பாதுகாப்பு, இணைப்பு மற்றும் வாய்ப்பு ஆகிய மூன்று முக்கிய தூண்களை அடிப்படையாகக் கொண்ட ஷாங்காய் ஒத்துழைப்பு அமைப்பு (SCO)-க்கான இந்தியாவின் தொலைநோக்குப் பார்வை மற்றும் கொள்கையை பிரதமர் நரேந்திர மோடி விளக்கினார்.
பஹல்காம் பயங்கரவாதத் தாக்குதல் இந்தியா மீதான தாக்குதல் மட்டுமல்ல, அனைத்து நாடுகளுக்கும் ஒரு சவாலாகும் என்றார். பயங்கரவாதம் குறித்து இரட்டை நிலைப்பாடு கொண்டிருப்பது ஏற்றுக்கொள்ள முடியாதது என்று அவர் வலியுறுத்தினார்.
முக்கிய அம்சங்கள்:
SCO தலைவர்களின் உச்சிமாநாட்டின் தொடக்க அமர்வில் மோடி இந்தக் கருத்துக்களைத் தெரிவித்தார். இந்த அமர்வுக்கு சீன அதிபர் ஜி ஜின்பிங் தலைமை தாங்கினார், பாகிஸ்தான் பிரதமர் ஷெபாஸ் ஷெரீப்பும் கலந்து கொண்டார்.
இந்தியாவிற்கும் அமெரிக்காவிற்கும் இடையிலான நம்பிக்கை பலவீனமடைந்து வரும் நேரத்தில், முக்கியமாக டொனால்ட் டிரம்ப் நிர்வாகத்தால் விதிக்கப்பட்ட 50% வரிகள் காரணமாக இந்த உச்சிமாநாடு நடைபெறுகிறது. சீனா மற்றும் ரஷ்யாவுடனான இந்தியாவின் ஈடுபாட்டை அமெரிக்கா, குறிப்பாக வெள்ளை மாளிகை வர்த்தக ஆலோசகர் பீட்டர் நவரோ கடுமையாக விமர்சித்துள்ளார்.
ரஷ்யாவிலிருந்து கச்சா எண்ணெயை அதிகம் வாங்கும் நாடுகள் சீனாவும் இந்தியாவும் ஆகும். ரஷ்ய எண்ணெயை வாங்குவதற்காக டிரம்ப் இந்தியா மீது கூடுதலாக 25% வரியை விதித்தார். ஆனால், சீனா மீது அத்தகைய வரிகளை விதிக்கவில்லை.
SCO-RATS (பிராந்திய பயங்கரவாத எதிர்ப்பு அமைப்பு) ஒரு முக்கியப் பங்கைக் கொண்டுள்ளது என்று மோடி கூறினார். இந்த ஆண்டு, கூட்டு தகவல் நடவடிக்கையை வழிநடத்தும் அதே வேளையில், அல்-கொய்தா மற்றும் தொடர்புடைய பயங்கரவாத குழுக்களை எதிர்கொள்ள இந்தியா நடவடிக்கை எடுத்தது.
இணைப்பு குறித்து, சபாஹர் துறைமுகம் மற்றும் சர்வதேச வடக்கு-தெற்கு போக்குவரத்து வழித்தடம் போன்ற திட்டங்களில் இந்தியா செயல்பட்டு வருகிறது. இவை ஆப்கானிஸ்தான் மற்றும் மத்திய ஆசியாவுடனான இந்தியாவின் தொடர்புகளை வலுப்படுத்தும் என்று மோடி கூறினார்.
"சீர்திருத்தம், செயல்திறன் மற்றும் மாற்றம்" (“reform, perform and transform.”) என்ற இந்தியாவின் குறிக்கோளைப் பற்றியும் அவர் பேசினார். வளர்ச்சி மற்றும் சர்வதேச ஒத்துழைப்புக்கான புதிய வாய்ப்புகளை உருவாக்கும் பரந்த அளவிலான சீர்திருத்தங்களை இந்தியா செய்துவருவதாக அவர் கூறினார். இந்தியாவின் வளர்ச்சிப் பயணத்தில் சேர SCO உறுப்பு நாடுகளை மோடி அழைத்தார்.
நாடுகளுக்கு இடையிலான உறவுகளை வலுப்படுத்த, SCO-விற்குள் ஒரு ‘நாகரிக உரையாடல் மன்றத்தை’ (‘Civilisation Dialogue Forum’) உருவாக்க பிரதமர் மோடி பரிந்துரைத்தார். இந்த மன்றம் நாடுகள் தங்கள் பண்டைய நாகரிகம், கலாச்சாரம், மரபுகள் மற்றும் இலக்கியங்களை உலக அரங்கில் பகிர்ந்து கொள்ள அனுமதிக்கும்.
சீன ஜனாதிபதி ஜி ஜின்பிங், SCO பிளஸ் தலைவர்களின் உச்சிமாநாட்டில், பன்முகத்தன்மையின் முக்கியத்துவத்தை வலியுறுத்தி, ஒரு உலகளாவிய நிர்வாக முயற்சியை (Governance Initiative (GGI)) முன்மொழிந்தார்.
அனைத்து நாடுகளும், அவற்றின் அளவு, வலிமை அல்லது செல்வம் எதுவாக இருந்தாலும், உலகளாவிய நிர்வாகத்தில் சமமான பங்கேற்பாளர்கள், முடிவெடுப்பவர்கள் மற்றும் பயனாளிகளாக இருக்க வேண்டும் என்று அவர் கூறினார்.
SCO பாதுகாப்புக் குழு கூட்டம், இரண்டாம் உலகப் போரில் ஜப்பான் தோல்வியடைந்த 80வது ஆண்டு நிறைவோடு ஒத்துப்போகிறது, இதை சீனா புதன்கிழமை நினைவுகூருகிறது.
சர்வதேச சட்ட ஆட்சி மதிக்கப்பட வேண்டும் என்றும், ஐ.நா. சாசனம் மற்றும் சர்வதேச உறவுகளின் உலகளவில் ஏற்றுக்கொள்ளப்பட்ட விதிமுறைகள் முழுமையாகவும் தொடர்ச்சியாகவும் பின்பற்றப்பட வேண்டும் என்றும் ஜி மேலும் கூறினார்.
ஒருதலைப்பட்சத்தை எதிர்க்கும் அதே வேளையில், ஆலோசனை, கூட்டுப் பங்களிப்புகள், பகிரப்பட்ட நன்மைகள், ஒற்றுமை மற்றும் ஒருங்கிணைப்பை ஊக்குவிப்பதன் மூலம் பன்முகத்தன்மையை கடைப்பிடிக்க வேண்டியதன் அவசியத்தையும் அவர் வலியுறுத்தினார்.
உங்களுக்குத் தெரியுமா?
ஷாங்காய் ஒத்துழைப்பு அமைப்பு (SCO) 1996-ல் "ஷாங்காய் ஐந்து" என்று தொடங்கியது. இதில் சீனா, ரஷ்யா, கஜகஸ்தான், கிர்கிஸ்தான் மற்றும் தஜிகிஸ்தான் ஆகியவை அடங்கும்.
1991-ல் சோவியத் ஒன்றியம் 15 நாடுகளாகப் பிரிந்தபிறகு, இப்பகுதியில் தீவிரவாதக் குழுக்கள் மற்றும் இன மோதல்கள் ஏற்படும் என்ற அச்சம் இருந்தது. இந்தப் பிரச்சினைகளைக் கையாள, பாதுகாப்புப் பிரச்சினைகளில் ஒன்றிணைந்து செயல்பட ஒரு குழு உருவாக்கப்பட்டது.
பின்னர், SCO ஜூன் 15, 2001 அன்று ஷாங்காயில் அதிகாரப்பூர்வமாக நிறுவப்பட்டது. உஸ்பெகிஸ்தானும் இணைந்து, ஆறாவது உறுப்பினரானது.
SCO சாசனம் ஜூன் 2002-ல் செயின்ட் பீட்டர்ஸ்பர்க் உச்சிமாநாட்டில் கையெழுத்திடப்பட்டு, செப்டம்பர் 19, 2003-ல் நடைமுறைக்கு வந்தது. 2006-ல், உலகளாவிய பயங்கரவாதத்திற்கு நிதியளிக்கும் சர்வதேச போதைப்பொருள் கடத்தலை எதிர்த்துப் போராடவும் SCO முடிவு செய்தது.
இன்று, SCO-ல் 10 உறுப்பு நாடுகள் உள்ளன: இந்தியா, ஈரான், கஜகஸ்தான், சீனா, கிர்கிஸ்தான், பாகிஸ்தான், ரஷ்யா, தஜிகிஸ்தான், உஸ்பெகிஸ்தான் மற்றும் பெலாரஸ்.