தமிழ்நாடு இந்தியாவில் கேழ்வரகு (ராகி) மற்றும் கொய்யா உற்பத்தித் திறனில் முதலிடத்திலும், மக்காச்சோளம், கரும்பு, புளி, மரவள்ளி, மல்லிகை, மற்றும் எண்ணெய் வித்துக்களின் உற்பத்தித் திறனில் இரண்டாம் இடத்திலும் உள்ளது.
மாநிலத்தின் சராசரி விவசாய வளர்ச்சி, 2012-13 முதல் 2020-21 வரை 1.36% ஆக இருந்தது. இது 2021 முதல் 2024 வரை சராசரியாக 5.66% என்ற சாதனை அளவை எட்டியுள்ளதாக தமிழ்நாடு அரசு ஞாயிற்றுக்கிழமை தெரிவித்துள்ளது. மாநிலத்தில் பாசன பரப்பு, 2020-21-ல் 36.07 லட்சம் ஹெக்டேராக இருந்தது, 2023-24ல் 38.33 லட்சம் ஹெக்டேராக அதிகரித்துள்ளது. இதன் விளைவாக உணவு உற்பத்தியில் குறிப்பிடத்தக்க அதிகரிப்பு ஏற்பட்டுள்ளது என்று தெரிவித்துள்ளது.
விவசாயம், பால்வள மேம்பாடு, மீன்வளம் ஆகிய துறைகளுக்கு ஊக்கமளிக்கும் வகையில் மேற்கொள்ளப்பட்டு வரும் நடவடிக்கைகளை மாநில அரசு அதிகாரப்பூர்வமாக வெளியிட்டுள்ளது. ஐந்து தனித்தனி விவசாய நிதிநிலை அறிக்கைகள் மூலம், இத்துறைக்கு மொத்தம் ₹1,94,076 கோடி ஒதுக்கீடு செய்யப்பட்டுள்ளது. விவசாய உற்பத்தியை அதிகரிக்கவும், விவசாய சமூகத்தின் நலனை மேம்படுத்தவும் பல புதிய திட்டங்களை அறிமுகப்படுத்தி செயல்படுத்தி வருவதாகவும் அரசு கூறியுள்ளது.
தமிழ்நாடு இந்தியாவில் கேழ்வரகு (ராகி) மற்றும் கொய்யா உற்பத்தித் திறனில் முதலிடத்திலும், மக்காச்சோளம், கரும்பு, புளி, மரவள்ளி, மல்லிகை, மற்றும் எண்ணெய் வித்துக்களின் உற்பத்தித் திறனில் நாட்டில் இரண்டாம் இடத்திலும் உள்ளது. கலைஞர் அனைத்து கிராம ஒருங்கிணைந்த விவசாய மேம்பாட்டுத் திட்டத்தின் (Kalaignar All Village Integrated Agricultural Development Scheme) கீழ், 10,187 கிராம பஞ்சாயத்துகளில் ₹786.86 கோடி செலவில் 47,286 ஏக்கர் தரிசு நிலங்கள் பயிரிடப்பட்டுள்ளன.
விவசாய இயந்திரமயமாக்கல் திட்டத்தின்கீழ், ₹499.45 கோடி மதிப்புள்ள விவசாய இயந்திரங்கள் மற்றும் கருவிகள் 62,820 விவசாயிகளுக்கு மானியத்துடன் வழங்கப்பட்டுள்ளதாக தெரிவித்துள்ளது. மொத்தம் 1,652 புதிய பண்ணை இயந்திரங்கள் வாங்கப்பட்டு, மின்-வாடகை (e-vaadagai) மொபைல் சேவை மூலம், சுமார் 69,000 விவசாயிகள் பயனடைந்துள்ளனர் என்று தெரிவித்துள்ளது. 27 மாவட்டங்களில் 900-க்கும் மேற்பட்ட குளங்கள் ₹1,212 கோடி செலவில் புதுப்பிக்கப்பட்டுள்ளன.
சிறு மற்றும் குறு விவசாயிகளுக்கு பயனளிக்கவும், விவசாய உற்பத்தியை அதிகரிக்கவும், 814 சிறுபாசன குளங்கள் ₹75.59 கோடி செலவில் புதுப்பிக்கப்பட்டுள்ளன. 24 மாவட்டங்களில் ₹519 கோடி செலவில் 88-க்கும் மேற்பட்ட தடுப்பணைகள் கட்டப்பட்டுள்ளன. இது நிலத்தடி நீர் மட்டத்தை பராமரிக்க உதவுகிறது.
முந்தைய நிர்வாகத்தின் போது 2018-19-ல் பால் உற்பத்தி 8,362 மெட்ரிக் டன்களாக இருந்தது. இருப்பினும், இந்த அரசின் முயற்சியால், இது 2023-24ல் 10,808 மெட்ரிக் டன்களாக உயர்த்தப்பட்டுள்ளதாக தெரிவிக்கப்பட்டுள்ளது. வருடாந்திர முட்டை உற்பத்தி 2018-19ல் ₹1,884.22 கோடியிலிருந்து 2023-24ல் ₹2,233.25 கோடியாக உயர்ந்துள்ளது.
மீன்வளத் துறையில், மாநில அரசு ₹1,428 கோடி செலவில் 72 புதிய மீன் இறங்கும் மையங்களை அமைத்துள்ளது. தரங்கம்பாடி, ராமேஸ்வரம் மற்றும் திருவொற்றியூர் குப்பம் போன்ற பகுதிகளில் மீன்வளத்தை மேம்படுத்த முதலமைச்சர் பல திட்டங்களையும் செயல்படுத்தியுள்ளார் என்று அரசு தெரிவித்துள்ளது.