தமிழர்கள் போன்ற பண்டைய கலாச்சாரங்களைச் சேர்ந்த மக்களைக் கட்டுப்படுத்தவோ அல்லது அவர்களின் அடையாளத்தை மாற்றவோ முடியாது. அவர்களின் மொழிக்கு ஏற்பட்டுள்ள அச்சுறுத்தல், ஒன்றிய அரசு தனது அரசியல் நோக்கத்திற்காக எந்தவொரு சாத்தியமான வழியையும் பயன்படுத்தும் அணுகுமுறையுடன் ஒத்துப்போகிறது.
கல்வி என்பது திராவிட அரசியல் தத்துவத்தின் முக்கிய மையப் பகுதியாகும். இதில் சுயமரியாதை, சமூக நீதி மற்றும் சம வாய்ப்புகளை மேம்படுத்துவதில் இது முக்கியப் பங்கு வகிக்கிறது. முன்னதாக, கல்வி ஒரு சிலருக்கு மட்டுமே அணுகக்கூடியதாக இருந்தது. சென்னை மாகாணத்தின் நீதிக் கட்சியின் முதல் அரசாங்கம் 1920-ம் ஆண்டில் ஆண் மற்றும் பெண் இருவருக்கும் தொடக்கக் கல்வியை கட்டாயமாக்க ஒரு சட்டத்தை அறிமுகப்படுத்தியது. இந்த நடவடிக்கை உலகளாவிய கல்விக்கு அடித்தளமிட்டது எனலாம்.
இருமொழிக் கொள்கைக்கான விதிமுறை பல ஆண்டுகாலமாக கட்டாயமாக பின்பற்றப்பட்டு வருகிறது. இதில் நம் தாய்மொழியான தமிழ் மற்றும் உலகளாவிய இணைப்பு மொழியான ஆங்கிலம் ஆகியவை அடங்கும். இந்த விதிமுறை நம் மதிப்புகளை பிரதிபலிக்கிறது. இங்குள்ள அனைத்து அரசியல் கட்சிகளும் இதை வலுவாக ஆதரித்து வருகின்றன. மேலும், இது சிறந்த பலன்களைத் தந்துள்ளது. அதிக எழுத்தறிவு விகிதங்கள் மற்றும் 47% உயர் கல்வி சேர்க்கை விகிதத்துடன் தமிழ்நாடு இந்தியாவில் தனித்து நிற்கிறது. இது தேசிய சராசரியான 28.4%-ஐ விட மிக அதிகம். நம்முடைய கல்வி மற்றும் பொருளாதார முறையின் வெற்றிகள் நன்கு ஆவணப்படுத்தப்பட்டு அளவிடக்கூடியவை ஆகும். இந்த கட்டாய மொழி விதிமுறையானது மாநில கல்வி வாரியத்தால் (State Board of Education) நிர்ணயிக்கப்பட்ட பாடத்திட்டத்திற்கு மட்டுமே பொருந்தும். இது மாநில அரசால் நடத்தப்படும் பள்ளிகளில் பின்பற்றப்படுகிறது. கல்வித் தேர்வுக்கான தமிழகத்தின் அர்ப்பணிப்பு தெளிவாகத் தெரிகிறது. தக்ஷின் பாரத் இந்தி பிரச்சார சபை (Dakshin Bharat Hindi Prachar Sabha) கூட அதன் தலைமையகத்தை சென்னையில் பராமரிக்கிறது.
இந்த சூழ்நிலையில், 2024-2025 நிதியாண்டில், நாடாளுமன்றத்தால் அங்கீகரிக்கப்பட்ட சமக்ர சிக்ஷா அபியான் நிதியில் (Samagra Shiksha Abhiyan funds) தமிழ்நாடு தனது பங்கைப் (சுமார் தோரயமாக ரூ.2,152 கோடி) பெறுவதற்கு ஒன்றிய அரசு புதிய நிபந்தனைகளை விதித்துள்ளது. இந்த நிபந்தனைகள் பின்னாளில் சேர்க்கப்பட்ட, அரசியலமைப்புக்கு அப்பாற்பட்ட நிபந்தனைகளாகப் பார்க்க வேண்டும்.
‘கட்டாய மும்மொழி விதிமுறை (three-language formula) உட்பட, தமிழ்நாடு அதன் சட்டமன்றத்தில் சட்டம் இயற்றுவதன் மூலம் புதிய கல்விக் கொள்கையை (NEP) முழுமையாக செயல்படுத்த வேண்டும். இல்லையெனில், ஏற்கனவே அங்கீகரிக்கப்பட்ட மற்றும் முன்பே ஒதுக்கப்பட்ட நிதியை ஒன்றியம் நிறுத்தி வைக்கும்’ எனும் அச்சுறுத்தலை ஒன்றிய கல்வி அமைச்சர் பகிரங்கமாகக் கூறினார்.
இது பயன் விளைவுகளை எவ்வாறு மேம்படுத்தும் என்பதைக் காட்ட எந்த உதாரணமும் இல்லை. இதன் காரணமாக, அச்சுறுத்தலை அரசியல் ரீதியாக மிரட்டி பணம் பறிப்பதாக நாம் பார்க்கிறோம். இந்த முயற்சி தமிழ்நாட்டின் தேர்ந்தெடுக்கப்பட்ட சட்டமன்றத்தின் மீது ஒன்றிய அரசின் விருப்பத்தை கட்டாயப்படுத்துகிறது. இது அரசியலமைப்பை மீறுவதாகும்.
உண்மையில், ஒரு மூன்றாம் மொழியைச் சேர்ப்பது பணியாளர்கள் மற்றும் தளவாடங்களில் மட்டுமல்ல, மாணவர்களின் கற்றல் திறனை அதிகமாகச் சுமத்துவதன் மூலமும், அத்தகைய பாடத்திட்டத்தை நீர்த்துப்போகச் செய்வதை நியாயப்படுத்த எந்த ஆதார அடிப்படையிலான நன்மைகளும் இல்லை. நாட்டின் பெரும்பகுதிகளில், இரண்டு மொழிகள்கூட போதுமான அளவு முறையாக நடைமுறைப்படுத்தப்படவில்லை. ஏனெனில், அவை இருந்திருந்தால், ஏற்கனவே ஆங்கிலம் இணைப்பு மொழியாக இருந்திருக்கும். மேலும், சுதந்திரம் அடைந்து 75 ஆண்டுகளுக்கும் மேலாக இந்த விவாதம் நடைபெற்றிருக்காது.
மூன்றாம் மொழியின் அறிமுகம் தாய்மொழியின் பயன்பாட்டை பலவீனப்படுத்தும். சில சமயங்களில், அது நடைமுறையில் இருந்து அழிந்துவிடும் என்ற நியாயமான அச்சமும் உள்ளது. இதில், முன்வைக்கப்படும் மூன்றாவது மொழி இந்தி அல்ல என்று கூறுவது யாரையும் நம்ப வைக்காது. ஒவ்வொரு இந்தி தினத்தன்றும் உள்துறை அமைச்சரின் அறிக்கைகளும், பிற பிராந்திய மொழிகளுடன் ஒப்பிடும்போது இந்தியை ஊக்குவிப்பதற்காக பல மடங்கு செலவிடப்படுவதும் உண்மையான நோக்கத்தை தெளிவாகக் காட்டுகின்றன.
தமிழ்நாட்டில் இதேபோன்ற மொழிக்காக ஏற்படும் அச்சுறுத்தல் நம்மை ஆழமாக காயப்படுத்துகிறது. இது தமிழர்கள் என்ற நமது அடையாளத்தின் மீது தாக்குதல் செய்கிறது. தமிழ் நமது தாய்மொழி, அது நமது வளமான கலாச்சாரத்தையும், வரலாற்றையும் பிரதிபலிக்கிறது. உலகின் பழமையான வாழும் மொழியைப் பாதுகாப்பதற்கான நமது விருப்பத்தில் மட்டுமல்ல, மாறிவரும் காலத்திற்கு ஏற்ப அதைப் புத்துணர்ச்சியுடன் வைத்திருப்பதற்கான நமது அவசர காலத்திலும் நம்முடைய அன்பு வெளிப்படுகிறது. நமது மொழியை துடிப்பாகவும் இளமையாகவும் வைத்திருக்க நாம் பல முயற்சிகளை மேற்கொண்டுள்ளோம். 1999-ம் ஆண்டு, நாம் கணித்தமிழ் மாநாடு - (KaniTamil Manaadu) (தமிழ் கணினி மாநாடு) நடத்தினோம். அதன் இரண்டாவது பதிப்பை 2024-ம் ஆண்டில் நடத்தினோம். பண்டைய நூல்களையும் டிஜிட்டல் மயமாக்கி தமிழ் மொழி மாதிரி (Tamil Language Model (LLM)) உருவாக்கியுள்ளோம். இந்த முயற்சிகளில் பலவற்றை தமிழ் இணையக் கல்விக்கழகம் (Tamil Virtual Academy) மேற்கொள்கிறது. இந்த கல்விக்கழகம் நம் தலைவர் கலைஞர் (எம். கருணாநிதி) முதலமைச்சராக இருந்தபோது நிறுவியது. இது இப்போது எனது தற்போதைய தகவல் தொழில்நுட்பம் மற்றும் டிஜிட்டல் சேவைகள் துறையின் ஒரு பகுதியாகும்.
இந்த அச்சுறுத்தல் ஒன்றிய அரசின் அரசியலமைப்புக்கு முரணான அணுகுமுறையுடன் பொருந்துகிறது. மேலும், அதன் அரசியல் நிலைப்பாட்டை முன்னெடுத்துச் செல்கிறது. இது நிதி ஒதுக்கீட்டை அரசியலாக்குவதற்கும், நிதி வழங்கலுக்கான கடைசி நிமிட நிபந்தனைகளைச் சேர்ப்பதற்கும் அப்பாற்பட்டது. இதில் குறிப்பிடவேண்டிய மிகவும் பாதிப்பான உதாரணங்கள்:
“293(B) பிரிவின் முன்னோடியில்லாத வகையில், அவர்களின் சட்டங்களுக்கு அப்பால் மாநிலக் கடன் வாங்குவதைக் கட்டுப்படுத்துவது, பாஜக அல்லாத மாநிலங்கள் மீது கட்டுப்பாடுகளை விதிக்க கடன் வழங்குபவர்கள் மீது சட்டவிரோத அழுத்தம் மற்றும் தேர்ந்தெடுக்கப்பட்ட அரசாங்கங்களுக்கு இடையூறாக பிடிவாதமான ஆளுநர்களை நியமித்தல்” ஆகியவை.
நமது முதலமைச்சர் கூறியது போல், தமிழ் மக்கள் இதுபோன்ற அச்சுறுத்தல்களால் பயப்பட மாட்டார்கள். வரலாறு நமக்கு பல பாடங்களைக் கற்பிக்கிறது. சமூகக் கட்டமைப்புகள் இந்த முன்னேற்றங்களை ஆதரிக்காவிட்டால், பணத்தால் மட்டுமே வேலைவாய்ப்பையோ அல்லது வளர்ச்சி விகிதங்களையோ கணிசமாக மாற்ற முடியாது. உதாரணமாக, GIFT City போன்ற தடையில்லா வர்த்தக மண்டலங்களை (Free Trade Zones) உருவாக்குவதன் மூலமும், மெகா திட்டங்களை ஒதுக்குவதன் மூலமும் குஜராத்தை நோக்கி தற்போதைய அரசாங்கம் காட்டும் பாரபட்சம், குஜராத்தில் சராசரி நபரின் வேலைவாய்ப்பு அல்லது வாழ்க்கைத் தரத்தில் குறிப்பிடத்தக்க முன்னேற்றங்களுக்கு வழிவகுக்கவில்லை.
தமிழர்களைப் போலவே பண்டைய கலாச்சாரங்களைச் சேர்ந்த மக்களையும் கட்டுப்படுத்த முடியாது. அவர்களின் அடையாளத்தை மாற்ற முடியாது. இந்தி திணிப்புக்கான கடந்த கால முயற்சிகள் பெரும் தோல்விகளாக இருந்தன. தமிழ்நாட்டில், ஜனவரி 25-ம் தேதி மொழி தியாகிகள் தினமாகக் (Language Martyr’s Day) கடைப்பிடிக்கப்படுகிறது. இந்த நாளில், தமிழைப் பாதுகாக்கவும், மொழி திணிப்பை எதிர்த்தும் போராடி இறந்தவர்களை நாம் மதிக்கிறோம். இப்போதோ அல்லது எதிர்காலத்திலோ நமது மொழியியல் உரிமைகளை விட்டுக்கொடுக்க மாட்டோம். அவர்களின் தியாகங்களை வீணாக விடமாட்டோம்.
கட்டுரையாளர் தமிழ்நாடு தகவல் தொழில்நுட்பம் மற்றும் டிஜிட்டல் சேவைகள் துறை அமைச்சர்.