பொறியியல் சாதனையை விட, இந்தப் பாதையை நிறைவு செய்வது காஷ்மீர் மக்களுக்கும் ஒன்றிய அரசுக்கும் இடையிலான ஒரு சமூக ஒப்பந்தத்தை மீண்டும் உறுதிப்படுத்துகிறது.
ஜம்மு-பாரமுல்லா பாதை என்றும் அழைக்கப்படும் உதம்பூர்-ஸ்ரீநகர்-பாரமுல்லா ரயில் திட்டம், 40 ஆண்டுகளுக்குப் பிறகு இறுதியாக நிறைவடைந்துள்ளது. பிர் பஞ்சால் மற்றும் இமயமலையின் கடினமான மலைகள் வழியாக கட்டப்பட்ட இந்த பாலம் ஒரு பெரிய பொறியியல் சாதனையாகும். பிர் பஞ்சால் மற்றும் இமயமலைத் தொடர்கள் வழியாக 272 கி.மீ. நீளமுள்ள இந்த ரயில் பாதை, எஃகு மற்றும் கான்கிரீட்டைவிட மேலானது; இது ஒரு பிணைப்பின் பாலமாகும்.
இயக்கம் என்பது வாய்ப்பைக் குறிக்கிறது. இந்த ரயில் பாதை, சோபூர், அனந்த்நாக், காசிகுண்ட், பனிஹால் போன்ற இடங்களை தேசிய பொருளாதாரத்துடன் (national economy) இணைக்கிறது. இது சந்தைகளை நெருக்கமாக்குகிறது. கல்வியை அணுகக்கூடியதாக்குகிறது. வேலைவாய்ப்புகளை சாத்தியமாக்குகிறது. ஒவ்வொரு ரயிலும் இடங்களை நெருக்கமாகக் கொண்டுவருவது மட்டுமல்லாமல், மக்கள் ஒருவருக்கொருவர் இணைந்து செயல்படவும் உதவுகிறது. தேசிய ஒருங்கிணைப்பு என்பது வெறும் அடையாளத்தைப் பற்றியது மட்டுமல்ல, நடைமுறை அணுகல், முதலீடு மற்றும் பகிரப்பட்ட வளர்ச்சி என்ற உணர்வை இந்த ரயில் பாதை வளர்க்கிறது. மோதல்களின் வரலாற்றைக் கொண்ட ஒரு பிராந்தியத்தில், ரயில்வேயின் இந்த குழுப்பணி, பொறுமை மற்றும் நிலையான முன்னேற்றத்தைச் சொல்கிறது. இது அனைத்துப் பிரச்சினைகளையும் தீர்க்காது, ஆனால், அது இணைப்பையும் பகிரப்பட்ட இலக்கையும் ஊக்குவிக்கிறது. காஷ்மீர் இந்தியாவின் விளிம்பில் இல்லை. ஆனால், அதன் முன்னேற்றப் பயணத்தில் மையமாக உள்ளது என்ற செய்தியை என்ற செய்தியை ரயில் அனுப்புகிறது.
துணிச்சலும் சாதனையும்
இந்திய ரயில்வே பொறியாளர்களின் துணிச்சலான மனப்பான்மை இல்லாமல் இந்த சாதனை சாத்தியமாகி இருக்காது. பிர் பஞ்சால் மலைகளில் பனி நிறைந்த சுரங்கப்பாதைகள் முதல் உயரமான செனாப் பாலம் வரை கடினமான சூழ்நிலைகளில் அவர்கள் பணியாற்றினர். உறைபனி குளிர்காலம், நிலச்சரிவுகள் மற்றும் பாதுகாப்பு பிரச்சினைகள் இருந்தபோதிலும், அவர்கள் தொடர்ந்து பணியாற்றினர். அவர்களின் துணிச்சலும் அர்ப்பணிப்பும் ஒரு நாட்டின் நன்றியைப் பெறத் தகுதியானவை.
இந்திய ரயில்வே இத்தகைய உறுதியின் பெருமைமிக்க பாரம்பரியத்தைக் கொண்டுள்ளது. 19ஆம் நூற்றாண்டில், ரயில்வே பொறியாளர்கள் மேற்குத் தொடர்ச்சி மலைத்தொடரின் கடினமான பகுதிகளில் ரயில் பாதையை அமைத்து, மும்பையை (Deccan) தக்காணத்துடன் இணைக்கும் போர் காட் பகுதியை (Bhor Ghat section) உருவாக்கினர். 1948-ஆம் ஆண்டு அசாம் ரயில் இணைப்பு திட்டத்தில் (Assam rail-link project), புதிதாக சுதந்திரம் பெற்ற இந்தியா வடகிழக்கை இணைப்பதில் தளவாட நெருக்கடியை (logistical crisis) எதிர்கொண்டபோது, புகழ்பெற்ற ரயில்வே பொறியாளர் சர்தார் கர்னில் சிங் (பின்னர் ரயில்வே வாரியத்தின் தலைவர் தலைவராக பணியாற்றினார்) மற்றும் அவரது குழுவினர் 200 கி.மீ நீள ரயில் பாதையையும் 300-க்கும் மேற்பட்ட பாலங்களையும் விரைவாகக் கட்டினர்.
ஜம்மு-பாரமுல்லா பாதை இப்போது துணிச்சல் மற்றும் சாதனைகளின் இந்த வரிசையில் இணைகிறது. அரசாங்கங்கள் மாறலாம், முன்னுரிமைகள் மாறலாம். ஆனால், இரயில்வே பொறியாளர் — பெயர் தெரியாத மற்றும் அடிக்கடி பாராட்டப்படாத — குடியரசின் மிகவும் நீடித்த கட்டிடக் கலைஞர்களில் ஒருவராக தொடர்ந்து இருக்கிறார் என்பதை இந்த பாலம் நினைவுபடுத்துகிறது. அவர்களின் பணி வெறும் இடங்களை இணைப்பதில்லை; அது வாழ்க்கையையும், விருப்பங்களையும், அடையாளங்களையும் இணைக்கிறது. வரைபடங்களை பயனுள்ளதாகவும், வரைபடங்களைச் சொந்தமாகவும் மாற்றுபவர்கள் அவர்கள்தான்.
ஜம்மு-பாரமுல்லா பாதையின் குறியீட்டு முக்கியத்துவம் (symbolism), அது இணைப்பதில் மட்டுமல்ல, அது கடந்து செல்லும் தடைகளிலும் உள்ளது. இந்தத் திட்டம், புவி தொழில்நுட்ப தடைகளையும் (geotechnical obstacles), காலநிலை தீவிரங்களையும் (climatic extremities) மட்டுமல்ல, நீண்டகால அரசியல் நிச்சயமின்மையையும் (political uncertainty), உள்நாட்டு அமைதியின்மையையும் கடந்து வந்துள்ளது. எனவே, ஒவ்வொரு முடிக்கப்பட்ட சுரங்கமும் (tunnel), பாலமும் ஒரு பொறியியல் சாதனையாகவும், துன்பங்களை எதிர்கொண்டு உறுதியுடன் தொடர்ந்து முன்னேறியதற்கு ஒரு அடையாளமாகவும், நிறுவன அர்ப்பணிப்பாகவும் உள்ளது.
ராஜதந்திர முக்கியத்துவம் (Strategic importance)
இந்த பாதையின் ராஜதந்திர முக்கியத்துவமும் வலியுறுத்தப்பட வேண்டிய ஒன்றாகும். காஷ்மீரின் வடக்கு முனையில் உள்ள ரயில் நிலையத்தை இந்தியாவின் மற்ற ரயில் வலையமைப்புடன் இணைப்பதன் மூலம், இது பொதுமக்களின் போக்குவரத்து, வர்த்தகம் மற்றும் அவசரகால மீட்பு நடவடிக்கைகளுக்கு ஒப்பற்ற தளவாட நன்மைகளை வழங்குகிறது. குளிர்காலத்தில் நிலச்சரிவுகள் மற்றும் மூடல்களுக்கு ஆளாகக்கூடிய ஸ்ரீநகர்-ஜம்மு தேசிய நெடுஞ்சாலையை நம்பியிருப்பதையும் இந்த பாதை குறைக்கிறது. அவ்வாறு செய்வதன் மூலம், இது காஷ்மீரின் இணைப்பின் மீள்தன்மையை மேம்படுத்துகிறது மற்றும் உணவு, எரிபொருள் மற்றும் மருந்து போன்ற அத்தியாவசியப் பொருட்களின் வழக்கமான ஓட்டத்தை உறுதி செய்ய உதவுகிறது.
மாணவர்களுக்கும் நோயாளிகளுக்கும், முன்பு மலைப்பாதைகளில் நீண்ட பயணங்களைத் தாங்கியவர்களுக்கும், இந்த இரயில் பயணம் ஆறுதல், குறைவான செலவு மற்றும் கண்ணியத்தை வழங்குகிறது. இது செலவையும், பிரிவினால் ஏற்படும் உணர்ச்சி பாதிப்பையும் குறைக்கிறது, குடும்பங்கள் இணைந்திருப்பதை எளிதாக்குகிறது. காலப்போக்கில், இது அந்தப் பகுதியை முதலீட்டாளர்களுக்கும் நிறுவனங்களுக்கும் மேலும் கவர்ச்சிகரமாக மாற்றும், அனந்தநாக், அவந்திபோரா மற்றும் பாரமுல்லா போன்ற நிலையங்களைச் சுற்றி தொழிற்பூங்காக்கள், திறன் மேம்பாட்டு மையங்கள் மற்றும் வேளாண்-தளவாட மையங்கள் உருவாக்கப்படுவதற்கு வழிவகுக்கும்.
கலாச்சார ரீதியாகவும், ரயில்வே பரிமாற்றத்திற்கான ஒரு வழியாக மாறுகிறது. ரயில்கள் மக்களை பள்ளத்தாக்குக்கு அழைத்து வருவது போல, அவை கதைகள், நினைவுகள் மற்றும் புரிதலையும் சுமந்து செல்கின்றன. ரயில் பயணம் மெதுவாக ஆனால், நிலையான சமூக சமநிலையை உருவாக்குபவராக இருக்கிறது. புவியியல் எல்லைகளைக் கடந்து பொதுவான அனுபவத்தை உருவாக்குகிறது. பள்ளத்தாக்கிலுள்ள பலர் தங்கள் மாவட்டங்களைத் தாண்டி பயணம் செய்ததில்லை. இது பிராந்தியம் நாட்டின் பிற பகுதிகளுடன் இணைவதற்கு ஒரு புதிய வழியை உருவாக்குகிறது.
எதிர்காலம், இந்த அடித்தளத்தைச் சுற்றி நாம் எவ்வாறு கட்டமைக்கிறோம் என்பதைப் சார்ந்து உள்ளது. ஜம்மு-பாரமுல்லா ரயில் பாதையின் நிறைவுக்குப் பிறகு, கடைசி மைல் இணைப்புகளை கவனமாக திட்டமிடுதல், நிலையப் பகுதி மேம்பாடு மற்றும் சேவை அதிர்வெண் மேம்பாடு ஆகியவை செய்யப்பட வேண்டும். உள்ளூர் தொழில்முனைவோர், பெண்கள் குழுக்கள் மற்றும் கைவினைஞர்கள் இந்த பாதை வழங்கும் அணுகலில் இருந்து பயனடைய அனுமதிக்கப்பட வேண்டும். அரசு நிறுவனங்கள் மற்றும் தனியார் நிறுவனங்கள் இணைந்து இந்த நிலையங்களைச் சுற்றி சூழல்களை உருவாக்க வேண்டும். அதனால் அவை வெறும் நிறுத்தங்களாக மட்டுமல்லாமல், கிராமப்புற மாற்றத்தின் மையங்களாக மாறும்.
இந்தத் திட்டம் ஜனநாயக வளர்ச்சி செயலில் எப்படி இருக்கிறது என்பதற்கு ஒரு சான்றாகும் — பொறுமையான, வேண்டுமென்றே திட்டமிடப்பட்ட, மற்றும் ஆழமான மாற்றத்தை உருவாக்கும். தண்டவாளங்கள் எஃகால் ஆனவையாக இருக்கலாம், ஆனால் அவை தாங்கி வரும் வாக்குறுதி நம்பிக்கையின் அடிப்படையில் உள்ளது. இதுவே ஜம்மு மற்றும் காஷ்மீரின் எதிர்காலத்தை கட்டமைப்பதற்கு மிகவும் வலிமையான அடித்தளமாக இருக்கலாம்.
சரப்ஜித் அர்ஜன் சிங், முன்னாள் பொது மேலாளர், இந்திய ரயில்வே, மற்றும் மத்திய நிர்வாக தீர்ப்பாயத்தின் முன்னாள் உறுப்பினர்.