இரயில்வே துறையில் அரசாங்கம் எடுத்த பல்வேறு முன்முயற்சிகள் என்ன? -குஷ்பூ குமாரி

 முக்கிய அம்சங்கள் :

“புல்லட் இரயில் திட்டத்தில் இன்று ஒரு முக்கிய மைல்கல் எட்டப்பட்டுள்ளது. இந்த மைல்கல், மலைச் சுரங்கப்பாதை எண் 5-ன் (MT-5 : Mountain Tunnel) பணிகளின் திருப்புமுனையாகும். இந்த திட்டத்தில் மொத்தம் ஏழு மலை சுரங்கப்பாதைகள் மற்றும் ஒரு கடலுக்கடியில் சுரங்கப்பாதை உள்ளன,” என்று புது தில்லியில் உள்ள இரயில் பவனில் இருந்து காணொலி வாயிலாக நிகழ்வைப் பார்வையிட்ட இரயில்வே அமைச்சர் அஸ்வினி வைஷ்ணவ் கூறினார்.

ஒரு சுரங்கப்பாதை இரு முனைகளிலிருந்தும் தோண்டப்பட்டு, இறுதியாக இணையும் புள்ளியே அல்லது கணமே சுரங்கப்பாதை பணிகள் நிறைவடைதல் எனப்படும். இது ஒரு முக்கியமான பணியின் நிறைவைக் குறிக்கிறது.

மலைச் சுரங்கப்பாதை எண் 5, பால்கர் மாவட்டத்தில் உள்ள விரார் மற்றும் போய்சர் புல்லட் ரயில் நிலையங்களுக்கு இடையில் அமைந்துள்ளது. இந்தச் சுரங்கப்பாதை 1.5 கி.மீ நீளமுடையது. இது இந்தத் திட்டத்தில் உள்ள மிக நீளமான மலைச் சுரங்கப்பாதையாகும். இந்தச் சுரங்கப்பாதையின் பணிகள் சுமார் 55% நிறைவடைந்துள்ளன.

புல்லட் இரயில் திட்டத்தின் 508 கி.மீ நீளத்தில், சுரங்கப்பாதைகள் 27.4 கி.மீ. ஆகும். இவற்றில், 21 கி.மீ. நிலத்தடி சுரங்கப்பாதைகளை உருவாக்குகின்றன. அதேநேரத்தில், மேற்பரப்பு சுரங்கப்பாதைகளின் மொத்த நீளம் 6.4 கி.மீ. ஆகும். மேற்பரப்பு சுரங்கப்பாதைகளில் எட்டு மலை சுரங்கப்பாதைகள் அடங்கும். அவற்றில் ஏழு மகாராஷ்டிராவில் (6.05 கி.மீ) உள்ளன. ஒன்று குஜராத்தில் (350 மீட்டர்) உள்ளது.

MT-5 சுரங்கப்பாதையில் அகழ்வாராய்ச்சி 18 மாதங்களில் நிறைவடைந்ததாக அதிகாரிகள் தெரிவித்தனர். இது ஒரு அதிநவீன துரப்பணம் மற்றும் வெடிப்பு முறையைப் பயன்படுத்தி இருபுறமும் தோண்டப்பட்டு வருகிறது. இந்த முறை புதிய ஆஸ்திரிய சுரங்கப்பாதை முறை (New Austrian Tunneling Method (NATM)) என்று அழைக்கப்படுகிறது.

பாறை உருவாக்கம் சீராக இல்லாத இடங்களில் புதிய ஆஸ்திரிய சுரங்கப்பாதை முறை (NATM) பயன்படுத்தப்படுகிறது. தள நிலைமைகளின் அடிப்படையில் இயந்திரங்கள் பயன்படுத்தப்பட்டு வெடித்தல் மூலம் சிறிய அளவில் தோண்டும் பணி மேற்கொள்ளப்படுகிறது.

செப்டம்பர் 2025-ல், கான்சோலி மற்றும் ஷில்பாடா இடையே 4.88 கி.மீ நீளமுள்ள ஒரு நிலத்தடி சுரங்கப்பாதையில் ஒரு முக்கிய முன்னேற்றம் எட்டப்பட்டது. இந்த சுரங்கப்பாதை மகாராஷ்டிராவில் உள்ள பாந்த்ரா-குர்லா வளாகம் (Bandra-Kurla Complex (BKC)) மற்றும் ஷில்பட்டா இடையே கட்டப்பட்ட ஒரு பெரிய, 21 கி.மீ. சுரங்கப்பாதையின் ஒரு பகுதியாகும். இந்த நிலத்தடி சுரங்கப்பாதையில் தானே க்ரீக்கின் (Thane Creek) கீழ் 7 கிமீ நீளமுள்ள கடலுக்கடியில் ஒரு பகுதியும் அடங்கும்.

தற்போது, ​​அனைத்து சுரங்கப்பாதைகளிலும் பணிகள் நடந்து வருகின்றன. மகாராஷ்டிராவில், 820 மீட்டர் நீளம் கொண்ட மலை சுரங்கப்பாதை எண். 1 (MT-1), 15% கட்டுமானப் பணியை எட்டியுள்ளது. அதேநேரத்தில், 228 மீட்டர் MT-2 இன்னும் ஆயத்த நிலையில் உள்ளது. 1.4 கிமீ நீளம் கொண்ட MT-3, 35.5% நிறைவடைந்துள்ளது. அதேநேரத்தில், 1.26 கிமீ MT-4 31% நிறைவடைந்துள்ளது. இதேபோல், 453 மீட்டர் MT-6 35% முன்னேற்றத்தையும், 417 மீட்டர் MT-7 28% நிறைவடைந்துள்ளது.

உங்களுக்குத் தெரியுமா?

புல்லட் இரயில் திட்டம் குஜராத் மற்றும் தாத்ரா & நகர் ஹவேலியில் 352 கி.மீ தூரத்தையும், மகாராஷ்டிராவில் 156 கி.மீ தூரத்தையும் உள்ளடக்கியுள்ளது. நவம்பர் 2025 நிலவரப்படி, இந்த திட்டம் 55.63% கட்டுமானப் பணிகளையும், 69.62% நிதிப் பணிகளையும் எட்டியுள்ளது. இன்றுவரை, 412 கி.மீ அடித்தளப் பணிகள், 405 கி.மீ தூண்கள் (piers), 344 கி.மீ கர்டர்-வார்ப்பு (girder-casting) மற்றும் 330 கி.மீ கர்டர்-ஏவுதல் (girder-launching) ஆகியவை நிறைவடைந்துள்ளன.

இது இந்தியாவின் முதல் லட்சிய புல்லட் இரயில் திட்டம் (bullet train project), நிலம் கையகப்படுத்துதல் சிக்கல்கள் மற்றும் கொரோனா வைரஸ் தொற்றுநோய் காரணமாக தாமதங்களால் பாதிக்கப்பட்டுள்ளது. ஆரம்பத்தில், 2022-ல் செயல்பாட்டுக்கு வரும் என்று எதிர்பார்க்கப்பட்டது. இருப்பினும், இப்போது 2029-ம் ஆண்டின் இறுதிக்குள் முழுமையாக நிறைவடையும் என்று எதிர்பார்க்கப்படுகிறது.

வியாழக்கிழமை, இரயில்வே அமைச்சர் அஸ்வினி வைஷ்ணவ், முதல் புல்லட் இரயில் ஆகஸ்ட் 15, 2027 அன்று சூரத்-பிலிமோரா பாதையில் இயக்கப்படும் என்று கூறினார். இதன் முழு திட்டமும் படிப்படியாக பல கட்டங்களாகத் தொடங்கப்படும். சூரத்-பிலிமோரா பாதையைத் தொடர்ந்து வாபி-சூரத், வாபி-அகமதாபாத் மற்றும் தானே-அகமதாபாத் பிரிவுகள் திறக்கப்படும். மும்பை-அகமதாபாத் வழித்தடம் இறுதி கட்டத்தில் தொடங்கும்.Original Article : What are the various initiatives taken by the government in the railways sector? -Khushboo Kumari