டைமெத்தில் ஈதர் (Dimethyl Ether (DME))
ஏன் முக்கியம்?
புனேவில் உள்ள அறிவியல் மற்றும் தொழில்துறை ஆராய்ச்சி கழகத்தின் தேசிய வேதியியல் ஆய்வகம் (National Chemical Laboratory), மெத்தனால் நீரிழப்பு மூலம் டைமெத்தில் ஈதரை (DME) உற்பத்தி செய்வதற்கான ஒரு உள்நாட்டு செயல்முறை தொழில்நுட்பத்தை உருவாக்கியுள்ளது. இதனை, ஒரு மாற்றுத் தூய்மையான எரிபொருளாக திரவமாக்கப்பட்ட பெட்ரோலிய வாயுவுடன் (Liquefied Petroleum Gas (LPG)) கலக்கலாம். இது ஒரு மாற்றுத் தூய்மையான எரிபொருளாகப் பயன்படும்.
முக்கிய கருத்து :
டைமெத்தில் ஈதர் (DME) என்பது செயற்கையாகத் தயாரிக்கப்படும் ஒரு மாற்று எரிபொருளாகும். இதை, சிறப்பாக வடிவமைக்கப்பட்ட அழுத்தப் பற்றவைப்பு டீசல் இயந்திரங்களில் (compression ignition diesel engines) பல்வேறு தேவைகளுக்காக நேரடியாகப் பயன்படுத்தலாம். சாதாரண வளிமண்டல நிலைகளில், டைமெத்தில் ஈதர் (DME) ஒரு நிறமற்ற வாயுவாக இருக்கும். இது வேதியியல் துறையிலும், ஏரோசால் உந்துவிசைப் பொருள், கரைப்பான், எரிபொருள் மற்றும் குளிரூட்டியாகவும் பரவலாகப் பயன்படுத்தப்படுகிறது.
டைமெத்தில் ஈதர் (DME) ஆனது, பாரம்பரிய எரிபொருள்களுக்கு இணையான வெப்ப மதிப்பையும், ஒத்த வெப்பத் திறனையும் கொண்டுள்ளது. இது குறைந்த அளவு புகை வெளியேற்றம் மற்றும் குறைந்த அளவு துகள்களைக் கொண்ட ஒரு தூய்மையாக எரியும் எரிபொருளாகும்.
மிக முக்கியமாக, ஓசோனை அழிக்கும் குளோரோஃப்ளூரோகார்பன்களுக்கு (chlorofluorocarbons (CFC)) மாற்றாக, இது ஏற்கனவே ஓசோனுக்கு உகந்த ஏரோசல் உந்துபொருளாகப் பயன்படுத்தப்பட்டு வருகிறது. எனவே, இதை ஒரு குளிர்பதனப் பொருளாகவும் பயன்படுத்தலாம். மேலும், இது நாட்டின் பொருளாதாரத்தை மேம்படுத்த உதவக்கூடிய குறைந்த ஒலெஃபின்கள் (lower olefins), டைமெத்தில் சல்பேட் (dimethyl sulfate) மற்றும் மெத்தில் அசிடேட் (methyl acetate) போன்ற மதிப்புமிக்க வேதிப்பொருட்களை உற்பத்தி செய்வதற்கான ஒரு அத்தியாவசிய இடைநிலைப் பொருளாகும்.
டைமெத்தில் ஈதரை (DME), லேசான ஈதர் போன்ற வாசனைக் கொண்ட ஒரு ‘இரண்டாம் தலைமுறை எரிபொருள்/உயிரி எரிபொருள்’ எனக் கருதலாம். இது அழுத்தத்தின் கீழ் (40°C வெப்பநிலையில் 10 பார் அழுத்தம்) திரவமாகிறது. மேலும், டைமெத்தில் ஈதரின் (DME) இந்தப் பண்புகள் புரோப்பேன் வாயுவைப் போலவே உள்ளன. அதுமட்டுமின்றி, இது ஒப்பீட்டளவில் மந்தமானது. இது அரிப்பை ஏற்படுத்தாதது, புற்றுநோயை உண்டாக்காதது, ஏறக்குறைய நச்சுத்தன்மையற்றது, மற்றும் காற்றில் நீண்டநேரம் வெளிப்படும்போது பெராக்சைடுகளை (peroxides) உருவாக்குவதில்லை.
அதன் இயற்பியல் மற்றும் வேதியியல் பண்புகள், அதனை திரவமாக்கப்பட்ட பெட்ரோலிய வாயுக்கு (LPG) ஒரு பொருத்தமான சிறந்த மாற்றாக (அல்லது கலவைப் பொருளாக) ஆக்குகின்றன. எனவே, டைமெத்தில் ஈதரை (DME) வீட்டு உபயோக சமையல் எரிவாயுவிலும் தொழிற்சாலைகளிலும் எரிபொருளாகப் பயன்படுத்தலாம்.
குறிப்பாக, மீத்தேன் நேரடியாக டைமெத்தில் ஈதரை (DME) உற்பத்தி செய்வதில்லை. மாறாக, மீத்தேன் ஒரு தொடக்கப் பொருளாகச் செயல்படுகிறது. அது முதலில் சின்கேஸாக (கார்பன் மோனாக்சைடு-CO மற்றும் ஹைட்ரஜன்-H2) மாற்றப்பட்டு, பின்னர் டைமெத்தில் ஈதரை (DME) உற்பத்தி செய்யப் பயன்படும் மெத்தனாலாக மாற்றப்படுகிறது. மீத்தேனை புதைபடிவ எரிபொருள்கள் மற்றும் புதுப்பிக்கத்தக்க மூலங்களிலிருந்து பெற முடியும் என்பதால், டைமெத்தில் ஈதர் (DME) உற்பத்தி முறை நெகிழ்வுத்தன்மை வாய்ந்ததாகவும், எதிர்காலத்திற்கு ஏற்ற வகையிலும் அமைந்துள்ளது.
டைமெத்தில் ஈதர் (DME) மற்றும் திரவமாக்கப்பட்ட பெட்ரோலிய வாயு (LPG) ஒப்பீடு
திரவமாக்கப்பட்ட பெட்ரோலிய வாயு (LPG) என்பது ஒப்பீட்டளவில் தூய்மையான, எடுத்துச் செல்லக்கூடிய மற்றும் திறமையான ஒரு ஆற்றல் மூலமாகும். இது நிறமற்றது மற்றும் மணமற்றது. மேலும், மிகச் சிறிய கசிவைக் கூட எளிதில் கண்டறியும் வகையில், இதில் ஒரு வலிமையான துர்நாற்றப் பொருள் சேர்க்கப்படுகிறது.
சாதாரண வெப்பநிலையில், திரவமாக்கப்பட்ட பெட்ரோலிய வாயு (LPG) ஒரு வாயுவாகும். மிதமான அழுத்தம் அல்லது குளிரூட்டலுக்கு உட்படுத்தப்படும்போது, அது திரவமாக மாறுகிறது. திரவ வடிவில் இருக்கும்போது, இதைச் சேமித்து வைப்பதும், ஓரிடத்திலிருந்து மற்றோர் இடத்திற்கு எடுத்துச் செல்வதும் எளிதாகிறது.
திரவமாக்கப்பட்ட பெட்ரோலிய வாயு (LPG) என்பது, பொதுவாகப் பயன்படுத்தப்படும் மற்ற எரிபொருள்களைக் காட்டிலும் ஓர் அலகுக்கு அதிக கலோரி மதிப்பைக் கொண்ட, அதிக அளவு ஆற்றலைக் கொண்ட ஒரு எரிபொருள் மூலமாகும்.
புதிய அடிப்படை ஆண்டுடன் கூடிய நுகர்வோர் விலைக் குறியீடு (CPI)
அது ஏன் முக்கியம்?
புள்ளியியல் மற்றும் திட்ட அமலாக்க அமைச்சகம் (MoSPI), புதுப்பிக்கப்பட்ட 2024-ம் ஆண்டை அடிப்படையாகக் கொண்ட புதிய நுகர்வோர் விலைக் குறியீட்டு (CPI) தரவுகளை வெளியிட்டது. அதன்படி, ஜனவரி மாதத்தில் சில்லறைப் பணவீக்கம் 2.75% ஆக இருந்தது. இந்தியாவின் மிக முக்கியமான பேரியல் பொருளாதாரக் குறியீடான நுகர்வோர் விலைக் குறியீட்டுப் (CPI) பணவீக்கத்தை நவீனமயமாக்குவது, புள்ளியியல் மற்றும் திட்ட அமலாக்க அமைச்சகத்தால் மேற்கொள்ளப்படும் இந்தியாவின் அதிகாரப்பூர்வ புள்ளிவிவர அமைப்பை முழுமையாக மாற்றியமைத்து வருகிறது.
முக்கிய கருத்து
பணவீக்கம் என்பது, ஒரு குறிப்பிட்ட காலப்பகுதியில் பொருட்கள் மற்றும் சேவைகளின் பொதுவான விலை மட்டத்தில் ஏற்படும் தொடர்ச்சியான உயர்வாகும். இது பணத்தின் வாங்கும் சக்தியையோ அல்லது உண்மையான வருமானத்தையோ குறைக்கிறது. பணவீக்கத்தை அளவிடுவதற்கு நுகர்வோர் விலைக் குறியீடு, மொத்த விலைக் குறியீடு (Wholesale Price Index (WPI)), மொத்த உள்நாட்டு உற்பத்தி விலைக் குறைப்பான் (GDP deflator) போன்ற பல்வேறு முறைகள் உள்ளன. இவற்றில் ஒவ்வொன்றும் விலை மாற்றங்களின் ஒரு குறிப்பிட்ட அம்சத்தில் கவனம் செலுத்துகிறது.
நுகர்வோர் விலைக் குறியீட்டு (CPI) பணவீக்கமானது, நுகர்வோரால் வாங்கப்படும் அனைத்துப் பொருட்களின் விலைகளையும் குறிக்கிறது. அப்பொருட்கள் உள்நாட்டில் உற்பத்தி செய்யப்பட்டவையாகவோ அல்லது இறக்குமதி செய்யப்பட்டவையாகவோ இருக்கலாம்.
நுகர்வோர் விலைக் குறியீட்டுப் பணவீக்கம் (CPI inflation) நாட்டின் மிக முக்கியமான பொருளாதாரக் குறியீடாகும். ஏனெனில் இது இந்திய ரிசர்வ் வங்கி (RBI) நிர்ணயிக்கும் வட்டி விகிதங்களின் அளவை நேரடியாகப் பாதிக்கிறது. நடுத்தரக் காலத்தில் CPI பணவீக்கத்தை 4% அளவில் தக்கவைத்துக்கொள்வது மத்திய வங்கியின் சட்டரீதியான பொறுப்பாகும். இந்த இலக்கை, 2% முதல் 6% வரையிலான அனுமதிக்கப்பட்ட வரம்பிற்குள் அது பராமரிக்க வேண்டும்.
பணவீக்கத்தைக் கணக்கிடுவதற்கான சூத்திரம்
((CPI x+1 – CPI x )/CPI x )) X 100
CPI x = ஆரம்ப/அடிப்படை ஆண்டான x-இல் நுகர்வோர் விலைக் குறியீட்டின் (CPI)
மதிப்பாகும்.
CPI x+1 = அதற்கு அடுத்த ஆண்டில் CPI-இன் மதிப்பாகும்.
நுகர்வோர் விலைக் குறியீட்டின் (CPI) விலைகளுக்கான அடிப்படை ஆண்டை 2012-லிருந்து 2024-க்கு மாற்றுவதற்கும், 2023-24 குடும்ப நுகர்வுச் செலவினக் கணக்கெடுப்பின் (Household Consumption Expenditure Survey (HCES)) முடிவுகளின் அடிப்படையில் நுகர்வு தொகுப்பை (consumption basket) மறுசீரமைப்பதற்கும் புள்ளியியல் அமைச்சகம் பல ஆண்டுகளாக மேற்கொண்ட பணிகளுக்குப் பிறகு இந்த புதிய நுகர்வோர் விலைக் குறியீட்டுப் பணவீக்கம் வந்துள்ளது. இதன் மூலம், விலைகள் 2011-12 கணக்கெடுப்பின்படி அல்லாமல், சமீபத்திய நுகர்வுப் பழக்கவழக்கங்களைப் பிரதிபலிக்கிறது.
2024-ம் ஆண்டை அடிப்படை ஆண்டாக மாற்றியமைத்த புதிய நுகர்வோர் விலைக் குறியீடு (CPI) என்பது, 2024-ம் ஆண்டிற்கான விலைக் குறியீட்டிற்கு 100 என்ற மதிப்பு வழங்கப்பட்டு, பின்னர் இந்த விலை நிலவரங்களிலிருந்து ஏற்படும் மாற்றங்களை அடிப்படையாகக் கொண்டு ஒவ்வொரு பொருள் அல்லது சேவைக்குமான பணவீக்க விகிதங்கள் கணக்கிடப்படுகின்றன என்பதாகும்.
புதிய நுகர்வோர் விலைக் குறியீட்டு (CPI) தொகுப்பில் 358 பொருட்கள் மற்றும் சேவைகள் இடம்பெற்றுள்ளன. இது முந்தைய தொகுப்பில் இருந்த 299-ஐ விட அதிகமாகும். கிராமப்புற வீட்டுவசதி நுகர்வின் பரவலை மேம்படுத்தும் நோக்கில், இந்த புதிய நுகர்வோர் விலைக் குறியீட்டில் முதல் முறையாக கிராமப்புற வீட்டு வாடகை இதில் சேர்க்கப்பட்டுள்ளது.
நுகர்வோர் விலைக் குறியீடு 2024 தொடரானது, முந்தைய கட்டமைப்பிற்குப் பதிலாக ஆறு பரந்த குழுக்களைக் கொண்டு, இவை ‘நோக்கத்தின் அடிப்படையில் தனிநபர் நுகர்வின் வகைப்பாடு’ (Classification of Individual Consumption According to Purpose (COICOP)) 2018-ஐ ஏற்றுக்கொள்கிறது. இந்த ஆறு பரந்த குழுக்களானது, உணவு மற்றும் பானங்கள், பான், புகையிலை மற்றும் போதைப்பொருட்கள், ஆடை மற்றும் காலணிகள், வீட்டுவசதி, எரிபொருள் மற்றும் மின்சாரம் மற்றும் இதர (கல்வி, சுகாதாரம் போன்ற சேவைகள்) சேவைகளை உள்ளடக்கியது.
நுகர்வோர் விலைக் குறியீடு 2024, ஐக்கிய நாடுகள் சபையின் புள்ளியியல் பிரிவால் உருவாக்கப்பட்ட சமீபத்திய வகைப்படுத்தல் முறையைப் பயன்படுத்துகிறது. புள்ளியியல் மற்றும் முதலீட்டு அமைச்சகத்தின் (MoSPI) படி, “திருத்தப்பட்ட கட்டமைப்பின் கீழ், செலவினங்களை ஒரு விரிவான அமைப்பில் வகைப்படுத்துகிறது. முதல் நிலையில், செலவினங்கள் 12 பிரிவுகளாகவும், 43 குழுக்களாகவும், 92 வகைகளாகவும், 162 துணை வகைகளாகவும் மற்றும் 358 இனங்களாகவும் வகைப்படுத்தப்பட்டுள்ளது.”
மொத்த விலைக் குறியீடு (Wholesale Price Index (WPI)) : நுகர்வோர் விலைக் குறியீடு (CPI) சில்லறை சந்தையில் ஏற்படும் விலை மாற்றங்களை (வரிகள் உட்பட அதிகபட்ச சில்லறை விலைகள் (maximum retail prices (MRP)) அளவிடும் அதே வேளையில், மொத்த விலைக் குறியீடு (WPI) மொத்த சந்தையில் ஏற்படும் விலை மாற்றங்களை அளவிடுகிறது. உதாரணமாக, வெங்காயம் போன்ற ஒரு பொருளின் விலை, அது மொத்த சந்தையிலிருந்து வாங்கப்படுகிறதா அல்லது சில்லறை சந்தையிலிருந்து வாங்கப்படுகிறதா என்பதைப் பொறுத்து மாறுபடும்.
மொத்த உள்நாட்டு உற்பத்தி பணவீக்க குறியீடு (GDP Deflator) : மொத்த உள்நாட்டு உற்பத்தி பணவீக்க குறியீடு (GDP Deflator) (மறைமுக விலைக்குறியீடு - (Implicit Price Deflator) என்றும் அழைக்கப்படுகிறது) என்பது, ஒரு பொருளாதாரம் ஒரு குறிப்பிட்ட ஆண்டில் உற்பத்தி செய்யும் பொருட்கள் மற்றும் சேவைகளின் மதிப்பிற்கும், தற்போதைய விலைகளுக்கும் இடையிலான விகிதமாகும். இந்த மதிப்பு, வேறு ஏதேனும் ஒரு ஒப்பீட்டு (அடிப்படை) ஆண்டில் நிலவிய விலைகளுடன் ஒப்பிடப்படுகிறது.
மொத்த உள்நாட்டு உற்பத்தி பணவீக்கக் குறியீடு = (பெயரளவு மொத்த உள்நாட்டு உற்பத்தி / உண்மையான மொத்த உள்நாட்டு உற்பத்தி) × 100
சுற்றுச்சூழல்
தார் பந்துகள் (Tar Balls)
இது ஏன் முக்கியம்?
மத்திய அரசு, முதல் முறையாக, தார் பந்துகளை நிர்வகிப்பதற்காக பிரத்யேக விதிகளை முன்மொழிந்துள்ளது. 2026-ம் ஆண்டின் தார் பந்துகள் மேலாண்மை விதிகள் (Tar Balls Management Rules), சிமெண்ட் உற்பத்தியில் எரிபொருளாக மறுபயன்பாடு செய்வது உட்பட, இந்த தார் பந்துகளின் உருவாக்கம், சேகரிப்பு, சேமிப்பு, போக்குவரத்து, சுத்திகரிப்பு மற்றும் அகற்றுதல் ஆகியவற்றுக்கான பொறுப்புகளை வழங்குகின்றன.
முக்கிய கருத்து
தார் பந்துகள் என்பவை, எண்ணெய் கசிவுகள் (oil leaks), சிதறல்கள் (spills), கழிவுநீர் வெளியேற்றங்கள் (effluents) மற்றும் விபத்துக்களால் (accidents) நிலத்திலும் கடலிலும் ஏற்படும் கடல் மாசுபாட்டினால் உருவாகும், அடர்நிறமுடைய, பிசுபிசுப்பான, சிதைவடைந்த எச்சங்கள் ஆகும்.
கடல் சூழல்களில் கச்சா எண்ணெய் சிதைவடைவதால் தார் பந்துகள் உருவாகின்றன. தேசிய கடல் மற்றும் வளிமண்டல நிர்வாகத்தின் (NOAA) கூற்றுப்படி, கச்சா எண்ணெய் அல்லது கனமான சுத்திகரிக்கப்பட்ட பொருட்கள் ஒரு கசிவுக்குப் பிறகு பெரும்பாலும் கடல் மேற்பரப்பில் மிதக்கும்போது, அதன் இயற்பியல் பண்புகள் மாறுகின்றன. ஒரு கசிவு ஏற்பட்ட முதல் சில மணிநேரங்களில், அந்த எண்ணெய் ஒரு மெல்லிய படலமாகப் பரவுகிறது.
காற்றும் அலைகளும் மெல்லிய எண்ணெய் படலத்தைச் சிறு துண்டுகளாக சிதைத்து, மிகப் பரந்த பகுதியில் சிதறியிருக்கும் சிறிய திட்டுகளாக மாற்றுகின்றன. பல்வேறு இயற்பியல், வேதியியல் மற்றும் உயிரியல் செயல்முறைகள் எண்ணெயின் தோற்றத்தை மாற்றுகின்றன. இந்தச் செயல்முறைகள் பொதுவாக “வானிலைச் சிதைவு” (weathering) என்று அழைக்கப்படுகின்றன.
வானிலை மாற்ற செயல்முறைகள் இறுதியில், வெளிப்புறத்தில் கடினமாகவும் மேலோடு போலவும், உட்புறத்தில் மென்மையாகவும் பிசுபிசுப்பாகவும் இருக்கக்கூடிய ஒரு தார் பந்துகளை அல்லது தட்டையான தார் கட்டியை உருவாக்குகின்றன.
சில தார் பந்துகள் கூடைப்பந்து அளவு பெரியதாகவும், மற்றவை சிறிய கோளங்களாகவும் சிலநேரங்களில், தார் பந்துகள் பொதுவாக நாணயம் அளவில் இருக்கும். மேலும், அவை கடற்கரைகளில் சிதறிக் கிடக்கின்றன. இருப்பினும், பல ஆண்டுகளாக, அவை கூடைப்பந்து அளவு பெரியதாகி, 6-7 கிலோகிராம் வரை எடை கொண்டவையாக மாறியுள்ளன.
கடற்கரைகளில், குறிப்பாக இந்தியாவின் மேற்குக் கடற்கரையில், பருவமழையின் போது வீசும் பலத்த காற்று மற்றும் நீரோட்டங்கள் காரணமாக தார் பந்துகள் கரைக்கு அடித்து வரப்படுவதால், அவை தாவரங்கள், விலங்குகள் மற்றும் சுற்றுலாத் துறையைப் பாதிக்கின்றன.
இந்தத் தார் பந்துகளில் கன உலோகங்கள், நுண் தனிமங்கள் மற்றும் நீடித்த கரிம மாசுபடுத்திகள் போன்ற நச்சு மாசுபடுத்திகள் அடங்கியுள்ளன. மேலும், இவை சுற்றுச்சூழலுக்கும் மனித ஆரோக்கியத்திற்கும் ஆபத்தை விளைவிக்கின்றன.
நுண்நெகிழிகள் (Microplastics) என்பவை ஐந்து மில்லிமீட்டருக்கும் குறைவான அளவுள்ள மிகச்சிறிய துகள்கள் ஆகும். அவை பொதுவாக, அழகுசாதனப் பொருட்களில் பயன்படுத்தப்படும் நெகிழிகள் போன்றவை, இவை வேண்டுமென்றே தயாரிக்கப்படும் நெகிழிகள் ஆகும். இரண்டாவது வகை, இரண்டாம் நிலை நுண்நெகிழிகள் (Microplastics) ஆகும். பெரிய நெகிழிப் பொருட்கள் உடைந்து சிதைவடையும்போது இவை உருவாகின்றன.
சில பற்பசைகளில் “குளிரூட்டும் படிகங்கள்” (cooling crystals) என விளம்பரப்படுத்தப்படும் சிறிய, பளபளப்பான துகள்கள், அந்தப் பற்பசையின் மூலப்பொருட்களில் “பாலிஎத்திலீன்” (polyethylene) குறிப்பிடப்பட்டிருந்தால், நுண்நெகிழிகள் (Microplastics) வகைக்குள் அடங்கும்.
இந்த நெகிழிகள் மக்கும் தன்மையற்றவை. மேலும், இவை முறையற்ற முறையில் அப்புறப்படுத்தப்பட்ட பிறகு நீண்டகாலத்திற்குச் சுற்றுச்சூழலில் நிலைத்திருக்கின்றன. இயற்பியல், வேதியியல் அல்லது உயிரியல் செயல்முறைகள் மூலம் இவை சிறு துகள்களாகச் சிதைந்து, மெதுவாகச் சிதைவடைவதால் சுற்றுச்சூழலில் தொடர்ந்து நிலைத்திருக்கின்றன.
Original article : Dimethyl Ether, CPI overhaul, Tar Balls -Roshni Yadav