சில சந்தர்ப்பங்களில், நிறுவனங்களின் பாதுகாப்பை சுயமாக சான்றளிக்கவும், திடீர் ஆய்வுகளைத் தடை செய்யவும் விதிமுறைகள் அனுமதிக்கின்றன. இதனால் கடுமையான மேற்பார்வை பாதிக்கப்படும்.
சமீபத்திய வாரங்களில், தெளிவான பாதுகாப்புத் தோல்விகளைக் காட்டும் கொடிய பேரிடர்களை (deadly disasters) நாம் கண்டிருக்கிறோம். ஏர் இந்தியா ட்ரீம்லைனர் விபத்து மற்றும் சென்னை மெட்ரோ இரயில் கர்டர் சரிவு ஒரு கடுமையான சிக்கலை வெளிப்படுத்துகின்றன. இந்தப் பிரச்சினை தொழில்துறை பாதுகாப்பு தரங்களில் நிலையான சரிவு மற்றும் குறைந்து வரும் "பாதுகாப்பு காரணி" (factor of safety) ஆகும். 2025-ம் ஆண்டின் முதல் பாதியில், இந்தியா பல ஆபத்தான தொழில்துறை விபத்துகளைச் சந்தித்தது. குஜராத்தில் பட்டாசு கிடங்கு வெடிப்பு, ஆந்திராவில் ஒரு பட்டாசு தொழிற்சாலையில் தீ விபத்து, நாக்பூரில் ஒரு ஆயுதத் தொழிற்சாலையில் வெடிப்பு மற்றும் மும்பையில் ஒரு இரசாயன தொழிற்சாலை வெடிப்பு ஆகியவை இதில் அடங்கும்.
பத்திரிகைகளில் பதிவாகும் பெரிய உற்பத்தி அமைப்புகளில் இவை சில முக்கியமானவை. தொலைதூரப் பகுதிகளில் இன்னும் பல விபத்துகள் நடக்கின்றன. ஆனால் அவை பதிவாகவில்லை. பல துறைகளில் உள்ள தொழிலாளர்களைப் பிரதிநிதித்துவப்படுத்தும் குழுவான IndustriALL, 2024-ல் மட்டும் 400-க்கும் மேற்பட்ட தொழிலாளர்கள் பணியிட விபத்துகளில் இறந்ததாகக் கூறுகிறது. தொழிற்சாலை ஆலோசனை சேவை மற்றும் தொழிலாளர் நிறுவனங்களின் பொது இயக்குநரகத்தின் (Directorate General of Factory Advice Service and Labour Institutes (DGFASLI)) அறிக்கைகள், 2012 மற்றும் 2022-க்கு இடையில் சராசரியாக ஒவ்வொரு நாளும் மூன்று தொழிற்சாலைகளில் பணிபுரியும் தொழிலாளர்கள் இறந்ததாகக் காட்டுகின்றன. இந்த தொடர்ச்சியான விபத்துக்கள், பொறியியல் பாதுகாப்பு விளிம்புகள் பலவீனமடைந்து மேற்பார்வையானது தோல்வியடையும்போது ஏற்படும் விளைவுகள் எவ்வளவு கடுமையானவை என்பதைக் காட்டுகின்றன. பாதுகாப்பு ஒரு முக்கிய வணிக முன்னுரிமையாக இருக்க வேண்டும் என்பதையும் இது காட்டுகிறது. துயரங்கள் நடந்த பிறகுதான் நிறுவனங்கள் கற்றுக்கொள்வதை நிறுத்த வேண்டும். அதற்குப் பதிலாக, அவர்கள் வலுவான, அமைப்பு ரீதியான பாதுகாப்பு நடவடிக்கைகளை உருவாக்குவதில் கவனம் செலுத்த வேண்டும்.
கடந்த சில ஆண்டுகளில், அரசாங்கம் பல முயற்சிகளைத் தொடங்கியுள்ளது. இந்தியாவில் தயாரிப்போம் திட்டம் (Make in India programme), உற்பத்தி இணைக்கப்பட்ட ஊக்கத்தொகை (Production Linked Incentive (PLI)) திட்டங்கள் மற்றும் தொழில்துறை வழித்தடங்களை உயர்த்துவதற்கும், மேம்படுத்துவதற்கும் முயற்சிகள் இதில் அடங்கும். உற்பத்தித் துறையில் முதலீடுகளை ஈர்ப்பதே இதன் நோக்கமாகும். இந்த முயற்சிகள் தேசிய வளர்ச்சியின் பரந்த இலக்கை ஆதரிக்கின்றன. இருப்பினும், இந்த செயல்பாட்டில் பாதுகாப்பு ஒரு முக்கியமான கவலையாகும். அதே நேரத்தில், கடுமையான போட்டி வணிகங்களை செயல்திறனில் அதிக கவனம் செலுத்தத் தள்ளுகிறது. இதன் விளைவாக, அவை பெரும்பாலும் பாதுகாப்பு நடவடிக்கைகளை புறக்கணித்து மிகக் குறைந்த பாதுகாப்பு விளிம்புகளுடன் செயல்படுகின்றன.
தொழிலாளர் பாதுகாப்பு விஷயத்தில் நீர்த்துப் போதல்
நிறுவனங்கள் செலவுகளைக் குறைத்து வருவதாக நிபுணர்கள் கூறுகின்றனர். இது வடிவமைப்பு மற்றும் செயல்பாடுகளில் பயன்படுத்தப்படும் பாரம்பரிய "பாதுகாப்பு காரணியை" (factor of safety) குறைத்துள்ளது. சில சந்தர்ப்பங்களில், விதிகள் நிறுவனங்கள் தங்கள் சொந்த பாதுகாப்பு தரங்களை சான்றளிக்க அனுமதிக்கின்றன. இந்த விதிகள் திடீர் ஆய்வுகளையும் தடை செய்கின்றன. கடுமையான பாதுகாப்பு சோதனைகளைவிட வணிகத்தை எளிதாக்குவதற்கு அதிக முக்கியத்துவம் கொடுக்கப்படுகிறது என்பதை இது காட்டுகிறது. இதன் விளைவாக, பாதுகாப்பு விதிகளை புறக்கணிப்பதால் ஏற்படும் விபத்துகள் அடிக்கடி நடக்கின்றன.
தொழிலாளர் பாதுகாப்பைப் புறக்கணிப்பதன் மூலம் பணத்தைச் சேமிக்கும் நிறுவனங்கள் பின்னர் அதிக விலை கொடுக்கக்கூடும் என்பதை கல்வி ஆராய்ச்சி மற்றும் நிகழ்வு சான்றுகள் (Academic research and anecdotal evidence) தெளிவாகக் காட்டியுள்ளன. இந்த செலவுகள் மக்களுக்கும், நிதிக்கும் தீங்கு விளைவிக்கும் பேரிடர்களிலிருந்து வருகின்றன. தொழிலாளர் உடல்நலம் மற்றும் பாதுகாப்பில் முதலீடு செய்வது ஒரு புத்திசாலித்தனமான வணிகத் தேர்வாகும். ஒரு வலுவான பாதுகாப்பு கலாச்சாரம் அபாயங்களைக் குறைக்கிறது. இது பணியாளரின் உற்பத்தித்திறன், மன உறுதி மற்றும் செயல்திறனை மேம்படுத்துகிறது. இது நிறுவனத்தின் நம்பகத்தன்மையைப் பராமரிக்க உதவுகிறது, வாடிக்கையாளர்களை ஈர்க்கிறது மற்றும் முதலீட்டாளர்களின் நம்பிக்கையை உருவாக்குகிறது. சாதகமான சுற்றுச்சூழல், சமூகம், ஆளுகை (Environmental, Social, Governance(ESG)) மதிப்பீடுகள் பிராண்டின் மதிப்பை அதிகரிக்கின்றன.
தொழிலாளர்களின் காப்பு மற்றும் பாதுகாப்பு (Safety and security of workers) ஆகியவை பெருநிறுவன ESG மதிப்பீடுகளின் ஒரு பகுதியாகும். பெரும்பாலான ESG கட்டமைப்புகளில் 'சமூக' பிரிவின் கீழ் தொழில்சார் சுகாதாரம் மற்றும் பாதுகாப்பு அடங்கும். விளைவுசார் முதலீட்டு மாதிரிகள் மூலம் மில்லியன் கணக்கான டாலர்கள் பாய்கின்றன. மோசமான பாதுகாப்பு செயல்திறன் ESG மதிப்பெண்களைக் குறைக்கலாம். இது ஒரு நிறுவனத்தின் நற்பெயருக்கு நீடித்த சேதத்தை ஏற்படுத்தும். இந்தியாவில், SEBI-ன் வணிக பொறுப்பு மற்றும் நிலைத்தன்மை அறிக்கையிடல் (Business Responsibility and Sustainability Reporting (BRSR)) தரநிலைகள், பணியிட சம்பவங்கள் பற்றிய தரவைப் பகிர்ந்து கொள்ள சிறந்த பட்டியலிடப்பட்ட நிறுவனங்களைக் கோருகின்றன. இது பாதுகாப்பை பங்குதாரர் மதிப்புடன் இணைக்கிறது.
எனவே, பாதுகாப்பை மேம்படுத்த ESG மதிப்பீடுகள் வலுவான, சந்தை சார்ந்த வழியை வழங்குகின்றன. ஒழுங்குமுறை கண்காணிப்பு மற்றும் அமலாக்கம் சீரற்றதாக இருக்கும்போது இது மிகவும் முக்கியமானது.
வளர்ந்துவரும் பொருளாதாரத்தில், அமைப்புகள் மற்றும் சந்தை நிலைமைகள் நிறுவனங்களை மிக வேகமாக வேலை செய்யவும், செலவுகளைக் குறைவாக வைத்திருக்கவும் தூண்டும். அவை விரைவாகவும் மலிவாகவும் சிறந்த செயல்திறனை அடைய முயற்சிக்கின்றன. ஆனால், இந்த வளர்ச்சி மக்களின் உயிர்களை பணயம் வைத்து வரக்கூடாது. பொறியியல் பாதுகாப்பு லாப வரம்புகளும் பெருநிறுவனங்களின் நல்லெண்ணமும் வரம்பற்றவை அல்ல என்பதை சமீபத்திய துயரங்கள் நமக்கு நினைவூட்டுகின்றன. எதிர்கால பேரிடர்களைத் தடுக்கவும், தொழில்களை நிலையானதாக வைத்திருக்கவும், தொழில்சார் சுகாதாரம் மற்றும் பாதுகாப்பில் தொடர்ச்சியான, அமைப்பு அளவிலான கவனம் இருக்க வேண்டும். இந்த கவனம் ESG (சுற்றுச்சூழல், சமூக மற்றும் ஆளுகை) பொறுப்புத்தன்மையுடன் நன்கு இணைக்கப்பட வேண்டும்.
எழுத்தாளர், திருச்சிராப்பள்ளி ஐஐஎம் செயல்பாட்டு மேலாண்மை மற்றும் முடிவெடுக்கும் அறிவியல் துறையின் ஆசிரியர்.