பிராந்திய மற்றும் உலகளாவிய சூழ்நிலைகள் இந்தியாவின் பாதுகாப்புச் செலவினங்களை எவ்வாறு பாதிக்கின்றன? -கே எம் சீத்தி

 

இந்தியாவின் பாதுகாப்பு இறக்குமதிகள் அதிகமாக இருந்தாலும், படிப்படியாக உள்நாட்டு உற்பத்தியை நோக்கி ஒரு மாற்றம் ஏற்பட்டு வருவதாக சமீபத்திய சிப்ரி தரவுகள் (SIPRI data) குறிப்பிடுகின்றன. டெல்லியின் பாதுகாப்பு வியூகம், உடனடிப் பாதுகாப்புத் தேவைகளைத் தற்சார்பு எனும் நீண்டகால இலக்குகளுடன் எவ்வாறு ஒருங்கிணைக்கிறது?

இந்தியாவின் பாதுகாப்பு உத்தியானது, உலகளாவிய மோதல்கள் மற்றும் அதிகரித்து வரும் புவிசார் அரசியல் பதட்டங்களால் மட்டுமல்லாமல், பிராந்திய யதார்த்தங்கள் மற்றும் கட்டமைப்பு காரணிகளாலும் வடிவமைக்கப்படுகிறது. ஸ்டாக்ஹோம் சர்வதேச அமைதி ஆராய்ச்சி நிறுவனத்தின் (Stockholm International Peace Research Institute (SIPRI)) சமீபத்திய தரவுகளின்படி, இந்தியா இரண்டாவது பெரிய ஆயுத இறக்குமதியாளராக உள்ளது. இருப்பினும், படிப்படியாக உள்நாட்டு உற்பத்தியை நோக்கி மாறுவதற்கான முயற்சிகள் மேற்கொள்ளப்பட்டு வருகின்றன.

இந்த நிலைமை இந்தியாவின் பாதுகாப்பு வியூகம் குறித்து முக்கியமான கேள்விகளை எழுப்புகிறது. மிக வேகமாக விரிவாக்கம் செய்யாமல், படைகளைத் தடுக்கும் திறனை வலுப்படுத்துவதை இது நோக்கமாகக் கொண்டுள்ளதா? பாதுகாப்பு இறக்குமதிகள் மீதான சார்பைக் குறைக்க இந்தியா எவ்வாறு திட்டமிடுகிறது?

அதிகரித்துவரும் உலகளாவிய மோதல்களின் காலகட்டத்தில் இந்தியாவின் பாதுகாப்பு உத்தி

உலகளாவிய மோதல்கள் கடுமையாக அதிகரித்துவரும் நேரத்தில் சிப்ரியின் (SIPRI) சமீபத்திய அறிக்கை வெளியாகியுள்ளது. இதில், உக்ரைன் மற்றும் மேற்கு ஆசியாவில் நீடித்துவரும் மோதல்களும், இந்தோ-பசிபிக் பிராந்தியத்தில் நிலவும் போட்டியும், உலகளாவிய இராணுவச் செலவினங்களை 2024-ம் ஆண்டில் சுமார் 2.7 டிரில்லியன் டாலராக உயர்த்தியுள்ளன. இது பல பத்தாண்டுகளில் இல்லாத மிக அதிகபட்ச அதிகரிப்பாகும்.

உலக வடக்குப் பகுதி மற்றும் உலகத் தெற்குப் பகுதியைச் சேர்ந்த பல நாடுகள், தங்கள் படைகளை விரிவுபடுத்தி, மேம்பட்ட ஆயுதங்களில் முதலீடு செய்து, அணு ஆயுதக் கிடங்குகளை நவீனமயமாக்கி வருகின்றன. இருப்பினும், பிராந்திய மற்றும் உலகளாவிய அழுத்தங்கள் இந்தியாவின் தேர்வுகள் மற்றும் உத்திகளைப் பாதித்தாலும், இந்தியாவின் பாதுகாப்புத் துறையும் இந்தப் பரந்த போக்கையே பிரதிபலிக்கிறது.

2020-24 காலகட்டத்தில் உலகளாவிய ஆயுத இறக்குமதியில் 8.3 சதவீதப் பங்கைக் கொண்டு, இந்தியாவை இரண்டாவது பெரிய ஆயுத இறக்குமதியாளராக சிப்ரி (SIPRI) தரவரிசைப்படுத்தியுள்ளது. இந்தியா பாதுகாப்பிற்காக 86.1 பில்லியன் டாலர் பாதுகாப்புச் செலவினம், அதனை உலக அளவில் முதல் ஐந்து பாதுகாப்பு செலவின நாடுகளில் ஒன்றாக ஆக்குகிறது. ஆனால், அதைவிட முக்கியமாக, சீனாவின் மிகப் பெரிய செலவினத்துடன் ஒப்பிடுகையில், இது ஒரு தீவிரமான விரிவாக்கமல்ல, மாறாக ஒரு சீரான விரிவாக்கத்தையே எடுத்துக்காட்டுகிறது.

இதை ஒப்பிடுகையில், சீனா இந்தியாவின் அளவை விட கிட்டத்தட்ட நான்கு மடங்கு அதிகமாக, சுமார் 314 பில்லியன் டாலர்களைச் செலவிட்டது. அதேசமயம், பாகிஸ்தான் செலவிட்ட சுமார் 10.2 பில்லியன் டாலர்கள், முழுமையான அளவில் மிகவும் குறைவாக இருந்தாலும், பிராந்திய சமநிலையைப் பொறுத்தவரை இது இன்னும் முக்கியத்துவம் வாய்ந்தது. இந்தப் புள்ளிவிவரங்கள் இந்தியாவுக்கும் சீனாவுக்கும் இடையே ஒரு புலப்படும் இடைவெளியையும், இந்தியாவுக்கும் பாகிஸ்தானுக்கும் இடையே ஒரு கணிசமான இடைவெளியையும் காட்டுகின்றன.

விரைவான விரிவாக்கம் இல்லாமல் தடுப்பு சக்தியை வலுப்படுத்துதல்

அணு ஆயுதத் துறையில், இந்தியாவிடம் சுமார் 180 அணு ஆயுதங்கள் இருப்பதாக சிப்ரி (SIPRI) மதிப்பிடுகிறது. இந்த எண்ணிக்கை, சுமார் 170 ஆயுதங்களைக் கொண்ட பாகிஸ்தானின் எண்ணிக்கையைவிட சற்றே அதிகம். அதேநேரத்தில், சீனாவின் ஆயுதக் கிடங்கு சுமார் 600 ஆயுதங்களாக வேகமாக வளர்ந்துள்ளது. சீனாவின் இந்த விரிவாக்கம் ஆசியாவில் இராஜதந்திர அழுத்தத்தை அதிகரித்துள்ளது. இதற்குப் பதிலளிக்கும் விதமாக, இந்தியா தனது நம்பகமான தடுப்புச் சக்தியை, குறிப்பாக நீண்ட தூர ஏவுகணைகள் மற்றும் வளர்ந்துவரும் கடல்சார் அணுசக்தித் திறன் மூலம் வலுப்படுத்துவதில் கவனம் செலுத்தி வருகிறது.

பாதுகாப்புத் துறையின் நிலைமை, பெரும்பாலும் வரையறுக்கப்பட்ட கட்டுப்பாடுகளுடன் கூடிய ஒரு சீரான நவீனமயமாக்கல் உத்தியைக் காட்டுகிறது. இந்தியா தரை, வான் மற்றும் கடல் ஆகிய துறைகளில் தனது திறன்களை சீராக அதிகரித்து வருவதுடன், இணையம் மற்றும் விண்வெளித் துறைகளிலும் கவனம் செலுத்தி வருகிறது. இராணுவச் செலவினங்கள் படிப்படியாக உயர்ந்திருந்தாலும், அது மொத்த உள்நாட்டு உற்பத்தியில் சுமார் 1.9–2 சதவீதமாகவே நீடிக்கிறது. இது, கிடைக்கக்கூடிய நிதி ஆதாரங்களில் வரம்புகள் இருப்பதைக் காட்டுகிறது. முந்தைய காலகட்டத்துடன் ஒப்பிடுகையில் இந்தியாவின் இறக்குமதிகள் சிறிதளவு குறைந்துள்ளதாக சிப்ரி (SIPRI) தரவுகள் வெளிப்படுத்துகின்றன. இது, இந்தியா தனது உள்நாட்டுப் பாதுகாப்பு உற்பத்தியை விரிவுபடுத்த முயற்சிக்கிறது என்பதை உணர்த்துகிறது.

எனவே, இந்தியாவின் பாதுகாப்பு உத்தியானது ஒரு கடினமான சமநிலைப்படுத்தும் முயற்சியைப் பிரதிபலிக்கிறது. சீனாவின் எழுச்சி மற்றும் சீனாவுடன் பாகிஸ்தான் கொண்டுள்ள கூட்டணி ஆகியவற்றால் நிர்ணயிக்கப்பட்ட, சவாலான பாதுகாப்புச் சூழலுக்கு அது பதிலளிக்கிறது. டெல்லி, விரைவான விரிவாக்கம் இல்லாமல் தனது தடுப்பு நடவடிக்கைகளை வலுப்படுத்துகிறது. அது உள்நாட்டு திறனை வளர்த்துக் கொள்ளும் அதேவேளையில், முக்கிய அமைப்புகளையும் இறக்குமதி செய்கிறது.

இறக்குமதிகளைப் பன்முகப்படுத்துதல்

காலப்போக்கில் இதன் போக்கு மாறியிருந்தாலும், வெளிநாட்டு ஆயுதங்களைச் சார்ந்திருப்பது இந்தியாவின் பாதுகாப்புத் துறையில் ஒரு பெரும் சவாலாகவே நீடிக்கிறது. உள்நாட்டு உற்பத்தி விரிவடைந்து வரும் நிலையிலும், முக்கிய ஆயுதத் தளங்களுக்கு இந்தியா தொடர்ந்து இறக்குமதியையே சார்ந்துள்ளது என்று சிப்ரி (SIPRI) தரவுகள் காட்டுகின்றன.

கடந்த பத்தாண்டுகளில் விநியோக நாடுகளின் பட்டியல் மாறியுள்ளது. ரஷ்யா இந்தியாவின் மிகப்பெரிய விநியோக நாடாக நீடித்தாலும், அதன் பங்கு பல ஆண்டுகளாகக் குறைந்துள்ளது. 2010-களின் முற்பகுதியில் சுமார் 60-70 சதவீதமாக இருந்த பங்கு, 2020-24-ல் சுமார் 36-38 சதவீதமாகக் குறைந்துள்ளது. இதற்கிடையில், பிரான்ஸ் ஒரு முக்கிய கூட்டணி நாடாக உருவெடுத்துள்ளது. இந்தியாவின் ஆயுத இறக்குமதியில் தற்போது சுமார் 29 முதல் 33 சதவீதம் வரை பிரான்ஸின் பங்காக உள்ளது. இந்தியாவின் பாதுகாப்பு இறக்குமதிகளில் அமெரிக்கா சுமார் 13 சதவீதத்தையும், இஸ்ரேல் சுமார் 9-10 சதவீதத்தையும் கொண்டுள்ளன.

இந்தியா தனது பாதுகாப்பு இறக்குமதி ஆதாரங்களைப் பல்வகைப்படுத்த முயன்று வருகிறது என்பதை இப்புள்ளிவிவரங்கள் உணர்த்துகின்றன. ஏதேனும் ஒரே ஒரு விநியோக நாட்டினைச் சார்ந்திருப்பதைக் குறைப்பதற்கான முயற்சிகளை நாடு மேற்கொண்டு வருகிறது. குறிப்பாகப் பழைய தலைமுறை அமைப்புகள் மற்றும் ஏவுகணைத் தளங்களில், ரஷ்யா இன்றும் ஒரு முக்கியப் பங்கை வகிக்கிறது. போர் விமானங்கள் மற்றும் நீர்மூழ்கிக் கப்பல்கள் தொடர்பான ஒத்துழைப்பின் மூலம் பிரான்ஸ் முக்கியத்துவம் பெற்றுள்ளது. கடல்சார் கண்காணிப்பு மற்றும் மேம்பட்ட விமானவியல் அமைப்புகள் ஆகியவற்றில் அமெரிக்கா இந்தியாவிற்குத் துணை நிற்கிறது. இஸ்ரேல் ஆளில்லா விமானங்கள் (Drones), உணர்திறன் கருவிகள் (Sensors) மற்றும் துல்லியத் தொழில்நுட்பங்களை வழங்குகிறது.

உள்நாட்டு உற்பத்தியின் வளர்ச்சி

இறக்குமதிகளின் போக்கு, இந்தியாவின் முன்னுரிமைகளையும் வெளிப்படுத்துகிறது. சிப்ரி (SIPRI) தரவுகளின்படி, இறக்குமதிகளில் விமானங்கள் சுமார் 29 சதவீதமாகவும், ஏவுகணைகள் சுமார் 23 சதவீதமாகவும், கவச வாகனங்கள் சுமார் 14 சதவீதமாகவும், கடற்படைத் தளங்கள் சுமார் 13 சதவீதமாகவும் உள்ளன. இது வான்வழி ஆற்றல், துல்லியமான தாக்குதல் மற்றும் கடல்சார் திறன் ஆகியவற்றில் கவனம் செலுத்தப்படுவதை உணர்த்துகிறது.

கடந்த ஐந்தாண்டு காலத்துடன் ஒப்பிடும்போது இறக்குமதி அளவுகள் சுமார் 4-9 சதவீதம் குறைந்துள்ளன. தன்னிறைவு இந்தியா (Atmanirbharta) போன்ற கொள்கைகளின்கீழ் உள்நாட்டு உற்பத்தி வளர்ச்சியே இதற்குக் காரணம் என சிப்ரி குறிப்பிடுகிறது. அதேசமயம், இயந்திரங்கள் (engines), மேம்பட்ட மின்னணுவியல் (advanced electronics) மற்றும் வான் பாதுகாப்பு அமைப்புகள் (air defence systems) போன்ற உயர் தொழில்நுட்பத் துறைகளில் இந்தச் சார்புநிலை தொடர்கிறது.

இந்தியாவும் பிராந்தியப் பாதுகாப்புச் சூழலைக் கண்காணித்து வருகிறது. பாகிஸ்தானின் ஆயுத இறக்குமதிகள் அதிகரித்துள்ளன. அதன் ஆயுதத் தேவையில் கிட்டத்தட்ட 80 சதவீதத்தை சீனா வழங்குகிறது. பெய்ஜிங் பெருமளவில் தன்னிறைவு பெற்றிருப்பதுடன், ஆயுதங்களை ஏற்றுமதி செய்வதன் மூலம் தனது இராஜதந்திர நிலையை வலுப்படுத்துகிறது. இத்தகைய சூழலில், இந்தியா ஒரு சங்கடமான இடைப்பட்ட நிலையில் இருப்பதாகத் தோன்றுகிறது. அதாவது, அது இனிமேல் ஒரேயொரு விநியோக நாட்டை மட்டுமே பெரிதும் சார்ந்திருக்கும் நிலையில் இல்லை. இருப்பினும், முழுமையான தன்னிறைவை அடைவதிலிருந்து அது இன்னும் வெகு தொலைவிலேயே உள்ளது.

பிராந்திய மற்றும் உலகளாவிய பாதுகாப்பு நிலைமைகள்

பிராந்திய பாதுகாப்பு நிலைமைகளும் புவிசார் அரசியல் பதட்டங்களும் இந்தியாவின் பாதுகாப்பு இறக்குமதிகளைப் பாதிக்கின்றன என்பதை இந்த முன்னேற்றங்கள் காட்டுகின்றன. பாதுகாப்பு அபாயங்கள் அதிகமாகவும், அடிக்கடி நிகழும்போதும் இராணுவத் தேவை அதிகரிக்கிறது என்பதை சிப்ரி (SIPRI) தரவுகளும் பிராந்தியப் போக்குகளும் தெளிவுபடுத்துகின்றன.

மிக முக்கியமான காரணி சீனா ஆகும். சீனா பாதுகாப்பிற்காக 300 பில்லியன் டாலருக்கும் அதிகமான பாதுகாப்புச் செலவினம், விரைவான நவீனமயமாக்கல், கடற்படை இருப்பை விரிவுபடுத்துதல் மற்றும் உண்மையான எல்லைக் கட்டுப்பாட்டுக் கோடு (Line of Actual Control) நெடுகிலும் உள்கட்டமைப்பை உருவாக்குதல் ஆகியவை இந்தியா மீது தொடர்ச்சியான அழுத்தத்தை ஏற்படுத்தியுள்ளன.

பாகிஸ்தான் மற்றொரு காரணியாகும். பாகிஸ்தானின் செலவினங்கள் மிகவும் குறைவாக இருந்தாலும், அதன் இராணுவ நவீனமயமாக்கலுக்கு சீனா ஆதரவளித்துள்ளது. பாகிஸ்தானின் ஆயுத இறக்குமதிகள் கணிசமாக அதிகரித்துள்ளதாகவும், சீனத் தளங்கள் மீதான அதன் சார்புநிலை வளர்ந்து, இரு நாடுகளுக்கும் இடையே ஒருவித இராஜதந்திர ஒருங்கிணைப்பை உருவாக்கியுள்ளதாகவும் சிப்ரி (SIPRI) தரவுகள் அடிக்கோடிட்டுக் காட்டுகின்றன.

உலகளாவிய போக்குகளும் முக்கியத்துவம் வாய்ந்தவை. 2021 மற்றும் 2025-க்கு இடையில் உலகளாவிய ஆயுதப் பரிமாற்றங்கள் 9.2 சதவீதம் அதிகரித்துள்ளதாக சிப்ரி (SIPRI) அறிக்கை கூறுகிறது. இது பல நாடுகள் அதிக இராணுவமயமாக்கலை நோக்கி நகர்வதைக் காட்டுகிறது. மேற்கு ஆசியா மற்றும் உக்ரைனில் தொடரும் மோதல்களால் விநியோகச் சங்கிலிகள் மேலும் இறுக்கமாகியுள்ளன. ஆளில்லா விமானங்கள் (Drones), ஏவுகணைகள் மற்றும் இணையத் திறன்களில் தொழில்நுட்பப் போட்டிகள் வேகமெடுத்து வருகின்றன. இத்தகைய சூழலில், நாடுகள் காத்திருப்பதைவிட, தங்கள் இராணுவத் திறன்களை முன்கூட்டியே பாதுகாத்துக் கொள்ளவே விரும்புகின்றன.

இந்தியாவிற்கான கொள்முதல் தேவைகள்

இந்தியாவைப் பொறுத்தவரை, இந்த அழுத்தங்கள் அவசரமான பாதுகாப்பு கொள்முதல் தேவைகளை உருவாக்குகின்றன. ரஃபேல் விமானங்கள், எஸ்-400 வான் பாதுகாப்பு அமைப்புகள், ஆளில்லா விமானங்கள் (Drones) மற்றும் கண்காணிப்புத் தளங்கள் போன்ற அமைப்புகள் உடனடி இடைவெளிகளை நிரப்புகின்றன. உள்நாட்டு உற்பத்தியால் இந்தத் தேவைகளை எப்போதும் சரியான நேரத்தில் பூர்த்திசெய்ய முடியாது. தற்போதைக்கு, இறக்குமதிகள் தற்போதைய தேவைகளுக்கும் எதிர்காலத் திறனுக்கும் இடையே ஒரு பாலமாகச் செயல்படுகின்றன.

இந்தத் தேவைக்குப் பின்னால் ஒரு கட்டமைப்புரீதியான காரணமும் உள்ளது. அதற்கு நீண்ட நில எல்லைகளும் குறிப்பிடத்தக்க கடல்சார் நலன்கள் என இந்தியா இருமுனைப் பாதுகாப்புச் சவாலை எதிர்கொள்கிறது. இதற்கு ஒரேநேரத்தில் பல களங்களில் தயார்நிலை தேவைப்படுகிறது. எனவே, ஆயுதங்களுக்கான தேவை ஒரு சேவைக்கோ அல்லது ஒரு களத்திற்கோ மட்டும் கட்டுப்படுத்தப்படவில்லை. அது வான் பாதுகாப்பு, கடற்படை விரிவாக்கம், தரைவழிப் போக்குவரத்து மற்றும் புதிய களங்கள் எனப் பலவற்றையும் உள்ளடக்கியுள்ளது.

இந்தச் சூழ்நிலையில், இந்தியாவின் இறக்குமதிகள் அவசரம், அளவு மற்றும் தொழில்நுட்பத் தேவைகளால் வடிவமைக்கப்படுகின்றன. அவை வெளிநாட்டு அமைப்புகளுக்கான ஒரு எளிய விருப்பத்தைக் காட்டிலும், மாறிவரும் பாதுகாப்புச் சூழலுக்கான ஒரு பதிலையே சுட்டிக்காட்டுகின்றன.

தற்சார்பு, பல்வகைப்படுத்தல் மற்றும் தொலைநோக்குப் பார்வை-2047

இந்தியாவின் பாதுகாப்பு இறக்குமதிகள் அதிகமாக இருந்தாலும், படிப்படியாக உள்நாட்டு உற்பத்தியை நோக்கி ஒரு மாற்றம் ஏற்பட்டு வருவதாக சிப்ரி (SIPRI) தரவுகள் குறிப்பிட்டன. டெல்லியின் பாதுகாப்பு உத்தியானது, உடனடிப் பாதுகாப்புத் தேவைகளைத் தற்சார்பு என்ற நீண்டகால இலக்குகளுடன் இணைக்கிறது. இது பல்வகைப்படுத்தல் மற்றும் பாதுகாப்பு தொலைநோக்குப் பார்வை 2047 போன்ற அதன் உத்திகளில் தெளிவாகத் தெரிகிறது.

பல்வகைப்படுத்தல், விநியோக நாடுகளைப் பல்வகைப்படுத்துவது, ஒரே ஒரு விநியோக நாட்டைச் சார்ந்திருப்பதைக் குறைப்பது மட்டுமல்லாமல், உக்ரைன் மற்றும் மேற்கு ஆசியாவில் நடந்த போருடன் தொடர்புடைய விநியோகத் தடைகள் போன்ற உலகளாவிய மோதல்களால் எழும் அபாயங்களை நிர்வகிக்கவும் உதவுகிறது.

பாதுகாப்பு தொலைநோக்கு-2047 இந்தக் கட்டமைப்பு, பல்துறை சார்ந்த, தொழில்நுட்பத்தால் இயக்கப்படும் ஒரு இராணுவத்தை உருவாக்குவதற்கான திட்டத்தை கோடிட்டுக் காட்டுகிறது. இது தரைப்படை, கடற்படை மற்றும் விமானப்படை ஆகியவற்றுக்கு இடையே சிறந்த ஒருங்கிணைப்பு, செயற்கை நுண்ணறிவு, ஆளில்லா விமானங்கள் (Drones), இணையத் திறன்கள் மற்றும் விண்வெளி சார்ந்த அமைப்புகளின் பயன்பாட்டை வலியுறுத்துகிறது. மேலும், இது ஒரு வலுவான உள்நாட்டுத் தொழில்துறையை உருவாக்கும் நோக்கில், பாதுகாப்பு உற்பத்தியைப் பொருளாதார இலக்குகளுடன் இணைக்கிறது.

உடனடித் தேவைகளே இன்னும் முடிவுகளைத் தொடர்ந்து பாதிக்கின்றன என்பது தெளிவாகிறது. கூடுதலாக ஐந்து எஸ்-400 நீண்டதூர தரை-வான் ஏவுகணை அமைப்புகளைக் கொள்முதல் செய்ய சமீபத்தில் வழங்கப்பட்ட ஒப்புதல், இந்த அவசரத் தன்மையைப் பிரதிபலிக்கிறது. இந்தியாவின் உள்நாட்டுப் பாதுகாப்புத் திறன்கள் இன்னும் வளர்ந்துவரும் நிலையில், இத்தகைய கொள்முதல்கள் தற்போதைய அபாயங்களைக் கையாளும் என்று எதிர்பார்க்கப்படுகின்றன.

எனவே, சிப்ரி (SIPRI) 2025-ல் இந்தியாவின் பாதுகாப்புத் துறையானது, நாடு ஒரு மாற்றத்தின் காலகட்டத்தைக் கடந்து செல்கிறது என்பதைக் காட்டுகிறது. அது தனது விநியோக நாடுகளைப் பன்முகப்படுத்தி, உள்நாட்டுத் தொழில்துறையை உருவாக்கி, புதிய தொழில்நுட்பங்களில் முதலீடு செய்துவருகிறது. வரும் ஆண்டுகளிலும் இந்தப் போக்கு தொடரும் என்று சிப்ரியின் (SIPRI) தரவுகள் சுட்டிக்காட்டுகின்றன. இறக்குமதிகள், குறிப்பாக உயர்தர மற்றும் மேம்பட்ட தொழில்நுட்பங்களுக்கு இந்த அமைப்பின் ஒரு பகுதியாகவே நீடிக்கும். உள்நாட்டு உற்பத்தி அதிகரிக்கும் என எதிர்பார்க்கப்பட்டாலும், அந்த வளர்ச்சி படிப்படியாகவும் சீராகவும் இருக்கும். இறுதியில், இந்தியா தனது இலக்குகளுக்கும் உண்மையான உற்பத்தித் திறனுக்கும் இடையிலான இடைவெளியை எவ்வளவு வேகமாக நிரப்புகிறது என்பதைப் பொறுத்தே இதன் விளைவு அமையும்.

Original article : https://indianexpress.com/article/upsc-current-affairs/upsc-essentials/how-regional-and-global-scenario-shapes-indias-defence-spending-10611868/