இரு நாடுகளுக்கும் இடையேயான பதட்டமான உறவுகளைச் சரிசெய்யும் முயற்சியில், இந்தியாவில் அமெரிக்க தூதராக நியமிக்கப்பட்ட செர்ஜியோ கோர் ஒரு சமரசமான நிலைப்பாட்டை எடுத்த ஒரு நாள் கழித்து, வெளியுறவு அமைச்சர் எஸ்.ஜெய்சங்கர் மற்றும் அமெரிக்க வெளியுறவுச் செயலாளரும் தேசிய பாதுகாப்பு ஆலோசகருமான மார்கோ ரூபியோ செவ்வாயன்று தொலைபேசியில் பேசி இருதரப்பு வர்த்தக பேச்சுவார்த்தைகள், முக்கியமான கனிமங்கள், பாதுகாப்பு, அணுசக்தி ஒத்துழைப்பு, எரிசக்தி மற்றும் அஅடுத்த மாதம் நடைபெற வாய்ப்புள்ள ஒரு சந்திப்பு குறித்து விவாதித்தனர்.
முக்கிய அம்சங்கள் :
வர்த்தக ஒப்பந்தப் பேச்சுவார்த்தைகள் முக்கியமானவை என்றாலும், முக்கியமான கனிமங்கள், பாதுகாப்பு, எரிசக்தி மற்றும் அணுசக்தி ஒத்துழைப்பு போன்ற பிற துறைகளின் முக்கியத்துவத்தை குறைத்து மதிப்பிட முடியாது. அமெரிக்கா (வாஷிங்டன்) மற்றும் இந்தியா (டெல்லி) இரண்டிற்கும், இந்த பிரச்சினைகள் ஒரு வலுவான கூட்டமைப்புக்கு மிகவும் முக்கியமானவை.
ரூபியோவும் ஜெய்சங்கரும் இருநாடு தரப்பு வருகையின்போது சந்திப்பார்களா அல்லது அடுத்த மாதம் டெல்லியில் நடைபெறும் செயற்கை நுண்ணறிவு (AI) இம்பாக்ட் உச்சிமாநாடு (AI Impact Summit) உட்பட பலதரப்பு நிகழ்வின்போது சந்திப்பார்களா என்பது தெளிவாகத் தெரியவில்லை. விவாதங்களுக்குப் பிறகு, ஜெய்சங்கர் இதை ஒரு "நல்ல உரையாடல்" என்று குறிப்பிட்டார். அதேநேரத்தில், கோர் அதை "நேர்மறையான அழைப்பு" என்று விவரித்தார்.
சமீபத்தில் இயற்றப்பட்ட n-அணுசக்திச் சட்டம் (n-energy law) குறித்துக் குறிப்பிட்ட அவர், "இந்தியாவை மாற்றியமைப்பதற்கான அணுசக்தியை நிலையான முறையில் பயன்படுத்துதல் மற்றும் மேம்படுத்துதல் மசோதாவை இயற்றியதற்காகச் செயலாளர் இந்தியாவைப் பாராட்டினார். இந்த முக்கிய முன்னேற்றத்தைப் பயன்படுத்தி, அமெரிக்க-இந்தியா குடிமை அணுசக்தி ஒத்துழைப்பை மேம்படுத்தவும், அமெரிக்க நிறுவனங்களுக்கு வாய்ப்புகளை விரிவுபடுத்தவும், பகிரப்பட்ட எரிசக்திப் பாதுகாப்பு இலக்குகளை முன்னெடுத்துச் செல்லவும், முக்கியமான கனிம விநியோகச் சங்கிலிகளைப் பாதுகாக்கவும் அவர் ஆர்வம் தெரிவித்தார்." என்றார்.
திங்களன்று, அமெரிக்க தூதரகத்தின் பொறுப்பை ஏற்றுக்கொண்ட செர்ஜியோ கோர், செவ்வாய்க்கிழமை வர்த்தக பேச்சுவார்த்தையாளர்கள் பேசுவார்கள் என்றும், அமெரிக்கா தலைமையிலான இராஜதந்திர ரீதியில் முயற்சியான பாக்ஸ் சிலிக்காவிற்கு (Pax Silica) இந்தியா அழைக்கப்படும் என்றும் கூறினார்.
ரூபியோ-ஜெய்சங்கர் உரையாடல் ஒரு நாள் கழித்து நடந்தது. மேலும், பேச்சுவார்த்தையின் முக்கிய அம்சங்கள் செர்ஜியோ கோர் கூறியதைப் போலவே இருந்தன. பல மாத பதட்டத்திற்குப் பிறகு இருதரப்பு உறவுகளை மேம்படுத்த இரு தரப்பினரும் தயாராக இருந்ததை இது காட்டியது.
அக்டோபர் 2025-ல், கோலாலம்பூரில் நடந்த ஆசியான் மற்றும் கிழக்கு ஆசியத் தலைவர்கள் உச்சிமாநாட்டின் ஒரு பகுதியாக, இந்தியா ரஷ்ய எண்ணெய் வாங்கியதற்கு 25 சதவீத அபராதம், நெருக்கமான அமெரிக்க-பாகிஸ்தான் உறவுகள் மற்றும் கடந்த ஆண்டு மே மாதம் இந்தியாவிற்கும் பாகிஸ்தானுக்கும் இடையில் போர்நிறுத்தத்தை ஏற்படுத்துவதாக டிரம்ப் தொடர்ந்து கூறியது உள்ளிட்ட 50 சதவீத வரிகளைத் தொடர்ந்து ஏற்பட்ட இருநாடுகளின் மத்தியில், ஜெய்சங்கர் ரூபியோவுடன் பேச்சுவார்த்தை நடத்தினார்.
மேலும், நவம்பர் 2025-ல், கனடாவில் நடந்த G7 வெளியுறவு அமைச்சர்கள் கூட்டத்தின் ஒரு பகுதியாக இரு அமைச்சர்களும் சந்தித்தனர். அவர்களின் பேச்சுவார்த்தைகள் வர்த்தகம் மற்றும் விநியோகச் சங்கிலிகள்மீது கவனம் செலுத்தின. உக்ரைன் மோதல், மத்திய கிழக்கு நிலைமை மற்றும் இந்தோ-பசிபிக் பற்றிய கருத்துக்களையும் அவர்கள் பரிமாறிக் கொண்டனர்.
இந்த முறை, தொலைபேசி அழைப்பிற்குப் பிறகு வந்த செய்தி, வர்த்தக ஒப்பந்தம் இன்னும் முடிவடையாத நேரத்தில், இருநாடுகளின் உறவைப் பாதிக்கும் இருதரப்பு பிரச்சினைகள் குறித்து அவர்கள் பேசியது தெளிவாகிறது. செப்டம்பர் 2025 முதல் இந்தியா தனது ரஷ்ய எண்ணெய் இறக்குமதியைக் குறைத்துள்ளது. இது அமெரிக்கா 25 சதவீத தண்டனை வரிகளை நீக்க வேண்டும் என்று வாஷிங்டனுக்கு ஒரு சிக்னலாகப் பார்க்கப்படுகிறது.
25 சதவீத வரித் தள்ளுபடியை ரத்து செய்வது, இரு தரப்பினரும் மீதமுள்ள 25 சதவீதத்திற்கான வரியைக் குறைப்பதற்காக வர்த்தக ஒப்பந்தம் குறித்து தொடர்ந்து பேச்சுவார்த்தை நடத்தி வரும் நிலையில், உறவில் உள்ள அழுத்தத்தைக் குறைக்க உதவும் என்று வட்டாரங்கள் தெரிவித்தன.
ஈரானுடன் வர்த்தகம் செய்யும் எந்தவொரு நாடும் அமெரிக்காவுடனான எந்தவொரு வர்த்தகத்திற்கும் 25 சதவீத வரியை எதிர்கொள்ள நேரிடும் என்று அமெரிக்க அதிபர் டொனால்ட் டிரம்ப் எச்சரித்துள்ளார்.
வெள்ளை மாளிகையின் கொள்கை குறித்த அதிகாரப்பூர்வ ஆவணங்கள் தனது இணையதளத்தில் வெளியிடவில்லை அல்லது டிரம்ப் வரிகளை விதிக்கப் பயன்படுத்தும் சட்டப்பூர்வ அதிகாரம் பற்றிய தகவலோ அல்லது அவை ஈரானின் அனைத்து வர்த்தக நட்பு நாடுகளையும் இலக்காகக் கொண்டதா என்பது பற்றிய தகவலோ இல்லை.
இந்த புதிய வரிகள் முதன்மையாக ஈரானின் மிகப்பெரிய வர்த்தக நட்பு நாடான சீனாவை பாதிக்கக்கூடும் என்றாலும், இந்தியாவும் ஈரானுடன் நீண்டகால வர்த்தக உறவுகளைக் கொண்டுள்ளது மற்றும் ஈரானின் துறைமுக உள்கட்டமைப்பில் கணிசமான முதலீட்டைக் கொண்டுள்ளது. இருப்பினும், அணுசக்தித் திட்டம் காரணமாக ஈரானின் மீதான தடைகள் ஏற்கனவே பல ஆண்டுகளாக இந்தியாவுடனான வர்த்தக உறவுகளை பலவீனப்படுத்தியுள்ளன.
ஏற்கனவே 50 சதவீத அமெரிக்க வரிவிதிப்புகளை எதிர்கொள்ளும் இந்தியா, இதனால் அதிகம் பாதிக்கப்படப் போவதில்லை என்ற கருத்து நிலவுகிறது. சீனா போன்ற நாடுகளுடன் ஒப்பிடும்போது ஈரானுடனான இந்தியாவின் வர்த்தகம் சிறியது. இது 2024-25-ல் $1.6 பில்லியனாக இருந்தது. மேலும் 2025-26-ல் $1.2 பில்லியன் டாலராக இருக்கும் என மதிப்பிடப்பட்டுள்ளது. இந்தியாவின் முதல் 50 வர்த்தக நட்பு நாடுகளில் ஈரான் இடம்பெறவில்லை.
உங்களுக்குத் தெரியுமா?
பாக்ஸ் சிலிக்கா (Pax Silica) என்பது செயற்கை நுண்ணறிவு (AI) மற்றும் தொழில்நுட்ப விநியோகச் சங்கிலிகளைப் பாதுகாப்பதில் கவனம் செலுத்தும் அமெரிக்கா தலைமையிலான ஒரு முயற்சியாகும். இது முக்கிய தொழில்நுட்பங்கள் பாதுகாப்பானவை, நம்பகமானவை மற்றும் விரோத நடவடிக்கையால் கட்டுப்படுத்தப்படாமல் இருப்பதை உறுதி செய்வதற்காக "நட்பு மற்றும் நம்பகமான" நாடுகளை ஒன்றிணைப்பதை நோக்கமாகக் கொண்டுள்ளது என்று அமெரிக்க வெளியுறவுத்துறை தெரிவித்துள்ளது.
இந்த முயற்சி முக்கியமான கனிமங்கள் மற்றும் எரிசக்தி உள்ளீடுகள் முதல் மேம்பட்ட உற்பத்தி மற்றும் குறைமின்கடத்திகள் (semiconductors) வரை பாதுகாப்பான விநியோகச் சங்கிலியை உருவாக்குவதை நோக்கமாகக் கொண்டுள்ளது. இந்த முயற்சியில் இந்தியா சேர்க்கப்படவில்லை.
Original Article : What is the significance of the SHANTI Act for US-India civil nuclear cooperation? -Khushboo Kumari , Roshni Yadav