H-1B நடைமுறையில் முன்மொழியப்பட்டுள்ள மாற்றங்கள் என்ன? தொழிலாளர்நலத்துறை என்னென்ன மாற்றங்களைப் பரிந்துரைத்துள்ளது? சர்வதேச மாணவர்கள் எது போன்ற மாற்றங்களை எதிர்கொள்ள நேரிடும்?
தற்போதைய செய்தி: அமெரிக்காவில் வெளிநாட்டினர் பணிபுரிவதற்கும் கல்வி கற்பதற்கும் அனுமதிக்கப்படும் நடைமுறைகள் தொடர்பான விதிகளில் விரிவான மாற்றங்களைக் கொண்டுவர அமெரிக்க அரசு தயாராகி வருகிறது. இதில் H-1B பணி விசா திட்டம், விருப்பத் தேர்வு நடைமுறைப் பயிற்சி (Optional Practical Training (OPT)) முறை மற்றும் வேலைவாய்ப்பு சார்ந்த 'அமெரிக்க நிரந்தர குடியுரிமை அட்டை' (Green Card) ஆகியவை அடங்கும். இந்த மாற்றங்கள், அமெரிக்க அரசின் உள்துறைப் பாதுகாப்பு, தொழிலாளர் மற்றும் வெளியுறவு ஆகிய மூன்று முக்கியத் துறைகள் அவ்வப்போது வெளியிடும் 'ஒருங்கிணைந்த ஒழுங்குமுறை நிகழ்ச்சி நிரல்களின்' (Unified Regulatory Agendas) கீழ் முன்வைக்கப்பட்ட பரிந்துரைகளின் ஒரு பகுதியாகும்.
H-1B திட்டத்தில் முன்மொழியப்பட்டுள்ள மாற்றங்கள் எவை?
விதிகள் இன்னும் நடைமுறைப்படுத்தப்படவில்லை. ஆனால், விதிகள் இந்த ஆண்டு ஆகஸ்ட் மாதம் அவை அமலுக்கு வரும் என எதிர்பார்க்கப்படுகிறது. உள்நாட்டுப் பாதுகாப்புத் துறையின் (Department of Homeland Security (DHS)) இது போன்ற ஒரு விதியானது, வழங்கப்படும் H-1B விசாக்களுக்கான உச்சவரம்பிலிருந்து பல்கலைக்கழகங்களுக்கும் சில ஆராய்ச்சி நிறுவனங்களுக்கும் வழங்கப்பட்ட விலக்குகளைக் குறைக்கும்.
மூன்றாம் தரப்பு வாடிக்கையாளரை கொண்ட (Third-party client) நிறுவனங்களில் H-1B பணியாளர்களை பணியமர்த்த விரும்பும் நிறுவனங்களுக்கு கடுமையான நிபந்தனைகளையும் இந்த முன்மொழிவுகள் கொண்டு வருகின்றன. இந்திய தகவல் தொழில்நுட்ப மற்றும் ஆலோசனை (Consulting) நிறுவனங்கள் இந்த வணிக மாதிரியை பரவலாகப் பயன்படுத்துவதால், இந்த மாற்றம் இந்தியர்களுக்கு மிகவும் முக்கியத்துவம் வாய்ந்ததாக அமைகிறது.
அடிப்படையில், H-1B விசா பெற்ற பணியாளர்களை மூன்றாம் தரப்பு வாடிக்கையாளர் நிறுவனங்களில் பணியமர்த்த விரும்பும் நிறுவனங்கள், உண்மையான முதலாளி-பணியாளர் (Employer–Employee) இருப்பதை மட்டும் அல்லாமல், அந்தப் பணியாளர் அங்கு சிறப்புத் திறன் தேவைப்படும் பணியையே மேற்கொள்வார் என்பதற்கான ஆதாரங்களையும் வழங்க வேண்டும். இந்தச் செயல்முறைக்கு மேலும் விரிவான ஆவணங்களும் தேவைப்படும், அதனுடன் சேர்த்து கடந்தகாலத்தில் H-1B விசா திட்டத்தின் விதிகளை மீறிய நிறுவனங்கள் கடுமையான ஆய்வுக்கு உட்படுத்தப்படும்.
இவை அனைத்திற்கும் மேலாக, அமெரிக்க உள்நாட்டு பாதுகாப்புத் துறை, H-1B விசா விண்ணப்பங்களுடன் இணைந்து செலுத்தப்படும் கூடுதல் கட்டணங்களில் சிலவற்றை நீட்டித்து, அவற்றின் வரம்பையும் விரிவுபடுத்த முடிவு செய்துள்ளது.
இவை அனைத்தும் இந்தியாவிற்கும் இந்தியர்களுக்கும் அதிக தாக்கங்களை ஏற்படுத்துகின்றன. அமெரிக்காவில் ஆண்டுக்கு 85,000 H-1B விசாக்களுக்கு மட்டுமே அனுமதி உண்டு. இதில், ஒப்புதல் பெற்ற H-1B விசா விண்ணப்பங்களில் 71–74 சதவீதம் இந்தியர்களின் விண்ணப்பங்களாகும்.
தொழிலாளர் துறை (Department of Labor) என்ன மாற்றங்களைப் பரிந்துரைத்துள்ளது?
தொழிலாளர் துறையின் விதிமுறை மாற்றங்கள் முக்கியமாக ஊதிய அளவுகள் போன்ற அம்சங்களில் கவனம் செலுத்துகின்றன. முன்மொழியப்பட்டுள்ள மாற்றங்களின்படி, H-1B மற்றும் நிரல் மின்னணு மதிப்பாய்வு மேலாண்மை (Program Electronic Review Management (PERM)) ஆகிய அமைப்புகளுக்கான 'தொடக்க நிலை ஊதிய வரம்பாகும்' (entry-level wage benchmark). இது வேலைவாய்ப்பு தொடர்பான அமெரிக்க நிரந்தர குடியுரிமை அட்டைகளைப் (Green Cards) பெறுவதற்கான முதல் படியாகும். இது 17-வது சதவீத நிலையிலிருந்து, 34-வது சதவீதம் என்ற நிலைக்கு உயர்த்தப்படும். அதேபோல, ஊதிய நிலைகளும் உயர்த்தப்படும்.
எளிமையாகச் சொன்னால், வெளிநாட்டு பணியாளர்களுக்கு ஆதரவளித்து வேலைக்கு அமர்த்தும் நிறுவனங்கள் வழங்க வேண்டிய குறைந்தபட்ச சம்பள வரம்பு உயர்த்தப்படும். இதன் விளைவாக, அமெரிக்க நிரந்தர குடியுரிமை அட்டை (Green Card) பெறும் செயல்முறை அதிக செலவுடையதாக மாறும்.
சர்வதேச மாணவர்கள் என்னென்ன மாற்றங்களை எதிர்கொள்வார்கள்?
முன்மொழியப்பட்டுள்ள மாற்றங்கள் அமெரிக்காவில் பணிபுரிய விரும்புவோருக்கு மட்டும் உரியவை அல்ல. அங்கு கல்வி கற்க விரும்புவோரும் இதில் இடம் பெறுவர்.
தற்போது, சர்வதேச மாணவர்களுக்கான விசா நடைமுறையில் 'தங்கும் கால அளவு' (duration of stay) என்ற கொள்கையை உள்நாட்டுப் பாதுகாப்புத் துறை பின்பற்றுகிறது. இதன்படி, மாணவர்கள் தங்கள் கல்வித் திட்டத்தின் தேவைகளைப் பூர்த்தி செய்யும் வரை அமெரிக்காவில் தங்கமுடியும். ஆனால் இனி, மாணவர்களுக்குத் தங்குவதற்கு ஒரு குறிப்பிட்ட கால அளவு நிர்ணயிக்கப்படும். அந்தக் காலம் முடிந்த பிறகு, தொடர்ந்து படிக்கவோ அல்லது அமெரிக்காவில் தங்கி இருக்க அவர்கள் கால நீட்டிப்புக்கு விண்ணப்பிக்க வேண்டும்.
இது இந்தியாவுக்கும், குறிப்பாக இந்தியாவின் இரண்டு மாநிலங்களுக்கும் மிக முக்கியமான ஒரு விவகாரமாகும். 2023-24-ஆம் ஆண்டிற்கான சமீபத்திய தரவுகளின்படி, அமெரிக்காவிற்கு அதிக எண்ணிக்கையிலான சர்வதேச மாணவர்களை அனுப்பிய நாடாக இந்தியா உள்ளது. 2023-24-ஆம் ஆண்டுகளில் 3.3 லட்சம் மாணவர்கள் இந்தியாவிலிருந்து அமெரிக்காவிற்கு சென்றுள்ளனர். மேலும், அமெரிக்கத் தூதரக அதிகாரிகளின் தகவலின்படி, இந்தியாவிலிருந்து அமெரிக்காவிற்குச் சென்ற மாணவர்களில் 50% பேர் தெலுங்கானா மற்றும் ஆந்திரப் பிரதேசத்தைச் சேர்ந்தவர்கள் ஆவர்.
இது மட்டுமல்லாமல், 2027 பிப்ரவரி மாதத்தில் அமலுக்கு வரவுள்ள மற்றொரு முன்மொழிவு, விருப்பத் தேர்வு சார்ந்த செய்முறைப் பயிற்சி (Optional Practical Training) திட்டத்தின் விதிகளை மேலும் கடுமையாக்கி உள்ளது. இதில், இரண்டு ஆண்டுகள் வழங்கப்படும் STEM OPT நீட்டிப்பு மற்றும் பாடத்திட்டம் தொடர்பான பயிற்சி (Curricular Practical Training (CPT)) திட்டங்களிலும் மாற்றங்கள் செய்யப்படவுள்ளன.
வேறு ஏதேனும் மாற்றங்கள் மேற்கொள்ளப்படவிருக்கின்றனவா?
இறுதி விதிமுறை மாற்றம் ஒன்று, H-4 விசா திட்டத்தின்கீழ் அமெரிக்காவில் வசிக்கும் H-1B பணியாளர்களின் வாழ்க்கைத் துணைவர்களுக்கு ஆவணப் பணிகளையும் மன அழுத்தத்தையும் அதிகரிக்கக்கூடும். இதுவரை, இவர்கள் 'பணி அங்கீகார ஆவணங்கள்' (Employment Authorisation Documents (EADs)) அமைப்பின் கீழ், அமெரிக்காவில் தங்கிப் பணியாற்ற முடிந்ததுடன், இவர்களது தங்கும் காலத்திற்கான நீட்டிப்புகளும் தானாகவே வழங்கப்பட்டு வந்தன.
இருப்பினும், இந்த மாதத்தில் எதிர்பார்க்கப்படும் ஒரு புதிய மாற்றத்தின் மூலம், இது போன்ற தானியங்கி காலநீட்டிப்புகள் நிறுத்தப்படவுள்ளன. இது போன்ற விசாக்களை வைத்திருப்பவர்கள் காலநீட்டிப்புக்கு விண்ணப்பிக்கலாம் என்றாலும், ஏதேனும் காரணத்தினால் அவர்களின் விசா புதுப்பிப்பதில் தாமதம் ஏற்பட்டால், அவர்கள் தங்கள் பணிக்கான அனுமதியை இழக்க நேரிடலாம்.