தக்க வகையில், இனம், தொழில், பதவி அல்லது பாலின வேறுபாடு இல்லாத அனைத்து நபர்களும் இந்த விருதுகளுக்குத் தகுதியுடையவர்கள் ஆவர். இருப்பினும், மருத்துவர்கள் மற்றும் விஞ்ஞானிகள் தவிர, பொதுத்துறை நிறுவனங்களில் பணிபுரிபவர்கள் உட்பட அரசு ஊழியர்கள் இந்த விருதுகளுக்குத் தகுதியற்றவர்கள்.

உள்துறை அமைச்சகத்தின் கூற்றுப்படி, தேர்வு செய்வதற்கு நிலையான அல்லது கடுமையான தேர்வு அளவுகோல்கள் எதுவும் இல்லை. இருப்பினும், ஒரு தனிநபரின் வாழ்நாள் சாதனைகள் கருத்தில் கொள்ளப்படும் முக்கிய காரணிகளில் ஒன்றாகும்.

பத்ம விருதுகளுக்குப் பெறப்படும் அனைத்து பரிந்துரைகளும், ஒவ்வொரு ஆண்டும் பிரதமரால் அமைக்கப்படும் பத்ம விருதுகள் குழுவின் முன் வைக்கப்படும். பத்ம விருதுகள் குழு அமைச்சரவைச் செயலாளரால் தலைமை தாங்கப்படுகிறது. மேலும் உள்துறைச் செயலாளர், குடியரசுத் தலைவரின் செயலாளர் மற்றும் நான்கு முதல் ஆறு பிரபலங்கள் உறுப்பினர்களாக உள்ளனர். குழுவின் பரிந்துரைகள் பிரதமர் மற்றும் இந்திய குடியரசுத் தலைவரின் ஒப்புதலுக்காக சமர்ப்பிக்கப்படுகின்றன.

Original Article : About the Indian Civilian Awards. -Roshni Yadav 

Read More →

புஜ் நிலநடுக்கத்தின் 25 ஆண்டுகள் நிறைவு. -ரோஷ்னி யாதவ்

 தற்போதைய செய்தி :

நாடு தனது 77-வது குடியரசு தினத்தைக் கொண்டாடிய பிறகு, இந்த நாள் 2001-ஆம் ஆண்டு ஜனவரி 26 குஜராத்தில் ஏற்பட்ட மிக மோசமான பேரழிவின் 25-வது ஆண்டு நிறைவையும் குறிக்கிறது. குறிப்பிடத்தக்க வகையில், 77-வது குடியரசு தினக் கொண்டாட்டங்களின் போது, ஒன்றிய உள்துறை அமைச்சகத்தின் சார்பில், தேசிய பேரிடர் மேலாண்மை ஆணையம் (National Disaster Management Authority (NDMA)) மற்றும் தேசிய பேரிடர் மீட்புப் படை (National Disaster Response Force (NDRF)) ஆகியவற்றைக் காட்சிப்படுத்தும் அலங்கார ஊர்தி, 'புஜ் நிலநடுக்கம்: 25 ஆண்டுகால மீள்திறன்' (Bhuj Earthquake: 25 Years of Resilience) என்ற கருப்பொருளின்கீழ், புஜ் நிலநடுக்கத்தின் 25 ஆண்டுகளைக் குறிக்கும் வகையில் கடமைப் பாதையில் அணிவகுத்துச் சென்றது. இந்தச் சூழலில், புஜ் நிலநடுக்கம் மற்றும் நிலநடுக்கங்கள் பற்றி இங்கே : 

முக்கிய அம்சங்கள்:

1. ரிக்டர் அளவுகோலில் 6.9 ஆகப் பதிவான குஜராத்தின் நிலநடுக்கத்தின் காரணமாக 20,000-க்கும் மேற்பட்டவர்கள் உயிர் இழந்தனர். 166,000 பேர் காயமைடந்தனர். ஏறக்குறைய 400,000 வீடுகள் இருக்கும் இடம் தெரியாமல் அழிந்து போனது. இந்த அதிர்வலைகள் 700 கிலோமீட்டருக்கும் மேல் பரவின. 21 மாவட்டங்கள் பாதிக்கப்பட்டன. மேலும், 600,000 மக்கள் வீடற்றவர்களாக ஆக்கப்பட்டனர். புஜ் நகரம் இந்த நிலநடுக்கத்தின் மையப்பகுதியாக இருந்தது.

2. புஜ் நிலநடுக்கம் ஒரு திருப்புமுனையாக அமைந்தது. பேரிடர்களுக்கு எதிர்வினையாற்றுவதில் இருந்து, இன்றைய மீட்பு நடவடிக்கைகளுக்கு வழிகாட்டும் ஒரு முன்னெச்சரிக்கையாக மாற்றியதுடன், இன்றைய பேரிடர் மேலாண்மை கட்டமைப்புக்கு அடிப்படையாகவும் அமைந்தது.

3. குஜராத் இயல்பு நிலைக்குத் திரும்ப பல ஆண்டுகள் ஆகும் என்று பலர் நினைத்தார்கள். ஆனால், அதிக அளவிலான புனரமைப்புப் பணிகள் அந்த மாநிலம் விரைவாக மீண்டுவர உதவியது.

நிலநடுக்கம் (earthquake) என்றால் என்ன?

1. பூமியின் இரண்டு பகுதிகள் பூமிக்கு அடியில் ஒன்றுக்கொன்று உரசி நகரும்போது ஏற்படும் மிகத் தீவிரமான நில அதிர்வே நிலநடுக்கம் ஆகும். பூமியின் இரண்டு தொகுதிகள் திடீரென ஒன்றையொன்று கடந்து நழுவும்போது இது நிகழ்கிறது என்று USGS கூறுகிறது. இது நில அதிர்வு அலைகளின் வடிவத்தில் சேமிக்கப்பட்ட 'மீள் திரிபு' (elastic strain) ஆற்றலை வெளியிடுகிறது. இது பூமி முழுவதும் பரவி நில அதிர்வை ஏற்படுத்துகிறது.

2. பூமியின் வெளிப்புற மேற்பரப்பான மேலோடு, புவித்தட்டுத் தகடுகளாகப் பிளவுபட்டுள்ளது. இந்தத் தகடுகளின் விளிம்புகள் புவித்தட்டு எல்லைகள் என்று அழைக்கப்படுகின்றன, அவை பிளவுகளால் ஆனவை. இந்த புவித் தட்டுகள் தொடர்ந்து மெதுவான வேகத்தில் நகர்ந்து, ஒன்றுக்கொன்று மோதிக்கொள்கின்றன. இந்தத் தட்டுகளின் விளிம்புகள் மிகவும் கரடுமுரடாக இருப்பதால், தட்டின் மற்ற பகுதிகள் நகர்ந்துகொண்டிருந்தாலும், விளிம்புகள் ஒன்றுடன் ஒன்று சிக்கிக்கொள்கின்றன. அதே நேரத்தில் தட்டின் மற்ற பகுதிகள் நகர்ந்துகொண்டே இருக்கின்றன. புவித் தட்டுகள் ஒரு பிளவுப் பகுதியில் போதுமான அளவு நகர்ந்து, அவற்றின் விளிம்புகள் விலகிச் செல்லும்போது நிலநடுக்கம் ஏற்படுகிறது.

3. பூமிக்குள் நிலநடுக்கம் தொடங்கும் புள்ளி நிலநடுக்கத்தின் மையப்பகுதி (hypocenter) என்றும், அதற்கு நேராக மேலே தரையில் உள்ள புள்ளி மேல்மையப்பகுதி (epicentre) என்றும் அழைக்கப்படுகிறது.

நிலநடுக்கங்களை முன்கூட்டியே கணிக்க முடியுமா?

இல்லை. நிலநடுக்கத்தைப் பற்றிய துல்லியமான கணிப்புக்கு, பூமிக்குள்ளிருந்து ஒரு பெரிய நிலநடுக்கம் வரப்போகிறது என்பதைக் குறிக்கும் ஒருமுன் அறிவிப்பு தேவைப்படுகிறது. மேலும், பெரிய நிலநடுக்கங்களுக்கு முன்பு  அந்த முன் அறிவிப்பு வெளிப்படையாக தெரிவிக்கப்பட வேண்டும். அந்த முன் அறிவிப்பு பெரிய நிலநடுக்கங்களுக்கு முன்பு மட்டுமே வர வேண்டும், ஒவ்வொரு சிறிய அசைவிற்கும் அல்ல. தற்போது, ​​அத்தகைய முன் அறிவிப்பு அறிகுறிகள் இருந்தாலும், அவற்றை நம்பகத்தன்மையுடன் கண்டறியக்கூடிய எந்தக் கருவியும் இல்லை.

நிலநடுக்க அலைகள்

1. ஒரு நிலநடுக்கம் ஏற்படும்போது, ​​அது நில அதிர்வு அலைகளை உருவாக்குகிறது. அவை நாம் அனுபவிக்கும் நடுக்கத்தை ஏற்படுத்துகின்றன. நிலநடுக்க அலைகளில் இரண்டு முக்கிய வகைகள் உள்ளன: உட்புற அலைகள் (body waves) மற்றும் மேற்பரப்பு அலைகள் (surface waves) ஆகும்.

2. உட்புற அலைகள் P மற்றும் S அலைகளை உள்ளடக்கியது. மேலும், அவை பூமியின் மேற்பரப்பில் மட்டும் பயணிக்காமல், பூமிக்குள்ளும் பயணிப்பதால், அவை உட்புற அலைகள் (body waves) என்று அழைக்கப்படுகின்றன.

3. முதன்மையாக அல்லது ‘P’ அலை என்பது பாறைகள் வழியாகப் பயணிக்கும் ஒரு வகை ஒலி அலையாகும். ஒரு P அலையில், பாறைத் துகள்கள் மாறி மாறி சுருங்கி விரிவடைகின்றன. இந்தச் செயல்முறை சுருக்கங்கள் மற்றும் விரிவுகள் (compressions and dilatations) என்று அழைக்கப்படுகிறது. இதனால் P அலைகள் அழுத்த அலைகள் (compressional waves) என்றும் குறிப்பிடப்படுகின்றன. P அலைகள் திட, திரவ மற்றும் வாயுப் பொருட்கள் வழியாகப் பயணிக்கக்கூடியவை. குறிப்பிடத்தக்க வகையில், P அலைகள் பூமியின் திரவ நிலையில் உள்ள வெளிப்புற மையப்பகுதி வழியாகவும் பயணிக்க முடியும்.

4. இரண்டாம் நிலை அல்லது 'S' அலையில், பாறைத் துகள்கள் ஒன்றுக்கொன்று இணையாகச் சரிந்து செல்கின்றன. இது வெட்டு அலைகளை உருவாக்குகிறது (shear waves). எனவே, S அலைகள் வெட்டு அலைகள் என்றும் அழைக்கப்படுகின்றன. S அலைகளால் திரவங்கள் அல்லது வாயுக்கள் வழியாகப் பயணிக்க முடியாது. S அலைகளால் கடல் அல்லது புவியின் வெளிப்புற மையப்பகுதி வழியாகப் பயணிக்க முடியாது என்பதாகும்.

5. மேற்பரப்பு அலைகள் (Surface waves), P மற்றும் S அலைகளைப் போல பூமியின் உட்பகுதி வழியாகப் பயணிக்காமல், பூமியின் மேற்பரப்பிற்கு அருகிலேயே கட்டுப்படுத்தப்படும் அவற்றின் தன்மை காரணமாக அந்தப் பெயரைப் பெறுகின்றன. மேற்பரப்பு அலைகளில் இரண்டு முக்கிய வகைகள் உள்ளன: ஒன்று, மேற்பரப்பிற்கு அருகிலேயே இருக்கும் குறுக்கலைகளான லவ் அலைகள் (Love waves) மற்றொன்று, கடல் அலைகளில் உள்ள நீர் துகள்களைப் போல நகரும் ரேலே அலைகள் (Rayleigh waves) ஆகும்.

நிலநடுக்கங்களால் இந்தியாவிற்கு ஏற்படும் பாதிப்பு

1. இந்தியாவிற்கு நிலநடுக்கங்களால் ஏற்படும் ஆபத்து, அது அமைந்துள்ள புவியியல் அமைவிடம்—அதாவது பல புவித்தட்டுகள் சந்திக்கும் இடம், அதன் சிக்கலான நிலவியல் அமைப்பு, வேகமாக வளர்ந்துவரும் மக்கள் தொகை மற்றும் பரவலாகக் காணப்படும் ஒழுங்குபடுத்தப்படாத கட்டுமானங்கள் போன்றவற்றின் காரணமாக ஏற்படுகிறது.

2. இதன் விளைவாக, நாடு நில அதிர்வுகளை சந்தித்து வருகிறது. இந்தியா உலகில் நிலநடுக்கம் அதிகம் ஏற்படும் நாடுகளில் 7-வது இடத்தில் உள்ளது.

3. ndma.gov.in-இணையதளத்தின்படி, இந்தியாவின் நிலப்பரப்பில் தோராயமாக 59 சதவீதம், மிதமான முதல் கடுமையான நிலநடுக்கங்களைச் சந்திக்கும் அபாயத்தில் உள்ளது. இது MSK அளவுகோலில் VII அல்லது அதற்கும் அதிகமான தீவிரத்தைக் கொண்டதாகும்.

தேசிய பேரிடர் மேலாண்மை ஆணையம் (National Disaster Management Authority (NDMA))

1. இந்தியாவில் பேரிடர் மேலாண்மைக்கான அதிக அதிகாரங்களை கொண்ட அமைப்பாக தேசிய பேரிடர் மேலாண்மை ஆணையம் உள்ளது.

2. தேசிய பேரிடர் மேலாண்மை ஆணையத்தை அமைப்பதும், மாநில மற்றும் மாவட்ட அளவில் அமைப்பிற்கான வழிமுறைகளுக்கான ஒரு நல்ல சூழலை உருவாக்குவது 2005-ஆம் ஆண்டு பேரிடர் மேலாண்மைச் சட்டத்தால் கட்டாயமாக்கப்பட்டுள்ளது.

3. பேரிடர் மேலாண்மைக்கான கொள்கைகள், திட்டங்கள் மற்றும் வழிகாட்டுதல்களை வகுக்க தேசிய பேரிடர் மேலாண்மை ஆணையம் கடமைப்பட்டுள்ளது. பிரதமர் தேசிய பேரிடர் மேலாண்மை ஆணையத்தின் தலைவராக உள்ளார். மேலும், இதில் 9 உறுப்பினர்கள் உள்ளனர். அந்த 9 உறுப்பினர்களில் ஒருவர் துணைத் தலைவராக நியமிக்கப்படுகிறார்.

4. பேரிடர் மேலாண்மைச் சட்டம், அந்தந்த முதலமைச்சர்கள் தலைமையிலான மாநில பேரிடர் மேலாண்மை ஆணையங்களை (State Disaster Management Authorities (SDMAs)) உருவாக்குவதையும், மாவட்ட ஆட்சியர்கள்/மாவட்ட நீதிபதி தலைமையிலான மாவட்ட பேரிடர் மேலாண்மை ஆணையங்களை (District Disaster Management Authorities (DDMA)) உருவாக்குவதையும் நோக்கமாகக் கொண்டது.

5. பேரிடர் மேலாண்மைக்கான முதன்மைப் பொறுப்பு சம்பந்தப்பட்ட மாநில அரசிடமே உள்ளது. இருப்பினும், பேரிடர் மேலாண்மை குறித்த தேசியக் கொள்கையானது, ஒன்றிய, மாநில மற்றும் மாவட்ட அரசுகள் என அனைவருக்கும் ஒரு சாதகமான சூழலை உருவாக்குகிறது.

6. பேரழிவு அபாயக் குறைப்புக்கான சென்டாய் கட்டமைப்பு ஒப்பந்தத்தில் (Sendai Framework for Disaster Risk Reduction (SFDRR)) இந்தியா கையெழுத்திட்டுள்ளது. இது பேரழிவுகளை நிர்வகிப்பதற்கான இலக்குகளை நிர்ணயிக்கிறது.

Original Article : 25 years of Bhuj earthquake. -Roshni Yadav

Read More →

அகில இந்தியப் பணிகளுக்கான பணிநிலை ஒதுக்கீட்டுக் கொள்கை என்ன? -ரோஷ்னி யாதவ்

முக்கிய அம்சங்கள்:

மாநில அரசாங்கங்களுடன் கலந்தாலோசித்த பிறகு, பணியாளர் மற்றும் பயிற்சித் துறையால் (Department of Personnel and Training (DoPT)) அறிவிக்கப்பட்ட இந்த புதிய கட்டமைப்பு, 2017ஆம் ஆண்டு முதல் நடைமுறையில் இருந்த அமைப்பை மாற்றியமைக்கிறது. இது குடிமைப் பணிகள் தேர்வில் வெற்றி பெற்றவர்களுக்குப் பணிப் பிரிவுகளை ஒதுக்குவதற்காகப் பயன்படுத்தப்பட்ட முந்தைய மண்டல அடிப்படையிலான முறைக்கு மாற்றாக, ஒரு புதிய குழும அமைப்பை (new grouping structure) அறிமுகப்படுத்துகிறது.

நியாயமான மற்றும் வெளிப்படையான அமைப்பை உறுதி செய்வதற்காக, அரசாங்கம் அனைத்து மாநில மற்றும் கூட்டுப் பணிப்பிரிவுகளையும் அகர வரிசைப்படி பட்டியலிட்டு, அவற்றை நான்கு குழுக்களாகப் பிரித்துள்ளது என்று பணியாளர் மற்றும் பயிற்சித் துறை வெளியிட்ட அறிவிப்பில் தெரிவிக்கப்பட்டுள்ளது. ஒதுக்கீடு இப்போது இந்த நான்கு குழுக்களின் அடிப்படையில் இருக்கும். விண்ணப்பதாரர்கள்  தங்களுக்கு விருப்பமான குழுக்களைத் தேர்ந்தெடுப்பார்கள்.

புதிய குழு அமைப்பின் கீழ்:

• குழு I-ல், அருணாச்சலப் பிரதேசம்-கோவா-மிசோரம் மற்றும் யூனியன் பிரதேசங்கள் (Arunachal Pradesh-Goa-Mizoram and Union Territories (AGMUT)) ஆந்திரப் பிரதேசம், அசாம்-மேகாலயா, பீகார் மற்றும் சத்தீஸ்கர் போன்ற மாநிலங்கள் இடம்பெற்றுள்ளன.

• குழு II-ல், குஜராத், ஹரியானா, இமாச்சலப் பிரதேசம், ஜார்கண்ட், கர்நாடகா, கேரளா மற்றும் மத்தியப் பிரதேசம் போன்ற மாநிலங்கள் இடம்பெற்றுள்ளன.

• குழு III-ல், மகாராஷ்டிரா, மணிப்பூர், நாகாலாந்து, ஒடிசா, பஞ்சாப், ராஜஸ்தான், சிக்கிம் மற்றும் தமிழ்நாடு போன்ற மாநிலங்கள் இடம்பெற்றுள்ளன.

• குழு IV-ல், தெலுங்கானா, திரிபுரா, உத்தரகண்ட், உத்தரப் பிரதேசம் மற்றும் மேற்கு வங்கம் போன்ற மாநிலங்கள் இடம்பெற்றுள்ளன.

முன்னதாக, மண்டலம்-1 ஏழு பிரிவுகளைக் கொண்டிருந்தது: அதன்படி அருணாச்சலப் பிரதேசம்-கோவா-மிசோரம் மற்றும் யூனியன் பிரதேசங்கள், ஜம்மு-காஷ்மீர், இமாச்சலப் பிரதேசம், உத்தரகண்ட், பஞ்சாப், ராஜஸ்தான் மற்றும் ஹரியானா போன்ற மாநிலங்கள் இடம் பெற்றிருந்தன. மண்டலம்-II-ல், உத்தரப் பிரதேசம், பீகார், ஜார்கண்ட் மற்றும் ஒடிசாவை போன்ற மாநிலங்கள் இடம்பெற்றிருந்தன. மண்டலம்-III-ல், குஜராத், மகாராஷ்டிரா, மத்தியப் பிரதேசம் மற்றும் சத்தீஸ்கர் போன்ற மாநிலங்கள் இடம்பெற்றிருந்தன. மண்டலம்-IV-ல், மேற்கு வங்கம், சிக்கிம், அசாம்-மேகாலயா, மணிப்பூர், திரிபுரா மற்றும் நாகாலாந்து போன்ற மாநிலங்கள் இடம்பெற்றிருந்தன. மண்டலம்-V-ல், தெலுங்கானா, ஆந்திரப் பிரதேசம், கர்நாடகா, தமிழ்நாடு மற்றும் கேரளா போன்ற மாநிலங்கள் இடம்பெற்றிருந்தன.

மறுசீரமைக்கப்பட்ட கட்டமைப்பானது, முந்தைய கொள்கையின் கீழ் சமமற்ற காலியிடப் பகிர்வு (uneven vacancy distribution) குறித்து பல மாநில அரசுகள் எழுப்பிய கவலைகளை நிவர்த்தி செய்யும் அதே வேளையில், குடிமை சேவைகளுக்குள் தேசிய ஒருங்கிணைப்பைப் ஏற்படுத்த முயற்சிக்கிறது என்று அதிகாரிகள் தெரிவித்தனர்.

புதிய ஒதுக்கீட்டு முறை நிர்வாகத்தை மேலும் சீராக மாற்றுவதற்கும், இளம் அதிகாரிகளுக்கு மாநிலங்களுக்கு இடையேயான அனுபவத்தை அதிகமாக வழங்குவதற்கும் நோக்கமாகக் கொண்டுள்ளது என்றும், இது அகில இந்திய கொள்கைகளுக்கு ஏற்ப இருப்பதாகவும் என்றும் பணியாளர் மற்றும் பயிற்சித் துறை வட்டாரங்கள் தெரிவிக்கின்றன.

திருத்தப்பட்ட வழிகாட்டுதல்களின்கீழ், இந்திய ஆட்சிப் பணிக்கு (IAS) பணியாளர் மற்றும் பயிற்சித் துறை (DoPT), இந்திய காவல் பணிக்கு (IPS) உள்துறை அமைச்சகம் (MHA) மற்றும் இந்திய வனப் பணிக்கு (IFoS) சுற்றுச்சூழல், வனம் மற்றும் காலநிலை மாற்ற அமைச்சகம் (MoEF&CC) ஆகிய பணியாளர் கட்டுப்பாட்டு அதிகார அமைப்புகள், ஒவ்வொரு சேவையிலும் உள்ள காலிப் பணியிடங்களின் எண்ணிக்கையை ஆண்டுதோறும் நிர்ணயிக்கும். இந்தக் காலிப் பணியிடங்கள் பொதுப் பிரிவு (UR), பட்டியல் சாதிகள் (SC), பட்டியல் பழங்குடியினர் (ST) மற்றும்  இதர பிற்படுத்தப்பட்ட வகுப்புகள் (OBC) போன்ற பல்வேறு பிரிவுகளுக்குப் பகிர்ந்தளிக்கப்படும்.

பணியாளர் மற்றும் பயிற்சித் துறையால் (DoPT) வெளியிடப்பட்ட இந்த புதிய கட்டமைப்பு, காலிப் பணியிடங்கள் குறித்த முடிவுகளையும், பணிப்பிரிவு ஒதுக்கீடுகளையும் மேலும் வெளிப்படையானதாகவும் சீரானதாகவும் மாற்றுவதை நோக்கமாகக் கொண்டுள்ளன.

புதிய கொள்கையின்படி, வகை வாரியான இடஒதுக்கீடு மற்றும் உள்/வெளி ஒதுக்கீட்டுப் பங்கீட்டிற்கான காலியிடங்களைத் தீர்மானிப்பதற்கான பதிவேடுகளைப் பராமரிக்கும் கொள்கைகள், ஏற்கனவே உருவாக்கப்பட்ட நடைமுறையின்படியே இருக்கும்.

குடிமைப் பணித் தேர்வு முடிந்த பிறகு, ஜனவரி 1-ஆம் தேதி நிலவரப்படி எத்தனை பணியிடங்கள் காலியாக உள்ளன என்பதைப் பொறுத்து காலிப் பணியிடங்கள் தீர்மானிக்கப்படும். மாநிலங்கள் தங்களின் காலிப் பணியிட விவரங்களை அந்த ஆண்டின் ஜனவரி 31-ஆம் தேதிக்குள் அனுப்ப வேண்டும். பொருளாதாரரீதியாகப் பின்தங்கிய பிரிவினருக்காக (Economically Weaker Sections (EWS)) ஒதுக்கப்பட்டுள்ள காலியிடங்கள், பொதுப் பிரிவின் ஒரு பகுதியாகக் கருதப்பட்டு, அதற்கேற்பப் பணிப் பட்டியல் பதிவேட்டில் பிரதிபலிக்கப்படும் என்றும் புதிய விதிமுறைகள் தெளிவுபடுத்துகின்றன என்று ஒரு அதிகாரி கூறினார்.

சொந்தமாநிலத்தைச் சேர்ந்த விண்ணப்பதாரர்களுக்கு – அதாவது, , தங்கள் சொந்த மாநிலத்தில் பணிபுரிய விரும்பும் விண்ணப்பதாரர்கள்—திறமையின் அடிப்படையிலும் காலியிடங்களின் எண்ணிக்கையின் அடிப்படையிலும் மட்டுமே தேர்ந்தெடுக்கப்படுவார்கள் என்று இந்தக் கொள்கை மீண்டும் வலியுறுத்துகிறது. ஒரு விண்ணப்பதாரர் தனது சொந்த மாநிலத்தில் பணியாற்றத் தயாராக இருப்பது இப்போது ஒரு கட்டாய நிபந்தனையாகும் என்று அதிகாரி கூறினார்.

புதிய கொள்கையின் கீழ், 25 மாநிலங்கள் மற்றும் கூட்டுப் பணிப்பிரிவுகளுக்கு ஏற்ப, சுழற்சி முறை அமைப்பு மூலம் இனி பணிப்பிரிவு ஒதுக்கீடு நடைபெறும் என்றும், ஒவ்வொரு சுழற்சியும் தகுதி வரிசையில் உள்ள 25 விண்ணப்பதாரர்களை கொண்டிருக்கும் என்றும் அதிகாரி ஒருவர் தெரிவித்தார். "ஒரே சுழற்சிக்குள் பல விண்ணப்பதாரர்கள் இடம்பெற்றிருந்தால், அதிக தரவரிசை பெற்றவருக்கு ஒதுக்கீட்டில் முன்னுரிமை வழங்கப்படும், மற்றவர்கள் அடுத்தடுத்த சுழற்சிகளுக்குச் செல்வார்கள் என்றும் அந்த அதிகாரி கூறினார்.

சொந்தமாநிலத்தைச் சேர்ந்த பணியாளர்கள் நியமிக்கப்பட்டபிறகு, வெளி மாநிலத்தைச் சேர்ந்த விண்ணப்பதாரர்களுக்கான ஒதுக்கீடு இரண்டு கட்டங்களாக நடத்தப்படும். முதலில் வரையறுக்கப்பட்ட மாற்றுத்திறனாளிகளுக்கும் (Persons with Benchmark Disabilities (PwBD)), பின்னர் மற்றவர்களுக்கும், இட ஒதுக்கீட்டு முறைப்படி செய்யப்படும் என்று அதிகாரி தெரிவித்தார். “இந்த நடவடிக்கை, தேர்வர்கள் மற்றும் மாநில அரசுகள் மத்தியில் நீண்ட காலமாக ஒரு முக்கியமான விவகாரமாக இருந்துவரும் பணி ஒதுக்கீட்டுச் செயல்முறைக்கு அதிக வெளிப்படைத்தன்மையை கொண்டுவரும் என்று எதிர்பார்க்கப்படுகிறது. திருத்தப்பட்ட இந்த அமைப்பு, அகில இந்திய சேவைகளில் நேர்மை மற்றும் நிர்வாகத் திறனை மேம்படுத்துவதற்கான அரசாங்கத்தின் பரந்த இலக்குகளுடன் ஒத்துப்போகிறது என்று அந்த அதிகாரி கூறினார்.

உங்களுக்குத் தெரியுமா?

 1950-ஆம் ஆண்டு ஜனவரி 26 அன்று இந்தியாவில் அரசியலமைப்புச் சட்டம் நடைமுறைக்கு வந்தபோது, ​​புதிதாக உருவான ஜனநாயக நாட்டின் அடித்தளத்தை அமைத்த சில அமைப்புகளும் தொடங்கப்பட்டன. அத்தகைய அமைப்புகளில் ஒன்று, புது டெல்லியில் உள்ள ஷாஜகான் சாலையில் உள்ள தோல்பூர் மாளிகையில் அமைந்துள்ள ஒன்றிய அரசுப் பணியாளர் தேர்வாணையம் (Union Public Service Commission (UPSC)) ஆகும்.

ஒன்றிய அரசுப் பணியாளர் தேர்வாணையம் ஒரு தலைவர் மற்றும் உறுப்பினர்களைக் கொண்ட ஒரு குழுவால் நிர்வகிக்கப்படுகிறது. இவர்கள் அனைவரும் குடியரசுத் தலைவரால் நியமிக்கப்படுகிறார்கள். உறுப்பினர்களில் குறைந்தபட்சம் பாதி பேர் அரசுப் பணியில் குறைந்தபட்சம் 10 ஆண்டுகள் அனுபவம் பெற்றிருக்க வேண்டும் என்று அரசியலமைப்புச் சட்டத்தில் குறிப்பிடப்பட்டுள்ளது. தலைவர் மற்றும் உறுப்பினர்கள் 6 ஆண்டுகள் பதவியில் இருப்பார்கள் அல்லது அவர்களுக்கு 65 வயது ஆகும் வரை பதவியில் நீடிப்பார்கள். இவற்றில் எது முதலில் வருகிறதோ அதுவே பொருந்தும்.

தேர்வாணையத்தின் பணிக்கு அதன் செயலகம் ஆதரவளிக்கிறது. இதில் தேர்வுகள் மற்றும் நேரடி ஆட்சேர்ப்புக்காக பிரத்யேகப் பிரிவுகள் உள்ளன. இந்த ஆண்டின் தொடக்கத்தில், புகழ்பெற்ற ஓய்வுபெற்ற இந்திய ஆட்சிப் பணி (IAS) அதிகாரியும் முன்னாள் பாதுகாப்புச் செயலாளருமான டாக்டர் அஜய் குமார் புதிய தலைவராக நியமிக்கப்பட்டார்.

ஒன்றிய அரசுப் பணியாளர் தேர்வாணையத்தின் அரசியலமைப்புச் சட்டப்பூர்வப் பணிகள், அரசியலமைப்பின் 315 முதல் 323 வரையிலான பிரிவுகளில்  குறிப்பிடப்பட்டுள்ளன. இதில் பிரிவு 320 அதன் முக்கியப் பணிகளை விரிவாகக் கூறுகிறது. மூன்று அகில இந்திய சேவைகள் இந்திய ஆட்சிப் பணி, இந்தியக் காவல் பணி, இந்திய வெளியுறவுப் பணி, மத்திய சேவைகள் மற்றும் பல்வேறு முக்கிய அரசுப் பதவிகளுக்கான நியமனங்களுக்குத் தேர்வுகளை நடத்தும் இந்தியாவின் முதன்மை அமைப்பு ஒன்றிய அரசுப் பணியாளர் தேர்வாணையம் ஆகும். இது பல்வேறு சேவைகள் மற்றும் பதவிகளில் ஆட்களை நியமிப்பதற்கான விதிகளையும் புதுப்பிக்கிறது.

 Original Article : What is the cadre allocation policy for All India Services? -Roshni Yadav

Read More →

இந்தியா மற்றும் ஐரோப்பிய ஒன்றியத்திற்கு (EU) இடையிலான ஒத்துழைப்புக்கான துறைகள் யாவை? -ரோஷ்னி யாதவ்

முக்கிய அம்சங்கள்:

— வான் டெர் லேயன் (von der Leyen) சனிக்கிழமை அன்றும், கோஸ்டா (Costa) ஞாயிற்றுக்கிழமை அன்றும் புது டெல்லி வந்தடைந்தனர். இந்தியாவுக்கான இந்த உயர்மட்டப் பயணத்தின் தொடக்கமாக, இருவருக்கும் சிறப்பான வரவேற்பும் அணிவகுப்பு மரியாதையும் அளிக்கப்பட்டது. பிரதமர் மோடியுடன் இணைந்து, ஐரோப்பிய ஒன்றியத் தலைவர்கள் செவ்வாயன்று நடைபெறவுள்ள 16-வது இந்தியா-ஐரோப்பிய ஒன்றிய உச்சிமாநாட்டிற்குத் தலைமை தாங்குவார்கள் என்றும் கூறப்பட்டுள்ளது.

— பாதுகாப்புத் துறை அமைச்சர் ராஜ்நாத் சிங் மற்றும் ஐரோப்பிய ஒன்றியத்தின் வெளியுறவு மற்றும் பாதுகாப்புக் கொள்கைக்கான உயர்பிரதிநிதியும் ஐரோப்பிய ஆணையத்தின் துணைத் தலைவருமான காஜா கல்லாஸ் ஆகியோர் பாதுகாப்பு மற்றும் பாதுகாப்புக் கூட்டமைப்பு ஒப்பந்தத்தில் கையெழுத்திடுவார்கள் என்று தெரிவிக்கப்பட்டுள்ளது.

— "இந்தக் கூட்டமைப்பானது கடல்சார் பாதுகாப்பு, இணையப் பிரச்சினைகள், கலப்பின அச்சுறுத்தல்கள், முக்கியமான உள்கட்டமைப்புகளின் மீள்தன்மை மற்றும் பாதுகாப்பு, பயங்கரவாத எதிர்ப்பு மற்றும் ஒழுங்கமைக்கப்பட்ட குற்றங்களைத் தடுத்தல் ஆகிய துறைகளில் ஒத்துழைப்பை உள்ளடக்கியதாகக் கூறப்படுகிறது. மேலும், ஐநா சபை போன்ற பன்னாட்டு அமைப்புகளில் இணைந்து செயல்படுதல், அமைதி காப்பு, ஆயுதக் குறைப்பு மற்றும் பரவல் தடுப்பு, அத்துடன் விண்வெளி பாதுகாப்பு மற்றும் தற்காப்பு ஆகியவற்றிலும் இந்த ஒத்துழைப்பு தொடரும் என்று எதிர்பார்க்கப்படுகிறது. 

— இந்த ஒப்பந்தம் கூட்டு முயற்சிகளையும் பாதுகாப்பு ஒத்துழைப்பையும் மேம்படுத்துவதை நோக்கமாகக் கொண்டுள்ளது.  மேலும், ஐரோப்பிய ஒன்றியத்தின் (EU) பாதுகாப்புத் திட்டங்களில் இந்தியாவும் இணைவதற்கான வாய்ப்புகளும் உள்ளன. பாதுகாப்பு மற்றும் உள்துறைச் செயலாளர்கள் போன்ற உயர்அதிகாரிகள் தலைமையில், ஆண்டுதோறும் நடைபெறும் உத்திசார் பேச்சுவார்த்தைகள் மற்றும் செயல்பாட்டு வழிமுறைகளையும் இந்த ஒப்பந்தம் உள்ளடக்கியிருக்கும் என்றும் கூறப்படுகிறது.

— ஜப்பான் மற்றும் தென்கொரியாவைத் தொடர்ந்து, ஐரோப்பிய ஒன்றியத்துடன் (EU) பாதுகாப்பு மற்றும் தற்காப்பு ஒப்பந்தத்தில் கையெழுத்திடும் மூன்றாவது ஆசிய நாடாக இந்தியா உருவெடுக்க உள்ளது. அமெரிக்காவின் தேசிய பாதுகாப்பு உத்திகள் சீனா மீதான தங்கள் கடுமையான போக்கைத் தளர்த்தி, மேற்கத்திய நாடுகளின் பக்கம் கவனத்தைத் திருப்பியுள்ள இந்தச் சூழலில், இந்தியாவின் இந்த நடவடிக்கை முக்கியத்துவம் பெறுகிறது.

— இந்தியா மற்றும் ஐரோப்பிய ஒன்றியம் (EU) ரகசிய தகவல்களை இன்னும் விரிவாகப் பகிர்ந்து கொள்வதற்கான 'தகவல் பாதுகாப்பு ஒப்பந்தம்' குறித்த பேச்சுவார்த்தைகளைத் தொடங்கவுள்ளன. இது இரு தரப்பிற்கும் இடையே வளர்ந்துவரும் பரஸ்பர நம்பிக்கையைப் பிரதிபலிக்கிறது என்று வட்டாரங்கள் தெரிவிக்கின்றன.

— இந்தியா மற்றும் ஐரோப்பிய ஒன்றியம் (EU) ஆகியவை இந்தியப் பெருங்கடல் (ஜூன் 2025), கினியா வளைகுடா (அக்டோபர் 2023) மற்றும் ஏடன் வளைகுடா (ஜூன் 2021) ஆகிய பகுதிகளில் கூட்டுக் கடற்படைப் பயிற்சிகளை மேற்கொண்டுள்ளன. மேலும், 2018 மற்றும் 2019-ஆம் ஆண்டுகளில் சோமாலியா கடற்கரைக்கு அருகில் மனிதநேய பாதுகாப்புப் பணிகளிலும் (Humanitarian escort missions) அவை இணைந்து பணியாற்றின.

— இந்தியா மற்றும் ஐரோப்பிய ஒன்றியத்திற்கு (EU) இடையிலான உறவு 1962-ஆம் ஆண்டில் தொடங்கியது. ஐரோப்பிய ஒன்றியத்தின் முன்னோடியான 'ஐரோப்பிய பொருளாதார கூட்டமைப்புடன்' (European Economic Community (EEC)) தூதரக உறவுகளை ஏற்படுத்திக் கொண்ட முதல் நாடுகளில் இந்தியாவும் ஒன்று. இன்று அமெரிக்கா ஒரு கடினமான நிலைப்பாட்டை எடுத்துவரும் சூழலில், ஐரோப்பிய ஒன்றியம் இந்தியாவின் ஒரு நம்பிக்கைக்குரிய நண்பனாகவும் மற்றும் கூட்டாளியாகவும் தன்னை நிலைநிறுத்திக் கொள்கிறது.

— ஐரோப்பிய ஒன்றிய (EU) தலைவர்கள் இந்தியக் குடியரசு தின விழாவில் முதன்மை விருந்தினர்களாகக் கலந்துகொள்வது இதுவே முதல் முறையாகும். இதைத் தொடர்ந்து நடைபெறும் உச்சிமாநாட்டில் வர்த்தகம், பாதுகாப்பு, மற்றும் இடப்பெயர்வு ஆகிய மூன்று முக்கியத் துறைகளில் ஒப்பந்தங்கள் கையெழுத்தாகும் என எதிர்பார்க்கப்படுகின்றன.

— உலகின் மிகப்பெரிய ஜனநாயக நாடு மற்றும் மிக வேகமாக வளர்ந்துவரும் முக்கியப் பொருளாதாரம் என்ற ரீதியில், ஐரோப்பிய ஒன்றியத்திற்கு (EU) இந்தியா மிகவும் முக்கியமானது. நூறு கோடிக்கும் அதிகமான உழைக்கும் வயதுடைய மக்கள் மற்றும் 31 என்ற சராசரி வயதைக் கொண்டுள்ள இந்தியா, 2030-ஆம் ஆண்டிற்குள் உலகின் மூன்றாவது பெரிய பொருளாதாரமாக மாறும் என்று கணிக்கப்பட்டுள்ளது. மேலும், இந்தியா மிக வேகமாக வளர்ந்துவரும் உற்பத்தி மற்றும் தொழில்நுட்ப மையமாகவும் திகழ்கிறது. உலகளாவிய திறன் மையங்களில் (Global Capability Centres) 45% இந்தியாவிலேயே உள்ளன; மேலும் இந்தியா மேம்பட்ட தொழில்நுட்பங்களில் பெருமளவில் முதலீடு செய்து வருகிறது.

— இந்தியாவிற்கு, மேற்கத்திய நாடுகளில் ஐரோப்பிய ஒன்றியம் (EU) ஒரு நம்பிக்கைக்குரிய கூட்டமைப்பு நாடாக இருக்க முடியும். உக்ரைன் முதல் கிரீன்லாந்து வரை பல முக்கியப் பிரச்சனைகளில், அமெரிக்க அதிபர் டொனால்ட் ட்ரம்ப் பெரிய அளவிலான சிக்கல்களை ஏற்படுத்தாதவாறு அவரைத் திசைதிருப்பும் திறமையை ஐரோப்பியத் தலைவர்கள் நிரூபித்துள்ளனர். இந்தியத் தொழில்முறை வல்லுநர்கள் மற்றும் மாணவர்களுக்கான வாய்ப்புகளை அமெரிக்கா கட்டுப்படுத்தும் அதே வேளையில் சில வாய்ப்புகளையும் அளிக்கின்றன. இதனால், சாதிக்கத் துடிக்கும் இந்தியர்களுக்கு ஐரோப்பா ஒரு சிறந்த மாற்று இடமாக உருவெடுத்து வருகிறது.

— வர்த்தகம் மற்றும் முதலீடு: இந்தியாவிற்கும் ஐரோப்பிய ஒன்றியத்திற்கும் இடையிலான 'தடையற்ற வர்த்தக ஒப்பந்தம்' கையெழுத்தாவது, இந்தப் பயணத்தின் மிக முக்கியமான முடிவாக இருக்கும் என எதிர்பார்க்கப்படுகிறது. இது இரு நாடுகளின் பொருளாதாரத்திற்கும் பெரும் வளர்ச்சி வாய்ப்புகளை உருவாக்குவதுடன், இளைஞர்களுக்குப் பல நன்மைகளையும் வழங்கும்.

— பாதுகாப்பு மற்றும் தற்காப்பு: இந்தப் பயணத்தின்போது, இந்தியாவும் ஐரோப்பிய ஒன்றியமும் (EU) ஒரு பாதுகாப்பு மற்றும் தற்காப்புக் கூட்டாண்மை ஒப்பந்தத்தில் கையெழுத்திடும் என்று எதிர்பார்க்கப்படுகிறது. இது இருதரப்பு உறவின் அரசியல் அடித்தளத்தை வலுப்படுத்தும் என்று எதிர்பார்க்கப்படுகிறது. 

— இடம்பெயர்வு மற்றும் இடமாற்றம்: இந்தியா மற்றும் ஐரோப்பிய ஒன்றியம் (EU) இடையே 'இடமாற்ற கூட்டாண்மை ஒப்பந்தம்' கையெழுத்தாகும் என எதிர்பார்க்கப்படுகிறது. இது இந்தியத் திறன்மிக்க பணியாளர்கள் ஐரோப்பிய ஒன்றியத்தில் பணியாற்றுவதற்கும், அங்கிருக்கும் வாய்ப்புகளைப் பயன்படுத்துவதற்கும் புதிய வழிவகைகளை உருவாக்கும் என்கின்றனர். 

—  ஐரோப்பிய ஒன்றியத்தில் வசிக்கும் இந்தியர்கள்: ஐரோப்பிய ஒன்றியத்தில் சுமார் 13.6 லட்சம் இந்திய வம்சாவளியினர் வாழ்கின்றனர். இதில் 8,84,718 பேர் வெளிநாடு வாழ் இந்தியர்கள் (NRI) மற்றும் 4,78,206 பேர் இந்திய வம்சாவளியைச் சேர்ந்தவர்கள் (PIO) ஆவர். ஐரோப்பாவின் முக்கிய நிலப்பகுதிகளில் அதிகப்படியான இந்திய சமூகத்தினர் வசிக்கும் நாடுகள்: ஜெர்மனி (2,60,864 பேர்), நெதர்லாந்து (2,28,787 பேர்) இத்தாலி (2,06,503 பேர்) ஆகும்

— இந்தியா மற்றும் ஐரோப்பிய ஒன்றியத்திற்கு இடையிலான உறவுகளில் சில சிக்கல்கள் உள்ளன: 

ரஷ்யா-உக்ரைன் போர்: இந்த விவகாரத்தில் இரு நாடுகளுக்கும் இடையே கருத்து வேறுபாடுகள் ஒரு முக்கியப் பிரச்சனையாக உள்ளது. 

மனித உரிமைகள்: இந்தியாவின் மனித உரிமைகள் குறித்த செயல்பாடுகள் கடினமான விவாதங்களுக்கு வழிவகுத்துள்ளன. இருப்பினும், சமீப காலங்களில் இவை பெரும்பாலும் ரகசியமாகவே விவாதிக்கப்படுகின்றன. 

சீனா மற்றும் பாகிஸ்தான் மீதான எதிர்பார்ப்பு: சீனா மற்றும் பாகிஸ்தான் விவகாரங்களில் ஐரோப்பா இன்னும் உறுதியான நிலைப்பாட்டை எடுக்க வேண்டும் என்று இந்தியா எதிர்பார்க்கிறது. பொருளாதாரச் சார்பு: அதே நேரத்தில், ஐரோப்பா தனது பொருளாதாரத் தேவைகளுக்காக சீனாவைச் சார்ந்து இருப்பது முக்கிய சிக்கலாகப் பார்க்கப்படுகிறது.

—வேளாண்மை மற்றும் வர்த்தக ஒப்பந்தங்கள்:  இந்தியாவிற்கும் அமெரிக்காவிற்கும் இடையே இன்னும் முடிவடையாமல் இருக்கும் ‘தடையற்ற வர்த்தக ஒப்பந்தத்தில்’ (Free Trade Agreement (FTA)), வேளாண்மைத் துறை ஒரு முக்கியத் தடையாக இருந்து வருகிறது. அரசியல்ரீதியாக மிகவும் முக்கியமான இந்தத் துறையை, இந்தியாவிற்கும் ஐரோப்பிய ஒன்றியத்திற்கும் (EU) இடையே திட்டமிடப்பட்டுள்ள விரிவான வர்த்தக ஒப்பந்தத்திலிருந்தும் தவிர்ப்பதற்கே அதிக வாய்ப்புகள் உள்ளன.

—வேளாண்மையை விலக்கி வைப்பதற்கான காரணங்கள்: இறக்குமதி வரி குறைப்பு மற்றும் வர்த்தகத் தடைகளை நீக்கும் தடையற்ற வர்த்தக ஒப்பந்தங்களில் (FTA) இருந்து விவசாயத்தைத் தள்ளி வைக்க இந்தியா விரும்புவதற்கு வாழ்வாதாரத்தைப் பாதுகாத்தல் மற்றும் விவசாய மானியங்கள் என இரண்டு முக்கிய காரணங்கள் உள்ளன.

— சர்வதேச பொருளாதார உறவுகளுக்கான இந்திய ஆராய்ச்சி கவுன்சிலின் (Indian Council for Research on International Economic Relations (ICRIER)) கௌரவப் பேராசிரியர் அசோக் குலாட்டி, ஐரோப்பிய ஒன்றியத்திலிருந்து (EU) இறக்குமதி செய்யப்படும் விவசாயப் பொருட்களால் ஏற்படும் அச்சுறுத்தல், அமெரிக்காவிலிருந்து வரும் அச்சுறுத்தலைவிடக் குறைவு என்று கருதுகிறார்.

— அமெரிக்காவுடனான ஒரு தடையற்ற வர்த்தக ஒப்பந்தம் (FTA), இந்தியாவிற்குள் அமெரிக்காவின் சோளம், சோயாபீன், எத்தனால் மற்றும் பருத்தி ஆகியவை பெருமளவில் இறக்குமதி செய்யப்படுவதற்கு வழிவகுக்கும். அதற்கு நேர்மாறாக, ஐரோப்பிய ஒன்றியம் (EU) பெரும்பாலும் விவசாயப் பொருட்களில் விலை போட்டியை எதிர்கொள்ளும் நிலையில் இல்லை என்றும் தெரிவிக்கின்றனர். 

— ஐரோப்பிய ஒன்றியத்துடன் (EU) வேளாண்மையையும் உள்ளடக்கிய ஒரு தடையற்ற வர்த்தக ஒப்பந்தம் (FTA) ஏற்பட்டால், அது இந்தியாவுக்குப் பெரிய நன்மையை அளிக்கும். குறிப்பாக கடல் உணவுகள், பழங்கள், காய்கறிகள், பானங்கள், வாசனை திரவியங்கள் மற்றும் அரிசி போன்ற இந்தியா அதிகம் ஏற்றுமதி செய்யும் துறைகளில் இது நல்ல வாய்ப்புகளை உருவாக்கும் என்றும் எதிர்பார்க்கப்படுகிறது. 

— சுருக்கமாகச் சொன்னால், அமெரிக்காவுடன் ஒப்பந்தம் செய்துகொள்வதைவிட, ஐரோப்பிய ஒன்றியத்துடன்  ஒப்பந்தம் செய்துகொள்வதால் இந்திய வேளாண் தொழிலாளர்களுக்கு ஏற்படும் சிக்கல்கள் குறைவுதான் என்றும் தெரிவிக்கின்றனர். 'தேவைப்பட்டால், அந்த நாட்டு வேளாண் தொழிலாளர்கள் பெறும் மானியங்களுக்கு ஈடாக, நாம் 15% கூடுதல் வரியை (Countervailing Duty) விதிக்க முடியும் என்றும் இது இறக்குமதியாகும் பொருட்களுக்கு எதிராகப் போதிய பாதுகாப்பை வழங்கும், என்றும் குலாத்தி தெரிவித்துள்ளார். 

உங்களுக்குத் தெரியுமா?

— அமெரிக்காவில் டிரம்ப் நிர்வாகத்தின் புதிய பாதுகாப்பு உத்திகளால், இந்தோ-பசிபிக் பகுதிகளில் அந்நாட்டின் ஈடுபாடு குறைந்து வருவதாகத் தெரிகிறது. இத்தகைய சூழலில், இந்தியாவும் ஐரோப்பிய ஒன்றியமும் தங்களது பாதுகாப்பு மற்றும் பாதுகாப்புத்துறை சார்ந்த ஒத்துழைப்பை பலப்படுத்தி வருகின்றன. இந்த நடவடிக்கையும், தடையற்ற வர்த்தக ஒப்பந்தமும் (FTA) ஐரோப்பிய ஒன்றியப் பயணத்தின் முக்கிய முடிவுகளாக இருக்கும் என்றும், இரு நாடுகளுக்கு இடையிலான உறவை அடுத்த கட்டத்திற்கு கொண்டு செல்லும் என்றும் எதிர்பார்க்கப்படுகிறது.

— சரக்கு வர்த்தகத்தில் இந்தியாவின் மிகப்பெரிய வர்த்தகக் கூட்டமைப்பு நாடாக ஐரோப்பிய ஒன்றியம் (EU) உள்ளது. 2024–25-ஆம் நிதியாண்டில், இந்தியா மற்றும் ஐரோப்பிய ஒன்றியத்திற்கு இடையிலான மொத்த சரக்கு வர்த்தகம் சுமார் 136 பில்லியன் அமெரிக்க டாலர்களாக இருந்தது. இதில் இந்தியாவின் ஏற்றுமதி சுமார் 76 பில்லியன் டாலராகவும், இறக்குமதி சுமார் 60 பில்லியன் டாலராகவும் உள்ளதாகக் கூறப்படுகிறது.

— ஐரோப்பிய ஒன்றியம் என்பது 27 ஐரோப்பிய நாடுகளைக் கொண்ட ஒரு அமைப்பாகும். மக்களின் வாழ்க்கை நிலையை மேம்படுத்தவும், பொதுவான நன்மை மற்றும் பாதுகாப்பிற்காக இந்த நாடுகள் ஒன்றிணைந்து செயல்படவும் இந்த அமைப்பானது உருவாக்கப்பட்டது.

— ஐரோப்பிய ஒன்றியத்தின் முன்னோடியான 'ஐரோப்பிய பொருளாதாரக் கூட்டமைப்புடன்' (European Economic Community (EEC)), இந்தியா 1962-ஆம் ஆண்டு தூதரக உறவுகளை ஏற்படுத்திக் கொண்டது. 1993-ஆம் ஆண்டில் கையெழுத்தான கூட்டு அரசியல் அறிக்கை மற்றும் 1994-ஆம் ஆண்டில் மேற்கொள்ளப்பட்ட ஒத்துழைப்பு ஒப்பந்தம் ஆகியவை இந்தியா மற்றும் ஐரோப்பா இடையிலான உறவுகளை வலுப்படுத்த உதவியதாகக் கூறப்படுகிறது. 

 Original Article : What are the areas of cooperation between India and the EU? -Roshni Yadav

Read More →