முக்கிய ஐரோப்பிய நாடுகள் இதற்கு எதிராகச் சட்டங்களை இயற்றியுள்ளதால், வெளிநாடுகளில் உள்ள நிறுவனங்களுடனான வணிகத்தின் தொடர்ச்சியை உறுதிப்படுத்த இந்திய நிறுவனங்கள் இணங்க வேண்டும்.
நிலைத்தன்மை மற்றும் சுற்றுச்சூழல், சமூகம் மற்றும் நிர்வாகம் (environment, social, and governance(ESG)) பற்றி நாம் பேசும்போது, பெரும்பாலான கவனம் சுற்றுச்சூழலில் உள்ளது. காலநிலை மாற்றம் அதிகக் கவனத்தைப் பெறுகிறது. சமூக மற்றும் நிர்வாகப் பகுதிகள் பெரும்பாலும் புறக்கணிக்கப்படுகின்றன. ‘சமூக’த்திற்குள் (social) வரும் அழுத்தமான சொற்களில் ஒன்று ‘நவீன அடிமைத்தனம்’ (modern slavery) ஆகும். இந்தியாவில் 'நவீன அடிமைத்தனம்' என்ற வெளிப்பாடு பெரும்பாலும் பயன்பாட்டில் காணப்படவில்லை என்றாலும், நவீன கால சூழலில் 'அடிமைத்தனம்' (slavery) என்ற சொல் வெவ்வேறு அர்த்தங்களைப் பெற்றுள்ளது. இங்கிலாந்தில் ‘நவீன அடிமைச் சட்டம் 2015’ (The Modern Slavery Act 2015) என்ற சட்டம் உள்ளது, இது பல்வேறு அம்சங்களைக் கையாளும் ஏற்கனவே இருக்கும் சட்டங்களின் ஒற்றைச் சட்டமாக ஒரு குறியீட்டு முறையாகும். ஆஸ்திரேலியாவில் ‘நவீன அடிமைச் சட்டம் 2018’ உள்ளது. ஜெர்மனி மற்றும் பிரான்ஸ் போன்ற நாடுகள் ஏற்கனவே நவீன அடிமைத்தனத்தை அங்கீகரித்து அதற்கு எதிராக சட்டம் இயற்றினாலும் ஐரோப்பிய ஒன்றியம் (EU) இன்னும் ஒரு பொதுவான சட்டத்தை கொண்டிருக்கவில்லை.
இந்தியாவில் இந்த விஷயத்தை முழுமையாக உள்ளடக்கிய எந்த ஒரு சட்டமும் இல்லை என்றாலும், அதன் வெவ்வேறு பகுதிகளைக் கையாளும் பல சட்டங்கள் உள்ளன. இவை கீழே பட்டியலிடப்பட்டுள்ளன,
இந்திய அரசியலமைப்பின் பிரிவு 23, மனிதர்களை கடத்துவதைத் தடை செய்கிறது. இது கட்டாய உழைப்பையும் தடை செய்கிறது.
அரசியலமைப்பின் பிரிவு 24, 14 வயதுக்குட்பட்ட குழந்தைகளை வேலைக்கு அமர்த்துவதைத் தடை செய்கிறது. இது எந்த தொழிற்சாலை, சுரங்கம் அல்லது பிற ஆபத்தான வேலைகளிலும் வேலை செய்வதற்குப் பொருந்தும்.
பாரதிய நியாய சன்ஹிதா, இந்திய தண்டனைச் சட்டம், 1860 (IPC)-ஐ மாற்றியுள்ளது.
பாரதிய நியாய சன்ஹிதாவின் பிரிவுகள் 143 முதல் 146 வரை கடத்தல், அடிமைத்தனம் மற்றும் கட்டாய உழைப்பு ஆகியவற்றை குற்றமாகக் கருதுகின்றன.
கொத்தடிமை தொழிலாளர் முறை (ஒழிப்பு) சட்டம்-1976 (Bonded Labour System (Abolition) Act) இந்தியாவில் கொத்தடிமைத்தனத்தை முடிவுக்குக் கொண்டுவர உருவாக்கப்பட்டது. இது கொத்தடிமைத்தனத்தை ஒரு கடுமையான குற்றமாக மாற்றியது. இந்தக் குற்றத்தைச் செய்பவர்கள் சட்டத்தால் தண்டிக்கப்படலாம்.
குழந்தைத் தொழிலாளர் (தடை மற்றும் ஒழுங்குமுறை) திருத்தச்சட்டம்-1986 (Child Labour (Prohibition and Regulation) Act) அனைத்து வேலைகளிலும் குழந்தைகள் வேலை செய்வதைத் தடை செய்கிறது. பதின்பருவத்தினர் ஆபத்தான வேலைகள் மற்றும் செயல்முறைகளில் வேலை செய்வதையும் இது தடை செய்கிறது. 14 வயதுக்குட்பட்ட குழந்தைகளை வேலைக்கு அமர்த்துவதை இது தடை செய்கிறது. இந்த வயது வரம்பு காலப்போக்கில் அதிகரிக்கும் என்று எதிர்பார்க்கப்படுகிறது. இருப்பினும், 14 வயதுக்கு மேற்பட்டவர்களுக்கான விதிகளைப் பற்றி அறிய, ஒருவர் பிற தொழிலாளர் சட்டங்களைச் சரிபார்க்க வேண்டும்.
ஒழுக்கக்கேடான கடத்தல் (தடுப்பு) சட்டம், 1956 (Immoral Traffic (Prevention) Act, 1956 (ITPA)) பாலியல் சுரண்டலுக்கான கடத்தலில் கவனம் செலுத்துகிறது.
சிறார் நீதி (குழந்தைகளின் பராமரிப்பு மற்றும் பாதுகாப்பு) சட்டம்-2015 (Juvenile Justice (Care and Protection of Children) Act) சிறார் கடத்தல் மற்றும் சுரண்டலைக் கையாள்கிறது.
UN-ன் நிலையான வளர்ச்சி இலக்குகள் (SDG)
ஐ.நா. நிலையான வளர்ச்சி இலக்கு (Sustainable Development Goal (SDG)) 8.7-ஐ நிர்ணயித்துள்ளது. இந்த இலக்கு நவீன அடிமைத்தனம் மற்றும் குழந்தைத் தொழிலாளர் முறையை முடிவுக்குக் கொண்டுவருவதில் கவனம் செலுத்துகிறது. கட்டாய உழைப்பு, நவீன அடிமைத்தனம் மற்றும் மனித கடத்தலை நிறுத்த உடனடி மற்றும் வலுவான நடவடிக்கைகளுக்கு இது அழைப்பு விடுக்கிறது. இது மிக மோசமான குழந்தைத் தொழிலாளர்களைத் தடைசெய்து அகற்றுவதையும் நோக்கமாகக் கொண்டுள்ளது. இதில் குழந்தைத் தொழிலார்களை ஆட்சேர்ப்பு செய்தல் மற்றும் பயன்படுத்துவதை நிறுத்துவதும் அடங்கும். 2025-ம் ஆண்டுக்குள் அனைத்து வகையான குழந்தைத் தொழிலாளர்களையும் முடிவுக்குக் கொண்டுவருவதே இதன் இலக்காகும்.
குழந்தைத் தொழிலாளர்களைச் சுரண்டுவதைத் தடுக்க இந்தியா இன்னும் சில வேலைகளைச் செய்ய வேண்டியுள்ளது. ஆனால் அதிர்ஷ்டவசமாக, ஆப்பிரிக்காவில் உள்ளதைப் போல AK-47களை ஏந்திய குழந்தை வீரர்கள் (child-soldiers) நம்மிடம் இல்லை. தென் அமெரிக்காவைப் போல போதைப்பொருட்களை கடத்தும் போதைப்பொருள் கழுதைகளாகச் செயல்படும் குழந்தைகளும் நம்மிடம் இல்லை. இந்தியாவில் மிக மோசமான குழந்தைத் தொழிலாளர் மீறல்களில் ஒன்று ஒரு காய்ச்சி வடிக்கும் தொழிற்சாலையில் நடந்தது. இந்த வழக்கில், 59 குழந்தைகள் வேலை செய்வது கண்டறியப்பட்டது. அவர்கள் 13 முதல் 17 வயதுக்குட்பட்டவர்கள் ஆவர். இந்த குழந்தைகள் 11 மணி நேர ஷிப்டுகளில் வேலை செய்தனர். அவர்கள் தீங்கு விளைவிக்கும் இரசாயனங்களுக்கும் ஆளாகினர். இந்த இரசாயனங்கள் அவர்களின் கைகளில் தீக்காயங்களை ஏற்படுத்தின.
குழந்தைத் தொழிலாளர் பற்றிய சோகமான உண்மை என்னவென்றால், இது பல குடும்பங்களுக்கு உணவை வழங்க உதவுகிறது. எனவே, அதை முற்றிலுமாக தடை செய்வது சில குடும்பங்கள் பசியால் வாட வழிவகுக்கும். இந்த கடுமையான யதார்த்தத்தைக் கருத்தில் கொண்டு, குழந்தைத் தொழிலாளர் படிப்படியாக ஒழிக்கப்பட வேண்டும். இந்த செயல்முறைக்கு சட்டங்களைவிட அதிகமாக தேவைப்படுகிறது. இதற்கு சமூகத்தின் ஆதரவும் மக்களிடையே வலுவான பொறுப்புணர்வும் தேவை.
BRSR வெளிப்பாடு
இந்தியப் பத்திரங்கள் மற்றும் பரிவர்த்தனை வாரியத்தின் (Securities and Exchange Board of India (SEBI)) விதிகளின்படி, பெரிய பட்டியலிடப்பட்ட நிறுவனங்கள் தங்கள் ஆண்டு அறிக்கைகளின் ஒரு பகுதியாக வணிகப் பொறுப்பு மற்றும் நிலைத்தன்மை அறிக்கையை (Business Responsibility and Sustainability Report(BRSR)) தாக்கல் செய்ய வேண்டும். இது சில அளவுகோல்களை பூர்த்தி செய்யும் நிறுவனங்களுக்கு மட்டுமே பொருந்தும். BRSR-ல் உள்ள தேவையான பிரிவுகளில் ஒன்று ”கொள்கை 5” என்று அழைக்கப்படுகிறது. இந்தக் கொள்கை "வணிகங்கள் மனித உரிமைகளை மதித்து ஊக்குவிக்க வேண்டும்" என்று கூறுகிறது. இந்தப் பிரிவின் கீழ், நிறுவனங்கள் விரிவான தகவல்களைப் பகிர்ந்து கொள்ள வேண்டும். அவை பின்வருவன தொடர்பான புகார்களைப் தெரிவிக்க வேண்டும். அவை,
பாலியல் துன்புறுத்தல்
பணியிடத்தில் பாகுபாடு
குழந்தைத் தொழிலாளர்
கட்டாய அல்லது விருப்பமில்லாத உழைப்பு
ஊதியங்கள்
மற்றும் பிற மனித உரிமைகள் பிரச்சினைகள்
இங்கிலாந்தின் நவீன அடிமைச் சட்டம்
இங்கிலாந்தின் நவீன அடிமைத்தனச் சட்டம் நவீன அடிமைத்தனமாகக் கருதப்படுவதை விளக்குகிறது. இதன் பிரிவுகள் 1 மற்றும் 2 நவீன அடிமைத்தனமாகக் கருதப்படும் செயல்பாடுகளை பட்டியலிடுகின்றன. இந்த நடவடிக்கைகளில் அடிமைத்தனம், கடின அல்லது கட்டாய உழைப்பு, மனித கடத்தல், பாலியல் சுரண்டல் மற்றும் உறுப்புகளை அகற்றுதல் ஆகியவை அடங்கும். இது கட்டாயப்படுத்துதல், அச்சுறுத்தல் அல்லது ஏமாற்றுதல் மூலம் சேவைகளைப் பெறுவதையும் உள்ளடக்கியது. சட்டம் குழந்தைகள் மற்றும் பாதிக்கப்படக்கூடிய நபர்களை சேவைகளை வழங்க கட்டாயப்படுத்தப்படுவதிலிருந்து பாதுகாக்கிறது.
சட்டத்தின் பிரிவு 54 "விநியோகச் சங்கிலிகளில் வெளிப்படைத்தன்மை" (Transparency in Supply Chains) பற்றியது. சில UK நிறுவனங்கள் வருடாந்திர அறிக்கையை தாக்கல் செய்ய வேண்டும். அடிமைத்தனம் மற்றும் மனிதக் கடத்தல் நடக்கவில்லை என்பதை உறுதிப்படுத்த நிறுவனம் எடுத்துள்ள நடவடிக்கைகளை இந்த அறிக்கையானது விளக்க வேண்டும். இது அவர்களின் சொந்த செயல்பாடுகள், வெளிநாடுகளில் உள்ள துணை நிறுவனங்கள் மற்றும் அவற்றின் விநியோகச் சங்கிலிகளுக்கு பொருந்தும்.
இங்கிலாந்தில் வணிகம் செய்யும் எந்தவொரு நிறுவனத்திற்கும் சட்டம் பொருந்தும். நிறுவனம் எங்கு இணைக்கப்பட்டது அல்லது உருவாக்கப்பட்டது என்பது முக்கியமல்ல. அவர்கள் இங்கிலாந்தில் செயல்பட்டால், அவர்கள் இந்தச் சட்டத்தைப் பின்பற்ற வேண்டும்.
ஐரோப்பிய ஒன்றியம் 'பெருநிறுவன நிலைத்தன்மை தொடர்பான விடாமுயற்சி உத்தரவு (Corporate Sustainability Due Diligence Directive(CSDDD))' என்று அழைக்கப்படும் அதன் சொந்த சட்டத்தைக் கொண்டுள்ளது. இந்த சட்டம் பெரிய நிறுவனங்களுக்கான விதிகளை அமைக்கிறது. இந்த விதிகள் UK சட்டத்தைப் போலவே உள்ளன. அவை நிறுவன மதிப்புச் சங்கிலிகளில் மனித உரிமை மீறல்களைத் தடுப்பதை நோக்கமாகக் கொண்டுள்ளன. ஐரோப்பிய ஒன்றியத்தில் நிறைய வணிகம் செய்யும் EU அல்லாத நிறுவனங்களும் இந்த சட்டத்தால் பாதிக்கப்படுகின்றன. தற்போது, EU-ல் உள்ள நிறுவனங்களுக்கு அறிக்கையிடலுக்கான தேவைகளை எளிதாக்குவது குறித்து விவாதம் நடந்து வருகிறது.
கடந்த சில ஆண்டுகளில், இந்திய வணிகங்கள் ஐரோப்பிய மற்றும் இங்கிலாந்து நிறுவனங்களின் தணிக்கைகளை எதிர்கொண்டன. அடிமைத்தன எதிர்ப்பு விதிகளின் மீறல்கள் எதுவும் இல்லை என்பதை உறுதிப்படுத்த இந்த தணிக்கைகள் அவற்றின் விநியோகச் சங்கிலிகளைச் சரிபார்க்கின்றன. எதிர்காலத்தில், இந்த தணிக்கைகள் மிகவும் விரிவாகவும் முழுமையாகவும் மாறும்.
உலகம் முழுவதும், விதிகள் பற்றிய விழிப்புணர்வு அதிகரித்து வருகிறது. சட்டங்கள் கடுமையாகி வருகின்றன. வெளிநாட்டு நிறுவனங்களுடன் வணிக உறவுகளை இணக்கப்படுத்த, வெளிநாட்டுத் தரங்களைப் பின்பற்றுவது மிகவும் முக்கியம் என்பதை இந்திய நிறுவனங்கள் புரிந்து கொள்ள வேண்டும். இந்த வெளிநாட்டு தரநிலைகளின் அடிப்படையில் தணிக்கைகள் செய்யப்படும். தற்போது, பல நாடுகளுடன் வர்த்தகப் பேச்சுவார்த்தைகளில் அதிக செயல்பாடு உள்ளது. இந்திய நிறுவனங்கள் தணிக்கைகளுக்குச் சென்று தயாராக வேண்டும். இது மற்ற நாடுகளைச் சேர்ந்த நிறுவனங்களுடன் வணிகம் செய்யத் தயாராக இருக்க உதவும்.
எழுத்தாளர் ஒரு பட்டயக் கணக்காளர் ஆவர்.