முக்கிய அம்சங்கள்:
• இந்தியப் பிரிவினையின் துயரங்களுக்குப் பிறகு நமது அரசியலமைப்பை வடிவமைக்கும்போது ஒன்றிய அரசிடம் அதிகாரங்கள் குவிக்கப்பட்டதில் தொடங்கி; நிதிப்பகிர்வில் ஒன்றிய மற்றும் மாநில அரசுகளுக்கு இடையிலான செங்குத்து மற்றும் கிடைமட்டப் பகிர்வு குறித்த முடிவில்லாத விவாதங்கள்; திட்டக் குழுவின் மூலம் நிகழ்ந்த அதிகாரக் குவிப்பு; அரசியலமைப்புச் சட்டப்பிரிவு 356-ஐத் தவறாகப் பயன்படுத்தி மாநில அரசுகளைக் கலைத்துவிட்டு குடியரசுத் தலைவர் ஆட்சியை அமல்படுத்துவது; ஆளுநர்களின் ஒருதலைபட்சமான செயல்பாடுகள்; மொழிச் சிக்கல்கள்; தொகுதி மறுவரையறை மற்றும் நாடாளுமன்றத்தில் மாநிலங்களுக்கான இடங்களைப் பகிர்ந்தளிப்பது எனப் பல விஷயங்களை எதிர்கொண்ட இந்தியக் கூட்டாட்சித் தத்துவம் என்பது காலம் மற்றும் சூழலுக்கு ஏற்ப தொடர்ந்து மாறிவரும் மற்றும் பரிணமித்து வரும் ஒரு செயல்முறையாகவே இருந்து வருகிறதே தவிர, அது ஒருபோதும் மாற்ற முடியாத ஒன்றாகக் கல்லில் எழுதப்படவில்லை.
• ஜனநாயக நாடுகளில், சமமான குடியுரிமை (Equal citizenship) என்பது ஒவ்வொரு குடிமகனின் வாக்கிற்கும் சமமான மதிப்பு இருக்க வேண்டும் என்று கோருகிறது. மக்கள்தொகை மாறும்போது, இந்தச் சமத்துவத்தை உறுதி செய்வதற்காக, மாநிலங்களுக்கு இடையேயும் (மெதுவாக மக்கள்தொகை வளரும் மாநிலங்கள் மற்றும் வேகமாக மக்கள்தொகை வளரும் மாநிலங்கள் இடையே) மற்றும் மாநிலங்களுக்குள்ளும் (மெதுவாக மக்கள்தொகை வளரும் கிராமப்புறங்கள் மற்றும் வேகமாக மக்கள்தொகை வளரும் நகர்ப்புறங்கள் இடையே) குறிப்பிட்ட கால இடைவெளியில் தொகுதிகளின் எண்ணிக்கையை மாற்றியமைப்பது அவசியமாகிறது. ஆனால், இத்தகைய கோட்பாடுகளை வெறும் தத்துவங்களாக மட்டும் பார்க்காமல், அரசியல் விவேகத்தின் நடைமுறை உண்மைகளுக்கேற்ப அவற்றை மாற்றி அமைத்துக் கொள்ள வேண்டும்.
உங்களுக்குத் தெரியுமா?
• தேசிய கல்வி ஆராய்ச்சி மற்றும் பயிற்சிக் குழு (National Council of Educational Research and Training (NCERT)) பாடப்புத்தகங்களின்படி, கூட்டாட்சி (Federalism) என்பது ஒரு நாட்டின் ஒன்றிய அதிகார அமைப்பிற்கும் (ஒன்றிய அரசு), அதன் பல்வேறு உறுப்பு அமைப்பிற்கும் (மாநில அரசுகள்) இடையே அதிகாரம் பகிர்ந்து அளிக்கப்படும் ஓர் அரசாங்க முறையாகும். பொதுவாக, கூட்டாட்சி முறையில் இரண்டு அடுக்கு அரசாங்கங்கள் இருக்கும். ஒன்று, ஒட்டுமொத்த நாட்டிற்குமான அரசாங்கம் (ஒன்றிய அரசு); இது பொதுவாகப் பொதுவான தேசிய நலன் சார்ந்த சில குறிப்பிட்ட துறைகளுக்குப் பொறுப்பாகச் செயல்படும். மற்றொன்று, மாகாணங்கள் அல்லது மாநிலங்களின் அளவில் உள்ள அரசாங்கங்கள் (மாநில அரசுகள்); இவை தங்களின் மாநில அன்றாட நிர்வாகத்தைக் கவனித்துக்கொள்கின்றன. இந்த இரண்டு அடுக்கு அரசாங்கங்களும் மற்றொன்றைச் சார்ந்து இருக்காமல், தங்களுக்குரிய அதிகாரங்களைத் தன்னிச்சையாகவும் சுதந்திரமாகவும் பயன்படுத்துகின்றன.
Original Link: What Supreme Court of India said on Federalism in India in Union of India and Anr versus M/s Mohit Minerals Through Director case?