காசிரங்கா உயர்மட்ட வழித்தடம் தேசியப் பூங்காவில் எவ்வாறு விலங்குகளின் இறப்புகளைக் கட்டுப்படுத்துவதற்கான நோக்கமாக உள்ளது? -சுக்ரிதா பருவா

ரூ. 6,950 கோடி மதிப்பிலான காசிரங்கா வழித்தடம், தேசியப் பூங்காவையும் கிழக்கு அசாமையும் மாநிலத் தலைநகரான குவாஹாத்தியுடன் இணைக்கும் ஒரு முக்கிய நெடுஞ்சாலையின் பகுதியாக இருக்கும். இதன் நோக்கம், விலங்குகள் பாதுகாப்பாக சாலையைக் கடப்பதற்கு வழிவகை செய்வதாகும்.

அசாமின் காசிரங்காவில் 34.5 கிலோமீட்டர் நீளமுள்ள ஒரு உயர்மட்ட வழித்தடத்தை பிரதமர் நரேந்திர மோடி ஞாயிற்றுக்கிழமை தொடங்கி வைக்க உள்ளார். நிபுணர்கள் மற்றும் வனத்துறை அதிகாரிகளின் கூற்றுப்படி, இந்தத் தேசியப் பூங்காவில் கனரக வாகனப் போக்குவரத்தால் விலங்குகள் அடிபட்டு இறப்பு அதிகரித்துவரும் பிரச்சனைக்கு இது ஒரு நீண்டகால தீர்வாக இருக்கும் என்று எதிர்பார்க்கப்படுகிறது.

ரூ. 6,950 கோடி மதிப்பிலான இந்த வழித்தடம், தேசியப் பூங்காவையும் கிழக்கு அசாமையும் மாநிலத் தலைநகரான குவாஹாத்தியுடன் இணைக்கும் ஒரு முக்கிய நெடுஞ்சாலையின் பகுதியாக இருக்கும். இதன் நோக்கம், விலங்குகள் பாதுகாப்பாக சாலையைக் கடப்பதற்கு வழிவகை செய்வதாகும். தற்போது, ​​வெள்ளப்பெருக்கு காலங்களில் இந்த நெடுஞ்சாலை விலங்குகளின் இயல்பான நடமாட்டத்திற்கு இடையூறாக உள்ளது.

காசிரங்கா உயர்மட்ட வழித்தடம் பற்றி

இந்த பூங்காவில், உலகின் மிகப்பெரிய ஒற்றைக் கொம்பு காண்டாமிருகங்களின் எண்ணிக்கையைக் கொண்டதும், 37 வகையான பாலூட்டிகள் மற்றும் ஏறக்குறைய 500 வகையான பறவைகளின் இருப்பிடமாகவும் விளங்கும் காசிரங்கா தேசியப் பூங்கா, மத்திய அசாமின் நாகோன் மற்றும் கிழக்கு அசாமின் கோலாகாட் மாவட்டங்களில் உள்ள பிரம்மபுத்திரா வெள்ளச் சமவெளிகளில் அமைந்துள்ளது. பிரம்மபுத்திராவின் வடகரையில் உள்ள ஒரு முக்கிய நகரமான தேஜ்பூரை கிழக்கு அசாமில் உள்ள நகரங்களுடன் இணைக்கும் ஒரு முக்கிய சாலையான முன்னர் NH-37 என்று அழைக்கப்பட்ட தேசிய நெடுஞ்சாலை 715, பூங்காவின் தெற்கு எல்லையாக அமைகிறது. இந்த நெடுஞ்சாலைக்கு அப்பால் கார்பி ஆங்லாங் மலைகள் (hills of Karbi Anglong) அமைந்துள்ளன.

இந்த ஆண்டு அக்டோபரில், மத்திய அரசின் பொருளாதார விவகாரங்களுக்கான அமைச்சரவைக் குழு, இந்த நெடுஞ்சாலையின் 86.675 கி.மீ நீளமுள்ள இருவழிப் பாதையை நான்கு வழிப்பாதையாக விரிவுபடுத்துவதற்கு ஒப்புதல் அளித்தது. இந்தச் சாலையின் பெரும்பகுதி பூங்காவின் எல்லையோரமாக அல்லது அதன் வழியாகப் பயணிக்கிறது. அங்கீகரிக்கப்பட்ட இந்தத் திட்டத்தில், 34.5கி.மீ நீளமுள்ள ஒரு உயர்மட்ட வழித்தடம் அமைப்பது அடங்கும். இதன் மூலம், தேசியப் பூங்காவிலிருந்து கார்பி ஆங்லாங் மலைகளுக்கு விலங்குகள் கடந்து செல்வதற்காக அதன் அடியில் ஒரு பகுதி விடப்படும். அரசாங்கத்தின்படி, இந்தத் திட்டத்தில் தற்போதுள்ள 30.22 கி.மீ. சாலைகளைத் தரம் உயர்த்துவதும், ஜகலாபந்தா மற்றும் போக்காகாட் நகரங்களைச் சுற்றி 21 கி.மீ. நீளமுள்ள புதிய புறவழிச் சாலைகளை அமைப்பதும் அடங்கும். இதன் நோக்கம், கவுஹாத்தி (Guwahati), காசிரங்கா தேசியப் பூங்கா (Kaziranga National Park) மற்றும் நுமலிகர் தொழில்துறை நகரம் (industrial town of Numaligarh) ஆகியவற்றுக்கு இடையேயான தற்போதைய போக்குவரத்து நெரிசலைக் குறைப்பது, பாதுகாப்பை மேம்படுத்துவது மற்றும் நேரடி இணைப்பை அதிகரிப்பது ஆகும்.

அதிகரித்த மனித நடமாட்டம் அச்சுறுத்தலை ஏற்படுத்துகிறது

தேசிய நெடுஞ்சாலையும், அதன் வழியாகச் செல்லும் போக்குவரத்தும் தேசியப் பூங்காவில் உள்ள வனவிலங்குகளுக்கு ஒரு முக்கிய அச்சுறுத்தலாக உள்ளது.

இந்திய வனவிலங்கு அறக்கட்டளையின் இயக்குநர் டாக்டர் ரதின் பர்மனின் கூற்றுப்படி, தாழ்வான பிரம்மபுத்திரா வெள்ளச் சமவெளிகள், ஈரநிலங்கள் மற்றும் புல்வெளிகள் முதல் கார்பி ஆங்லாங்கின் உயர்நிலங்கள் வரை பரந்து விரிந்த இப்பகுதியின் நிலப்பரப்பு பல விலங்குகளின் இயற்கை வாழ்விடமாக உள்ளது.

“காசிரங்காவின் எல்லை விலங்குகளால் அல்ல, மனிதர்களாலேயே உருவாக்கப்பட்டுள்ளது என்று விளக்கினார். ஒரு இயற்கையான நிகழ்வான வெள்ளம் ஏற்படும்போது, ​​தேசியப் பூங்காவின் பெரும் பகுதிகள் நீரில் மூழ்குகின்றன. அப்போது விலங்குகள் தெற்கு நோக்கி உயர்நிலங்களை நோக்கி நகர்கின்றன. வெள்ளம் வடிந்ததும், அவை மீண்டும் தாழ்வான பகுதிகளுக்குத் திரும்புகின்றன. இருப்பினும், வளர்ச்சி இந்த முறையை மாற்றிவிட்டது. நெடுஞ்சாலையின் இருப்பு மற்றும் அருகிலுள்ள மனித குடியிருப்புகள் இந்த இயற்கையான இயக்கத்தைக் சீர்குலைத்துள்ளன.

இந்த நிதியாண்டில் சராசரியாக ஒரு நாளைக்கு 13,800 பயணிகள் வாகனங்கள் செல்லும் இந்த பரபரப்பான நெடுஞ்சாலையைக் கடக்க விலங்குகள் மேற்கொள்ளும் முயற்சிகள் உயிரிழப்பை ஏற்படுத்தக்கூடும்.

கவுஹாத்தி பல்கலைக்கழகத்தின் விலங்கியல் துறைப் பேராசிரியர்களான பிரசந்த குமார் சைகியா மற்றும் மாலபிகா ககாதி சைகியா, மற்றும் ஆராய்ச்சி அறிஞர் சோமோயிதா சூர் ஆகியோர் அடங்கிய ஒரு ஆராய்ச்சிக் குழு, அக்டோபர் 2016 மற்றும் செப்டம்பர் 2017-க்கு இடையில் NH-715 நெடுஞ்சாலையின் ஒரு பகுதியில் வாகனங்களால் ஏற்படும் விலங்குகளின் இறப்பு குறித்து 2022-ல் ஆய்வு மேற்கொண்டது. இந்தக் காலகட்டத்தில் வாகனங்களுடன் மோதியதில் இந்தியச் சிறுத்தை உட்பட 6,036 விலங்குகள் கொல்லப்பட்டதாக பதிவு செய்தனர். இந்தச் சாலை விபத்துக்களில் 63.6% ஏப்ரல் முதல் செப்டம்பர் வரையிலான வெள்ளக் காலத்தில் நிகழ்ந்ததாக அந்த ஆய்வு கண்டறிந்தது.

அந்த ஆய்வு மேலும் கூறியிருப்பதாவது, “இந்த சாலை விபத்துக்களுக்கு முக்கியக் காரணம் வாகனங்களின் அதிக வேகம்தான். எனவே, அனைத்து விலங்குகளின் பாதுகாப்பான நடமாட்டம் மற்றும் இருப்புக்காக முறையான தணிப்பு வடிவமைப்புகளுடன், வேகத்தைக் கட்டுப்படுத்த வேண்டும். நாம் வளர்ச்சிப் பணிகளை நிறுத்தக்கூடாது. மாறாக, எந்தவொரு பாதுகாக்கப்பட்ட பகுதிக்குள் ஏற்படும் ஊடுருவல்களில் வாகன மோதல்களைக் குறைக்க, அதனுடன் இணைந்து முறையான மற்றும் சுற்றுச்சூழலுக்கு உகந்த வடிவமைப்புகள் மற்றும் புதுமைகளை இணைத்துக்கொள்ள வேண்டும்.”

காசிரங்கா கோட்ட வன அதிகாரி அருண் விக்னேஷின் கூற்றுப்படி, இந்தப் பிரச்சனை காலப்போக்கில் அதிகரித்துக்கொண்டே செல்கிறது. கார்பி ஆங்லாங்-காசிரங்கா நிலப்பரப்பு வழியாகச் செல்லும் சாலையில் போக்குவரத்து நாளுக்கு நாள் அதிகரித்து வருகிறது. வாகனங்களின் தொடர்ச்சியான இயக்கமே இந்த வழித்தடத்தைத் தடுக்கிறது. எனவே, இந்த விலங்குகளுக்கு ஒரு மாற்றுப் பாதையைக் கண்டறிய வேண்டிய காலகட்டத்தில் நாம் இருக்கிறோம். உயர்மட்டச் சாலை வழியாக கனரக வாகனங்களின் போக்குவரத்தை உறுதி செய்வதன் மூலம் இதை நிர்வகிக்க முடியும்,” என்று அவர் கூறினார்.

பூங்காவின் விலங்குகளைப் பாதுகாத்தல்

தற்போதுள்ள உள்கட்டமைப்பைப் பயன்படுத்தி இந்தப் பிரச்சினையைக் கட்டுப்படுத்த சில நடவடிக்கைகள் எடுக்கப்பட்டுள்ளதாக மாவட்ட வன அதிகாரி (DFO) கூறினார். “முக்கியமான கடக்கும் பகுதிகளாக அடையாளம் காணப்பட்ட ஆறு இடங்களில் எங்களிடம் விலங்கு உணர்வி அமைப்புகள் (animal sensor systems) உள்ளன. விலங்குகள் நெடுஞ்சாலைக்கு அருகில் வந்தால் இந்த அமைப்புகள் எங்களை எச்சரிக்கும். அவ்வாறு நிகழும்போது, ​​அந்தப் பகுதியில் போக்குவரத்து உடனடியாக ஒழுங்குபடுத்தப்படுகிறது. ஆனால் இது ஒரு தற்காலிகத் தீர்வுதான்,” என்று அவர் கூறினார்.

இத்தகைய உணர்திறன் வாய்ந்த பகுதியில் இந்த அளவிலான ஒரு திட்டத்தைச் செயல்படுத்தத் தேவையான கட்டுமானப் பணிகள், அப்பகுதியில் உள்ள வனவிலங்குகளுக்கு ஒரு பெரிய இடையூறாக அமையும் என்று சில ஆர்வலர்கள் கவலை தெரிவித்துள்ளனர்.

இருப்பினும், வனவிலங்கு அறக்கட்டளையைச் (Wildlife Trust of India (WTI)) சேர்ந்த டாக்டர் பர்மன், இந்த மேம்பாலம் நீண்டகாலப் பிரச்சினைக்கு “ஒரு நிரந்தரத் தீர்வாக” இருக்கும் என்று நம்புவதாகக் கூறினார். “கட்டுமானத்தின் போது ஏற்படும் இடையூறுகளைக் குறைப்பதில் கவனம் செலுத்தும் நடவடிக்கைகளுடன், நான் இந்தப் துறையில் இருந்த 30 ஆண்டுகளில் கண்ட ஒரு பிரச்சினைக்கு இது ஒரு நிரந்தரத் தீர்வாக அமையும். காலப்போக்கில் போக்குவரத்து அதிகரித்து வருவதால், இந்தப் பிரச்சினை வளர்ந்து கொண்டேதான் இருந்தது என்றும் அவர் மேலும் கூறினார். இது ஒரு முக்கியமான சாலை, மேலும் நாம் வளர்ச்சியைத் தடுக்க முடியாது என்பதால், வளர்ச்சியையும் சுற்றுச்சூழல் பாதுகாப்பையும் சமநிலைப்படுத்த ஒரு வழி இருக்க வேண்டும் என்று அவர் கூறினார்.

  Original Article : How the Kaziranga Elevated Corridor aims to curb animal deaths in the National Park?. -Sukrita Baruah