ஷாங்காய் ஒத்துழைப்பு அமைப்பின் உச்சிமாநாடு 2026: பிஷ்கேக் பிரகடனம் கூறுவது என்ன? -ரவீணா பனேட்டா

கிர்கிஸ்தானில் நடைபெற்ற ஷாங்காய் ஒத்துழைப்பு அமைப்பின் 2026-ஆம் ஆண்டுக்கான உச்சிமாநாட்டில் கலந்துகொண்ட தலைவர்கள் பிஷ்கேக் பிரகடனத்தில் கையெழுத்திட்டனர். அதிலிருந்து பெறப்பட்ட முக்கிய அம்சங்கள் என்னென்ன, மேலும் அந்த உச்சிமாநாட்டின்போது இந்தியப் பிரதமர் என்ன கூறினார்? மேலும், ஷாங்காய் ஒத்துழைப்பு அமைப்பின் தோற்றம் மற்றும் நோக்கங்களைப் பற்றி அறிந்துகொள்வோம்.

26-வது ஷாங்காய் ஒத்துழைப்பு அமைப்பின் தலைவர்கள் குழு உச்சிமாநாடு 2026-ஆம் ஆண்டு ஆகஸ்ட் மாதம் 31-ஆம் தேதி முதல் செப்டம்பர் மாதம் 1-ஆம் தேதி வரை கிர்கிஸ்தானின் பிஷ்கேக் நகரில் நடைபெற்றது. "ஷாங்காய் ஒத்துழைப்பு அமைப்பின் 25 ஆண்டுகள்: நிலையான அமைதி, வளர்ச்சி மற்றும் செழிப்புக்காக இணைந்து" என்ற கருப்பொருளுடன், ஷாங்காய் ஒத்துழைப்பு அமைப்பு தொடங்கப்பட்டதன் 25-வது ஆண்டு நிறைவைக் குறித்தது. பிராந்திய பாதுகாப்பு, பொருளாதார ஒத்துழைப்பு மற்றும் உலகளாவிய பிரச்சினைகள் குறித்து விவாதித்து தலைவர்கள் 'பிஷ்கேக் பிரகடனத்தில்' கையெழுத்திட்டனர்.

முக்கிய அம்சங்கள்:

1. பயங்கரவாதத்திற்கு எதிரான போராட்டத்தில் ‘இரட்டை நிலைகள்’ ஏற்றுக்கொள்ள முடியாதவை என்பதை வலியுறுத்தி, பயங்கரவாதிகளின் எல்லை தாண்டிய நடமாட்டம் உட்பட பயங்கரவாதத்தை எதிர்க்க சர்வதேச சமூகத்திற்கு ஷாங்காய் ஒத்துழைப்பு அமைப்பின் (Shanghai Cooperation Organisation (SCO)) உச்சிமாநாட்டில் தலைவர்கள் கடந்த செவ்வாய்க்கிழமை செப்டம்பர் மாதம் 1-ஆம் தேதி அழைப்பு விடுத்தனர்.

2. ஷாங்காய் ஒத்துழைப்பு அமைப்பில் (SCO) உள்ள இந்தியா, பாகிஸ்தான், ஈரான், ரஷ்யா, சீனா, பெலாரஸ் மற்றும் மத்திய ஆசிய நாடுகள் ஏற்றுக்கொண்ட 'பிஷ்கேக் பிரகடனத்தின்' (Bishkek Declaration) ஒரு பகுதியாக அமைந்துள்ளது. இந்தியாவில் நடக்கும் எல்லை தாண்டிய பயங்கரவாதத்திற்கு பாகிஸ்தானே பொறுப்பு என்று இந்தியா எப்போதும் கூறி வருவதால், இந்தப் பிரகடனம் முக்கியத்துவம் பெறுகிறது. 

3. உறுப்பு நாடுகள், பயங்கரவாதம், பிரிவினைவாதம் மற்றும் தீவிரவாதத்தை எதிர்த்துப் போராடுவதற்கான தங்களது உறுதியான உறுதிப்பாட்டை மீண்டும் வலியுறுத்துவதோடு, சுயநல நோக்கங்களுக்காக பயங்கரவாத, பிரிவினைவாத மற்றும் தீவிரவாதக் குழுக்களைப் பயன்படுத்திக் கொள்ளும் முயற்சிகள் ஏற்றுக்கொள்ள முடியாதவை என்று பயங்கரவாதம் குறித்த கூட்டறிக்கையில் தெரிவிக்கப்பட்டுள்ளது. மேலும், பயங்கரவாத மற்றும் தீவிரவாத அச்சுறுத்தல்களை எதிர்கொள்வதில் இறையாண்மை கொண்ட நாடுகளின் மற்றும் அவற்றின் தகுதியான அதிகார அமைப்புகளின் முன்னணிப் பங்கை அவை அங்கீகரிக்கின்றன.

4. ஷாங்காய் ஒத்துழைப்பு அமைப்பின் உறுப்பு நாடுகள், அரசாங்க அமைப்புகளையும் உறுப்பு நாடுகளின் கட்டமைப்புகளையும் சீர்குலைக்கும் முயற்சிகளை ஏற்றுக்கொள்ள முடியாதவையாகக் கருதுகின்றன. இத்தகைய நடவடிக்கைகள் சர்வதேச சட்டத்திற்கு முரணானவை என்றும், ஐ.நா. சாசனத்தில் பொறிக்கப்பட்டுள்ள நாடுகளின் சமத்துவம் மற்றும் உள்நாட்டு விவகாரங்களில் தலையிடாமை ஆகிய கொள்கைகளைச் சீர்குலைக்கின்றன என்றும் அவை வலியுறுத்துகின்றன.

5. பயங்கரவாதத்தை அதன் அனைத்து வடிவங்களிலும் வெளிப்பாடுகளிலும் உறுப்பு நாடுகள் கடுமையாகக் கண்டிக்கின்றன. பயங்கரவாதத்திற்கு எதிரான போராட்டத்தில் ‘இரட்டை நிலைகள்’ ஏற்றுக்கொள்ள முடியாதவை என்பதை வலியுறுத்துகின்றன. மேலும், சர்வதேசச் சட்டம் மற்றும் ஐக்கிய நாடுகள் அவையின் கொள்கைகளுக்கு ஏற்ப, தொடர்புடைய ஐக்கிய நாடுகள் பாதுகாப்புக் குழு தீர்மானங்கள் மற்றும் ஐக்கிய நாடுகள் உலகளாவிய பயங்கரவாத எதிர்ப்பு உத்திசார் நிலையை முழுமையாக நடைமுறைப்படுத்துவதன் மூலம், அனைத்து பயங்கரவாத அமைப்புகளையும் கூட்டாக எதிர்கொள்ள ஐக்கிய நாடுகள் சபை முக்கியப் பங்காற்ற வேண்டும் என்றும், எல்லை கடந்த பயங்கரவாதிகளின் நடமாட்டம் உட்பட பயங்கரவாதத்தை எதிர்க்க சர்வதேச சமூகம் முன்வர வேண்டும் என்றும் கேட்டுக்கொள்கின்றன,” என்று பிரகடனத்தில் தெரிவிக்கப்பட்டுள்ளது.

6. அமெரிக்கா-இஸ்ரேல் மற்றும் ஈரானுக்கு இடையே ஆறு மாதங்களுக்கும் மேலாகத் தொடர்ந்து வரும் போர் குறித்து, பிஷ்கேக் பிரகடனம் (Bishkek Declaration) கூறியதாவது: “மத்திய கிழக்கு பிராந்தியத்திலும் ஈரானைச் சுற்றிலும் ஏற்படும் மாற்றங்கள் குறித்து உறுப்பு நாடுகள் ஆழ்ந்த கவலையைத் தெரிவிக்கின்றன.

7. ஈரான் இஸ்லாமியக் குடியரசின் நிலப்பரப்பு மீது நடத்தப்பட்ட இராணுவத் தாக்குதல்களில் ஏராளமான பொதுமக்கள் உயிரிழந்துள்ளதுடன், அந்நாட்டின் பொருளாதாரத்திற்கும் கணிசமான சேதம் ஏற்பட்டுள்ளதை கண்டிக்கும் வகையில், ஷாங்காய் ஒத்துழைப்பு அமைப்பின் (SCO) முந்தைய நிலையை அவை மீண்டும் வலியுறுத்துகின்றன.

8. இத்தகைய நடவடிக்கைகள் சர்வதேசச் சட்டம் மற்றும் ஐக்கிய நாடுகள் பிரகடனத்தின் (UN Charter) கொள்கைகள் மற்றும் விதிகளை மீறுவதோடு, சர்வதேச அமைதி, பாதுகாப்பு மற்றும் நிலைத்தன்மைக்கு அதிக ஆபத்துக்களை உருவாக்குகின்றன, என்றும் கூறப்பட்டுள்ளது.

9. இந்தியா இஸ்ரேலுடன் வலுவான உறவுகளைக் கொண்டுள்ளதாலும், அமெரிக்கா மற்றும் இஸ்ரேலை விமர்சிப்பது இந்தியாவின் வழக்கமான நடைமுறை அல்ல என்பதாலும் இது முக்கியமானதாகக் கருதப்படுகிறது.

10. இஸ்லாமியக் குடியரசான ஈரானின் உச்சத் தலைவர் செய்யத் அலி காமேனியின் மறைவு குறித்து ஈரானிய மக்களுக்கும் அந்நாட்டு அரசுக்கும் மற்றும் உயிரிழந்தவர்களின் குடும்பங்களுக்கும் உறுப்பு நாடுகள் தங்கள் ஆழ்ந்த இரங்கலைத் தெரிவித்துக் கொள்கின்றன, என்று அதில் கூறப்பட்டுள்ளது.

11. மேலும் அதில், ஈரானிய இஸ்லாமியக் குடியரசின் இறையாண்மையையும் பிராந்திய ஒருமைப்பாட்டையும் மீண்டும் உறுதிப்படுத்தும் உறுப்புநாடுகள், இந்த மோதலுக்கு அரசியல் மற்றும் இராஜதந்திர வழிகளில் மட்டுமே தீர்வு காணப்பட வேண்டும் என வலியுறுத்துகின்றன. இது தொடர்பாக, அப்பகுதியில் பதற்றத்தைத் தணிப்பதை நோக்கமாகக் கொண்ட அனைத்து முயற்சிகளையும் அவை வரவேற்கின்றன என்றும் குறிப்பிடப்பட்டுள்ளது.

12. அமெரிக்கா மற்றும் இதர மேற்கத்திய நாடுகள் ஷாங்காய் ஒத்துழைப்பு அமைப்பை (SCO) சந்தேகத்துடனும் அச்சத்துடனும் பார்த்து வரும் நிலையில், ஷாங்காய் ஒத்துழைப்பு அமைப்பு என்பது ஒரு இராணுவ-அரசியல் கூட்டமைப்பு அல்ல; அது பிற நாடுகளுக்கோ அல்லது சர்வதேச அமைப்புகளுக்கோ எதிரானது அல்ல. இந்த அமைப்பு வெளிப்படைத்தன்மை, தலையிடாமை, சமத்துவம் மற்றும் பரஸ்பர மரியாதை ஆகியவற்றின் அடிப்படையில் செயல்படுவதாகவும் பிஷ்கேக் பிரகடனத்தில் கூறப்பட்டுள்ளது. 

13. உக்ரைன் மற்றும் மேற்கு ஆசியா என இரண்டு பகுதிகளிலும் போர்கள் நடந்து வரும் தற்போதைய புவிசார் அரசியல் சூழலின் பின்னணியில், “உலகம் ஒரு ஆழமான புவிசார் அரசியல், சமூகப் பொருளாதார மற்றும் தொழில்நுட்ப மாற்றத்தின் யுகத்திற்குள் நுழைந்துள்ளதை உறுப்பு நாடுகள் சுட்டிக்காட்டுகின்றன. தொடரும் மோதல்கள், எரிசக்தி மற்றும் உணவுப் பாதுகாப்பு சவால்கள், உலகளாவிய சந்தை நிலையற்ற தன்மை மற்றும் பருவநிலை மாற்றம் ஆகியவற்றால் சர்வதேச சூழ்நிலை தொடர்ந்து சவாலாக உள்ளதாகவும் அந்தப் பிரகடனம் குறிப்பிடுகிறது. 

14. ஹார்முஸ் நீரிணை (Strait of Hormuz) மூடப்பட்டதாலும், கருங்கடல் (Black Sea) வழியிலான போக்குவரத்து தடங்கலாலும் இரு போர்களும் எரிசக்தி மற்றும் உணவுப் பாதுகாப்பு சவால்களுக்கு வழிவகுத்துள்ளன. இது வளர்ந்து வரும் நாடுகள் மற்றும் வளர்ந்த நாடுகள் என அனைத்து நிலை பொருளாதாரத்தையும் பாதித்துள்ளது. உண்மையில், பிரதமர் நரேந்திர மோடி ஷாங்காய் ஒத்துழைப்பு அமைப்பின் உச்சிமாநாட்டில் ஆற்றிய உரையில் இப்பிரச்சினையை முன்வைத்தார்.

ஷாங்காய் ஒத்துழைப்பு அமைப்பின் உச்சிமாநாட்டில் பிரதமர் நரேந்திர மோடியின் உரை:

— கடந்த செவ்வாய்க்கிழமை நடைபெற்ற ஷாங்காய் ஒத்துழைப்பு அமைப்பின் உச்சிமாநாட்டில் பங்கேற்ற தலைவர்களிடம் பிரதமர் நரேந்திர மோடி பேசுகையில், “ஒன்றுடன் ஒன்று பிணைக்கப்பட்ட உலகில், பாதுகாப்பின் எல்லை கணிசமாக விரிவடைந்துள்ளது. மேற்கு ஆசியாவில் ஏற்பட்டுள்ள நெருக்கடி, ஒரு பிராந்தியத்தில் ஏற்படும் மோதல் அங்கு மட்டுமே முடிந்துவிடுவதில்லை என்பதை நிரூபித்துள்ளது; அது உலகளாவிய எரிசக்தி பாதுகாப்பு, கடல்சார் வர்த்தகம் மற்றும் விநியோகச் சங்கிலிகளையும் பாதிக்கிறது” என்று தெரிவித்தார்.

— இந்த விளைவுகளின் பாதிப்பை வளரும் நாடுகளே எதிர்கொள்கின்றன. எனவே, அனைத்து பதற்றங்களுக்கும் மோதல்களுக்கும் தீர்வு காண்பது போர்க்களத்தின் மூலம் அல்ல, பேச்சுவார்த்தை மற்றும் இராஜதந்திரத்தின் மூலமாக மட்டுமே சாத்தியம் என்பதில் இந்தியா தொடர்ந்து உறுதியாக உள்ளது” என்று மோடி கூறினார்.

— பயங்கரவாதப் பிரச்சினையையும் எழுப்பிய மோடி, “பயங்கரவாதம் என்பது முழு மனிதகுலத்திற்கும் ஒரு கடுமையான சவாலாகவே உள்ளது” என்றார்.

— “அதற்கு எதிரான போராட்டத்தில், வெறும் ‘நடவடிக்கை-எதிர்வினை’ மனப்போக்கோடு நாம் நம்மைச் சுருக்கிக் கொள்ள முடியாது. பயங்கரவாதத்திற்கான நிதி, ஆள்சேர்ப்பு, தீவிரவாதமயமாக்கல் மற்றும் பாதுகாப்பான புகலிடங்கள் ஆகிய முழு அமைப்பையும் நாம் தகர்க்க வேண்டும். இந்த முக்கியமான விவகாரத்தில் இரட்டை நிலைக்கு இடமில்லை என்று நாம் ஒரே குரலில் பிரகடனப்படுத்த வேண்டும்” என்று பாகிஸ்தான் பிரதமர் ஷெபாஸ் ஷெரீப் கேட்டுக்கொண்டிருந்த வேளையில் அவர் இவ்வாறு கூறினார்.

— பயங்கரவாதத்தை அரசு கொள்கையின் ஒரு கருவியாகப் பயன்படுத்தி, பயங்கரவாதிகளுக்கு புகலிடமும் ஆதரவும் அளிக்கும் நாடுகளுக்கு உறுதியான செய்தி அனுப்பப்பட வேண்டும்: பயங்கரவாதம் என்பது ஒருபோதும் எவருக்கும் ஒரு உத்திசார் சொத்தாக இருக்க முடியாது என்று மோடி கூறினார்.

— வலுவான மற்றும் நம்பகமான இணைப்புத்தன்மை" தேவையை சுட்டிக்காட்டிய மோடி, சந்தைகளை இணைக்கும், வர்த்தகத்தை எளிதாக்கும் மற்றும் வளர்ச்சிக்கான புதிய வழிகளை உருவாக்கும் அனைத்து முயற்சிகளுக்கும் இந்தியா ஆதரவளிக்கிறது என்றார். இருப்பினும், இத்தகைய முயற்சிகளில் அனைத்து நாடுகளின் இறையாண்மை மற்றும் பிராந்திய ஒருமைப்பாட்டை மதிப்பது முதன்மையானது. இதுவே ஷாங்காய் ஒத்துழைப்பு அமைப்பு பிரகடனத்தின் முதன்மை சாராம்சமும் ஆகும் என்றும் அவர் குறிப்பிட்டார்.

— எதிர்காலத்தில், இணைப்புத்தன்மையின் எல்லை மேலும் விரிவடையும். சாலைகள், இரயில்வே மற்றும் வான்வழிப் பாதைகளுடன் சேர்த்து, சுங்க நடைமுறைகளை எளிதாக்கவும், டிஜிட்டல் ஆவணமாக்கலை ஊக்குவிக்கவும், சரக்கு போக்குவரத்து அமைப்புகளின் திறனை உயர்த்தவும் நாம் நடவடிக்கை எடுக்க வேண்டும், என்று அவர் கூறினார்.

15. சீனா, ரஷ்யா மற்றும் ஈரான் உள்ளிட்ட நாடுகளில் மனித உரிமை மீறல்கள் நடப்பதாக மேற்கத்திய நாடுகள் விமர்சிப்பது குறித்து அந்த பிரகடனம் கூறியது: உறுப்பு நாடுகள் அனைத்து மனித உரிமைகளின் பிரிக்க முடியாத தன்மை, சார்ந்துவாழும் தன்மை மற்றும் பரஸ்பர தொடர்பை வலியுறுத்துவதுடன், மனித உரிமைகள் மற்றும் அடிப்படை சுதந்திரங்களை மதிக்கும் கடமையின் உலகளாவிய தன்மையை நினைவுகூர்கின்றன. குறிப்பாக மனித உரிமை விவகாரங்களில் 'இரட்டை நிலைகளை' செயல்படுத்துவதை எதிர்ப்பதுடன், இறையாண்மையுள்ள நாடுகளின் உள்நாட்டு விவகாரங்களில் தலையிடுவதையும் எதிர்க்கின்றன.

16. ஷாங்காய் ஒத்துழைப்பு அமைப்பில் (SCO) இந்தியாவின் முயற்சிகள் ஏற்றுக்கொள்ளப்பட்டதாக அவர்கள் தெரிவித்தனர். இளைஞர்களின் சுறுசுறுப்பான பங்கேற்பு மற்றும் ஷாங்காய் ஒத்துழைப்பு அமைப்பின் இளம் விஞ்ஞானிகள் மன்றத்தை (SCO Young Scientists Forum) தொடர்ந்து நடத்துவதன் மூலம் அறிவியல், தொழில்நுட்பம் மற்றும் புதுமை ஒத்துழைப்பை வலுப்படுத்துதல்" என்று அந்த அறிவிப்பு கூறியுள்ளது. மேலும், உறுப்பு நாடுகள் இளைஞர்களின் ஒத்துழைப்பை மேலும் வலுப்படுத்துவதை ஊக்குவிக்கும். ஷாங்காய் ஒத்துழைப்பு அமைப்பின் இளம் எழுத்தாளர்கள் மாநாட்டின் (SCO Young Authors Conference) பங்களிப்புகளை அவை சுட்டிக்காட்டின என்றும் அதில் குறிப்பிடப்பட்டுள்ளது.

17. 2026-ஆம் ஆண்டு இந்தியாவில் ஷாங்காய் ஒத்துழைப்பு அமைப்பின் நாகரிக உரையாடல் மன்றம் (SCO Civilization Dialogue Forum) நடத்தப்படுவதையும் தலைவர்கள் வரவேற்றனர். மேலும், இந்த அமைப்பில் இந்தியா சேர்க்கப்பட்டதைக் கருத்தில்கொண்டு, ஷாங்காய் ஒத்துழைப்பு அமைப்பின் அதிகாரப்பூர்வ மற்றும் அலுவல் மொழியாக ஆங்கிலத்தையும் சேர்ப்பதற்கு அந்த அமைப்பின் பிரகடனத்தில் திருத்தம் செய்யப்பட்டது.

18. ஷாங்காய் ஒத்துழைப்பு அமைப்பின் தலைமைப் பொறுப்பு பாகிஸ்தான் இஸ்லாமியக் குடியரசுக்கு செல்லும், அங்கு 2027-ஆம் ஆண்டில் ஷாங்காய் ஒத்துழைப்பு அமைப்பின் அரசுத் தலைவர்கள் குழுவின் அடுத்த கூட்டம் கூட்டப்படும் என்றும் பிஷ்கேக் பிரகடனம் (Bishkek Declaration) கூறியுள்ளது. இந்த அமைப்பில் இந்தியா தனது பங்கேற்பை எவ்வாறு கையாள்கிறது என்பதை உலகம் உற்றுநோக்கும் என்கின்றனர்.

ஷாங்காய் ஒத்துழைப்பு அமைப்பு என்றால் என்ன, அது எவ்வாறு உருவானது?

1. ஷாங்காய் ஒத்துழைப்பு அமைப்பு (SCO) என்பது ஒரு நிரந்தர அரசுகளுக்கிடையேயான சர்வதேச அமைப்பாகும். இது உலகளாவிய மொத்த உள்நாட்டு உற்பத்தியில் சுமார் 25 சதவீதத்தையும், சர்வதேச வர்த்தகத்தில் 15 சதவீதத்திற்கும் அதிகமானதையும் பிரதிநிதித்துவப்படுத்துகிறது.

2. ஷாங்காய் ஒத்துழைப்பு அமைப்பின் முக்கிய நோக்கங்கள் பின்வருமாறு:

(i) உறுப்பு நாடுகளிடையே நல்லுறவை மேம்படுத்துதல், பரஸ்பர நம்பிக்கையை வலுப்படுத்துதல், பிராந்தியத்தில் அமைதி, பாதுகாப்பு மற்றும் நிலைத்தன்மையைக் கருத்தில்கொண்டு கூட்டு முயற்சிகளை எடுத்தல், மற்றும்

(ii) வர்த்தகம் மற்றும் பொருளாதாரம், அறிவியல் மற்றும் தொழில்நுட்பம், கலாச்சாரம், எரிசக்தி, போக்குவரத்து, சுற்றுலா, சுற்றுச்சூழல் பாதுகாப்பு போன்ற பல்வேறு துறைகளில் பயனுள்ள ஒத்துழைப்பை மேம்படுத்துதல்.

3. மேலும், ஒரு புதிய, ஜனநாயக, பகுத்தறிவு சார்ந்த அரசியல் மற்றும் பொருளாதார சர்வதேச ஒழுங்கை நிறுவுவதை நோக்கியும் இந்த அமைப்பு முன்னேறுவதை நோக்கமாகக் கொண்டுள்ளது.

4. ஷாங்காய் ஒத்துழைப்பு அமைப்பின் தோற்றம், 1996-ஆம் ஆண்டில் உருவாக்கப்பட்ட சீனா, ரஷ்யா, கஜகஸ்தான், கிர்கிஸ்தான் மற்றும் தஜிகிஸ்தான் ஆகிய நாடுகளை உள்ளடக்கிய “Shanghai Five” அமைப்பில் அடங்கியுள்ளது.

5. 1991-ஆம் ஆண்டில் சோவியத் ஒன்றியம் 15 சுதந்திர நாடுகளாகப் பிரிந்தபோது, ​​அப்பகுதியில் தீவிரவாத மதக் குழுக்களும் இனப் பதட்டங்களும் அதிகரிப்பது குறித்து கவலைகள் எழுந்தன. இந்தப் பிரச்சினைகளைக் கையாள்வதற்காக, பாதுகாப்பு விஷயங்களில் ஒத்துழைக்க ஒரு குழு உருவாக்கப்பட்டது.

6. இதன் தொடர்ச்சியாக, ஜூன்  மாதம் 15-ஆம் தேதி, 2001-ஆம் ஆண்டு ஷாங்காய் நகரில் ஷாங்காய் ஒத்துழைப்பு அமைப்பு (SCO) ஒரு சர்வதேச அமைப்பாக நிறுவப்பட்டது. மேலும், இதில் ஆறாவது உறுப்பினராக உஸ்பெகிஸ்தானும் இணைந்தது. 

7. ஜூன் மாதம் 2002-ஆம் ஆண்டில் செயிண்ட் பீட்டர்ஸ்பர்க் உச்சிமாநாட்டில் ஷாங்காய் ஒத்துழைப்பு அமைப்பின் (SCO) பிரகடனம் கையெழுத்திடப்பட்டு, செப்டம்பர் மாதம் 19-ஆம் தேதி, 2003-ஆம் ஆண்டு நடைமுறைக்கு வந்தது. மேலும், 2006-ஆம் ஆண்டில், சர்வதேச பயங்கரவாதத்திற்கு நிதிளிப்பதைத் தடுக்கும் பொருட்டு, சர்வதேச போதைப்பொருள் கடத்தலை எதிர்த்துப் போராடுவதற்கான திட்டங்களை ஷாங்காய் ஒத்துழைப்பு அமைப்பு (SCO) அறிவித்தது.

8. தற்போது, இதில் இந்தியா, ஈரான், கஜகஸ்தான், சீனா, கிர்கிஸ்தான், பாகிஸ்தான், ரஷ்யா, தஜிகிஸ்தான், உஸ்பெகிஸ்தான் மற்றும் பெலாரஸ் ஆகிய 10 உறுப்பு நாடுகள் உள்ளன. இந்தியா மற்றும் பாகிஸ்தான் 2017-ஆம் ஆண்டில் முழுநேர உறுப்பினர்களாக மாறின. ஈரான் 2023-ஆம் ஆண்டிலும், பெலாரஸ் 2024-ஆம் ஆண்டிலும் இணைந்தன. ஷாங்காய் ஒத்துழைப்பு அமைப்பில் (SCO) தற்போது ஆப்கானிஸ்தான் மற்றும் மங்கோலியா ஆகிய இரண்டு அதிகாரப்பூர்வ பார்வையாளர் நாடுகள் உள்ளன. மேலும் நேபாளம், ஆர்மீனியா, மியான்மர் போன்ற 15 நாடுகள் உரையாடல் கூட்டமைப்பு நாடுகளாகவும் உள்ளன. 

Original Link: SCO summit 2026: What does the Bishkek declaration say? 

Read More →

நாடாளுமன்றக் கண்காணிப்பு எவ்வாறு வெளிப்படையான மற்றும் பொறுப்புணர்வுள்ள நிர்வாகத்தை எவ்வாறு வலுப்படுத்துகிறது?. - திலீப் பி சந்திரன்

இந்திய நாடாளுமன்ற அமைப்பில், அரசாங்கத்தை அதன் குடிமக்களுக்கு பொறுப்புணர்வாக வைப்பதற்கும், அவர்களின் தேவைகளுக்கு ஏற்ப செயல்படச் செய்வதற்கும் விரிவான மற்றும் பயனுள்ள பல்வேறு வழிமுறைகள் உள்ளன. ஆனால், இந்த வழிமுறைகள் தங்களுடைய ஜனநாயக நோக்கங்களை முழுமையாக நிறைவேற்றுவதற்கு தடையாக இருக்கும் கட்டுப்பாடுகள்   என்ன?

நாடாளுமன்றத்தில் நிலையான பெரும்பான்மையைப் பெற்றுள்ள ஒரு அரசாங்கம், நாடாளுமன்றத்தின் செயல்திட்டத்தை நிர்ணயிப்பது, சட்டங்களை அறிமுகப்படுத்தி நிறைவேற்றுவது, சட்டமன்றப் பணிகளுக்கான கால அட்டவணையை நிர்ணயிப்பது, விவாதங்கள் மற்றும் கலந்துரையாடல்களுக்கான நேரத்தை ஒதுக்குவது போன்றவற்றில் செல்வாக்கு செலுத்த முடியும்.

ஆனால், நாடாளுமன்றத்தில் உள்ள இந்த நிலையான பெரும்பான்மைக்கும், நிர்வாகத்தைப் பொறுப்பு உணர்வு கொண்டதாக இருக்க  வைப்பதற்காக உருவாக்கப்பட்டுள்ள நாடாளுமன்ற நடைமுறைகளுக்கும் இடையே எவ்வாறு தொடர்பு உள்ளது? முதலாவதாக, அதிபர் முறை மற்றும் நாடாளுமன்ற முறை ஆகிய அரசாங்க வடிவங்களில், அதிகாரப் பகிர்வுக் கோட்பாடு (doctrine of the separation of powers) எவ்வாறு நாடாளுமன்றப் பொறுப்புணர்வை வடிவமைக்கிறது என்பதைப் புரிந்துகொள்வோம்.

அதிகாரப் பிரிவினை மற்றும் நாடாளுமன்றப் பொறுப்புணர்வு

அரசின் அதிகாரம், சட்டமன்றம், நிர்வாகம் மற்றும் நீதித்துறை ஆகியவற்றுக்கு இடையே பிரிக்கப்பட்டுள்ளது. இவை முறையே சட்டம் இயற்றுதல், கொள்கைகளை நடைமுறைப்படுத்துதல் மற்றும் நீதி வழங்குதல் போன்ற பணிகளை மேற்கொள்கின்றன. எந்தவொரு ஒரு துறையிலும் அதிகாரம் குவிவதையும், அது தவறாகப் பயன்படுத்தப்படுவதையும் தடுப்பதற்காக, இந்த மூன்று முக்கிய துறைகளும் ஒன்றையொன்று கட்டுப்படுத்தும் மற்றும் சமநிலைப்படுத்தும் முறைகளைப் பின்பற்றுகின்றன. இவற்றுக்கிடையேயான உறவின் தன்மை, நாடாளுமன்ற மற்றும் குடியரசுத் தலைவர் ஆட்சி முறைகளில் வேறுபடுகிறது.

குடியரசுத் தலைவர் ஆட்சி (presidential system) முறையில், நிர்வாகம் நாடாளுமன்றத்திலிருந்து உருவாவதில்லை. மேலும், பதவியில் நீடிப்பதற்காக நாடாளுமன்றத்தின் நம்பிக்கையைச் சார்ந்திருப்பதும் இல்லை. உதாரணமாக, அமெரிக்க குடியரசுத் தலைவர் ஆட்சி முறையில், நிர்வாக மற்றும் சட்டமன்றத் துறைகள் தெளிவாகப் பிரிக்கப்பட்டுள்ளன. மேலும், அவை அதிக அளவிலான சுதந்திரத்தைக் கொண்டுள்ளன. அதிகாரப் பகிர்வு தெளிவாக இருப்பது, அதிகாரச் சமநிலை மற்றும் கண்காணிப்புக்கான மிகவும் உறுதியான, நிறுவனமயமாக்கப்பட்ட வழிமுறைகளை உருவாக்குகிறது.

இதற்கு மாறாக, நாடாளுமன்ற ஆட்சி முறையில், நிர்வாகத்தின் உறுப்பினர்கள் சட்டமன்றத்திலிருந்தே தேர்ந்தெடுக்கப்படுகின்றனர். மேலும், நாடாளுமன்றத்தில் பெரும்பான்மையினரின் நம்பிக்கையைப் பெற்றிருக்கும் வரையில் அவர்கள் பதவியில் தொடர்கின்றனர். எனவே, நாடாளுமன்ற ஆட்சி முறையில் நிர்வாகத்திற்கும் சட்டமன்றத்திற்கும் இடையேயான அதிகாரப் பிரிவு  கடுமையானதாக இருப்பதில்லை. இங்கு அதிகாரத்தை ஒன்றையொன்று கட்டுப்படுத்தும் மற்றும் சமநிலைப்படுத்தும் முறைகள், நிர்வாகத்தின் சட்டமன்றத்திற்கான அரசியல் பொறுப்பு உணர்வின் மூலம் செயல்படுகின்றன.

எனவே, நிர்வாகம் சட்டமன்றத்திற்குப் பொறுப்பாக இருக்க வேண்டும் என்பது நாடாளுமன்ற ஆட்சி (parliamentary form) முறையின் அடிப்படைக் கொள்கையாகும். நாடாளுமன்றக் கண்காணிப்பு, நிர்வாகத்தின் செயல்பாடுகள் மற்றும் கொள்கைகளுக்குப் பொறுப்பாக இருப்பதன் மூலம், ஆட்சியில் வெளிப்படைத்தன்மையையும் மக்களுக்குப் பதிலளிக்கும் தன்மையையும் உறுதி செய்கிறது. மேலும், ஒரு சிறந்த ஜனநாயகத்தின் அடித்தளமான 'விழிப்புணர்வுள்ள குடிமக்கள்' சமூகத்திற்கு நாடாளுமன்றத்தின் பயனுள்ள மேற்பார்வை முக்கியமாதாகும். இது ஒரு சிறந்த ஜனநாயகத்தின் அடித்தளமாகும். அதேசமயம், அரசாங்கத்தின் அதிகாரத்தைத் தன்னிச்சையாகவும் அளவுக்கு மீறியும் பயன்படுத்துவதைத் தடுக்கும் ஒரு ஜனநாயகத் தடுப்பாகவும் இது செயல்படுகிறது.

சட்டமன்றக் கண்காணிப்புக்கான அரசியலமைப்பு விதிகள்

இந்தியாவில் சட்டமன்றக் கண்காணிப்பு, பல்வேறு அரசியலமைப்பு விதிகள் மற்றும் நாடாளுமன்ற நடைமுறைகளை அடிப்படையாகக் கொண்டுள்ளது. அரசியலில் பொறுப்புணர்வு என்பது முக்கியமாக அரசியலமைப்பின் 75-வது பிரிவில் குறிப்பிடப்பட்டுள்ள தனிப்பட்ட மற்றும் கூட்டுப் அமைச்சரவைப் பொறுப்புணர்வு கொள்கைகளின் மூலம் செயல்படுகிறது. 75(3)-வது பிரிவு, அமைச்சர்கள் குழு மக்களவைக்கு (House of the People) கூட்டாகப் பொறுப்புடையதாக இருக்கும் என்று குறிப்பிடுகிறது.

இந்திய நாடாளுமன்ற ஆட்சி முறையின் அடித்தளமாக விளங்கும் கூட்டுப் பொறுப்புணர்வு, அமைச்சர்கள் தாங்களின் துறையைப் பொருட்படுத்தாமல், அரசாங்கத்தின் அனைத்து நடவடிக்கைகளும் மக்களவைக்கு ஒரே குழுவாகப் பொறுப்பேற்க வேண்டும் என்பதைக் குறிக்கிறது. அரசாங்கம் நம்பிக்கை வாக்கெடுப்பில் தோல்வியடைந்தாலோ அல்லது நம்பிக்கையில்லாத் தீர்மானம் நிறைவேற்றப்பட்டாலோ, முழு அமைச்சர்கள் குழுவும் பதவி விலக வேண்டும். எனவே, நாடாளுமன்ற ஆட்சி முறையில், நிர்வாகம் வெற்றியிலும் தோல்வியிலும் கூட்டாகப் பொறுப்பேற்க வேண்டும் என்ற கொள்கையைப் பின்பற்ற வேண்டும்.

தனிப்பட்ட அமைச்சரவைப் பொறுப்புணர்வு என்ற கொள்கை அரசியலமைப்பின் 75(2)-வது பிரிவிலிருந்து உருவாகிறது. இதன்படி, அமைச்சர்கள் குடியரசுத் தலைவரின் விருப்பம் தொடரும் வரை பதவியில் இருப்பார்கள். நடைமுறையில், ஒரு அமைச்சர் தனக்கு ஒதுக்கப்பட்ட துறையின் பணிகளை முறையாக நிறைவேற்றத் தவறினாலோ அல்லது நாடாளுமன்றத்தின் நம்பிக்கையை இழந்தாலோ, பிரதமரின் ஆலோசனையின் பேரில் பதவியிலிருந்து நீக்கப்படலாம். மாநில அளவில், 164(2)-வது பிரிவும் அமைச்சர்கள் குழுவின் கூட்டுப் பொறுப்புணர்வு இதே போன்ற நிலை நீடிக்கிறது.

அரசியல் பொறுப்புணர்வு என்பதை தாண்டி, நிதி தொடர்பான விவகாரங்களிலும் நிர்வாகம் நாடாளுமன்றத்திற்குப் பொறுப்புணர்வோடு இருக்க வேண்டும். அரசியலமைப்பின் 112 முதல் 117 வரையிலான பிரிவுகள், நாடாளுமன்றத்தில் ஆண்டிற்கான நிதிநிலை அறிக்கையை (Budget) தாக்கல் செய்வதற்கான நடைமுறைகளையும், ஒதுக்கீட்டுச் சட்டமசோதா (Appropriation Bill), இடைக்கால நிதி ஒதுக்கீடு (Vote on Account), கூடுதல் மானியங்கள் (Additional Grants), நிதிச் சட்டமசோதாக்கள் (Finance Bills) போன்ற பிற நிதி மற்றும் வரவு-செலவுத் திட்ட நடைமுறைகளையும் வகுத்துள்ளன.

அரசு நிர்வாகம் பொது நிதியைத் தங்கள் விருப்பப்படி முழுமையாகக் கையாள முடியாது என்பதை இந்த அரசியலமைப்பு விதிகள் உறுதி செய்கின்றன. பிரிவு 148-ன் கீழ் செயல்படும் இந்தியத் தலைமைத் தணிக்கையாளர் (Comptroller and Auditor General (CAG)) மூலம் நிதிசார் கண்காணிப்பு மேலும் வலுப்படுத்தப்படுகிறது. ஒன்றிய அரசு தொடர்பான இந்தியத் தலைமைத் தணிக்கையாளரின் (CAG) அறிக்கைகள் நாடாளுமன்றத்தில் சமர்ப்பிக்கப்படுகின்றன என்பதை பிரிவு 151 குறிப்பிடுகிறது. இவை முக்கியமாக 'பொதுக் கணக்குக் குழு'வால் (Public Accounts Committee) ஆய்வு செய்யப்பட்டு, நிதி முறைகேடுகள் மற்றும் நிர்வாகச் சீர்கேடுகள் ஆகியவை சுட்டிக்காட்டப்படுகின்றன.

எனவே, நாடாளுமன்றமும் மாநில சட்டமன்றங்களும், அவற்றின் கீழ் உள்ள அவைகளும், நிர்வாகத்தின் அரசியல் முடிவுகள் மற்றும் பொதுநிதி நிர்வாகம் ஆகியவற்றுக்குப் பொறுப்புணர்வோடு இருப்பதற்கான பல்வேறு அரசியலமைப்பு மற்றும் நடைமுறை வழிமுறைகளைக் கொண்டுள்ளன.

நாடாளுமன்றம் நிர்வாகத்தை எவ்வாறு கட்டுப்படுத்துகிறது?

நாடாளுமன்ற ஆட்சி முறையில், நிர்வாகத்தின் செயல்பாடுகளைத் தொடர்ந்து ஆய்வு செய்வதற்காக, நாடாளுமன்ற விதிமுறைகள் மற்றும் மரபுகளின் மூலம் பல்வேறு வழிமுறைகள், கருவிகள் மற்றும் நடைமுறைகள்  உருவாக்கப்பட்டுள்ளன. இது போன்ற நாடாளுமன்ற வழிமுறைகள், சட்டமன்றம் விவாதங்கள் மற்றும் கலந்துரையாடல்களை நடத்துவதற்கும், அரசாங்கத்திடமிருந்து தகவல்களைப் பெறுவதற்கும் பயன்படுத்தப்படுகின்றன. இதன் மூலம், நிர்வாகத்தின் செயல்பாடுகள், கொள்கைகள், முடிவுகள் மற்றும் பொதுமக்களின் முக்கியத்துவம் வாய்ந்த பிரச்சினைகள் தொடர்பாக நிர்வாகம் பொறுப்புணர்வோடு  செயல்படுகிறது.

நாடாளுமன்றம் மற்றும் மாநில சட்டமன்றங்களில் அலுவல்களை நடத்துவதற்கான முக்கிய வழிமுறைகள் பின்வருமாறு:

சாதனங்கள்	செயல்பாடுகள்
கேள்வி நேரம் (Question Hour)	நாடாளுமன்றத்தின் ஒவ்வொரு அமர்வின் முதல் ஒரு மணி நேரம், உறுப்பினர்கள் கேள்விகளைக் கேட்டு, சம்பந்தப்பட்ட அமைச்சர்களிடமிருந்து பதில்களைப் பெறுவதற்காக ஒதுக்கப்படுகிறது. கேள்விகள் மிக முக்கிய கேள்விகள் (Starred), மிக முக்கிய நோக்கம் இல்லாத கேள்விகள் (Unstarred), குறுகிய கால அறிவிப்பு கேள்விகள் (Short Notice) என மூன்று வகைகளாக உள்ளன.
பூஜ்ய நேர விவாதம் (Zero Hour Discussion)	கேள்வி நேரம் முடிந்த மறு நிமிடம் தொடங்கி, பட்டியலிடப்பட்ட பணிகள் தொடங்கும் வரை பூஜ்ய நேரம் நடைபெறும். முன் அறிவிப்பு இல்லாமலேயே அவசரமான முக்கியத்துவம் வாய்ந்த பொது நல பிரச்சினைகளை உறுப்பினர்கள் எழுப்ப  அனுமதிக்கிறது. இது நாடாளுமன்ற நடைமுறையில் இந்தியாவால் உருவாக்கப்பட்ட ஒரு புதிய நடைமுறையாகும். இருப்பினும், இது நாடாளுமன்ற நடைமுறை விதிகளில் குறிப்பிடப்படவில்லை.
அரை மணி நேர விவாதம் (Half-an-hour Discussion)	சமீபத்தில் விவாதிக்கப்பட்ட அல்லது பதிலளிக்கப்பட்ட ஒரு விவகாரம் குறித்து, கூடுதல் விளக்கம் தேவைப்படும் பட்சத்தில்,  பொது முக்கியத்துவம் வாய்ந்த விவகாரங்கள் குறித்து விவாதிக்க உறுப்பினர்கள் அறிவிப்பு வழங்கலாம்.
குறுகிய கால விவாதம் (Short Duration Discussion)	தீர்மானம், முன்மொழிவு அல்லது வாக்கெடுப்பு ஆகியவற்றைத் தவிர, உறுப்பினர்கள் ஒரு குறுகிய காலத்திற்கு விவாதத்தை எழுப்ப அனுமதிக்கிறது.
நம்பிக்கையில்லாத் தீர்மானம் (No-confidence Motion)	மக்களவையில் பெரும்பான்மையினரின் நம்பிக்கையைப் பெற்றிருக்கும் வரை அமைச்சரவை பதவியில் நீடிக்கும். நம்பிக்கையில்லாத் தீர்மானத்தை நிறைவேற்றுவதன் மூலம் மக்களவை அமைச்சரவையை பதவியிலிருந்து நீக்க முடியும்.
கண்டனத் தீர்மானம் (Censure Motion)	இது ஒரு தனிப்பட்ட அமைச்சருக்கோ அல்லது அமைச்சர்கள் குழுவிற்கோ எதிராகக் கொண்டுவரப்படுகிறது. நம்பிக்கையில்லாத் தீர்மானத்தைப் போல் இல்லாமல், இந்தத் தீர்மானத்தில் கண்டனத்திற்கான குறிப்பிட்ட காரணம் பதிவு செய்யப்பட வேண்டும். மேலும், தீர்மானம் நிறைவேற்றப்பட்டால் எந்தவொரு அமைச்சரும் பதவி விலக வேண்டிய கட்டாயம் இல்லை.
ஒத்திவைப்புத் தீர்மானம் (Adjournment Motion)	சபாநாயகரின் ஒப்புதலுடன், அவையின் வழக்கமான அலுவல்களை ஒதுக்கி வைத்து, அவசரப் பொது முக்கியத்துவம் வாய்ந்த ஒரு  முக்கிய விவகாரம் தொடர்பாக கேள்வி  எழுப்பலாம்.
கவன ஈர்ப்புத் தீர்மானம் (Calling Attention Motion)	சபாநாயகரின் முன் அனுமதியுடன், ஒரு உறுப்பினர் அவசரப் பொது முக்கியத்துவம் வாய்ந்த எந்தவொரு விவகாரம் தொடர்பாகவும் அமைச்சரின் கவனத்திற்குக் கொண்டு வரலாம். மேலும், அதற்குப் பதிலளிக்கும் விதமாக அமைச்சர் ஒரு சுருக்கமான அறிக்கையை வெளியிடுவார் என்று எதிர்பார்க்கப்படுகிறது.
உரிமை மீறல் தீர்மானம் (Privilege Motion)	ஒரு அமைச்சர், அவைக்குத் தகவல்களை மறைப்பதன் மூலமோ அல்லது தவறான தகவல்களை வழங்குவதன் மூலமோ ஓர் உறுப்பினரின் சிறப்புரிமையை மீறியுள்ளார் என்று கருதும் ஒருஉறுப்பினரால் தீர்மானம் கொண்டு வரப்படுகிறது.

இந்திய நாடாளுமன்ற அமைப்பு சட்டமியற்றும் பணிகளை மேற்பார்வையிட விரிவான வழிமுறைகளை வழங்கினாலும், நிர்வாகமும் நாடாளுமன்றத்தின் மீது  கட்டுப்பாட்டைச் செலுத்துகிறது. மக்களவையின் தலைவராக இருக்கும் பிரதமருக்கு, கீழவையைக் (மக்களவை) கலைக்குமாறு குடியரசுத் தலைவருக்கு ஆலோசனை வழங்கும் அதிகாரம் உள்ளது.

முன்னர் குறிப்பிடப்பட்டதைப் போல, நாடாளுமன்றத்தில் நிலையான பெரும்பான்மையைப் பெற்றிருக்கும் அரசாங்கம், சட்டமியற்றும் பணிகளின் செயல்பாட்டில் ஆதிக்கம் செலுத்த முடியும். மேலும், அரசியலமைப்பின் 123-வது பிரிவின் கீழ் உள்ள அவசரச் சட்டம் பிறப்பிக்கும் அதிகாரம் (Ordinance-making power) உள்ளிட்ட ஒப்படைக்கப்பட்ட சட்டமியற்றும் அதிகாரங்கள், நாடாளுமன்றம் அமர்வில் இல்லாதபோது நிர்வாகம் சட்டமியற்றும் அதிகாரத்தைப் பயன்படுத்துவதற்கு மேலும் வாய்ப்பளிக்கின்றன.

அவசரச் சட்டம் (ordinance) என்பது நிர்வாகத் துறையால் இயற்றப்படும் ஒரு தற்காலிகச் சட்டமாகும்; இது நடைமுறையில் சட்டத்தின் தன்மையைக் கொண்டிருந்தாலும், பின்னர் ஆறு வாரங்களுக்குள் சட்டமியற்றும் அவையால் அங்கீகரிக்கப்பட வேண்டும்.

நாடாளுமன்ற மேற்பார்வை பலவீனமடைந்து வருகிறதா?

இந்தியாவின் நாடாளுமன்ற ஜனநாயகத்தில், நாடாளுமன்ற மேற்பார்வையின் வழக்கமான வழிமுறைகள் தங்களுடைய செயல்திறனை இழந்து வருகின்றன என்று அடிக்கடி வாதிடப்படுகிறது. நிர்வாகத்தின் மீது சட்டமன்றக் கண்காணிப்பைப் பாதுகாப்பதற்குப் பல அரசியலமைப்பு மற்றும் நடைமுறை வழிமுறைகள் இருந்தாலும், சமீபத்திய ஆண்டுகளில் ஏற்பட்ட அரசியல் மற்றும் அமைப்பு ரீதியான மாற்றங்களால் அவற்றின் செயல்திறன் கட்டுப்படுத்தப்படுவதாகத் தெரிகிறது.

ஆளும் கட்சிக்கும் எதிர்கட்சிக்கும் இடையே நீடிக்கும் மோதலால் ஏற்படும் தொடர்ச்சியான அமளிகள் மற்றும் அவை ஒத்திவைப்புகள், அமைச்சர்களிடம் கேள்விகள் கேட்பதற்கும் தகவல்களைப் பெறுவதற்கும் நாடாளுமன்ற உறுப்பினர்களுக்குக் கிடைக்கும் வாய்ப்புகளை அடிக்கடி குறைக்கின்றன.

அவசரமாக சட்டங்களை இயற்றுதல், தேவையான வலுவான விவாதங்கள் இல்லாத நிலை, நாடாளுமன்றக் குழுக்களை தேவையான அளவில் பயன்படுத்தாத நிலை, சிறப்பு மற்றும் விரிவான விவாதங்களுக்கான வாய்ப்புகள் குறைந்து வருதல், அவசரச் சட்டங்களை அதிகமாகச் சார்ந்திருத்தல் போன்றவை சட்டமன்றத்தின் ஆய்வு மற்றும் கண்காணிப்பின் செயல்திறன் குறித்து கவலைகளை ஏற்படுத்துகின்றன. கடுமையான கட்சி நிலைப்பாடு மற்றும் கட்சித் தாவல்  சட்டம் (Anti-defection Law) ஆகியவையும் சட்டமன்றத்தின் தனிப்பட்ட உறுப்பினர்கள் கட்சி சார்பற்ற நிலைப்பாட்டை எடுப்பதைக் கட்டுப்படுத்தக்கூடும்.

சில  சூழல்களில், சட்டங்களை இயற்றுவதற்கு நிதி மசோதா (Money Bill) வழிமுறையைப் பயன்படுத்துவது, நிர்வாகத்தின் மீது இரு அவைகளும் மேற்கொள்ளும் கட்டுப்பாட்டை பலவீனப்படுத்தும். அதே நேரத்தில், சட்டங்கள் மற்றும் பொதுக் கொள்கைகள் அதிகரித்து வரும் தொழில்நுட்ப சிக்கல்களைக் கொண்டிருப்பதால், சட்டமன்ற உறுப்பினர்களிடம் நிபுணத்துவம், ஆராய்ச்சி திறன் மற்றும் பயனுள்ள ஆய்வுத் திறன் போன்றவை தேவைப்படுகின்றன.

அரசியலமைப்பு நெறிமுறைகளையும் சீர்திருத்தங்களையும் பாதுகாத்தல்

இந்திய நாடாளுமன்ற அமைப்பில், அரசாங்கத்தை அதன் குடிமக்களுக்குப் பொறுப்புணர்வாக இருக்க வைப்பதற்க்கும், அவர்களின் தேவைகளுக்கு ஏற்ப பதிலளிக்கச் செய்வதற்கும் விரிவான மற்றும் பயனுள்ள பல்வேறு வழிமுறைகள் உள்ளன. இருப்பினும், நடைமுறை வரம்புகளும் அரசியல் தடைகளும் இந்த வழிமுறைகள் தங்களுடைய ஜனநாயக நோக்கங்களை முழுமையாக நிறைவேற்றுவதைத் தடுக்கும்.

அமைப்பு  ரீதியான வழிமுறைகளின் வழக்கமான செயல்பாட்டைத் தாண்டி,   இந்தியாவின் நாடாளுமன்ற ஜனநாயகத்திற்கு அரசியலமைப்பு நெறிமுறைகளைக் கடைப்பிடிப்பதும் நிறுவன சீர்திருத்தமும் முக்கியமானதாக்குகிறது. இதில், அமைப்பு ரீதியான விவாதங்களையும் கலந்துரையாடல்களையும் பாதுகாத்தல், நாடாளுமன்றக் குழுக்களின் கட்சி சார்பற்ற செயல்பாட்டை வலுப்படுத்துதல், சட்டமன்ற உறுப்பினர்களின் செயல்பாடுகள் மற்றும் அவைகளின் நடவடிக்கைகள் மீதான பொதுமக்களின் கண்காணிப்பை மேம்படுத்துதல் மற்றும் நாடாளுமன்றச் செயல்பாட்டிலும் சட்டமியற்றுபவர்களின் திறன் மேம்பாட்டிலும் தொழில்நுட்பத்தை திறம்படப் பயன்படுத்துதல் ஆகியவை அடங்கும்.

இறுதியாக, சட்டம் இயற்றப்பட்ட பின்னர் மேற்கொள்ளப்படும் ஆய்வின் வரம்பு குறைவாக இருப்பது மற்றும் சட்டமியற்றுதல் தொடர்பான விவாதங்களிலும் பொதுக் கொள்கை கண்காணிப்பிலும் அதிகளவில் சிறப்பு நிபுணத்துவம் தேவைப்படுவது போன்ற பிரச்சினைகளை எதிர்கொள்வதற்கு,  அரசியலமைப்பு மற்றும் அறநெறி சார்ந்த  உறுதியான நிலைப்படுகளுடன் நாடாளுமன்ற நடைமுறைகளில் புதிய அணுகுமுறைகளும் இணைக்கப்பட வேண்டும்.

நாடாளுமன்ற ஜனநாயகத்தில், அடிக்கடி ஏற்படும் அமளிகளைக் காட்டிலும் விவாதம் மற்றும் கலந்துரையாடலுக்கு முக்கியத்துவம் அளிக்கும் அரசியல் கலாச்சாரத்தையும், பெரும்பான்மை ஆதிக்கத்தைக் காட்டிலும் பொறுப்புணர்வுக்கு முக்கியத்துவம் அளிக்கும் அரசியல் கலாச்சாரத்தையும், பெரும்பான்மை ஆதிக்கத்திற்கு மாறாக பொறுப்புணர்வாக இருக்க முக்கியத்துவம் அளிக்கும் அரசியல் கலாச்சாரத்தையும் வளர்ப்பது, மிகவும் பயனுள்ள கண்காணிப்பை உறுதி செய்ய உதவும். நிர்வாகப் பொறுப்புணர்வை உறுதி செய்வதற்கான நாடாளுமன்ற வழிமுறைகள், அரசாங்கத்தை விமர்சிப்பதற்கான வெறும் அரசியல் மேடைகளாக மட்டும் மாற வேண்டிய அவசியமில்லை. நாடாளுமன்ற ஜனநாயகத்தின்  செயல்பாட்டின் மூலம், வெளிப்படையான மற்றும் பொறுப்புணர்வை கொண்ட ஆட்சிமுறையை வலுப்படுத்துவதே அவற்றின் முக்கிய நோக்கமாகும்.

Original Link: How parliamentary oversight strengthens transparent and responsive governance.

Read More →

இந்தியாவின் பெரும்பாலான அமைப்புசாரா தொழிலாளர்கள் (Gig workers) அரசின் நலத்திட்டங்களைப் பெறமுடியாத நிலையில் உள்ளனர். -சச்சின் ஸ்வராஜ்

‘e-Shram’ இணையதளத்தில் அமைப்புசாரா தொழிலாளர்களின் பதிவுகள் அதிகரித்திருந்தாலும், அது அனைத்து மாநிலங்களிலும் சீராக இல்லை.

‘e-SHRAM’ என்பது இந்தியாவில் உள்ள அமைப்புசாரா தொழிலாளர்களின் தேசிய தரவுத்தளமாகும்.

2021-ஆம் ஆண்டில் தொடங்கப்பட்ட ‘e-Shram’ இணையதளத்தில் பதிவுசெய்துள்ள அமைப்புசாரா தொழிலாளர்களுக்கு சுகாதாரப் பாதுகாப்பு வழங்கப்படும் என்று ஒன்றிய அரசு, தனது 2025-26-ஆம் ஆண்டு நிதிநிலை அறிக்கையில் அறிவித்தது. "புதிய யுக சேவைப் பொருளாதாரத்திற்கு" அமைப்புசாரா தொழிலாளர்களின் பங்களிப்பை அங்கீகரிக்கும் வகையில் இந்த அறிவிப்பு வெளியானது. கடந்த பிப்ரவரி மாதம் 1-ஆம் தேதி, 2025-ஆம் ஆண்டு தனது நிதிநிலை உரையில் இந்த அறிவிப்பை வெளியிட்ட நிதி அமைச்சர் நிர்மலா சீதாராமன், இந்த நடவடிக்கையின் மூலம் ஒரு கோடிக்கும் அதிகமான அமைப்புசாரா தொழிலாளர்கள் பயனடைவார்கள் என்று எதிர்பார்க்கப்படுவதாகத் தெரிவித்தார்.

அதன் பிறகு அமைப்புசாரா தொழிலாளர்களின் பதிவு அதிகரித்திருந்தாலும், புள்ளிவிவரங்களில் உள்ள இடைவெளியானது, பெரும்பான்மையான தொழிலாளர்கள் இன்னும் இந்த அறிவிப்பின் பயனைப் பெறவில்லை என்பதைக் காட்டுவதுடன், நாட்டின் அதிவேகமாக வளர்ந்து வரும் அமைப்புசாரா தொழிலாளர்களின் எண்ணிக்கையைக் கணக்கிடுவதிலும் புரிந்து கொள்வதிலும் உள்ள இடைவெளியைச் சுட்டிக்காட்டுகிறது.

ஒரு கோடி என்ற எண்ணிக்கையை அமைச்சர் குறிப்பிட்டிருந்தாலும், ஜனவரி மாதம் 29-ஆம் தேதி, 2026-ஆம் ஆண்டு மாநிலங்களவையில் மத்திய தொழிலாளர் மற்றும் வேலைவாய்ப்பு அமைச்சகம் அளித்த பதிலின்படி, 'e-Shram' இணையதளத்தில் 8.58 லட்சம் அமைப்புசாரா தொழிலாளர்கள் (gig workers) மட்டுமே பதிவு செய்யப்பட்டுள்ளனர். ஜனவரி மாதத்திற்குப் பிறகு இந்தப் பதிவுகள் இரண்டு மடங்கு அதிகரித்திருப்பதாகக் கருதினாலும்கூட, அது மதிப்பிடப்பட்ட அமைப்புசாரா தொழிலாளர்களின் எண்ணிக்கையில் சுமார் 15 சதவீதம் மட்டுமே இருக்கும் என்றும் கூறப்படுகிறது.

இதன் பொருள், ஒவ்வொரு ஆறு தற்காலிகப் பணியாளர்களில் ஐந்து பேர் அரசாங்கத்தின் நலத்திட்டப் பயன்களைப் பெற முடியாடக் நிலையில் இருக்கிறார்கள் என்பதாகும்.

கடந்த ஆண்டு நாடாளுமன்றத்தில் அரசாங்கம் அளித்த பல பதில்களில் பெரும்பாலும் ஒரு கோடிக்கும் மேல் எனக் குறிப்பிடப்பட்ட இந்தியாவின் அமைப்புசாரா தொழிலாளர்களின் எண்ணிக்கை, ஒரு தனிப்பட்ட ஆதாரத்தில் இருந்தே உருவானதாகத் தெரிகிறது. அது ஜூன் மாதம் 2022-ஆம் ஆண்டில் வெளியிடப்பட்ட நிதி ஆயோக் குழு (NITI Aayog) தயாரித்த 'India’s Booming Gig and Platform Economy' என்ற அறிக்கையாகும். அந்த அறிக்கை 2020-21-ஆம் ஆண்டில் தொழிலாளர்களின் எண்ணிக்கை சுமார் 77 லட்சமாக இருக்கும் என்று மதிப்பிட்டிருந்தது.

அமைப்புசாரா (Gig) தொழிலாளர்களின் எண்ணிக்கையை அளவிடுவதற்கான பிரத்யேக முயற்சிகள் எதுவும் இல்லாத நிலையில், இந்தியாவின் மதிப்பீடுகள் நிதி ஆயோக் (NITI Aayog) அமைப்பின் அறிக்கையை மட்டுமே நம்பியுள்ளன. இந்த அறிக்கை 2024-25 மற்றும் 2025-26-ஆம் ஆண்டுகளில் அமைப்புசாரா தொழிலாளர்களின் எண்ணிக்கை முறையே 1.27 கோடி மற்றும் 1.43 கோடியாக இருக்கும் என மதிப்பிட்டுள்ளது.

‘e-Shram’ இணையதளத்தை ஆதார் இணைக்கப்பட்ட ‘ஒழுங்கமைக்கப்படாத தொழிலாளர்களின் தேசிய தரவுத்தளமாக (National Database of Unorganised Workers (NDUW)) வடிவமைத்து, அரசின் சலுகைகளைப் பெறுவதற்குப் பதிவை ஒரு முன்நிபந்தனையாக்கியதன் மூலம், அமைப்புசாரா தொழிலாளர்கள் உட்பட ஒழுங்கமைக்கப்படாத தொழிலாளர்களைக் கண்காணிப்பதற்கான ஒரு ஒருங்கிணைந்த தளமாக ‘e-Shram’ தளத்தை அரசாங்கம் மாற்றியுள்ளது.

2025-ஆம் ஆண்டின் காலமுறை தொழிலாளர் கணக்கெடுப்பு அறிக்கையில் குறிப்பிடப்பட்டுள்ளபடி, இந்தியாவின் மொத்த தொழிலாளர் சக்தியான 61.6 கோடியில் அமைப்புசாரா தொழிலாளர்கள் சுமார் 2 சதவீதமாக உள்ள போதிலும், காலமுறை தொழிலாளர் கணக்கெடுப்பு அறிக்கைகள் இன்னும் அமைப்புசாரா தொழிலாளர்களை ஒரு தனிப்பிரிவாகப் பதிவு செய்யவில்லை. 

கடந்த ஆண்டு அமலுக்கு வந்த சமூக பாதுகாப்புச் சட்டம், 2020-ல் (Code on Social Security, 2020) மட்டுமே, அமைப்புசாரா தொழிலாளி என்பவர் யார் என்பதை அரசு அதிகாரப்பூர்வமாக வரையறுத்தது. இந்தச் சட்டம் விபத்துக் காப்பீடு, மகப்பேறு சலுகைகள் மற்றும் பிரத்யேக சமூகப் பாதுகாப்பு நிதி போன்ற கூடுதல் பலன்களை உறுதியளித்த போதிலும், பெரும்பாலானவை இன்னும் செயல்பாட்டுக்கு வரவில்லை. 

இருப்பினும், 2025-26-ஆம் ஆண்டு நிதிநிலைத் திட்டத்தில் அறிவிக்கப்பட்ட சுகாதாரக் காப்பீட்டின் வாக்குறுதி, பதிவுகளின் எண்ணிக்கையை அதிகரித்திருப்பதாகத் தெரிகிறது.

ஆனால், இந்தப் பதிவுகள் மாநிலங்கள் முழுவதும் சீராக இல்லை. குறிப்பிடத்தக்க வகையில், அதிக நகரமயமாக்கப்பட்ட தமிழ்நாடும் (31,654), தெலங்கானாவும் (29,951) மற்றும் கேரளமும் (11,219) முதல் 10 மாநிலங்களின் பட்டியலில் கூட இடம்பெறவில்லை.

நிதிஆயோக் குழுவின் 2022-ஆம் ஆண்டு அறிக்கை அமைப்புசாரா தொழிலாளர்களைக் கொண்ட 21 துறைகளைப் பட்டியலிட்டுள்ளது. இதில் வேளாண்மை, சுகாதாரம், கல்வி மற்றும் சில்லறை விற்பனை ஆகியவை அடங்கும் என்றாலும், ‘e-Shram’ இணையதளப் பதிவுகளின்படி, அமைப்புசாரா தொழிலாளர்களின் எண்ணிக்கை உணவுத் துறை, போக்குவரத்து மற்றும் வீட்டு வேலைகளிலேயே அதிகமாக உள்ளது.

Original Link: Majority of India’s gig workers remain out of the government’s reach 

Read More →

பல வகைகள் : வெங்காய உற்பத்தி மற்றும் விநியோகம் தொடர்பான சிக்கல்கள் குறித்து . . .

விவசாயிகளுக்குக் கூடுதல் சேமிப்பு வசதிகளும் (more storage facilities), மேம்பட்ட விநியோகக் கட்டமைப்புகளும் (better distribution networks) தேவைப்படுகின்றன.

1960-களிலிருந்தே, நுகர்வோருக்குக் குறைந்த விலையில் உணவுப் பொருட்களை வழங்குவதற்கும், விவசாயிகளுக்கு இலாபகரமான விலையை உறுதி செய்வதற்கும் இடையே ஒரு சமநிலையைப் பேணும் வழக்கத்தை இந்தியா கொண்டுள்ளது. குறுகிய கால விலையில் ஏற்படும் ஏற்ற இறக்கங்களைச் சமாளிப்பதிலேயே அரசின் தலையீடுகள் பெரும்பாலும் கவனம் செலுத்துகின்றன. இதனால்தான், டிசம்பர் 2023 முதல் மே 2024 வரை வெங்காய ஏற்றுமதிக்கு அரசு தடை விதித்தது. பின்னர் டன்னுக்கு 550 டாலர் என்ற குறைந்தபட்ச ஏற்றுமதி விலையையும் 40% ஏற்றுமதி வரியையும் அரசு நிர்ணயித்தது. செப்டம்பர் 2024-ல் வரியை 20%-ஆகக் குறைக்கப்பட்டது. இறுதியாக ஏப்ரல் 2025-ல் அதை முழுமையாக நீக்கப்பட்டது. ஆனால், சீரற்ற வானிலை மற்றும் நீண்ட காலத் தீர்வுகள் இல்லாத சூழல் ஆகியவை அரசின் இந்த நடவடிக்கைகளைச் சிக்கலானதாக மாற்றியுள்ளன. விவசாயிகளின் கண்ணோட்டத்தில் பார்த்தால், எதிர்பார்க்கப்படும் விலையை அடிப்படையாகக் கொண்டு உற்பத்தி தொடர்பான முக்கிய முடிவுகளை எடுத்த பிறகு, அரசு அடிக்கடி தனது முடிவை மாற்றிக்கொள்கிறது. மறுபுறம், நாட்டின் முக்கிய வெங்காய உற்பத்தியாளரான மகாராஷ்டிராவில் 'ராபி' (குளிர்கால) பருவத்தில் அமோக விளைச்சல் இருந்தபோதிலும், மத்திய அரசு நிர்ணயித்த கொள்முதல் விலையான கிலோவுக்கு ₹12.35 என்பது சாகுபடிச் செலவுகளை ஈடுகட்டாது என்று விவசாயிகள் வாதிட்டனர். பின்னர் மத்திய அரசு விலையை கிலோவுக்கு ₹26.45 வரை உயர்த்தியது. இருப்பினும், பல விவசாயிகளால் (குறைந்த தரம், சேமிப்பு வசதி இல்லாமை மற்றும் பிற காரணங்களால் முன்னதாகவே கிலோவுக்கு ₹1 என்ற மிகக் குறைந்த விலைக்கு வெங்காயத்தை விற்க வேண்டிய கட்டாயத்திற்கு ஆளான சில விவசாயிகளும் அடங்குவர்) இந்த உயர்ந்த விலையைப் பெற முடியவில்லை. விலைகள் சரிந்த பிறகு தலையிடுவதாலும், அனைத்து விவசாயிகளுக்கும் அல்லது அனைத்துத் தரமான விளைபொருட்களுக்கும் பலன் சென்றடையாததாலும் ஏற்படும் வரம்புகளை இது வெளிப்படுத்தியது.

விலை கையாளுதல் அல்லது முறைகேடுகள் குறித்து அரசு குறிப்பிட்டிருந்தாலும், முன்கூட்டியே திட்டமிட்டுச் செயல்படாமல், விலை உயர்வுகளுக்குப் பிறகு எதிர்வினையாற்றும் போக்கே முக்கியப் பிரச்சினையாகத் தொடர்கிறது. சேமிப்பு வசதிகளை மேம்படுத்துதல், சீரான வர்த்தகக் கொள்கையைப் பின்பற்றுதல், பிராந்தியங்களுக்கு இடையே சரக்குகளைத் திறம்படக் கொண்டு செல்லுதல் மற்றும் விலை வீழ்ச்சியால் ஏற்படும் பாதிப்புகளிலிருந்து விவசாயிகளைப் பாதுகாத்தல் போன்ற ஆக்கபூர்வமான நடவடிக்கைகளை அரசு மேற்கொள்ள வேண்டும். அறுவடை நேரத்தில் பெய்த வழக்கத்திற்கு மாறான மழை, மகாராஷ்டிராவில் 'காரிஃப்' (மழைக்கால) பயிர் உற்பத்தியில் ஏற்பட்ட 5% முதல் 7% சரிவு, மற்றும் வெங்காயத்தைச் சேமிப்பதிலும் பெரிய அளவிலான கையிருப்புப் பராமரிப்பிலும் உள்ள சவால்கள் ஆகியவை இந்த ஆண்டு நிலவிய குறைபாடுகளை வெளிச்சத்திற்குக் கொண்டுவந்தன. மேலும், குடும்ப அட்டை ஒன்றுக்கு 1 கிலோ வெங்காயத்தை ₹35-க்கு விநியோகிப்பதற்காக 1,000 டன் வெங்காயத்தை வாங்கும் வகையில் தமிழ்நாடு அரசு அறிவித்துள்ள இலக்கு சார்ந்த மானியத் திட்டமானது, சீரான விநியோகத்தைப் பராமரிக்க வேண்டிய கட்டாயத்தை மத்திய அரசுக்கு ஏற்படுத்தும். பொருட்களைப் பதுக்குவதைத் தடுப்பதோடு, தனியார் சில்லறை விற்பனை விலையைக் குறைக்கவும் உதவும் வகையில் இந்த நடவடிக்கை பாராட்டத்தக்க வகையில் வடிவமைக்கப்பட்டுள்ளது. இருப்பினும், கோதுமை அல்லது அரிசியை விட வெங்காயம் அறுவடைக்குப் பிந்தைய சேதங்களுக்கு (post-harvest losses) அதிகம் ஆளாகக்கூடியது என்பதால், அத்தகைய இழப்பு 10% முதல் 15%-க்கு மேல் சென்றால் இதன் பொருளாதாரச் சாத்தியக்கூறு பாதிக்கப்படலாம். மேலும், மானியத்தை நீண்ட காலத்திற்குத் தொடர வேண்டிய சூழல் ஏற்பட்டால் ஏற்படும் சிக்கல்களையும் மாநில அரசு கவனத்தில் கொள்ள வேண்டும். இறுதியாக, பிற மாநிலங்களும் இதேபோன்ற நடவடிக்கைகளை மேற்கொண்டால், மத்திய அரசின் கையிருப்பு (buffer stock) விரைவாகத் தீர்ந்துபோகக்கூடும். குறிப்பாக, இந்த ஆண்டில் சேமிப்பு இழப்பு சுமார் 30% என்ற அளவில் அதிகமாக இருக்கும் சூழலில் இது கூடுதல் கவனத்திற்குரியது.

Original Link: Many layers: On onion produce, issues.

Read More →

நிமோனியா மற்றும் மூளைக்காய்ச்சலுக்கு எதிரான ஒரு பொதுவான தடுப்பூசியை (Universal Vaccine) நோக்கிய முதல் படி -சுவாமிநாதன் எஸ்

ஸ்ட்ரெப்டோகாக்கஸ் நிமோனியா (Streptococcus pneumoniae) பாக்டீரியாவின்  நூறு வடிவங்கள் அனைத்தையும் குறிவைத்துத் தாக்கக்கூடிய மற்றும் தற்போதுள்ள தடுப்பூசிகளால் உருவாக்கப்படும் சில விரும்பத்தகாத விளைவுகளைத் தடுக்கக்கூடிய ஒரு பொதுவான நிமோகாக்கல் தடுப்பூசியை (universal pneumococcal vaccine) விஞ்ஞானிகள் தேடி வருகின்றனர். இந்தத் தடுப்பூசி, மக்களிடையே நிமோனியா, மூளைக்காய்ச்சல் மற்றும் பிற நிமோகாக்கல் நோய்களின் அச்சுறுத்தலை முழுமையாக அகற்றாமல் போகலாம். ஆனால், தற்போதுள்ள தடுப்பூசி நோயைக் குறைக்கக்கூடும்.

ஸ்ட்ரெப்டோகாக்கஸ் நிமோனியா (Streptococcus pneumoniae) என்ற ஒரு பாக்டீரியா உள்ளது. இது குறைந்தது நூறு வெவ்வேறு வடிவங்களில், அல்லது செரோடைப்களில் (serotypes) காணப்படுகிறது. மேலும், இது பொதுவாக நமது மூக்கு மற்றும் தொண்டையின் உட்புறச் சுவரில் உள்ள திசுக்களில் வாழ்கிறது. எஸ். நிமோனியா பொதுவாக பாதிப்பில்லாதது. ஆனால், உங்கள் உடலின் நோய் எதிர்ப்பு சக்தி பலவீனமடையும்போது, உதாரணமாக உங்களுக்கு வைரஸ் காய்ச்சல் ஏற்படும்போது, இந்த பாக்டீரியாக்கள் உங்கள் நுரையீரலைத் தாக்கி நிமோனியாவையும், உங்கள் மூளை மற்றும் தண்டுவடத்தைத் தாக்கி மூளைக்காய்ச்சலையும், உங்கள் இரத்த ஓட்டத்தில் செப்சிஸையும் (sepsis) ஏற்படுத்தக்கூடும்.

இந்த நோய்கள் நிமோகாக்கல் நோய்கள் (pneumococcal diseases) என்று அழைக்கப்படுகின்றன. மேலும் அதிர்ஷ்டவசமாக, இவற்றைத் தடுப்பூசிகள் மூலம் தடுக்க முடியும். இந்தத் தடுப்பூசிகள் ஒவ்வொன்றும், எஸ். நிமோனியாவின் (S. pneumoniae) ஒவ்வொரு செரோடைப்பையும் (serotype) இலக்காகக் கொண்ட, காப்சுலர் பாலிசாக்கரைடு (capsular polysaccharide) எனப்படும் ஒரு தனித்துவமான சர்க்கரைப் பொருளைக் கொண்டுள்ளன. அதாவது, அவை ஒவ்வொரு செரோடைப்பிற்கும் (serotype) பிரத்யேகமான பாதுகாப்பை வழங்குகின்றன.

மேலும், தற்போதுள்ள நிமோகாக்கல் தடுப்பூசிகள் (pneumococcal vaccines), சுமார் 100 செரோடைப்புகளில் (serotypes) ஒரு குறிப்பிட்ட துணைக்குழுவிற்கு எதிராக மட்டுமே பாதுகாக்கின்றன. பாதுகாப்பு வரம்பை அதிகரிக்க, விஞ்ஞானிகள் தடுப்பூசியில் கூடுதல் செரோடைப்-சார்ந்த காப்சுலர் பாலிசாக்கரைடுகளைச் (serotype-specific capsular polysaccharides) சேர்க்க வேண்டும். மேலும், ஒரே ஊசியில் அனைத்து செரோடைப்புகளையும் உள்ளடக்குவது மிகவும் சவாலானது, அதுமட்டுமின்றி மிகவும் செலவு மிக்கதாகவும் இருக்கும்.

சர்க்கரை ஊசி (Sugary shot)

சமீபத்தில், பிரிட்டிஷ் விஞ்ஞானிகள் குழு ஒன்று இந்தத் திசையில் ஒரு முக்கியமான முதல் படியை அறிவித்தது. அவர்கள் இரண்டு மாற்றங்களைச் செய்தனர். முதலாவதாக, அவர்கள் பாலிசாக்கரைடுக்கு பதிலாக புரதங்களைப் பயன்படுத்தினர். இரண்டாவதாக, அவர்கள் தலைகீழ் தடுப்பூசியியல் (reverse vaccinology) எனப்படும் ஒரு அணுகுமுறையைக் கையாண்டனர்.

அடிப்படையில், இன்று இரண்டு வகையான நிமோகாக்கல் தடுப்பூசிகள் (pneumococcal vaccines) கிடைக்கின்றன. ஒன்று, பல செரோடைப்புகளிலிருந்து சுத்திகரிக்கப்பட்ட காப்சுலர் பாலிசாக்கரைடுகளின் கலவையாகும். நியூமோவாக்ஸ்-23 (Pneumovax 23) இதற்கு ஒரு எடுத்துக்காட்டு ஆகும். இது பச்சிளம் குழந்தைகளுக்கு நன்றாக வேலை செய்வதில்லை. இதன் பாதுகாப்பும் குறுகிய காலத்திற்கே நீடிக்கிறது.

நோயெதிர்ப்புத் திறனின் விளைவுகளையும் அதன் நீடித்த தன்மையையும் அதிகரிக்க உதவும் வகையில், விஞ்ஞானிகள் பாலிசாக்கரைடுகளை ஒரு கடத்திப் புரதத்துடன் இணைத்துள்ளனர். இத்தகைய தடுப்பூசிகள் நியூமோகாக்கல் கான்ஜுகேட் தடுப்பூசிகள் (pneumococcal conjugate vaccines (PCV)) என்று அழைக்கப்படுகின்றன. PCV-10 மற்றும் PCV-14 ஆகியவை பொதுவான எடுத்துக்காட்டுகளாகும். ஒவ்வொரு தடுப்பூசியிலும் எத்தனை செரோடைப்புகள் சேர்க்கப்பட்டுள்ளன என்பதை எண்கள் காட்டுகின்றன.

இந்தத் தடுப்பூசிகள் எஸ். நிமோனியாவின் (S. pneumoniae) சில செரோடைப்களைக் குறிவைத்து அழிக்கும்போது, ​​மற்ற செரோடைப்கள் நோய்த்தொற்றை ஏற்படுத்துவதற்கும் இது வழிவகுக்கிறது. மேலும், இந்தத் தடுப்பூசி அல்லாத செரோடைப்கள், இடம் மற்றும் வளங்களுக்கான உயிரியல் போட்டியை குறைவாகவே எதிர்கொள்கின்றன. எனவே, அவை பெருகி, இறுதியில் தடுப்பூசியால் குறிவைக்கப்பட்ட செரோடைப்களுக்குப் பதிலாக வந்துவிடுகின்றன. இதனால், தடுப்பூசிகள் பயனற்றுப் போகின்றன.

இரண்டாவதாக, பல தடுப்பூசி அல்லாத செரோடைப்கள், நுண்ணுயிர் எதிர்ப்பி எதிர்ப்பு மரபணுக்களைக் கொண்டுள்ளன அல்லது அவற்றின் எதிர்ப்புத் திறன் கொண்ட வகைகளிடமிருந்து அவற்றைப் பெற முடியும். இது தடுப்பூசி மற்றும் நுண்ணுயிர் எதிர்ப்பி ஆகிய இரண்டிற்கும் எதிர்ப்புத் திறன் கொண்ட செரோடைப்கள் உருவாக வழிவகுக்கிறது.

எனவே, நிமோனியா, மூளைக்காய்ச்சல் மற்றும் பிற நிமோகாக்கல் நோய்களின் அச்சுறுத்தலை மக்களிடையே உயிர்ப்புடன் வைத்திருக்கும் இந்த விளைவுகளைத் தடுத்து, அனைத்து செரோடைப்களையும் குறிவைக்கக்கூடிய ஒரு பொதுவான நிமோகாக்கல் தடுப்பூசியை விஞ்ஞானிகள் தேடி வருகின்றனர்.

ஒரு தீவிரமான தேடல்

தலைகீழ் தடுப்பூசியியல் (Reverse vaccinology) என்பது, தடுப்பூசிகளில் சேர்க்கப்படக்கூடிய புரதங்களைக் கண்டறிவதற்காக, கிருமியின் மரபணுத்தொகுதியிலிருந்து தொடங்குகிறது. சமீபத்திய கோவிட்-19 பெருந்தொற்றின் போது விஞ்ஞானிகள் இதற்கு ஒரு உதாரணத்தை நிரூபித்தனர். 2020-ம் ஆண்டின் தொடக்கத்தில் இந்த வைரஸின் மரபணுத்தொகுதி வரிசைப்படுத்தப்பட்டவுடன், உலகெங்கிலும் உள்ள விஞ்ஞானிகள் அதை ஆய்வு செய்து, கோவிட்-19 தடுப்பூசிகளை உருவாக்குவதற்காக ஸ்பைக்-புரத (spike protein) மரபணுவைக் கண்டறிய முடிந்தது. இந்த அணுகுமுறை, தடுப்பூசியை உருவாக்குவதற்காக கிருமிகளைப் பெரிய உயிரியல் உலைகளில் வளர்த்து, அவற்றிலிருந்து மூலக்கூறு கூறுகளைத் தூய்மைப்படுத்த வேண்டிய தேவையை முற்றிலுமாகத் தவிர்த்தது.

எஸ். நிமோனியாவின் மரபணுத்தொகுதி 2,000-க்கும் மேற்பட்ட மரபணுக்களைக் கொண்டுள்ளது. அவற்றில், சுமார் 1,300 மரபணுக்கள் செரோடைப்கள் முழுவதும் பொதுவாகக் காணப்படுகின்றன. ஏறக்குறைய நூறு செரோடைப்களைச் சேர்ந்த 20,000-க்கும் மேற்பட்ட எஸ். நிமோனியா தனிமங்களின் மரபணுத் தரவுகளும் பொதுவெளியில் கிடைக்கின்றன. இந்த வரிசைகளை ஆய்வு செய்வதற்காக, விஞ்ஞானிகள் உயிரித் தகவல் கருவிகளின் (bioinformatics tools) தொகுப்பைப் பயன்படுத்தி விரிவான கணக்கீட்டுப் பகுப்பாய்வை மேற்கொண்டனர்.

ஒரு பொதுவான தடுப்பூசியை உருவாக்குவதற்கான சிறந்த மரபணுக்கள், மூன்று முக்கிய அம்சங்களைக் கொண்ட புரதங்களை உருவாக்க வேண்டும் என்று விஞ்ஞானிகள் கருதினர். (i) புரதம் கிருமியின் மேற்பரப்பில் இருக்க வேண்டும். இது நோயெதிர்ப்பு மண்டலம் அதைக் கண்டறிந்து தாக்குவதை எளிதாக்கும். (ii) புரதம் மனிதப் புரதங்களுடன் சிறிதளவோ அல்லது எந்த ஒற்றுமையுமின்றியோ இருக்க வேண்டும். இது நோயெதிர்ப்பு மண்டலம் உடலின் சொந்த திசுக்களைத் தாக்கும் அபாயத்தைக் குறைக்கும், மற்றும் (iii) அது வலுவான மற்றும் நீடித்த நிமோகாக்கல் எதிர்ப்பு நோயெதிர்ப்பு சக்தியைத் தூண்டும் திறன் கொண்டதாக இருக்க வேண்டும்.

அந்தக் குழு சில மரபணுக்களைப் பட்டியலிட்டு, அவற்றின் கணிக்கப்பட்ட வடிவங்கள் மற்றும் நிலைத்தன்மையின் அடிப்படையில் அந்தப் பட்டியலை மேலும் குறைத்தது. இதிலிருந்து, அந்தக் குழு மூன்று மரபணுக்களைத் தேர்ந்தெடுத்தது. அவை, துத்தநாக மெட்டாலோபுரோட்டீஸ் B (Z) (zinc metalloprotease B (Z)), நிமோகாக்கல் ஒட்டுதல் வீரிய காரணி A (P) (pneumococcal adherence virulence factor A (P)), மற்றும் மற்றொரு பாக்டீரியப் புரதத்துடன் அதன் ஒற்றுமையின் காரணமாக விஞ்ஞானிகள் YfhO-போன்ற (Y) என்று பெயரிட்ட ஒரு புரதம்.

இந்தக் குழு ஆய்வகத்தில் Z, P, மற்றும் Y புரதங்களை உற்பத்தி செய்து, அவற்றை ஒன்றாகக் கலந்து ஒரு சோதனைத் தடுப்பூசியை உருவாக்கியது. மேலும் அவர்கள், CpG எனப்படும் ஒரு சிறிய செயற்கை டி.என்.ஏ துண்டு மற்றும் கைட்டோசான் (chitosan) எனப்படும் ஒரு சர்க்கரை சார்ந்த பாலிமர் (sugar-based polymer) ஆகிய இரண்டு புரதமற்ற நோயெதிர்ப்பு ஊக்கிகளையும் சேர்த்தனர். இந்தத் தடுப்பூசி கலவைக்கு அவர்கள் ZPY-CpG-Ch என்று பெயரிட்டனர்.

வீரியமிக்க நோயெதிர்ப்புகள்

நிமோகோக்கல் பாக்டீரியாவுக்கு (pneumococcal bacteria) எதிராகப் பாதுகாப்பை அளிக்கும் நோயெதிர்ப்புகளை (antibodies) இத்தடுப்பூசி உருவாக்குமா என்பதைச் சோதிக்க விஞ்ஞானிகள் விரும்பினர். எனவே, அவர்கள் ஆய்வக எலிகளுக்கு இத்தடுப்பூசியைச் செலுத்தினர். சிறிது காலத்திற்குப் பிறகு, அதிக வீரியம் கொண்டதாக அறியப்படும் எஸ். நிமோனியா சீரோடைப் 1 (serotype 1) பாக்டீரியாவின் உயிரிழப்பை ஏற்படுத்தக்கூடிய அளவை (lethal dose) அந்த எலிகளுக்கு அவர்கள் செலுத்தினர். தடுப்பூசி போடப்படாத அனைத்து எலிகளும் அந்த உயிரிழப்பை ஏற்படுத்தும் அளவினால் உயிரிழந்த நிலையில், தடுப்பூசி போடப்பட்ட எலிகள் 80-100% வரை உயிர் பிழைத்தன. முக்கியமாக, ZPY-CpG-Ch வழங்கிய பாதுகாப்பின் அளவானது PCV-13 தடுப்பூசி வழங்கிய பாதுகாப்பிற்கு இணையாக இருந்ததை விஞ்ஞானிகள் கண்டறிந்தனர்.

ZPY-CpG-Ch தடுப்பூசி போடப்பட்ட எலிகளிடமிருந்து பெறப்பட்ட நோயெதிர்ப்புகள், ஆய்வகச் சூழலில் (test tube) *எஸ். நிமோனியா பாக்டீரியாவை அழிக்க உதவக்கூடும் என்பதையும் அக்குழு கண்டறிந்தது. தடுப்பூசி போடப்படாத எலிகளுக்கு இந்த நோயெதிர்ப்புகள் செலுத்தப்பட்டபோது, ​​சீரோடைப் 1-ன் உயிரிழப்பை ஏற்படுத்தும் அளவிலிருந்து அவற்றைப் பாதுகாக்க முடிந்தது.

மூன்றாவதாக, தடுப்பூசியில் சேர்க்கப்படாத இரண்டு வகை சீரோடைப்களான (serotypes) 11A மற்றும் 33F ஆகியவை உயிரிழப்பை ஏற்படுத்தும் அளவுகளுக்கு ஆளாக்கப்பட்ட எலிகளை ZPY-CpG-Ch முழுமையாகப் பாதுகாத்தது. மேலும், சீரோடைப் 8 எனப்படும் மற்றொரு சீரோடைப்பிற்கு எதிராக இது 50% பாதுகாப்பை வழங்கியது.

எலிகள் மீதான அனைத்து சோதனைகளிலும், நுரையீரல் மற்றும் இரத்தத்தில் உள்ள பாக்டீரியாக்களின் அளவைக் கொண்டு கணக்கிடப்பட்ட தடுப்பூசியின் பாதுகாப்புத் திறன், அந்த எலிகளின் உயிர் பிழைப்பு விகிதங்களுடன் ஒத்துப்போனது. இருப்பினும், ZPY-CpG-Ch தடுப்பூசி போடப்பட்ட எலிகளின் மேல் சுவாசப் பாதையில் உள்ள நிமோகோக்கல் பாக்டீரியாக்களின் அளவைக் குறைக்கவில்லை. அதாவது, பாதுகாப்பு பெற்றிருந்தாலும், தடுப்பூசி போடப்பட்ட எலிகளால் தொற்று இல்லாத எலிகளுக்குத் தொற்றைப் பரப்ப முடியும்.

ஒரு முக்கியமான இலக்கு

இறுதியாக, ZPY-CpG-Ch மூலம் எலிகளுக்குத் தடுப்பூசி செலுத்துவது, நிமோகோக்கல் நோயெதிர்ப்பு மண்டலச் செயல்பாட்டில் தொடர்புடைய ஒரு குறிப்பிட்ட வகை நோயெதிர்ப்பு செல்களைத் தூண்டியது என்றும் அக்குழு தெரிவித்தது.

ZPY-CpG-Ch தடுப்பூசியை ஒரு 'பொதுவான நிமோகோக்கல் தடுப்பூசி' (universal pneumococcal vaccine) என்று கருதுவதற்கு, இந்த ஆய்வின் முடிவுகள் இன்னும் முன்கூட்டிய நிலையிலேயே உள்ளன. இதுவரை, இது வெறும் நான்கு வகையான சீரோடைப்புகளுக்கு (serotypes) எதிராக மட்டுமே சோதிக்கப்பட்டுள்ளது. மேலும், ஆய்வக எலிகளில் கிடைக்கும் தடுப்பூசி முடிவுகள், மனிதர்களிடம் ஏற்படும் விளைவுகளை முழுமையாகப் பிரதிபலிக்காமல் இருக்கலாம்.

இருப்பினும், ஒரு பொதுவான நியூமோகோக்கல் தடுப்பூசியை (universal pneumococcal vaccine) உருவாக்கும் மதிப்புமிக்க இலக்கை நோக்கிய ஒரு தொடக்க முயற்சியாக இந்த ஆய்வு அமைகிறது.

எஸ். சுவாமிநாதன், ஹைதராபாத்தில் உள்ள BITS-பிலானியின் ஓய்வுபெற்ற உயிரியல் பேராசிரியரும், புது தில்லியில் உள்ள ICGEB-இன் முன்னாள் விஞ்ஞானியும் ஆவார்.

Original Link: A first step towards a universal vaccine against pneumonia, meningitis

Read More →