குழுக்கள் அறிவுப் பரவலை உருவாக்குகின்றன. பணியாளர் இடப்பெயர்வு, முறைசாராத்தொடர்புகள் மற்றும் பகிரப்பட்ட சேவை வழங்குநர்கள் மூலம் தொழில்நுட்ப அறிவு விரைவாகப் பரவுகிறது. மேலும், குழுக்கள் திறமையாளர்களை ஈர்த்துத் தக்கவைத்துக் கொள்கின்றன.
ஜந்தர் மந்தரில் சில நாட்களுக்கு முன்னர் நடந்த போராட்டங்கள், உடனடியான நீட் வினாத்தாள் கசிவு சர்ச்சையைவிட ஆழமான இளைஞர் வேலையின்மை எனும் ஒரு பிரச்சினையை வெளிப்படுத்தின. வேலையில்லாத இந்தியர்களில் அதிக அளவில் இளைஞர்களாகவும் படித்தவர்களாகவும் உள்ளனர். அதேசமயம் குறைவான வேலைவாய்ப்பு பரவலாக நீடிக்கிறது. செயற்கை நுண்ணறிவால் ஏற்படும் சிக்கல்கள் தற்போதுள்ள வேலைகளுக்கு அச்சுறுத்தலாக இருப்பதால், இந்தியாவிற்கு வலுவான வேலைவாய்ப்பு உருவாக்கும் இயந்திரங்கள் தேவைப்படுகின்றன. மேலும், குறு, சிறு மற்றும் நடுத்தர நிறுவனங்கள் (Micro, Small and Medium Enterprises (MSME)) துறை அதற்கு சிறந்த தேர்வுகளில் ஒன்றாகும்.
2026-ஆம் ஆண்டு குறு, சிறு மற்றும் நடுத்தரத் தொழில்கள் மேம்பாட்டு (திருத்த) மசோதா, தாமதமான பணப் பரிவர்தனைகளுக்கு தீர்வு காண்பதன் மூலமும், சிக்கல்களைத் சரி செய்து எளிதாக்குவதன் மூலமும் மற்றும் சில இணக்கச் சுமைகளைக் (compliance burdens) குறைப்பதன் மூலமும் உதவ முடியும். ஆனால், இன்னும் பல நடவடிக்கைகள் தேவைப்படுகின்றன. இந்தியாவின் 63 மில்லியன் குறு, சிறு மற்றும் நடுத்தர நிறுவனங்கள் 320 மில்லியனுக்கும் அதிகமான மக்களுக்கு வேலைவாய்ப்பு அளிக்கின்றன. மொத்த உள்நாட்டு உற்பத்தியில் 31 சதவீதமும், உற்பத்தி வெளியீட்டில் 35 சதவீதமும், ஏற்றுமதியில் 49 சதவீதமும் பங்களிக்கின்றன. இருந்த போதிலும், இந்தத்துறை அதிக அளவில் முறைசாராததாகவும் (informal), பிளவுப்பட்டு இருப்பதாகவும், குறைந்த மதிப்புள்ள செயல்பாடுகளில் மட்டுமே கவனம் செலுத்துவதாகவும் உள்ளது. சிறி நிறுவனங்கள் இன்னும் பெரிய தடைகளை எதிர்கொள்கின்றன, குறிப்பாக குறைவான கடன்களைப் பெறுவதில் உள்ள வரையறைகள் மற்றும் சரக்கு மற்றும் சேவை வரிகள் (GST), தொழிலாளர், வரி தொடர்பான விதிமுறைகளை நிறைவேற்றுவதில் உள்ள சுமைகளை அவை எதிர்கொள்கின்றன.
அமெரிக்காவும் சீனாவும் தனித்தனி நிறுவனங்களுக்கு ஒன்றன்பின் ஒன்றாக ஆதரவளிப்பதன் மூலம் தங்கள் தொழில்துறை பலத்தை உருவாக்கவில்லை. மாறாக, அவர்கள் தொழில் தொகுப்புகளை உருவாக்கினர். விநியோகர்கள், தொழிலாளர்கள், ஆராய்ச்சி நிறுவனங்கள் மற்றும் மூலதனம் ஆகியவை ஒன்றுக்கொன்று நெருக்கமாக அமைந்து, ஒன்றையொன்று வலுப்படுத்தும் அடர்த்தியான தொழில்சார் சுற்றுச்சூழல் அமைப்புகளை (ecosystems) அவர்கள் உருவாக்கினர். பல்கலைக்கழகங்கள் எவ்வாறு தொழில் தொகுப்புகளை நிலைநிறுத்த முடியும் என்பதை அமெரிக்காவின் அனுபவம் காட்டுகிறது. நார்த் கரோலினாவின் ரிசர்ச் ட்ரையாங்கிளில், டியூக் , யு.என்.சி-சாப்பல் ஹில்மற்றும் என்.சி ஸ்டேட் போன்ற கல்வி நிறுவனங்கள் ஆராய்ச்சியை தொழில்துறையுடன் இணைப்பதன் மூலம் உயிரித்தொழில்நுட்பம் மற்றும் மருந்துவத்துறை சுற்றுச்சூழல் அமைப்புகளை உருவாக்க உதவின. சீனாவின் குவாங்டாங்பகுதி, குறிப்பாக ஷென்சென், நிலம், வரிச் சலுகைகள் மற்றும் உள்கட்டமைப்புடன் கூடிய தொழில்துறை மண்டலங்கள் எவ்வாறு வலுவான விநியோக வலையமைப்புகளை உருவாக்க முடியும் என்பதைக் காட்டுகிறது. இது நிறுவனங்களை விரைவாக வடிவமைக்கவும், தயாரிக்கவும் மற்றும் முன்மாதிரிகளை (prototypes) உருவாக்கவும் அனுமதிக்கிறது. சீனாவின் "லிட்டில் ஜெயண்ட்" திட்டமும், நிதியுதவி, வரி ஆதரவு மற்றும் ஆராய்ச்சி மற்றும் மேம்பாட்டு உதவிகள் மூலம் குறிப்பிட்ட குறுகிய பிரிவுகளில் தொழில்நுட்பரீதியாக வலுவான சிறு நிறுவனங்களை ஆதரிக்கிறது.
தொழிலாளர் தொகுப்புகள் (Clusters) அறிவுப் பரிமாற்றத்தை உருவாக்குகின்றன. தொழிலாளர் நகர்வு, முறைசாரா தொடர்புகள் மற்றும் பகிரப்பட்ட சேவை வழங்குநர்கள் மூலம் தொழில்நுட்ப அறிவு விரைவாக பரவுகிறது. இத்தகைய மறைமுகமான அறிவை நீண்ட தூரத்திற்கு மாற்றுவது கடினம். தொழில் தொகுப்புகள் திறமையானவர்களை ஈர்க்கவும் தக்கவைக்கவும் செய்கின்றன. தனிமைப்படுத்தப்பட்ட ஒரு குறு, சிறு மற்றும் நடுத்தர நிறுவனங்கள் சிறப்புத்தொழிலாளர்களை வேலைக்கு அமர்த்துவதில் சிரமப்படுகிறது. ஆனால், பல நிறுவனங்களின் தொகுப்பு உண்மையான தொழிலாளர் சந்தையை உருவாக்குகிறது. அந்த இடத்தை திறமையானவர்களுக்கு மிகவும் கவர்ச்சிகரமானதாக மாற்றுகிறது. மூன்றாவதாக, பரிசோதனைக்கூடங்கள் (testing labs), கழிவுநீர் சுத்திகரிப்பு நிலையங்கள், குளிர்பதனக்கிடங்குகள், வடிவமைப்பு மற்றும் தளவாட மையங்கள் (logistics hubs) போன்ற உள்கட்டமைப்புகளைப் பகிர்ந்துகொள்வதன் மூலம் தொழிலாளர் தொகுப்புகள் நிலையான செலவுகளைக் குறைக்கின்றன. இந்த வசதிகள் ஒரு சிறிய நிறுவனத்திற்கு மிகவும் விலை உயர்ந்தவை. ஆனால், பல நிறுவனங்கள் பகிர்ந்து கொள்ளும்போது மலிவானதாக மாறுகின்றன.
குறு, சிறு மற்றும் நடுத்தர நிறுவனங்கள் தொழிலாளர் தொகுப்பு மேம்பாட்டுத் திட்டம் மற்றும் பி.எம் மித்ரா (PM MITRA) ஜவுளிப் பூங்காக்கள் போன்ற தொகுப்பு அடிப்படையிலான முன்முயற்சிகளை இந்தியா ஏற்கனவே கொண்டுள்ளது. இருப்பினும், இவற்றில் பல உண்மையான சுற்றுச்சூழல் அமைப்புகளை உருவாக்குபவைகளாக இல்லாமல் உள்கட்டமைப்பு மானியங்களைப் போலவே இன்னும் செயல்படுத்தப்பட்டு வருகின்றன. பின்வரும் கொள்கைகள் இதற்கு உதவக்கூடும். முதலாவதாக, பொதுவான தொழில்துறை மையங்களில் இருந்து சிறப்புத் தொகுப்புகளுக்கு (specialised clusters) இந்தியா மாற வேண்டும். தொடர் இல்லாத வணிகங்களை ஒரே பூங்காவில் கலப்பதற்குப்பதிலாக, புனேவில் வாகன உதிரிபாகங்கள், ஹைதராபாத்தில் மருந்துகள் மற்றும் ஸ்ரீபெரும்புதூரில் எலக்ட்ரானிக்ஸ் போன்ற ஆழமான, துறை சார்ந்த மையங்களில் வளங்கள் உருவாக்கப்பட வேண்டும். இரண்டாவதாக, இந்தியா தனது சொந்த ""சிறிய பிரம்மாண்டமான" (Little giant) திட்டத்தின் பதிப்பை உருவாக்க வேண்டும். அனைத்து குறு, சிறு மற்றும் நடுத்தர நிறுவனங்களையும் ஒரே மாதிரியாகக் கருதுவதற்குப் பதிலாக, துல்லியமான வரம்புகள், சிறப்பு இரசாயனங்கள் அல்லது பாதுகாப்பு உதிரிபாகங்கள் போன்ற சிறப்புத்துறைகளில் ஏற்கனவே சிறப்பாக செயல்படும் "மறைக்கப்பட்ட வெற்றியாளர்களை" கொள்கை அடையாளம் காண வேண்டும். இந்த நிறுவனங்கள் பின்னர் பிரத்யேக கடன் வசதிகள், விரைவான காப்புரிமை செயலாக்கம், ஆராய்ச்சி மற்றும் மேம்பாடு ஆதரவு மற்றும் முன்னுரிமை ஆகியவற்றைப் பெறலாம்.
மூன்றாவதாக, நிதியுதவி (financing) என்பது கிளஸ்டர் மட்டத்தில் தீர்க்கப்பட வேண்டும். குறு, சிறு மற்றும் நடுத்தர நிறுவனங்கள் கடன்பெறும் இடைவெளி பெரிதாக உள்ளது. ஆனால் வங்கிகள் இன்னும் நிறுவனங்களை தனித்தனியாகவே மதிப்பிடுகின்றன. பகிரப்பட்ட பிணையம் (shared collateral), வாங்குபவர்-விற்பனையாளர் உறவுகள் மற்றும் கூட்டுச்செயல்திறன் ஆகியவற்றை மதிப்பிடும் கிளஸ்டர் அடிப்படையிலான கடன் வழங்கல், தகவல் சமச்சீரற்ற தன்மையைக் குறைத்து அபாயத்தைக் குறைக்க முடியும். திருப்பூர் ஜவுளி தொகுப்பு, சிட்பி மற்றும் தொகுப்புகளை மையமாகக் கொண்ட அல்லாத நிதி நிறுவனங்கள் (NBFCs) மூலம் விரிவுபடுத்தக்கூடிய ஒரு பயனுள்ள முன்மாதிரியை வழங்குகிறது. நான்காவதாக, பல்கலைக்கழகங்கள் குறு, சிறு மற்றும் நடுத்தர நிறுவனங்கள் சுற்றுச்சூழல் அமைப்பின் மையப்பகுதிக்குக் கொண்டுவரப்பட வேண்டும். இந்தியாவில், சிறந்த பல்கலைக்கழகங்கள் பெரும்பாலும் அருகிலுள்ள தொழில்துறையிலிருந்து துண்டிக்கப்பட்டே காணப்படுகின்றன. இதற்கு மாறாக, சீனா மற்றும் அமெரிக்க கிளஸ்டர் மாதிரிகள் திறமைகள், பயன்பாட்டு ஆராய்ச்சி, ஆய்வக உள்கட்டமைப்பு மற்றும் கண்டுபிடிப்புகளை வழங்கும் முதன்மை ஆதாரங்களாக பல்கலைக்கழகங்களையே நம்பியுள்ளன. சுருக்கமாகச் சொன்னால், இந்தியாவின் குறு, சிறு மற்றும் நடுத்தர நிறுவனங்கள் உத்தி சார்ந்த தனிமைப்படுத்தப்பட்ட ஆதரவிலிருந்து ஒட்டுமொத்த சுற்றுச்சூழல் அமைப்பை (ecosystem) உருவாக்கும் திசையை நோக்கி மாற வேண்டும். வலுவான தொகுப்புகள், சிறந்த நிதியுதவி மற்றும் நெருக்கமான பல்கலைக்கழக-தொழில்துறை இணைப்புகள் ஆகியவை குறு, சிறு மற்றும் நடுத்தர நிறுவனங்களை வேலைவாய்ப்புகள், உற்பத்தித்திறன் மற்றும் ஏற்றுமதிக்கான சக்திவாய்ந்த இயந்திரங்களாக மாற்ற உதவும்
நூலாசிரியர்கள், மஹிந்திரா பல்கலைக்கழகத்தின் பொருளாதாரக்கொள்கை மையத்தின் பேராசிரியர்களும் இணை நிறுவனர்களும் ஆவர்.