நீதித்துறையில் பன்முகத்தன்மையின் அவசியம். -ரங்கராஜன் ஆர்.

 திமுக நாடாளுமன்ற உறுப்பினர் பி. வில்சன் கொண்டு வந்த தனிநபர் மசோதா எதைப் பற்றியது? நீதிபதிகள் நியமனக் குழு (Collegium) முறை ஏன் அறிமுகப்படுத்தப்பட்டது? தேசிய நீதிபதிகள் நியமன ஆணையத்தை (National Judicial Appointments Commission (NJAC)) உச்சநீதிமன்றம் ஏன் ரத்து செய்தது? உச்சநீதிமன்றத்தின் பிராந்திய கிளைகள் (Regional Benches), நீதி கிடைப்பதற்கான அணுகலை எவ்வாறு எளிதாக்கும்?

திமுகவைச் சேர்ந்த மூத்த வழக்கறிஞரும், மாநிலங்களவை உறுப்பினருமான (MP) பி. வில்சன், நீதிபதிகள் நியமனத்தில் பன்முகத்தன்மையை அதிகரிக்கவும், உச்சநீதிமன்றத்தின் பிராந்திய கிளைகளை உருவாக்கவும் அரசியலமைப்பைத் திருத்துவதற்காக ஒரு தனிநபர் மசோதாவை அறிமுகப்படுத்தியுள்ளார்.

அரசியலமைப்புச் சட்டம் எதை வழங்குகிறது?

அரசியலமைப்புச் சட்டப்பிரிவு 124-ன்படி, இந்தியத் தலைமை நீதிபதியுடன்  கலந்தாலோசித்த பிறகு, குடியரசுத் தலைவரால் உச்சநீதிமன்ற நீதிபதிகள் நியமிக்கப்படுகிறார்கள். அதேபோல், சட்டப்பிரிவு 217-ன்கீழ், இந்தியத் தலைமை நீதிபதி, அந்தந்த உயர்நீதிமன்றத்தின் தலைமை நீதிபதி மற்றும் மாநில ஆளுநர் ஆகியோருடன் கலந்தாலோசித்த பின்னரே குடியரசுத் தலைவரால் உயர்நீதிமன்ற நீதிபதிகள் நியமிக்கப்படுகிறார்கள். சட்டப்பிரிவு 130-ன்படி, உச்சநீதிமன்றம் டெல்லியில் அல்லது ஒன்றிய அரசின் ஒப்புதலுடன் இந்தியத் தலைமை நீதிபதி தீர்மானிக்கும் வேறு எந்த இடத்திலும் செயல்படும் என்று கூறப்பட்டுள்ளது. 

நீதிபதிகள் நியமனக் குழு அமைப்பு என்றால் என்ன?

1980-ஆம் ஆண்டு வரை, அரசியலமைப்பில் குறிப்பிட்டுள்ளபடி, நீதித்துறையுடன் கலந்தாலோசித்து அரசாங்கமே நீதிபதிகளை நியமித்தது. ஆனால், 1981-ஆம் ஆண்டின் முதலாவது நீதிபதிகள் வழக்கில், அரசாங்கம் மக்களுக்குப் பதிலளிக்கக் கடமைப்பட்டிருப்பதால், நியமனங்களில் அதன் முடிவே முக்கியமானது என்று உச்சநீதிமன்றம் கூறியது. பின்னர், அரசின் தலையீட்டிலிருந்து நீதித்துறையின் சுதந்திரத்தைப் பாதுகாக்க, 1993-ஆம் ஆண்டின் இரண்டாவது நீதிபதிகள் வழக்கில் "நீதிபதிகள் நியமனக் குழு" (Collegium) முறை உருவாக்கப்பட்டு, 1998-ஆம் ஆண்டின் மூன்றாவது நீதிபதிகள் வழக்கில் அது உறுதிப்படுத்தப்பட்டது. இந்த முறையில், உச்சநீதிமன்ற நீதிபதிகள் நியமனத்திற்கு இந்தியத் தலைமை நீதிபதி மற்றும் நான்கு மூத்த நீதிபதிகளும், உயர்நீதிமன்ற நீதிபதிகள் நியமனத்திற்குத் தலைமை நீதிபதி மற்றும் இரண்டு மூத்த நீதிபதிகளும் கொண்ட குழு பரிந்துரைகளை வழங்கும் என்று கூறப்படுகிறது. இந்தப் பரிந்துரைகளை ஒன்றிய அரசுக்கு அனுப்பும்போது, அரசு ஏதேனும் ஆட்சேபனை தெரிவித்து திருப்பி அனுப்பலாம் என்றும் நீதிபதிகள் நியமனக் குழு மீண்டும் அதே பெயர்களைப் பரிந்துரைத்தால், அவர்களை அரசு கட்டாயமாக நியமிக்க வேண்டும் என்றும் தெரிவிக்கப்பட்டுள்ளது. 

நீதிபதிகள் நியமனத்தில் அரசின் தலையீடு இல்லாமல் நீதித்துறையின் தன்னிச்சையான அதிகாரத்தைப் பாதுகாக்க நீதிபதிகள் நியமனக் குழு (Collegium) முறை உதவுகிறது. இருப்பினும், இதில் வெளிப்படைத்தன்மை மற்றும் பொறுப்புக்கூறல் இல்லாமை மற்றும் தகுதியானவர்களைவிட நீதிபதிகளின் உறவினர்களுக்கு முன்னுரிமை அளிக்கப்படுவதாகக் கூறப்படும் 'வாரிசு அரசியல்' போன்ற குறைபாடுகள் உள்ளன. இந்தப் பிரச்சனைகளைக் களைய, உச்சநீதிமன்ற தலைமை நீதிபதி, மூத்த நீதிபதிகள், மத்திய சட்ட அமைச்சர் மற்றும் இரு முக்கியப் பிரமுகர்கள் அடங்கிய தேசிய நீதிபதிகள் நியமன ஆணையத்தை (NJAC) உருவாக்க 2014-ஆம் ஆண்டில் நாடாளுமன்றம் 99-வது அரசியலமைப்புத் திருத்தத்தைக் கொண்டு வந்தது. ஆனால், 2015-ஆம் ஆண்டில் இந்த ஆணையம் நீதித்துறையின் சுதந்திரத்தைப் பாதிப்பதாகக் கூறி உச்சநீதிமன்றம் இதனை ரத்து செய்தது, இதனால் நீதிபதிகள் நியமனத்திற்கு இன்றும் நீதிபதிகள் நியமனக் குழு முறையே நடைமுறையில் தொடர்கிறது.

இந்த மசோதா என்பது என்ன?

நீதிபதிகள் நியமனத்தில் கொலிஜியம் முறை தகுதியை அடிப்படையாகக் கொண்டாலும், அது இந்தியாவின் சமூகப் பன்முகத்தன்மையை வெளிப்படுத்துவதாக இல்லை என்பதைச் சுட்டிக்காட்டுகின்றனர். உதாரணமாக, 2018-ஆம் ஆண்டு முதல் 2024-ஆம் ஆண்டு வரை உயர்நீதிமன்றங்களில் நியமிக்கப்பட்ட நீதிபதிகளில் சுமார் 20 சதவீதம் மட்டுமே பட்டியலினத்தவர் (Scheduled Castes (SC)), பழங்குடியினர் (Scheduled Tribes (ST)) மற்றும் இதர பிற்படுத்தப்பட்ட வகுப்பைச் (Other Backward Classes (OBC)) சேர்ந்தவர்களாக உள்ளனர் அதே சமயம் பெண்கள் மற்றும் சிறுபான்மையினரின் பிரதிநிதித்துவம் முறையே 15 சதவீதம் மற்றும் 5 சதவீதத்துக்கும் குறைவாகவே உள்ளது. இந்தச் சூழலில், உச்சநீதிமன்றம் மற்றும் உயர்நீதிமன்ற நீதிபதிகள் நியமனத்தில் மக்கள் தொகைக்கு ஏற்ப பட்டியலினத்தவர் (Scheduled Castes (SC)), பழங்குடியினர் (Scheduled Tribes (ST)) மற்றும் இதர பிற்படுத்தப்பட்ட வகுப்பினர் (Other Backward Classes (OBC)), சிறுபான்மையினர் மற்றும் பெண்களுக்கு உரிய இடஒதுக்கீடு வழங்கப்பட வேண்டும் என்றும், கொலிஜியம் பரிந்துரைகளை ஒன்றிய அரசு 90 நாட்களுக்குள் அறிவிக்க வேண்டும் என்றும் இந்த தனிநபர் மசோதா முன்மொழிகிறது.

உச்சநீதிமன்றம் டெல்லியில் மட்டுமே அமைந்துள்ளதால், சாதாரண குடிமக்கள் நாட்டின் உயரிய நீதிமன்றத்தை அணுகுவது கடினமாக உள்ளது. மேலும், ஜனவரி மாதம் 2026-ஆம் ஆண்டு நிலவரப்படி 90,000-க்கும் அதிகமான வழக்குகள் அங்கு நிலுவையில் உள்ளன. இந்தச் சிக்கல்களைத் தீர்க்கும் வகையில், புது டெல்லி, கொல்கத்தா, மும்பை மற்றும் சென்னை ஆகிய இடங்களில் உச்சநீதிமன்றத்தின் மண்டல அமர்வுகளை அமைக்க இந்த மசோதா பரிந்துரைக்கிறது. அரசியல்சாசனரீதியான வழக்குகளை மட்டும் டெல்லியில் உள்ள முதன்மை அரசியல் சாசன அமர்வு தொடர்ந்து விசாரிக்கும் என்றும், மற்ற அனைத்து விவகாரங்களிலும் இந்த மண்டல அமர்வுகள் உச்சநீதிமன்றத்தின் முழு அதிகாரங்களுடன் செயல்படும் என்றும் தெரிவிக்கப்பட்டுள்ளது.

அடுத்தகட்ட நடவடிக்கை என்னவாக இருக்கலாம்?

நீதித்துறை நியமனங்களில் சமூகப் பன்முகத்தன்மையை உறுதி செய்யும் பொறுப்பு முக்கியமாக 'நீதிபதிகள் நியமனக் குழு' அமைப்பின் மூலம் நீதித்துறையிடமே உள்ளது. இந்த இலக்கை அடைவதற்கான ஒரு அரசியலமைப்பு வழிகாட்டுதலை உருவாக்குவதால், தனிநபர் மசோதா முக்கியத்துவம் பெறுகிறது. இதற்கு ஒரு நீண்டகால சீர்திருத்தமாக, தென்னாப்பிரிக்கா மற்றும் இங்கிலாந்து நாடுகளில் இருப்பதைப் போல, சட்டமன்றம், பார் கவுன்சில் மற்றும் கல்வியாளர்களை உள்ளடக்கிய விரிவான அமைப்பைக் கொண்ட தேசிய நீதிபதிகள் நியமன ஆணையத்தை (NJAC) மீண்டும் கொண்டு வரலாம் என்றும் எதிர்பார்க்கப்படுகிறது. இது ஆலோசனைகளை விரிவுபடுத்துவதோடு அனைவரையும் உள்ளடக்கியதாகவும் மாற்றும். மேலும், இந்த செயல்முறை பட்டியல் வகுப்பினர் (SC), பழங்குடியினர் (ST), இதர பிற்படுத்தப்பட்ட வகுப்பினர் (OBC), சிறுபான்மையினர் மற்றும் பெண்களுக்கு முறையான பிரதிநிதித்துவத்தை உறுதிசெய்ய வேண்டும் என்றும் வலியுறுத்தப்படுகிறது. 

நாடாளுமன்றக் குழுக்கள் மற்றும் சட்ட ஆணையம் ஏற்கனவே பரிந்துரைத்தபடி, அரசியலமைப்பில் உள்ள தற்போதைய வழிமுறைகளைப் பயன்படுத்தியே உச்சநீதிமன்றத்தின் மண்டல கிளைகளை நிறுவ முடியும் என்றும் கூறப்படுகிறது. இதன் தொடக்கமாக ஏதேனும் ஒரு பிராந்தியத்தில் ஒரு கிளையை அமைத்து, பின்னர் ஒரு குறிப்பிட்ட காலவரையறைக்குள் மற்ற பகுதிகளுக்கும் அதனை விரிவுபடுத்தலாம் என்றும் அறிவுறுத்தப்படுகிறது. 

ரங்கராஜன். ஆர், முன்னாள் இந்திய ஆட்சிப்பணி (IAS) அதிகாரி,  ‘Courseware on Polity Simplified’ என்ற புத்தகத்தின் ஆசிரியர் ஆவார். இவர் தற்போது ‘Officers IAS Academy’ -ல் பயிற்சியாளராகப் பணியாற்றி வருகிறார்.

Original article : The need for diversity in the judiciary -Rangarajan R.