ஆபத்தான வேலைகளில் பணியமர்த்தப்படும் பெண்களுக்கு தொழிற்சாலைகள் வசதிகளை வழங்க வேண்டும்.
சிறிய மற்றும் படிப்படியாக எடுக்கப்படும் நடவடிக்கைகள்தான் ஒரு தொழில் இயங்குவதற்கு முக்கிய காரணிகளாக இருக்கின்றன. தொழிலாளர் சட்டங்களைப் பொறுத்தவரை, முன்னர் பெண்களுக்கு மிகவும் ஆபத்தானதாகக் கருதப்பட்ட 20 வேலைகளில் பெண்களை பணியமர்த்துவதற்கான தமிழ்நாடு அரசின் திட்டம் ஒரு முற்போக்கான நடவடிக்கையாகும். இதுவரை பெண்கள் இந்த வேலைகளில் பணியமர்த்தப்படுவது தடை செய்யப்பட்டிருந்தது. தமிழ்நாடு தொழிற்சாலைகள் விதிகள், 1950-ல் (Tamil Nadu Factories Rules) திருத்தங்களை அரசாங்கம் முன்மொழிந்துள்ளது. இந்த விதிகள் நடைமுறைக்கு வரும்போது, ஆபத்தானவை அல்லது அபாயகரமானவை என்று பட்டியலிடப்பட்ட வேலைகளில் பெண்கள் பணியாற்ற அனுமதிக்கப்படுவார்கள்.
கர்ப்பிணிப் பெண்கள் மற்றும் இளைஞர்கள் மட்டுமே இந்த வேலைகளில் இருந்து விலக்கப்படுவார்கள். இதற்கு முன்னதாக, தொழிற்சாலைகளில் இரவுநேரப் பணிகளில் பெண்கள் பணியமர்த்தப்படுவதை அனுமதிக்கும் வகையில் அரசாங்கம் விதிகளைத் திருத்தியது. இது பெண்களை இரவுநேரப் பணியில் இருந்து விலக்கி வைத்த பாரம்பரிய நடைமுறையை மாற்றியது. செப்டம்பர் மாதம் பொதுமக்களின் கருத்துக்காகப் பகிரப்பட்ட சமீபத்திய திருத்தத்தில், தொழிற்சாலைகள் பெண்களை இரவுநேரப் பணிகளில் அமர்த்துவதற்கு முன்பு அவர்களிடம் எழுத்துப்பூர்வ ஒப்புதல் பெறவேண்டும். அதன் விளைவாக, பெண்கள் பாதிக்கப்படக்கூடியவர்கள், பலவீனமானவர்கள், அரசால் பாதுகாக்கப்பட வேண்டியவர்கள் என்ற கருத்திலிருந்து அவர்களை விடுவித்துள்ளது. பெண்களுக்காக மேற்கொள்ளப்படவுள்ள பணிகளில் மின்னாற்பகுப்பு செயல்முறை (electrolytic process), கண்ணாடி உற்பத்தி, ஈயத்தின் உற்பத்தி மற்றும் சிகிச்சை, எரிவாயு மற்றும் பெட்ரோலியம் உற்பத்தி, வெடிப்புப் பணிகள், பதப்படுத்தப்படாத தோல்கள் மற்றும் தோல்களின் சுண்ணாம்பு பூச்சு மற்றும் கருவேலை, கிராஃபைட் தூள் தயாரித்தல், டைக்ரோமேட்டுகள் மற்றும் புற்றுநோய் உண்டாக்கும் நிறமூல இடைமுகங்கள் தயாரித்தல், பட்டாசு மற்றும் தீப்பெட்டி தொழிற்சாலைகள், மாங்கனீஸ் உற்பத்தி, ஆபத்தான பூச்சிக்கொல்லிகள் தயாரித்தல், பென்சீன் பயன்படுத்துதல், அதிக ஒலி மற்றும் அதிர்வு நிலைகள் சம்பந்தப்பட்ட செயல்பாடுகள் ஆகியவை இதில் இடம்பெற்றிருக்கும்.
சட்டத் தடைகளை நீக்குவது முதல் படியாகும். இது மேலும் சமத்துவமான பணியிடங்களை உருவாக்கும் முற்போக்கான நடவடிக்கைகளை செயல்படுத்த வழிவகுக்கும். சமுதாயத்திலும் தொழிற்துறையிலும் பழமையான ஆணாதிக்கத்தால் வலுப்படுத்தப்பட்ட பாலின பாத்திரங்களை திருத்துவதில் இந்த முதல்படி மிக முக்கியமானது என்றாலும், இந்த நடவடிக்கை மட்டுமே போதுமானதாக இருக்காது. இதைத் தொடர்ந்து, பெண்களுக்கு போதுமான வசதிகள் மற்றும் அமைப்புக்கள் வழங்கப்பட வேண்டும். இதில் தனி கழிப்பறைகள், ஆடை மாற்றும் அறைகள், இதுபோன்ற தொழில்களுக்கு கட்டாயமாக்கப்பட்டுள்ள மருத்துவ பரிசோதனைகளை மேற்கொள்வதற்கான மூடிய பகுதிகள் போன்றவை இதில் இடம்பெற்றிருக்க வேண்டும். இதற்காக சில முதலீடுகள், நிர்வாகத்தின் ஈடுபாடு, மாநில தொழிலாளர் அதிகாரிகளின் தீவிர கண்காணிப்பு போன்றவை அதிகம் தேவைப்படும். இந்த வேலைகளை மேற்கொள்ள முடியாத பெண்கள் அவற்றைச் செய்ய நிர்பந்திக்கப்படவோ அல்லது மறுத்ததற்காக தண்டிக்கப்படவோ கூடாது என்பதை அரசாங்கம் உறுதி செய்ய வேண்டும். அத்தகைய பாதுகாப்பு நடவடிக்கைகளை உருவாக்காமல், இந்திய சமுதாயத்தை சமமான வேலை சந்தையாக மாற்றுவதில் தடையாக இருக்கும் எல்லா பிரச்சினைகளையும் அகற்றும் எந்த முயற்சியும் முழுமையாக வெற்றியடையாது.