முக்கிய அம்சங்கள்:
— ஷாங்க்ரி-லா கலந்துரையாடலில் (Shangri-La Dialogue) பங்கேற்பதற்காகச் சிங்கப்பூர் சென்றுள்ள சிங், பிரம்மோஸ் ஏவுகணை அமைப்பை வாங்கக்கூடிய சாத்தியமுள்ள நாடுகள் குறித்த கேள்விக்கு பதிலளிக்கும்போது இந்த கருத்துக்களைத் தெரிவித்தார்.
— இந்தோனேசியா மற்றும் வியட்நாம் ஆகிய இருநாடுகளுடனான ஒப்பந்தமும் இறுதிக் கட்டத்தில் உள்ளது. உண்மையில், வியட்நாமுடன் ஏற்கனவே ஒப்பந்தம் கையெழுத்தாகிவிட்டது, அநேகமாக அது இன்னும் பொதுவெளியில் அறிவிக்கப்படாமல் இருக்கலாம், ஆனால் ஒப்பந்தம் கையெழுத்தாகிவிட்டது என்று அவர் கூறினார்.
— சுமார் 375 மில்லியன் டாலர் (₹3,100 கோடிக்கு மேல்) மதிப்புள்ள ஒப்பந்தத்தில் கையெழுத்திட்டதன் மூலம், 2022-ஆம் ஆண்டில் இந்தியாவின் பிரம்மோஸ் ஏவுகணை அமைப்பை வாங்கிய முதல் வெளிநாட்டு வாடிக்கையாளராக பிலிப்பைன்ஸ் உருவெடுத்தது. கடந்த மார்ச் மாதத்தில், இந்தோனேசியாவும் பிரம்மோஸ் ஏவுகணை அமைப்பைப் பெறுவதற்காக இந்தியாவுடன் ஒப்பந்தம் செய்துகொண்டுள்ளதாகத் தெரிவித்திருந்தது.
— இந்தோனேசியா மற்றும் வியட்நாம் உடனான இந்த ஒப்பந்தங்களின் விரிவான விவரங்கள் இன்னும் பொதுமக்களுக்குத் தெரிவிக்கப்படவில்லை. பொதுவாக நாடுகள் தங்களின் அதிநவீன ஆயுத அமைப்புகளையும் தளவாடங்களையும் தாங்கள் நட்புரீதியான கூட்டாளிகளாகக் கருதும் நாடுகளுக்கே விற்கும் என்று சிங் கூறினார்.
— தென்கிழக்கு ஆசிய நாடுகளின் கூட்டமைப்பில் (Association of Southeast Asian Nations (ASEAN)) உள்ள நாடுகளுடன் இணைந்து செயல்படுவதில் இந்தியா உறுதியான அர்ப்பணிப்புடன் உள்ளது என்று கூறினார். மேலும், நாங்கள் உங்களை எல்லாம் எங்களின் நட்பு நாடுகளாகக் கருதுகிறோம்; உங்களுடன் எங்களின் மேம்பட்ட பாதுகாப்புத் தொழில்நுட்பங்களைப் பகிர்ந்துகொள்ள தயாராக இருப்பதாகவும் தெரிவித்தார் .
— கடல்சார் பொதுப் பகுதிகளைப் பாதுகாப்பதுடன், மீள்திறன் கொண்ட விநியோகச் சங்கிலிகளை உருவாக்கவும், நம்பகமான பாதுகாப்பு கூட்டாண்மைகளை ஏற்படுத்தவும் இந்த பிராந்தியத்திலும் அதற்கு அப்பாலும் உள்ள கூட்டமைப்பு நாடுகளுடன் இணைந்து பணியாற்ற இந்தியா தயாராக உள்ளதாகவும் பிரதிநிதிகளிடம் தெரிவித்தார்.
— கடந்த பத்தாண்டுகளில் பாதுகாப்புத் தளவாட உற்பத்தி, புதிய கண்டுபிடிப்புகள் மற்றும் ஏற்றுமதி ஆகியவற்றில் இந்தியா பெரிய அளவிலான சீர்திருத்தங்களை மேற்கொண்டுள்ளதாக அவர் கூறினார். மேலும், இத்துறையில் அதிகப்படியான தனியார் துறையினரின் பங்களிப்பிற்கு வழிவகை செய்யப்பட்டுள்ளதாகவும் தெரிவித்தார்.
உங்களுக்குத் தெரியுமா?
— இந்தியாவின் முப்படைகளிலும் பயன்பாட்டில் இருக்கும் 'பிரம்மோஸ்' அதிவேக ஏவுகணைகள் (BrahMos supersonic cruise missiles), இந்தியாவின் பாதுகாப்பு ஆராய்ச்சி மற்றும் மேம்பாட்டு அமைப்பு (Defence Research and Development Organisation (DRDO)) மற்றும் ரஷ்யாவின் ‘NPO Mashinostroyeniya’ நிறுவனம் ஆகிய இரண்டும் இணைந்து உருவாக்கிய 'BrahMos Aerospace' கூட்டு நிறுவனத்தால் தயாரிக்கப்படுகின்றன.
— பிரம்மோஸ் என்பது திட எரிபொருள் உந்துவிசை இயந்திரத்தைக் (Solid propellant booster engine) கொண்ட இரண்டு நிலைகளை உடைய ஒரு ஏவுகணையாகும். இதன் முதல் கட்டம் ஏவுகணையை ஒலியின் வேகத்தைவிட அதிவேகத்திற்கு கொண்டு சென்று, பின்னர் தனியாகப் பிரிந்து விடுகிறது. அதன் பிறகு, 'Liquid ramjet' எனப்படும் இரண்டாம் கட்டம், ஏவுகணை இலக்கை நோக்கிப் பயணிக்கும்போது ஒலியின் வேகத்தைப் போல ஏறக்குறைய மூன்று மடங்கு வேகத்திற்கு அதைக் கொண்டு செல்கிறது. இந்த ஏவுகணையை ரேடார் (Radar) மூலம் கண்டறிவது மிகவும் கடினம் என்பதால், இது எதிரிகளின் கண்ணில்படாமல் மறைந்து தாக்கும் திறன் கொண்டது. மேலும், இது பல்வேறு பாதைகளைப் பின்பற்றிச் சென்று இலக்கைத் தாக்கும் வல்லமை பெற்றது.
— பிரம்மோஸ் ஏவுகணைகள் இலக்கை நோக்கிச் சீராகச் செல்லும் நிலையில் ஒலியின் வேகத்தைப் போல ஏறக்குறைய 3 மடங்கு வேகத்தில் இயங்குகின்றன. இது ஏவுகணை இலக்கைச் சென்றடையும் நேரத்தைக் குறைப்பதுடன், இலக்குகள் சிதறிப்போகும் வாய்ப்பைக் குறைக்கிறது, மிக விரைவாக இலக்கைத் தாக்க உதவுகிறது மற்றும் எதிரிகளால் இடைமறித்து அழிக்கப்படாமல் இருப்பதையும் உறுதி செய்கிறது.
— இந்த ஏவுகணை 'தானியங்கி' கோட்பாட்டின்படி (Fire and Forget Principle) செயல்படுகிறது. அதாவது ஏவப்பட்ட பின் இதனை நாம் வழிகாட்ட வேண்டியதில்லை, இலக்கை நோக்கிச் செல்லும் வழியில் பல்வேறு வகையான பறக்கும் முறைகளை தானாகவே மாற்றிக்கொள்ளும். பிரம்மோஸ் இணையதளத்தின்படி, இது அதிகபட்சமாக 15 கிலோமீட்டர் உயரம் வரையிலும், இலக்கைத் தாக்கும் இறுதி நேரத்தில் வெறும் 10 மீட்டர் போன்ற மிகக் குறைந்த உயரத்திலும் பறக்கக்கூடியது. இந்த ஏவுகணை 200 முதல் 300 கிலோகிராம் எடையுள்ள வழக்கமான வெடிபொருட்களைச் சுமந்து செல்லும் திறன் கொண்டதாகும்.
— நிலப்பரப்பு மற்றும் கப்பல்களைத் தாக்குவதற்காக வடிவமைக்கப்பட்ட சில பிரம்மோஸ் ஏவுகணைகளின் தாக்குதல் தூர வரம்பு, சமீபத்திய ஆண்டுகளில் ஏறக்குறைய இரு மடங்காக அதிகரிக்கப்பட்டுள்ளது.
Original article : What are the key features of the BrahMos missile? -Roshni Yadav