சமீபத்திய நாடாளுமன்ற நடவடிக்கைகளை, குறிப்பாக 18-வது மக்களவையில், அவர்களின் இருப்புக்கும் பங்கேற்புக்கும் இடையிலான இடைவெளியைக் கண்டறிய, நாங்கள் கூர்ந்து கவனித்தோம்.
தேசிய ஜனநாயகக் கூட்டணி அரசின் முக்கிய சாதனைகளில் ஒன்று 106-வது அரசியலமைப்பு திருத்தச் சட்டம், அது நாரி சக்தி வந்தன் அதினியம் (Nari Shakti Vandan Adhiniyam) என்றும் அழைக்கப்படுகிறது. இது நாடாளுமன்றத்திலும் மாநில சட்டசபைகளிலும் பெண்களுக்கு மூன்றில் ஒரு பங்கு இட ஒதுக்கீடு வழங்குவதை உறுதி செய்கிறது. அரசியல் கட்சிகள் பெரும்பாலும் பெண் நாடாளுமன்ற உறுப்பினர்கள், சட்டமன்ற உறுப்பினர்கள் மற்றும் உள்ளூர் தலைவர்களின் எண்ணிக்கையைப் பெருமையாகக் காட்டுகின்றன. இதை முன்னேற்றத்தின் அளவீடாகக் குறிப்பிடுகின்றன. இருப்பினும், உண்மையான பிரதிநிதித்துவம் என்பது இருக்கைகளை மட்டும் நிரப்புவதில் அல்ல, விவாதங்களை வடிவமைப்பது, குழுக்களுக்கு தலைமை தாங்குவது மற்றும் முடிவுகளில் செல்வாக்கு செலுத்துவதிலும் அடங்கும். சமீபத்திய நாடாளுமன்ற செயல்பாடுகள், குறிப்பாக 18-வது மக்களவையில், இருப்பிற்கும் பங்கேற்பிற்கும் இடையே ஒரு இடைவெளி இருப்பதை எங்கள் பகுப்பாய்வு வெளிப்படுத்துகிறது. பெண்களின் பிரதிநிதித்துவம் பற்றிய உரையாடல் எண்ணிக்கையுடன் முடிவடைய முடியாது. அது அவர்களின் செயலில் பங்கேற்கும் மணிநேரங்கள் மூலம் அளவிடப்பட வேண்டும்.
விவாதங்களில் பெண் நாடாளுமன்ற உறுப்பினர்களின் பங்கேற்பு
வக்ஃப் மசோதா (Waqf Bill), 2025 மீதான மக்களவை விவாதம் 14 மணி நேரம் நீடித்தது. இதில் 61 உறுப்பினர்கள் பங்கேற்றனர். இவர்களில் 5 பேர் மட்டுமே பெண்கள் ஆவார். மொத்த பேச்சாளர்களில் 8 சதவீதமே மட்டுமே பெண்கள் பங்குபெற்றனர். எடுத்துக்கொண்ட நேரத்தைப் பொறுத்தவரை, இந்த ஏற்றத்தாழ்வு இன்னும் அதிகமாக இருந்தது. பெண் நாடாளுமன்ற உறுப்பினர்கள் மொத்தமாக 32 நிமிடங்கள் மட்டுமே பேசினர். இது மொத்த பேசும் நேரத்தில் வெறும் 3.5 சதவீதம் மட்டுமே. இது அவைக்குள் அவர்களுக்குள்ள 14 சதவீத பிரதிநிதித்துவத்தைவிட குறிப்பிடத்தக்க அளவு குறைவான நேரமாகும்.
கட்சி வாரியான தரவுகளைப் பார்க்கும்போது இந்த முறை தெளிவாகிறது. 31 பெண் எம்பிக்களைக் கொண்ட பாஜக , விவாதத்தின் போது மொத்தம் 145 நிமிடங்கள் பெற்றது. ஆனால், அக்கட்சியின் இரண்டு பெண் பேச்சாளர்களுக்கு 14 நிமிடங்கள் மட்டுமே கிடைத்தன. 14 பெண் நாடாளுமன்ற உறுப்பினர்களைக் கொண்ட காங்கிரஸ் கட்சிக்கு 92 நிமிடங்கள் ஒதுக்கப்பட்டது. இதில் ஒரே பெண் பேச்சாளருக்கு 4.5 நிமிடங்கள் கிடைத்தது. பெண்கள் பேச்சாளர்கள் பட்டியலில் சேர்க்கப்பட்டாலும், அவர்களின் பேச்சின் நீளம் ஆண்களை ஒப்பிடும்போது மிகவும் குறுகியதாக உள்ளது.
வங்கி சட்டங்கள் (திருத்த) மசோதா (Banking Laws (Amendment) Bill), 2024, டிசம்பர் 3 அன்று மக்களவையில் விவாதிக்கப்பட்டது. விவாதம் ஐந்து மணி நேரம் தொடர்ந்தது. சட்டத்தின் முக்கியத்துவத்தை பொருட்படுத்தாமல், சுப்ரியா சுலே (Supriya Sule) என்ற ஒரே ஒரு பெண் நாடாளுமன்ற உறுப்பினர் மட்டுமே பங்கேற்றார். அவர் ஒன்பது நிமிடங்கள் பேசினார். கணிசமான எண்ணிக்கையிலான பெண் நாடாளுமன்ற உறுப்பினர்களைக் கொண்டுள்ள பாஜக மற்றும் காங்கிரஸ் ஆகிய இரண்டு கட்சிகளும் இந்த விவாதத்திற்கு ஆண் உறுப்பினர்களை மட்டுமே களமிறக்க தேர்வு செய்தன.
வரவு செலவு அறிக்கை விவாதங்களில் பெண் நாடாளுமன்ற உறுப்பினர்கள்
பெண்களுக்கு நிதி நுண்ணறிவு இல்லை என்று அடிக்கடி ஒரு சமூகம் முத்திரை குத்தும் நிலையில், மத்திய பட்ஜெட் மீதான நாடாளுமன்ற விவாதங்கள் ஒரு வெளிப்படையான கண்ணோட்டத்தை வழங்குகின்றன. பாஜக அடிக்கடி தனது நிதியமைச்சர் ஒரு பெண் என்பதை முன்னிலைப்படுத்துகிறது, ஆனால் நிதி மசோதா (Finance Bill), 2025 மீதான விவாதத்தின் போது அக்கட்சியிலிருந்து எந்த பெண் எம்பியும் பேசவில்லை என்பது குறிப்பிடத்தக்கது. இருப்பினும், சுப்ரியா சூலே, இக்ரா சௌத்ரி (Iqra Choudhary), மற்றும் ஹர்சிம்ரத் கௌர் பாதல் (Harsimrat Kaur Badal) போன்ற மூத்த பெண் தலைவர்கள் விவாதத்தில் பங்களித்தனர். மொத்தமாக, அனைத்து பெண்களும் 8 மணி 43 நிமிடங்கள் நீடித்த விவாதத்தில் சுமார் ஒரு மணி நேரம் பேசினர்.
மக்களவையில் ரயில்வே அமைச்சக வரவு செலவு அறிக்கை விவாதத்தின் போது இதேபோன்ற ஒரு போக்கு காணப்பட்டது. பேசிய 90 நாடாளுமன்ற உறுப்பினர்களில் 9 பேர் மட்டுமே பெண்கள் இடம் பெற்றிருந்தனர். மொத்தமுள்ள 11 மணி நேரம் 35 நிமிடங்களில் 1 மணி நேரம் 18 நிமிடங்கள் மட்டுமே அவர்கள் பேசினர். இது பெரும்பாலான கட்சிகள் இன்னும் தங்கள் பெண் நாடாளுமன்ற உறுப்பினர்களுக்கு போதுமான பேச்சு நேரத்தை வழங்கவில்லை என்பதைக் காட்டுகிறது.
இந்த எண்ணிக்கைகள் தொடர்ந்து நிலைத்திருக்கும் அமைப்பு சார்ந்த பாரபட்சத்தை வெளிப்படுத்துகின்றன. சில கட்சிகளைத் தவிர, பெரும்பாலான கட்சிகள் தங்கள் பெண் நாடாளுமன்ற உறுப்பினர்களுக்கு போதுமான பேசும் நேரத்தை வழங்குவதில்லை.
பெண் நாடாளுமன்ற உறுப்பினர்களால் நாடாளுமன்ற கருவிகளின் பயன்பாடு
நாடாளுமன்றத்தில் பெண்களின் பங்கேற்பின் மற்றொரு முக்கிய அளவீடு, அவர்கள் தாக்கல் செய்யும் நாடாளுமன்ற தலையீடுகளின் எண்ணிக்கை, அதன் பின்னர் பாலட் முறையில் தேர்ந்தெடுக்கப்படுகின்றன. அடிக்கடி பயன்படுத்தப்படும் நாடாளுமன்ற தலையீடுகளில் ஒன்று கேள்வி நேரம் (Question Hour) ஆகும். 18-வது மக்களவையின் 4-வது அமர்வின் பகுப்பாய்வு, பெண் எம்பிக்கள் மொத்த நட்சத்திரக் குறியிடப்பட்ட கேள்விகளில் (starred questions) 17.2 சதவீதத்தைக் கேட்டதைக் காட்டியது. இருப்பினும், இந்த விசாரணைகளில் மற்ற நாடாளுமன்ற உறுப்பினர்களுடன் இணைந்து செய்யப்பட்டன. 7.5 சதவீத கேள்விகள் மட்டுமே பெண் நாடாளுமன்ற உறுப்பினர்களால் தன்னிச்சையாகக் சேர்க்கப்பட்டதை குறிக்கிறது.
நாடாளுமன்றத்தில் மற்றொரு முக்கியப் பங்கு தனியார் உறுப்பினர் மசோதாக்களை அறிமுகப்படுத்துவதாகும். மொத்தம் உள்ள 628 மசோதாக்களில், ஆண் நாடாளுமன்ற உறுப்பினர்கள் 572 - 90%க்கும் அதிகமான மசோதாக்களை தாக்கல் செய்தனர். பெண் நாடாளுமன்ற உறுப்பினர்கள் 56 மட்டுமே தாக்கல் செய்தனர். இது மொத்த மசோதாக்களில் வெறும் 8.91% மட்டுமே.
நாடாளுமன்றக் குழுக்களில் பாலின இடைவெளி
குழுக்களுக்குள்ளும் கூட, பெண்கள் தலைமைப் பொறுப்புகளில் இருந்து குறிப்பிடத்தக்க அளவு விலக்கப்பட்டுள்ளனர். துறை சார்ந்த 24 நிலைக்குழுக்களில் (Standing Committees) தற்போது இரண்டு குழுக்களுக்கு மட்டுமே பெண்கள் தலைமை தாங்குகின்றனர். கூட்டு நாடாளுமன்றக் குழுக்களிலும் (Joint Parliamentary Committees (JPCs)) இதே போன்ற போக்கு உள்ளது. மிகவும் உயர்மட்ட குழுக்கள்கூட பிரத்யேகமாக ஆண்களால் மட்டுமே தலைமை தாங்கப்படுகின்றன. ஒரே நாடு ஒரே தேர்தல் (One Nation One Election) குழுவிற்கு பி.பி. சௌத்ரி தலைமை தாங்குகிறார் மற்றும் வக்ஃப் சட்டத்திற்கான கூட்டுக் குழுவிற்கு ஜகதாம்பிகா பால் தலைமை தாங்கினார்.
அதேபோல், உயிரியல் பன்முகத்தன்மை (திருத்த) மசோதா (Biological Diversity (Amendment) Bill), 2021-க்கான கூட்டுக் குழுவிற்கு சஞ்சய் ஜெய்ஸ்வால் தலைமை தாங்கினார். ஜன் விஷ்வாஸ் (விதிகளின் திருத்தம்) மசோதா (Jan Vishwas (Amendment of Provisions) Bill), 2022-க்கு மீண்டும் சௌத்ரி, மற்றும் பல-மாநில கூட்டுறவு சங்கங்கள் (திருத்த) மசோதா (Multi-State Co-operative Societies (Amendment) Bill), 2022-க்கு சந்திர பிரகாஷ் ஜோஷி தலைமை தாங்கினார். முக்கியமான சட்டமியற்றல் ஆலோசனைகளை ஆண் நாடாளுமன்ற உறுப்பினர்கள் மட்டுமே தலைமையேற்று நடத்துவது போல் தெரிகிறது.
மூன்று முக்கிய நிதிக் குழுக்களில் பெண்களின் இன்மை மிகவும் வெளிப்படையாக உள்ளது: பொதுக் கணக்குகள் (Public Accounts) மதிப்பீடுகள் மற்றும் பொதுத்துறை நிறுவனங்கள் (Public Undertakings) ஆகும். கடந்த 16 ஆண்டுகளில், பொதுக் கணக்குகள் குழு அல்லது மதிப்பீடுகள் குழுவிற்கு ஒரு பெண் நாடாளுமன்ற உறுப்பினர்கூட தலைமை தாங்கியதில்லை. மீனாட்சி லேகி என்ற ஒரே ஒரு பெண் மட்டுமே பொதுத்துறை நிறுவனங்கள் குழுவிற்கு தலைமை தாங்கியுள்ளார். அதுவும் மூன்று ஆண்டு காலத்திற்கு மட்டுமே. மிகவும் செல்வாக்குள்ள அமைப்புகளில் இருந்து இந்த தொடர்ச்சியான இன்மை, பெண்கள் அமைப்பில் இருந்தாலும் கூட, நிறுவன அதிகாரப் பதவிகளில் இருந்து வழக்கமாக விலக்கப்படுகிறார்கள் என்பதைக் காட்டுகிறது.
அரசியலில் பெண்களின் பங்கு இன்னும் ஒரு பெரிய கவலையாகவே உள்ளது. அரசியல் பேரணிகளிலும், நாடாளுமன்றத்திலும்கூட பெண்கள் பெரும்பாலும் அவமரியாதையான கருத்துகளால் குறிவைக்கப்படுகிறார்கள். நாடாளுமன்ற கட்டிடங்கள் பெண்களின் அடிப்படைத் தேவைகளையும் புறக்கணித்துள்ளன. உதாரணமாக, பழைய கட்டிடத்தில் பெண் பத்திரிகையாளர்களுக்கு தனி கழிப்பறைகள் இல்லை. மேலும், 2018-ல் தான் ஒரு உணவளிக்கும் அறை சேர்க்கப்பட்டது. இந்த தொடர்ச்சியான பிரச்சினைகள் பெண்கள் அரசியலில் முழுமையாக பங்கேற்பதை கடினமாக்குகின்றன. பெண்களுக்கு அமைப்பை மிகவும் நியாயமானதாகவும் ஆதரவாகவும் மாற்ற திட்டமிட்ட மற்றும் தீவிரமான சீர்திருத்தங்கள் மூலம் மட்டுமே உண்மையான மாற்றம் நிகழ முடியும்.
எழுத்தாளர்கள் நாடாளுமன்ற உறுப்பினர்களுக்கான சட்டமன்ற உதவியாளர்கள் (2024-25)