வனப்பகுதிகளுக்கு சிறந்த கண்காணிப்பு ஏன் தேவைப்படுகிறது? -அபினவ் ராய்

 புவி வெப்பமடைதல், வெப்ப அலைகள், காற்று மற்றும் நீர் மாசுபாடு, வெள்ளம், மண் அரிப்பு மற்றும் பாலைவனமாக்கல் போன்ற பல சுற்றுச்சூழல் சவால்களைத் குறைக்க வனப்பகுதி மற்றும் இயற்கை தாவரங்கள் உதவுகின்றன. இருந்த போதிலும், வனபகுதிகள் எவ்வாறு வரையறுக்கப்பட்டு வகைப்படுத்தப்படுகின்றன? இந்தியாவில் வன நிர்வாகம் அவற்றின் பாதுகாப்பு மற்றும் பாதுகாப்பை எவ்வாறு வடிவமைக்கிறது?

வனப்பகுதிகள் பல்லுயிர் பெருக்கத்திற்கு முக்கியமானதாக இருந்து வருகின்றன. நீர் ஆதாரங்களை நிலைநிறுத்துகின்றன. நுண்தட்பவெப்பநிலைகளை (Microclimate)) ஒழுங்குபடுத்துகின்றன மற்றும் கார்பன் பிரித்தெடுப்பதில் முக்கியப் பங்கு வகிக்கின்றன. மலைகளில், மரங்கள் மண் அரிப்பு மற்றும் நிலச்சரிவுகளுக்கு எதிராக இயற்கையான தடைகளாக செயல்படுகின்றன. ஏனெனில், அவற்றின் வேர்கள் மண்ணிற்கு அடியில் ஒன்றாக இணைந்துள்ளன. அவற்றின் பல சுற்றுச்சூழல் சேவைகள் மற்றும் கலாச்சார முக்கியத்துவத்தைத் தவிர, மரம் அல்லாத வனப் பொருட்கள் (Non-Timber Forest Products (NTFPs)) மில்லியன் கணக்கான மக்களின் வாழ்வாதாரத்தின் அடிப்படையாக அமைகின்றன.

இத்தகைய சுற்றுச்சூழல் மற்றும் சமூக-பொருளாதார முக்கியத்துவத்தைக் கருத்தில் கொண்டு, பல்லுயிர் பெருக்கத்தைப் பாதுகாப்பதிலும், வாழ்வாதாரத்தை நிலைநிறுத்துவதிலும், வன வளங்களின் நிலையான பயன்பாட்டை ஊக்குவிப்பதிலும் வன நிர்வாகம் முக்கிய பங்கு வகிக்கிறது. கடந்த மாதம்,  ஒன்றிய  சுற்றுச்சூழல் அமைச்சகம் வான் (Sanrakshan Evam Samvardhan) ஆதினியம், 2023-ன் கீழ் வழிகாட்டுதல்களை தளர்த்தி, எளிமைப்படுத்தியது. இது அரசு மற்றும் அரசு சாரா நிறுவனங்கள் வணிகத் தோட்டங்கள் மற்றும் மறுசீரமைப்பு போன்ற வனவியல் நடவடிக்கைகளுக்கு வன நிலத்தை குத்தகைக்கு எடுக்க அனுமதிக்கிறது.

வனபகுதிகள் பொதுச் சொத்தாகக் கருதப்படுவதால், இது இந்தியாவின் வன மேலாண்மை முயற்சிகளில் ஒரு மாற்றத்தைக் குறிக்கிறது. உணவு மற்றும் வேளாண்மை அமைப்பின் (Food and Agriculture Organization (FAO)) உலகளாவிய வன வள மதிப்பீட்டு (Global Forest Resources Assessment (GFRA)) அறிக்கை 2025-ன் படி, இந்தியா மொத்த வனப் பரப்பளவில் (72,739 ஆயிரம் ஹெக்டேர்) உலகளவில் 9-வது இடத்திலும், நிகர வருடாந்திர வனப் பரப்பளவு அதிகரிப்பில் 3-வது இடத்திலும் உள்ளது.

ஐந்து ஆண்டுகளுக்கு ஒருமுறை வெளியிடப்படும் உலகளாவிய வன வள மதிப்பீட்டு அறிக்கை, மொத்த உலகளாவிய நிலப்பரப்பில் 32 சதவீதம் (தோராயமாக 4.14 பில்லியன் ஹெக்டேர்) வனபகுதிகளால் சூழப்பட்டுள்ளது என்பதையும் வெளிப்படுத்தியுள்ளது. முதல் ஐந்து நாடுகள் ரஷ்ய கூட்டமைப்பு, பிரேசில், கனடா, அமெரிக்கா மற்றும் சீனா போன்ற நாடுகள் உலக வனப்பரப்பளவில் பாதிக்கும் மேற்பட்டவற்றை (54 சதவீதம்) கொண்டுள்ளன.

இந்தியாவில் வனப்பகுதிகள் எவ்வாறு வரையறுக்கப்படுகின்றன, அவற்றின் வகைகள், பரவல் மற்றும் முக்கியத்துவம் ஆகியவற்றைப் புரிந்துகொள்வோம்.

இந்திய வன ஆய்வு (FSI) 'வனப்பரப்பு' என்பது ஒரு ஹெக்டேர் அல்லது அதற்கு மேற்பட்ட பரப்பளவைக் கொண்ட அனைத்து நிலங்களையும், 10 சதவீதம் அல்லது அதற்கு மேற்பட்ட மரக் கவிகை (tree canopy) அடர்த்தியைக் கொண்ட நிலங்களையும், உரிமை அல்லது சட்டப்பூர்வ நிலையைப் பொருட்படுத்தாமல் வரையறுக்கிறது. இரண்டு ஆண்டுகளுக்கு ஒருமுறை வெளியிடப்படும் இந்திய வன நிலை அறிக்கையை (India State of Forests Report (ISFR)) வெளியிடும் இந்திய வன ஆய்வு அறிக்கை, முக்கியமாக ResourceSat-2, லீனியர் இமேஜிங் சுய-ஸ்கேனிங் சென்சார்-III) செயற்கைக்கோள் தரவை வரைபடத்திற்காகப் பயன்படுத்துகிறது. இந்த செயற்கைக்கோள் 23.5 மீட்டர் இடம்சார்ந்த தெளிவுத்திறனை வழங்குகிறது. இருந்தபோதிலும் மிகச் சிறந்த விவரங்களை இதனால் கண்டறிய முடியாது.

எனவே, இது ஒற்றைப் பயிர் சாகுபடி, தோட்டங்கள், பழத்தோட்டங்கள், மூங்கில், பனை போன்றவற்றை வனப்பகுதிகளாக கருதுகிறது. அவை இயற்கையான வனப்பகுதிகளைப் போன்ற சுற்றுச்சூழல் மதிப்பைக் கொண்டிருக்காமல் இருக்கலாம். இருப்பினும், இயற்கையான வனப்பகுதிகள் மற்றும் தோட்டங்களைத் தனித்தனியாகக் கருதும் கட்டமைப்புகள் உள்ளன. அவை:

1. பிரேசிலின் வன-கார்பன் கணக்கியல்.

2. ஐரோப்பிய ஒன்றியத்தின் கார்பன் அகற்றுதல் சான்றிதழ் கட்டமைப்பு.

3. காலநிலை மாற்றத்திற்கான அரசுகளுக்கிடையேயான குழுவின் நிலப் 

   பயன்பாடு, நிலப் பயன்பாட்டு மாற்றம் மற்றும் வனவியல் (Good Practice  

   Guidance for Land Use, Land-Use Change and Forestry (GPG-LULUCF)) 

  ஆகியவற்றிற்கான சிறந்த  நடைமுறை வழிகாட்டுதல்  போன்றவை  இதில் 

  அடங்கும்.

எனவே, ஒரு வனப்பகுதியை பாதுகாக்க, மீட்டெடுக்க மற்றும் பாதுகாக்க பயனுள்ள தலையீடுகளுக்கு மிகவும் நுணுக்கமான வரையறை மற்றும் சுத்திகரிக்கப்பட்ட வழிமுறை உதவும்.

இந்தியாவில் வனப்பகுதிகள் எவ்வாறு வகைப்படுத்தப்படுகின்றன?

இந்தியாவின் தாவர பன்முகத்தன்மை அதன் தனித்துவமான புவியியல் இருப்பிடத்திலிருந்து வருகிறது. இது மாறுபட்ட காலநிலை நிலைகளை வழங்குகிறது. தாவரங்களை பாதிக்கும் முதன்மையான காரணிகளில் வெப்பநிலை, மழைப்பொழிவு மற்றும் அதன் பருவகால பரவல் மற்றும் நிலப்பரப்பின் உயரம் ஆகியவை அடங்கும்.

கடக ரேகை நாட்டை இரண்டு பரந்த காலநிலை மண்டலங்களாகப் பிரிக்கிறது: அவை தெற்கில் வெப்பமண்டல காலநிலை மற்றும் வடக்கில் துணை வெப்பமண்டல காலநிலை ஆகும். காலநிலை நிலைமைகள் மற்றும் பிரதான தாவர வகையின் அடிப்படையில், இந்தியாவில் உள்ள வனப்பகுதிகள் வெப்பமண்டல பசுமையான மற்றும் அரை-பசுமைமாறா, வெப்பமண்டல இலையுதிர் காடுகள், வெப்பமண்டல முள் காடுகள், கடற்கரை மற்றும் சதுப்பு நிலக் காடுகள் மற்றும் மலைக்காடுகள் என வகைப்படுத்தப்படுகின்றன. மலைக்காடுகள் உயர் இமயமலைத் தொடர்கள் மற்றும் தமிழ்நாடு மற்றும் கேரளாவின் உயர்ந்த மலைகள் போன்ற அதிக உயரம் கொண்ட பகுதிகளில் அமைந்துள்ளன.

1000 மீட்டர் உயரம் வரை, வெப்பமண்டல மற்றும் மிதவெப்ப மண்டலப் பகுதிகள் இரண்டும் கோடை வெப்பம் (35°C-45°C) மற்றும் மிதமான வெப்பம் (10°C-15°C) மற்றும் குளிர் (5°C-10°C) ஆகிய ஒரே மாதிரியான காலநிலையை அனுபவிக்கின்றன. இதனால், இந்த காலநிலைகளின் வனப்பகுதிகள் அதிக 'ஒற்றுமைகளையும்' குறைவான 'வேறுபாடுகளையும்' வெளிப்படுத்துகின்றன.

உயரம் அதிகரிக்கும் போது வெப்பநிலை குறைகிறது. இது அதிக உயரம் கொண்ட இமயமலைத் தொடர்களில் மேல்நோக்கிச் செல்லும்போது வெப்பமண்டலத்திலிருந்து டன்ட்ரா வகைக்கு (tundra type) தாவரங்களில் தொடர்புடைய மாற்றத்தை ஏற்படுத்துகிறது. அடிவாரத்தில் உள்ள இலையுதிர் காடுகள் ஈரமான-மிதமான (1000-2000 மீட்டர்), குளிர் மிதமான (2000-3000 மீட்டர்), துணை-ஆல்பைன் (3000-4000 மீட்டர்) மற்றும் ஆல்பைன் தாவரங்கள் (4000-5000 மீட்டர்) ஆகியவற்றால் மாற்றப்படுகின்றன.

இடையில், மிதமான புல்வெளிகள் மற்றும் மேய்ச்சல் நிலங்கள் உள்ளன. அவை மேய்ச்சல் நிலங்களும், குஜ்ஜார்கள், பக்கர்வால்கள், போட்டியாக்கள், காடிஸ் மற்றும் பிற பழங்குடியினரால், பிராந்தியங்களுக்கு இடையே மக்கள் தங்கள் கால்நடைகளுடன் பருவகால இயக்கம் - மனிதகுலத்தை விட்டு இடம் பெயரும் நடைமுறையை ஆதரிக்கின்றன.

மேலும், இமயமலையின் தெற்கு நோக்கிய சரிவுகள், நிலப்பரப்பில் மழை பொழிவதற்கு முக்கியக் காரணியாக இருந்து வருகின்றன. வறண்ட வடக்கு சரிவுகளைவிட அடர்த்தியான தாவரங்களைக் கொண்டுள்ளன. அடர்த்தியின் அடிப்படையில், வனப்பகுதி பின்வருமாறு வரையறுக்கப்படுகிறது:

1.மிகவும் அடர்ந்த வனம் (VDF, மரச்சிறை அடர்த்தி ≥ 70%)

2.மிதமான அடர்ந்த வனம் (MDF, 40% ≤ மரச்சிறை அடர்த்தி < 70%)

3.திறந்தவெளி வனம்  (OF, 10% ≤ மரச்சிறை அடர்த்தி < 40%)

4.புதர்க்காடு (மரச்சிறை அடர்த்தி < 10%) மற்றும் வனம் அல்லாத பகுதி

வனம் அல்லாத பகுதிகளின் விரிவாக்கம் கவலைக்குரியதா?

இந்தியாவின் இயற்கை தாவரங்களின் மிகப்பெரிய பன்முகத்தன்மை, பல்வேறு வகையான காலநிலை மற்றும் புவியியல் நிலைமைகளை பிரதிபலிக்கிறது. இது இமயமலையின் உயரமான பகுதிகளில் மிதமான தாவரங்கள்; வடக்கு மற்றும் மத்திய இந்தியாவில் வெப்பமண்டல இலையுதிர் வனபகுதிகள்; மேற்குத் தொடர்ச்சி மலைகள் மற்றும் அந்தமான் மற்றும் நிக்கோபார் தீவுகளில் வெப்பமண்டல மழைக்காடுகள்; மேற்கு வங்கம் மற்றும் குஜராத்தின் டெல்டா பகுதிகளில் சதுப்புநிலங்கள்; ராஜஸ்தானின் அரை வறண்ட பகுதிகளில் வெப்பமண்டல முள் காடுகள், புற்கள் மற்றும் புதர்கள் போன்றவற்றை கொண்டுள்ளது.

இந்திய வன நிலை அறிக்கை (India State of Forests Report (ISFR)) 2023-ன் படி, இந்தியாவின் புவியியல் பரப்பளவில் 21.76 சதவீதம் வனபகுதியைக் கொண்டுள்ளது. இது 2021 மதிப்பீடுகளை விட 156.41 சதுர கிலோமீட்டர் அதிகரித்திருப்பதை வெளிக்காட்டுகிறது. மரங்களின் பரப்பளவு 1,12,014 சதுர கிமீ (3.41 சதவீதம்) ஆக உள்ளது. இதில் பதிவு செய்யப்பட்ட வனபகுதிகளுக்குள் உள்ள பகுதிகள் பாதுகாக்கப்பட்ட வனபகுதிகள், வகைப்படுத்தப்படாத அல்லது ஊரக பகுதிகளில் காடுகள், அத்துடன் பதிவு செய்யப்பட்ட வனபகுதிகளுக்கு வெளியே உள்ள பகுதிகள் ஆகியவை அடங்கும்.

பரப்பளவு வாரியாக, மத்தியப் பிரதேசம் (77,073 சதுர கி.மீ), அருணாச்சலப் பிரதேசம் (65,882 சதுர கி.மீ) மற்றும் சத்தீஸ்கர் (55,812 சதுர கி.மீ)  போன்ற மாநிலங்கள் மிகப்பெரிய வனப்பகுதியைக் கொண்டுள்ளன. சதவீத அடிப்படையில், லட்சத்தீவுகள் அதிக வனப்பகுதியைக் கொண்டுள்ளன (91.33 சதவீதம்), அதைத் தொடர்ந்து மிசோரம் (85.34 சதவீதம்), மற்றும் அந்தமான் மற்றும் நிக்கோபார் தீவுகள் (81.62 சதவீதம்) வனப்பகுதியைக் கொண்டுள்ளன.

ஆனால், மிக நெருக்கமாகப் படித்தால், பதிவு செய்யப்பட்ட காடுகளுக்கு வெளியே மிகவும் அடர்ந்த காடு  (-63.88 சதுர கி.மீ.), மிதமான அடர்ந்த காடு (-416.47 சதுர கி.மீ.), மற்றும் புதர் பகுதிகள் (-1,912.46 சதுர கி.மீ.) குறைந்துள்ளன என்பது தெரிகிறது. பதிவு செய்யப்பட்ட காடுகளுக்குள் கூட, மிகவும் அடர்ந்த காடுகளில் (+2,431.50 சதுர கி.மீ.) அதிகரிப்பு தவிர, மற்ற அனைத்து காட்டு வகைகளும் கணிசமாகக் குறைந்துள்ளன. குறிப்பிடத்தக்க வகையில், பதிவு செய்யப்பட்ட காடுகளுக்குள் (+1,197.48 சதுர கி.மீ.) மற்றும் பதிவு செய்யப்பட்ட காடுகளுக்கு வெளியே (+1,763.33 சதுர கி.மீ.) இரண்டிலும் காடு அல்லாத பகுதிகளின் விரிவாக்கம் மிகப் பெரிய கவலையளிக்கும் காரணியாக உள்ளது.

நிலையான வளர்ச்சியை நோக்கி

சுருக்கமாக, இந்தியா போன்ற வேகமாக வளர்ந்து வரும் பொருளாதாரம், நீண்டகால நிலையான வளர்ச்சிக்கு அதன் வளர்ச்சி இலக்குகளை சுற்றுச்சூழல் பாதுகாப்புடன் சமநிலைப்படுத்த வேண்டும். வனப்பகுதி மற்றும் இயற்கை தாவரங்கள் புவி வெப்பமடைதல், வெப்ப அலைகள், காற்று மற்றும் நீர் மாசுபாடு, வெள்ளம், மண் அரிப்பு மற்றும் பாலைவனமாக்கல் போன்ற சுற்றுச்சூழல் சவால்களை குறைக்க உதவுகின்றன. எனவே, வன வளங்களை திறம்பட கண்காணித்தல், பாதுகாத்தல், மீட்டமைத்தல் மற்றும் பாதுகாத்தல் ஆகியவற்றிற்கு மிகவும் நுணுக்கமான வரையறை மற்றும் சுத்திகரிக்கப்பட்ட வழிமுறை தேவை என்று வாதிடலாம்.

Original article : Why forests demand more effective monitoring?. -Abhinav Rai

Read More →

உள்துறை அமைச்சகம் வந்தே மாதரம் பாடலுக்கான முதல் நெறிமுறையை வெளியிட்டுள்ளது. -குஷ்பூ குமாரி

 மத்திய உள்துறை அமைச்சகம் வெளியிட்டுள்ள புதிய உத்தரவின்படி, தேசிய கீதமான 'ஜன கண மன' மற்றும் தேசியப் பாடலான 'வந்தே மாதரம்' ஆகிய இரண்டும் ஒன்றாக இசைக்கப்படும்போது, 'வந்தே மாதரம்' பாடலின் ஆறு சரணங்களும் தேசிய கீதத்திற்கு முன்பாக பாடப்பட வேண்டும் என்று அறிவுறுத்தப்பட்டுள்ளது.

இந்த வழிகாட்டுதல்களை ஜனவரி மாதம் 28-ஆம் தேதி உள்துறை அமைச்சகம் (Ministry of Home Affairs (MHA)) அறிவித்தது. தேசியப் பாடல்களுக்கான இத்தகைய நெறிமுறைகள் வழங்கப்படுவது இதுவே முதல் முறையாகும். இந்தப் பாடலின் ஆறு சரணங்களையும் பாடுவதற்கு ஏறக்குறைய 3 நிமிடம் 10 வினாடிகள் ஆகும்.

முக்கிய அம்சங்கள்:

1. பங்கிம் சந்திர சட்டர்ஜியால் எழுதப்பட்ட 'வந்தே மாதரம்', சுதேசி இயக்கத்தின் (1905–08) போது ஒரு எழுச்சிக் குரலாக மாறியதுடன், இந்திய சுதந்திரப் போராட்டத்தோடும் நெருங்கிய தொடர்புடையதாக இருந்தது. இந்திய அரசியலமைப்பு நிர்ணய சபை இதற்கு தேசிய கீதத்திற்கு இணையான கௌரவத்தையும் மரியாதையையும் வழங்கியது. இருப்பினும், இதனைப் பாடும்போதோ அல்லது வாசிக்கும்போதோ பின்பற்ற வேண்டிய உடல் அசைவுகள், ஒழுக்கமுறைகள் அல்லது சட்டப்பூர்வமான கட்டாய விதிகள் எதுவும் விதிக்கப்படவில்லை.

2. தேசியப் பாடலைப் பாடுவதற்கான மத்திய உள்துறை அமைச்சகத்தின் (MHA) முதல் வழிகாட்டுதல்கள், அனைத்து மாநிலங்கள் மற்றும் யூனியன் பிரதேசங்களின் காவல்துறைத் தலைவர்களுக்கும், தலைமைச் செயலாளர்களுக்கும் வழங்கப்பட்டன. அதிகாரப்பூர்வ நிகழ்ச்சிகளில் 3 நிமிடங்கள் 10 வினாடிகள் நீடிக்கக்கூடிய ஆறு பத்திகள் பாடப்பட வேண்டும் என்று உத்தரவிட்டது. தேசியப் பாடலின் அதிகாரப்பூர்வ வடிவம் பாடப்படும்போதோ அல்லது இசைக்கப்படும்போதோ, அங்கிருப்பவர்கள் அனைவரும் எழுந்து நின்று மரியாதை செலுத்த வேண்டும் என்றும் அறிவுறுத்தப்பட்டுள்ளது. 

3. செய்திப்படங்கள் அல்லது ஆவணப்படங்களின் போது நாட்டுப்பண் இசைக்கப்பட்டால், பொதுமக்கள் எழுந்து நிற்க வேண்டிய அவசியம் இல்லை. ஏனெனில், அந்தச் சூழலில் எழுந்து நிற்பது படத்தின் ஓட்டத்தைத் தடை செய்வதுடன், தேவையற்ற குழப்பத்தையும் ஒழுங்கீனத்தையும் ஏற்படுத்தும் என்று கூறப்பட்டுள்ளது. இது பாடலுக்குப் பெருமை சேர்ப்பதற்குப் பதிலாக இடையூறாகவே அமையும் என்றும் சுட்டிக்காட்டியுள்ளனர்.

4. அதிகாரப்பூர்வமாக தேசியப் பாடல் எந்தெந்த நிகழ்வுகளில் இசைக்கப்பட வேண்டும் என்பதற்கான வழிமுறைகள் கொடுக்கப்பட்டுள்ளன:

(i) அரசு கௌரவங்கள் மற்றும் விருதுகள் வழங்கப்படும் அதிகாரப்பூர்வ நிகழ்வுகளில்.

(ii) முறையான அரசு விழாக்களிலும், அரசாங்கத்தால் ஏற்பாடு செய்யப்பட்ட இதர நிகழ்வுகளிலும் குடியரசுத் தலைவர் வருகை தரும்போதும் அல்லது அங்கிருந்து புறப்படும்போதும்.

(iii)  அகில இந்திய வானொலி மற்றும் தொலைக்காட்சியில் குடியரசுத் தலைவர் நாட்டு மக்களுக்கு உரையாற்றுவதற்கு முன்னும் பின்னும்.

(iv) அந்தந்த மாநிலங்கள் அல்லது யூனியன் பிரதேசங்களில் நடைபெறும் முறையான அரசு விழாக்களுக்கு ஆளுநர்கள் அல்லது துணை நிலை ஆளுநர்கள் வரும்போதும், அங்கிருந்து புறப்படும்போதும்.

(v) தேசியக் கொடி அணிவகுப்பிற்கு கொண்டு வரப்படும் போது.

இந்திய அரசின் அறிவுறுத்தலின்படி, மற்ற சிறப்பு நிகழ்வுகளிலும் தேசியப் பாடல் இசைக்கப்படலாம் என்றும் கூறப்பட்டுள்ளது. 

5. தேசியக் கொடி ஏற்றப்படும் போதும், அணிவகுப்புகள் அல்லாத பிற கலாச்சார அல்லது அதிகாரப்பூர்வ நிகழ்ச்சிகளின் போதும், மற்றும் அரசு அல்லது பொது விழாக்களுக்குக் குடியரசுத் தலைவர் வருகை தரும் போதும், தேசியப் பாடல் இசைக்கப்பட்டு அனைவராலும் பாடப்பட வேண்டும். இத்தகைய தருணங்களில், இசைக் கருவிகளுடனோ அல்லது அவை இல்லாமலோ, குழுவாக இணைந்து தேசியப் பாடலைப் பாடுவது ஊக்குவிக்கப்படுகிறது.

6. அனைத்துப் பள்ளிகளிலும், அன்றைய நாள் செயல்பாடுகள் அனைத்தும் மாணவர்கள் அனைவரும் இணைந்து பாடும் தேசியப் பாடலுடன் தொடங்கலாம் என்றும் அறிவுறுத்தப்பட்டுள்ளது. பள்ளி நிர்வாகத்தினர் தங்களுடைய பாடத்திட்டங்கள் மற்றும் நிகழ்ச்சிகளில் தேசியப் பாடல் மற்றும் தேசிய கீதத்தைப் பாடுவதை ஊக்கப்படுத்தவும், மாணவர்களிடையே தேசியக் கொடிக்கு மதிப்பளிக்கும் பண்பை வளர்க்கவும் போதிய ஏற்பாடுகளைச் செய்ய வேண்டும் என்றும் கூறப்பட்டுள்ளது.

7. தாய்நாட்டிற்குச் செலுத்தும் வணக்கமாகவும், உரிய மரியாதையுடனும், முறையான ஒழுக்கத்துடனும் பாடும் வரை, தேசியப் பாடலை அனைவரும் இணைந்து கூட்டாகப் பாடுவதில் எந்தத் தடையும் இல்லை என்று தெரிவிக்கப்பட்டுள்ளது. 

8. சமீப காலங்களில், 'வந்தே மாதரம்' பாடலை எவ்வாறு பாட வேண்டும் என்பதற்கான தெளிவான விதிகள் குறித்தும், தேசியச் சின்னங்களை அவமதிப்பதைத் தடுக்கும் சட்டத்தின்கீழ் இதற்குத் தண்டனைகள் விதிக்க முடியுமா என்பது குறித்தும் பல நீதிமன்ற மனுக்கள் தாக்கல் செய்யப்பட்டுள்ளன.

9. தேசியப் பாடலைப் போலல்லாமல், தேசிய கீதமானது (National Anthem) தெளிவான அரசியலமைப்பு மற்றும் சட்டப்பூர்வ பாதுகாப்பைக் கொண்டுள்ளது. இந்திய அரசியலமைப்பின் பிரிவு 51A(a)-ன்படி, தேசிய கீதத்திற்கு மதிப்பளிப்பது ஒவ்வொரு குடிமகனின் அடிப்படை கடமையாகும். மேலும், தேசிய கீதத்தைப் பாடுவது மற்றும் பயன்படுத்துவது தொடர்பான விரிவான நடைமுறைகள், மத்திய உள்துறை அமைச்சகத்தால் வெளியிடப்பட்ட நிர்வாக உத்தரவுகளின் மூலம் நிர்வகிக்கப்படுகின்றன.

10. தேசிய கீதத்திற்கு உரிய மரியாதை அளிக்கப்படுவதை உறுதி செய்யும் வகையில், அதனை எவ்வாறு பாட வேண்டும் மற்றும் இசைக்க வேண்டும் என்பதற்கான தெளிவான வழிமுறைகளை இந்த ஆணைகள் வழங்குகின்றன. உதாரணமாக, அரசு விழாக்களில் தேசிய கீதத்தின் முழு வடிவம் இசைக்கப்படும்போது அனைவரும் எழுந்து நிற்க வேண்டும். மேலும், தேசிய கீதத்தை அவமதிக்கும் வகையில் அதனை மாற்றி அமைப்பதற்கோ அல்லது நாடகத்தன்மை வாய்ந்ததாக மாற்றுவதற்கோ அனுமதி இல்லை என்றும் அறிவுறுத்தப்பட்டுள்ளது. 

11. சட்டத்தின்படி, யாராவது வேண்டுமென்றே தேசிய கீதம் பாடுவதைத் தடுத்தாலோ அல்லது தேசிய கீதம் பாடும் கூட்டத்திற்கு இடையூறு விளைவித்தாலோ, அவர்களுக்கு மூன்று ஆண்டுகள் வரை சிறைத்தண்டனை விதிக்கப்படலாம் என்றும் உத்தரவிடப்பட்டுள்ளது.

150-வது ஆண்டில் வந்தே மாதரம்

1. "வந்தே மாதரம்" பாடல் உருவானதன் 150-வது ஆண்டை முன்னிட்டு, 2025 டிசம்பர் மாதத்தில் நாடாளுமன்றத்தில் 10 மணி நேரம் விவாதம் நடைபெற்றது. இந்த ஆண்டு அந்தப் பாடலின் 150-வது ஆண்டு நிறைவைக் குறிப்பதால், மத்திய அரசு ஓராண்டு கால கொண்டாட்டத்தைத் தொடங்கியுள்ளது. முதல் கட்டம் கடந்த நவம்பர் மாதத்துடன் முடிவடைந்தது. இரண்டாம் கட்டம் இந்த பிப்ரவரி மாதம் 2026-ஆம் ஆண்டு நடைபெற உள்ளது. மூன்றாம் கட்டமாக ஆகஸ்ட் மாதம்  2026-ஆம் ஆண்டில் நடத்தத் திட்டமிடப்பட்டுள்ளது. நான்காம் கட்டமாக நவம்பர் மாதம் 2026-ஆம் ஆண்டில் கொண்டாடப்படும் என்றும் தெரிவிக்கப்பட்டுள்ளது. 

2. சமஸ்கிருதம் மற்றும் வங்காள மொழி கலந்து எழுதப்பட்ட இந்தப் பாடல், 1875-ஆம் ஆண்டு உருவாக்கப்பட்டது. பின்னர் 1881-ஆம் ஆண்டு 'பங்கதர்ஷன்' (Bangadarshan) இதழில் தொடராக வெளிவந்த சட்டோபாத்யாயவின் 'ஆனந்தமடம்' (Anandamath) நாவலில் இது சேர்க்கப்பட்டது. 1896-ஆம் ஆண்டு கல்கத்தாவில் நடைபெற்ற காங்கிரஸ் மாநாட்டில், ரவீந்திரநாத் தாகூர் இந்தப் பாடலுக்கு இசையமைத்து முதன்முதலில் பாடியதாகக் கூறப்படுகிறது. 

3. "தாய் மண்ணே உன்னை வணங்குகிறேன்" என்று பொருள்படும் "வந்தே மாதரம்" பாடல், 1905-ஆம் ஆண்டு கர்சன் பிரபு மேற்கொண்ட வங்கப் பிரிவினைக்கு எதிரான போராட்டத்தின் போதுதான் மக்களிடையே மிகவும் பிரபலமானது. இது வங்காளத்தைத் தாண்டி நாடு முழுவதும் பரவியது. மேலும், இந்தப் பாடல் சமஸ்கிருத மொழியில் இருந்ததால், நாட்டின் பல்வேறு பகுதிகளில் இருந்த மக்களும் இதனை எளிதில் புரிந்துகொண்டு தங்களோடு தொடர்புபடுத்திக் கொள்ள முடிந்தது.

4. 1882-ஆம் ஆண்டு வெளியிடப்பட்ட 'ஆனந்தமடம்', முஸ்லிம் ஆட்சியாளர்களுக்கு எதிராக சந்நியாசிகள் மேற்கொண்ட கிளர்ச்சியைப் பற்றிய கதையாகும். இந்த நாவலில், மகேந்திரன் என்ற இல்லறவாசி, பவானந்தர் என்ற போர்வீரத் துறவியைச் சந்திக்கும் போது இந்தப் பாடல் இடம்பெறுகிறது. பவானந்தர் இப்பாடலின் முதல் வரிகளைப் பாடுகிறார்.

5. மகேந்திரன் ஆர்வத்துடன் இந்த "தாய்" யார் என்று கேட்கிறான், ஆனால் பவானந்தர் அதற்குப் பதிலளிக்காமல், மேலும் சில வரிகளைப் பாடுகிறார். குழப்பமடைந்த மகேந்திரன், "துறவி பாடுவது ஒரு தாயைப் பற்றி அல்ல, நாட்டைப் பற்றி" என்று கூறுகிறான். அதற்கு பவானந்தர், கண்களில் கண்ணீருடன், "எங்களைப் பெற்றெடுத்த இந்த மண்ணைத் தவிர வேறு எந்தத் தாயையும் நாங்கள் அறியமாட்டோம்" என்று பதிலளிக்கிறார்.

6. இந்தப் பாடல் நாட்டின் விடுதலை வேட்கையை வெளிப்படுத்தியதால் மக்களிடையே மிகவும் பிரபலமடைந்தது. அதே சமயம், இது சில சர்ச்சைகளையும் ஏற்படுத்தியது. இப்பாடல் ஒரு இந்து பெண் தெய்வத்தை போற்றுவது போல் அமைந்துள்ளதாகக் கூறி, முஸ்லிம்களில் ஒரு பிரிவினர் இதற்கு எதிர்ப்பு தெரிவித்தனர்.

7. தேசிய கீதத்தைத் தேர்ந்தெடுப்பது குறித்து அரசியலமைப்புச் சபை விவாதித்தபோது, 'வந்தே மாதரம்' பாடலுக்குப் பதிலாக தாகூரின் 'ஜன கண மன' தேர்ந்தெடுக்கப்பட்டது. மே மாதம் 21-ஆம் தேதி, 1948-ஆம் ஆண்டு அமைச்சரவைக்கு எழுதிய குறிப்பில் நேரு இதனை விளக்கினார். 'வந்தே மாதரம்' இந்தியர்களால் "ஆழமாக மதிக்கப்படும்" ஒரு பாடலாக இருந்தாலும், இசைக்குழுவினர் இசைப்பதற்கு 'ஜன கண மன' பாடல் மிகவும் எளிதாக இருந்ததாக நேரு குறிப்பிட்டுள்ளார்.

Original article : MHA issues first protocol on Vande Mataram -Khushboo Kumari

Read More →

சாந்தி சட்டத்திற்கு எதிரான ஒரு வழக்கு -சுவ்ரத் ராஜு

 வழங்குநர்களுக்கு ஏன் இழப்பீடு வழங்கப்படுகிறது? அணுசக்தி பாதிப்புகளுக்கான குடிமையியல் பொறுப்புச் சட்டத்தில் (Civil Liability for Nuclear Damage Act (CLNDA) இந்தச் சட்டம் எதை மாற்றுகிறது? பொறுப்பு வரம்பை நிர்ணயிப்பது தார்மீக அபாயத்தை' உருவாக்குமா? கடந்தகால அணுசக்தி இலக்குகள் ஏன் தவறவிடப்பட்டன?

நாடாளுமன்றத்தின் குளிர்காலக் கூட்டத்தொடரில் நிறைவேற்றப்பட்ட  சாந்தி சட்டம் (அணு ஆற்றல் நிலையான பயன்பாடு மற்றும் மேம்பாட்டுச் சட்டம்) (Sustainable Harnessing and Advancement of Nuclear Energy for Transforming India Act (SHANTI Act)), அணுசக்தித் துறையைத் தனியார் நிறுவனங்களுக்கும் திறந்து விடுகிறது. மேலும், இது அணுசக்தி பாதிப்புகளுக்கான குடிமையியல் பொறுப்புச் சட்டத்தின்கீழ் (CLNDA) உள்ள இழப்பீட்டு கட்டமைப்பிலும் மாற்றங்களைக் கொண்டு வருகிறது. குறிப்பாக, வழங்குநர் பாதுகாப்பு மற்றும் இழப்பீட்டு உச்சவரம்பு ஆகியவற்றில் செய்யப்பட்டுள்ள மாற்றங்கள், பாதுகாப்பு மற்றும் பொறுப்புக்கூறல் குறித்த சிக்கல்களை எழுப்பியுள்ளன.

சாந்தி சட்டத்தின் முக்கிய அம்சங்கள் என்ன?

இந்தச் சட்டம் மூன்று முக்கிய அம்சங்களைக் கொண்டுள்ளது.

முதலாவதாக, இது தனியார் நிறுவனங்கள் அணு மின் நிலையங்களை நடத்த அனுமதிக்கிறது. இதன் மூலம் இந்தத் துறையில் ஒன்றிய அரசுக்கு இருந்த தனிப்பட்ட அதிகாரம் முடிவுக்கு வருகிறது. இரண்டாவதாக, விபத்து ஏதேனும் ஏற்பட்டால் அதற்கான முழுப் பொறுப்பையும் மின் நிலையத்தை நடத்துபவரே ஏற்க வேண்டும் என்று கூறப்படுகிறது. இதன் மூலம் அணுசக்தி உபகரணங்களை வழங்கும் நிறுவனங்களுக்கு பாதுகாப்பு அளிக்கப்பட்டுள்ளது. முன்னதாக, பழுதடைந்த உபகரணங்களால் விபத்து ஏற்பட்டால் விநியோககர்கள் மீது வழக்கு தொடர மின் நிலைய நடத்துனர்களுக்கு இருந்த "மீட்பு உரிமை" இப்போது நீக்கப்பட்டுள்ளது. விபத்துக்கான இழப்பீட்டுத் தொகை சிறிய மின் நிலையங்களுக்கு ₹100 கோடி எனவும், பெரிய மின் நிலையங்களுக்கு ₹3,000 கோடி எனவும் நிர்ணயிக்கப்பட்டுள்ளது. ஒன்றிய அரசின் பங்கையும் சேர்த்து, ஒரு விபத்துக்கான மொத்த இழப்பீட்டு வரம்பு 300 மில்லியன் (சுமார் ₹3,900 கோடி) சிறப்பு வரைதல் உரிமைகள் (Special Drawing Rights) என நிர்ணயிக்கப்பட்டுள்ளது. இந்தச் சட்டம் அணு ஆற்றல் நிலையான பயன்பாடு மற்றும் மேம்பாட்டுச் சட்டத்தின் (CLNDA) பிரிவு 46-ஐ நீக்கியுள்ளது. இதன் மூலம் பாதிக்கப்பட்டவர்கள் குற்றவியல் சட்டம் உள்ளிட்ட பிற சட்டங்களின்கீழ் தீர்வு காண்பதற்கான வழிமுறை தடுக்கப்பட்டுள்ளது.

இறுதியாக, இது அணுசக்தி ஒழுங்குமுறை வாரியத்திற்கான (Atomic Energy Regulatory Board) ஒரு சட்ட கட்டமைப்பை உருவாக்குகிறது; ஆனால், அதன் உறுப்பினர்கள் அணுசக்தி ஆணையத்தால் (Atomic Energy Commission) அமைக்கப்பட்ட ஒரு குழுவின் மூலம் தேர்ந்தெடுக்கப்படுவார்கள் என்று கூறுவதன் மூலம், அந்த வாரியத்தின் சுதந்திரத்தை கட்டுப்படுத்துகிறது.

சட்டம் ஏன் வழங்குநர்களுக்கு இழப்பீடு வழங்குகிறது?

அனைத்து பெரிய விபத்துகளிலும் வடிவமைப்பு குறைபாடுகள் முக்கியப் பங்கு வகித்துள்ளன.

ஃபுகுஷிமா அணு உலைகளில் பயன்படுத்தப்பட்ட GE (General Electric) நிறுவனத்தின் 'மார்க்-1' (Mark-1) பாதுகாப்பு வடிவமைப்பில் உள்ள பலவீனம், 2011-ஆம் ஆண்டு ஏற்பட்ட பேரிடரை மேலும் மோசமாக்கியதாக பாதுகாப்பு நிபுணர்கள் எச்சரித்திருந்தனர். 1986-ஆம் ஆண்டு நிகழ்ந்த செர்னோபில் விபத்திற்கு, அந்த அணு உலையின் "நேர்மறை மின் திறன் குணகம்'" (positive power coefficient) மற்றும் அதன் "குறைபாடுள்ள அவசரகால நிறுத்த அமைப்பு" (deficient emergency shutdown system) ஆகியவையே இரண்டு முக்கிய காரணங்கள் என்று சர்வதேச அணுசக்தி பாதுகாப்பு ஆலோசனை குழுவின் அறிக்கை தெரிவித்தது. அதேபோல், 1979-ஆம் ஆண்டு நிகழ்ந்த த்ரீ மைல் தீவு (Three Mile Island) விபத்து குறித்து ஆய்வு செய்த அமெரிக்க அதிபர் ஆணையம், அணு உலையின் கட்டுப்பாட்டு அறை வடிவமைப்பில் கடுமையான குறைபாடுகள் இருப்பதைக் கண்டறிந்தது. மேலும், அந்த உலையை வழங்கிய நிறுவனம், அதில் இருந்த ஆபத்துகள் பற்றி இயக்குநருக்குத் தெரிவிக்காததைக் கடுமையாக விமர்சித்தது. எனவே, சாந்தி (SHANTI) சட்டத்தின்கீழ் அணு உலை விநியோகஸ்தர்களுக்கு (Suppliers) வழங்கப்படும் இழப்பீட்டுப் பொறுப்பிலிருந்து விலக்கு அளிப்பதற்கு எந்தவித அறிவியல் அடிப்படையுமில்லை என்றும் சுட்டிக்காட்டப்படுகிறது.

இருப்பினும், பன்னாட்டு நிறுவனங்கள், குறிப்பாக அமெரிக்காவைச் சேர்ந்த விநியோகஸ்தர்கள், இந்தியாவில் ஏற்படக்கூடிய இழப்பீடு பொறுப்புகள் குறித்து கடுமையாகப் புகார் அளித்தனர்.

2026-ஆம் ஆண்டின் அமெரிக்கத் தேசிய பாதுகாப்பு அங்கீகாரச் சட்டம் (U.S. National Defense Authorization Act), இந்தியாவின் உள்நாட்டு அணுசக்தி பொறுப்பு விதிகளை சர்வதேச நெறிமுறைகளுக்கு ஏற்ப மாற்றியமைக்க வேண்டும் என்று தெளிவாகக் கோருகிறது; இந்த சர்வதேச நெறிமுறைகள் அணுசக்தி விநியோகஸ்தர்களுக்கு  சாதகமாக உள்ளன.

சாந்தி (SHANTI) சட்டத்தின்படி, வழங்கப்பட்ட உபகரணங்களில் ஏதேனும் குறைபாடுகள் இருந்து அதனால் விபத்துக்கள் ஏற்பட்டாலும், அந்த உபகரணங்களை வழங்கிய விநியோகஸ்தர்கள் இந்தியாவில் எந்தவிதமான  குடிமையியல் அல்லது குற்றவியல் நடவடிக்கைகளுக்கும் பொறுப்பாக மாட்டார்கள் என்பதை இச்சட்டம் உறுதி செய்கிறது.

ஏற்படக்கூடிய சேதத்தின் மதிப்போடு ஒப்பிடும்போது பொறுப்பு வரம்பு எந்த அளவில் உள்ளது?"

ஜப்பான் பொருளாதார ஆராய்ச்சி மையம் (The Japan Centre for Economic Research), புகுஷிமா அணு உலை விபத்தினால் சுமார் 80 டிரில்லியன் யென் (₹46 லட்சம் கோடி) வரை இழப்பு ஏற்படலாம் என்று மதிப்பிட்டுள்ளது. அதேபோல், செர்னோபில் விபத்து குறித்து ஐக்கிய நாடுகள் சபை வெளியிட்ட கூட்டு அறிக்கையில், பெலாரஸ் நாடு மட்டுமே தனக்கு ஏற்பட்ட இழப்பு 235 பில்லியன் டாலர் (₹21 லட்சம் கோடி) என மதிப்பிட்டுள்ளதாகக் கூறப்பட்டுள்ளது. மேலும், கோவா மாநிலத்தின் பரப்பளவிற்கு இணையான “செர்னோபில் தவிர்ப்பு மண்டலம்” (Chernobyl Exclusion Zone) எனப்படும் இடம், கடந்த 40 ஆண்டுகளாக மக்கள் யாரும் வசிக்க முடியாத இடமாகவே இருந்து வருகிறது.

இதற்கு நேர்மாறாக, சாந்தி (SHANTI) சட்டம் நிர்ணயித்துள்ள இழப்பீட்டு வரம்பு, இந்தத் தொகைகளில் சுமார் ஆயிரத்தில் ஒரு பங்கு மட்டுமே ஆகும். இந்தியா சர்வதேச துணை இழப்பீட்டு ஒப்பந்தத்தின் (Convention on Supplementary Compensation) நிதியைப் பயன்படுத்தினாலும்கூட, ஒரு பெரிய விபத்தினால் ஏற்படும் சேதத்தில் 1 சதவீத அளவைக் கூட நெருங்க முடியாது என்று தெரிவிக்கின்றனர். இதனால், இந்தியாவில் உள்ள பாதிக்கப்பட்ட மக்களுக்கு இந்த வரம்பிற்கு மேல் இழப்பீடு கோர சட்டப்பூர்வ உரிமை இருக்காது. மேலும், அவர்கள் தங்கள் உயிருக்கும் உடைமைக்கும் ஏற்படும் இழப்புகளைத் தாங்களே சுமக்க வேண்டியிருக்கும். இத்தகைய வரம்பு இல்லையென்றால், தனியார் அணுசக்தி நிறுவனங்கள் கடுமையான நிதி அபாயங்களைச் சந்திக்க நேரிடும் என்கின்றனர். எனவே, ஒருவேளை அணுசக்தி விபத்து ஏற்பட்டால், அந்த நிறுவனங்களின் நலனைப் பாதுகாப்பதற்கே இந்த சாந்தி (SHANTI) சட்டம் வழிவகை செய்வதாகக் குற்றம் சாட்டுகின்றனர்.

இதனால் ஏற்படக்கூடிய பாதுகாப்பு விளைவுகள் என்ன?

முகவர்களின் செயல்களின் விளைவுகளிலிருந்து அவர்களைப் பாதுகாப்பது ஒரு "தார்மீக அபாயத்தை" உருவாக்குகிறது. பொறுப்பு வரம்புடன் கூடுதலாக, இந்தச் சட்டம் "கடுமையான இயற்கை பேரழிவால்" ஏற்படும் விபத்துகளுக்கு இழப்பீடு வழங்குகிறது. இது அபாயகரமான தொழில்களுக்கான இந்தியாவின் "முழுமையான பொறுப்பு" கட்டமைப்பை மாற்றியமைக்கிறது. ஃபுகுஷிமா (Fukushima) பேரழிவு ஒரு சுனாமியால் ஏற்பட்டது என்ற உண்மையைப் புறக்கணிக்கிறது. இது நெகிழ்வுத்தன்மை கொண்ட மற்றும் பாதுகாப்பான ஆலைகளை நிறுவுவதற்கான தொழில்துறையின் ஆர்வத்தைக் குறைக்கிறது.

இந்தியாவில் அணுசக்தி எவ்வளவு முக்கியத்துவம் வாய்ந்தது?

இந்தியாவின் மின்சார உற்பத்தியில் அணுசக்தி பல ஆண்டுகளாக சுமார் 3 சதவீதம் மட்டுமே பங்களித்து வருகிறது. 1980-ஆம் ஆண்டுகளில், 2000-ஆம் ஆண்டிற்குள் 10 கிகாவாட் (Giga Watt (GW)) இலக்கை எட்ட அரசாங்கம் திட்டமிட்டது. அதேபோல் 2006-ஆம் ஆண்டில், 2020-ஆம் ஆண்டிற்குள் 20 கிகாவாட் இலக்கை அடைய வேண்டும் என்று நிர்ணயிக்கப்பட்டது. ஆனால், உண்மையான உற்பத்தித்திறன் 2000-ஆம் ஆண்டில் 2.86 கிகாவாட் மற்றும் 2020-ஆம் ஆண்டில் 6.78 கிகாவாட் என்ற அளவிலேயே இருந்தது. அதிக செலவு மற்றும் பாதுகாப்பு தொடர்பான சிக்கல்களே இந்த பின்னடைவுக்குக் காரணங்களாகக் கூறப்படுகின்றன. அரசாங்கம் குறிப்பிடும் சிறிய மட்டு அணு உலைகள்(Small Modular Reactors) இன்னும் சோதிக்கப்படாத நிலையில் உள்ளன. மேலும், அவை ஒரு யூனிட் மின்சாரத்திற்கு அதிக செலவாகும் என்றும் எதிர்பார்க்கப்படுகிறது. எனவே, 2047-ஆம் ஆண்டுக்குள் 100 கிகாவாட் என்ற புதிய இலக்கு சாத்தியமற்றதாகப் பார்க்கப்படுகிறது. 

இந்தச் சட்டத்தின் பொருளாதார முக்கியத்துவம் என்ன?

குறைந்த அளவிலான உற்பத்தித் திறன் கொண்டவை என்ற போதிலும், அணு உலைகள் இன்றும் பெரிய வணிக வாய்ப்புகளை வழங்குகின்றன. உதாரணமாக, அமெரிக்காவின் ஜார்ஜியா மாநிலத்தில் வெஸ்டிங்ஹவுஸ் எலக்ட்ரிக் நிறுவனத்தால் (Westinghouse Electric Company) இரண்டு AP1000 அணு உலைகள் தலா சுமார் 18 பில்லியன் டாலர் செலவில் சமீபத்தில் கட்டி முடிக்கப்பட்டன. இந்தியாவின் சாந்தி சட்டம் (SHANTI Act), தனியார் நிறுவனங்களும் சர்வதேச விநியோகஸ்தர்களும் இத்தகைய திட்டங்கள் மூலம் கடுமையான கட்டுப்பாடுகள் அல்லது விபத்துகளுக்கான பொறுப்புகள் ஏதுமின்றி லாபம் ஈட்ட அனுமதிப்பதாகக் குற்றம் சாட்டப்படுகிறது. 

சுவ்ரத் ராஜு, அணு ஆயுதக் குறைப்பு மற்றும் அமைதிக்கான கூட்டமைப்புடன் (Coalition for Nuclear Disarmament and Peace) தொடர்புடைய ஒரு இயற்பியல் ஆய்வாளர் ஆவார்.

Original article : A case against the SHANTI Act -Suvrat Raju

Read More →

எகிப்தின் மன்னர்களின் பள்ளத்தாக்கில் (Valley of the Kings) கண்டெடுக்கப்பட்ட தமிழ் பிராமி கல்வெட்டுகள், பண்டையகால வணிகத் தொடர்புகளை வெளிச்சம் போட்டுக் காட்டுகின்றன. -என். சாய் சரண்

 இந்தியப் பயணிகள் கல்லறைகளின் உட்புறத்தில் தங்கள் பெயர்களை எழுதும் பொதுவான வழக்கத்தைப் பின்பற்றியதாக ஆராய்ச்சியாளர்கள் கூறுகின்றனர்.

பண்டைய தமிழகம், இந்தியாவின் பிற பகுதிகள் மற்றும் ரோமானியப் பேரரசு ஆகியவற்றிற்கு இடையே இருந்த வணிகத் தொடர்புகள் குறித்த புதிய விவரங்களை ஒரு முக்கிய கண்டுபிடிப்பு வெளிப்படுத்தியுள்ளது. எகிப்தின் 'மன்னர்களின் பள்ளத்தாக்கு' (Valley of the Kings) பகுதியில் உள்ள கல்லறைகளில், கி.பி. 1-ஆம் நூற்றாண்டு முதல் 3-ஆம் நூற்றாண்டு வரையிலான காலத்தைச் சேர்ந்த தமிழ்-பிராமி, பிராகிருதம் மற்றும் சமஸ்கிருதம் ஆகிய மொழிகளில் பொறிக்கப்பட்ட சுமார் 30 கல்வெட்டுகளை இரண்டு ஆராய்ச்சியாளர்கள் கண்டறிந்துள்ளனர்.

பாரிஸில் உள்ள பிரெஞ்சு ஆசியக் கல்வி நிறுவனத்தைச் சேர்ந்த சார்லோட் ஷ்மிட் (Charlotte Schmid) மற்றும் சுவிட்சர்லாந்தின் லொசேன் பல்கலைக்கழகத்தைச் சேர்ந்த இங்கோ ஸ்ட்ராச் (Ingo Strauch) ஆகியோர் மேற்கொண்ட 2024–25 ஆய்வின் போது இந்த கல்வெட்டுகள் கண்டறியப்பட்டன. 1926-ஆம் ஆண்டு 'மன்னர்களின் பள்ளத்தாக்கில்' (Valley of the Kings) ஆய்வு செய்து, 2,000-க்கும் மேற்பட்ட கிரேக்கச் சுவர் எழுத்துக்களை (graffiti) ஆவணப்படுத்திய பிரெஞ்சு அறிஞர் ஜூல்ஸ் பெய்லெட் என்பவரின் முந்தைய பணியைத் தொடர்ந்து, இந்தக் குழுவினர் தீபன் நெக்ரோபோலிஸில் (Theban Necropolis) உள்ள ஆறு கல்லறைகளில் இவற்றை பதிவு செய்தனர்.

தற்போது நடைபெற்று வரும் சர்வதேச தமிழ் கல்வெட்டியல் மாநாட்டில், 'மன்னர்களின் பள்ளத்தாக்கிலிருந்து இந்தியா வரை: எகிப்தில் இந்தியக் கல்வெட்டுகள்' என்ற தலைப்பில் அறிஞர்கள் தங்கள் ஆய்வறிக்கையை சமர்ப்பித்தனர். அதில், இந்தக் கல்வெட்டுகளை உருவாக்கியவர்கள் இந்திய துணைக் கண்டத்தின் வடமேற்கு, மேற்கு மற்றும் தெற்குப் பகுதிகளிலிருந்து வந்தவர்கள் என்றும், அவர்களில் தென்னிந்தியாவைச் சேர்ந்தவர்களே பெரும்பான்மையாக இருந்தனர் என்றும் அறிஞர்கள் தெரிவித்தனர்.

இந்தக் கல்லறைகளுக்குத் தாங்கள் வந்ததற்கான அடையாளமாக, அங்குள்ள அறைகள் மற்றும் நடைபாதைகளின் சுவர்களில் பார்வையாளர்கள் தங்கள் பெயர்களைச் செதுக்கிச் சிறிய கல்வெட்டுகளையும் கிறுக்கல்களையும் (graffiti) விட்டுச் சென்றுள்ளதாக ஆராய்ச்சியாளர்கள் தெரிவித்தனர். இந்தக் கல்லறைகளின் உள்ளே மற்ற மொழிகளில், குறிப்பாகக் கிரேக்க மொழியில் ஏராளமான கிறுக்கல்கள் உள்ளன. அவற்றோடு சேர்த்தே இந்த இந்தியக் கல்வெட்டுகளும் காணப்படுகின்றன என்றும் அவர்கள் குறிப்பிட்டனர். இத்தகைய சூழலில், ஏற்கனவே நடைமுறையில் இருந்த வழக்கத்தைப் பின்பற்றியே இந்தியப் பார்வையாளர்களும் கல்லறைகளின் உட்புறத்தில் தங்கள் பெயர்களைப் பொறித்துச் சென்றுள்ளதாக ஆய்வாளர்கள் சுட்டிக்காட்டுகின்றனர். 

சிகை கொற்றன் (Cikai Koṟraṉ) என்ற பெயர் மீண்டும் மீண்டும் இடம்பெற்றுள்ளது. இது ஐந்து கல்லறைகளில் மொத்தம் எட்டு முறை பொறிக்கப்பட்டுள்ளது. நுழைவாயில்களுக்கு அருகிலும், உட்புறச் சுவர்களின் உயரமான இடங்களிலும் உள்ள பிற கிறுக்கல் அடையாளங்களுக்கு நடுவே இப்பெயர் காணப்பட்டது. ஒரு கல்லறையில், நுழைவாயிலில் சுமார் நான்கு மீட்டர் உயரத்தில் இப்பெயர் இடம்பெற்றுள்ளது என்று ஸ்ட்ராச்  தெரிவித்துள்ளார்.

சிகை கொற்றன் (Cikai Koṟṟaṉ) என்ற பெயர் பல தகவல்களை வெளிப்படுத்துகிறது. இதன் முதல் பகுதியான 'சிகை', சமஸ்கிருத சொல்லான 'ஷிகா' (śikhā) என்பதோடு தொடர்புடையதாக இருக்கலாம். இதற்கு 'குடுமி' அல்லது 'கிரீடம்' என்று பொருள் கூறப்படுகிறது. இது ஒரு பொதுவான பெயராக இல்லாவிட்டாலும், இதன் இரண்டாம் பகுதியான 'கொற்றன்' என்பது முற்றிலும் தனித்துவமான தமிழ்ச் சொல்லாகும். இதற்குப் போர்க்குணமிக்க வலுவான பின்னணி உண்டு என்கிறார். 'கொற்றம்' என்ற வேர்ச் சொல்லிலிருந்து இது உருவானது என்றும் இதற்கு 'வெற்றி' மற்றும் 'பகைவரை அழித்தல்' என்று பொருள் என்றும் சுட்டிக்காட்டுகிறார். சேரர்களின் வீரக் கடவுளான கொற்றவை மற்றும் அரசனைக் குறிக்கும் கொற்றவன் ஆகிய சொற்களிலும் இதே வேர்ச் சொல் எதிரொலிப்பதை நாம் காணலாம் என்று ஸ்மிட் தெரிவித்துள்ளார்.

'கொற்றன்' என்ற பெயர் எகிப்தில் கண்டெடுக்கப்பட்ட மற்ற பொருட்களிலும் காணப்படுகிறது. 1995-ஆம் ஆண்டு செங்கடல் துறைமுகமான பெரெனிகேயில் (Berenike) கண்டெடுக்கப்பட்ட ஒரு மண்பாண்ட ஓட்டில் 'கொற்றபுமான்' (Koṟṟapumāṉ) என்ற பெயர் இடம்பெற்றுள்ளது. இந்தப் பெயர் சங்க இலக்கியங்களிலும் காணப்படுகிறது. புறநானூற்றில் புகழப்படும் சேர மன்னன் 'பிட்டாங்கொற்றன்', சில நேரங்களில் நேரடியாக 'கொற்றன்' என்றே அழைக்கப்படுகிறார். இதே போன்ற பெயர்கள் கி.பி. 2 அல்லது 3-ஆம் நூற்றாண்டைச் சேர்ந்த பண்டைய சேர தலைநகரான புகளூர் கல்வெட்டுகளிலும் காணப்படுவதாக அறிஞர்கள் குறிப்பிட்டுள்ளனர்.

இந்தக் கல்லறைகளில் மேலும் இரண்டு நபர்கள் தங்கள் பெயர்களைத் தமிழ் பிராமி எழுத்துக்களில் பொறித்துள்ளனர். அவற்றில் ஒரு கல்வெட்டு 'கோபன் வரத கண்டான்' (கோபன் வந்து பார்த்தான்) என்று வாசிக்கப்படுகிறது. 'கோபன்' என்ற பெயர் தமிழ்நாட்டின் அம்மன்கோவில்பட்டியிலும் கண்டறியப்பட்டுள்ளது. இது தவிர 'சாதன்' மற்றும் 'கிரன்' ஆகிய மற்ற தமிழ் பெயர்களும் அடையாளம் காணப்பட்டுள்ளன. முதலில் இந்தக் கல்வெட்டுகளைக் கண்டறிந்தபோது, என்னால் அதை நம்பவே முடியவில்லை என்றும் பல ஆண்டுகளாகப் பலர் இந்தக் கல்லறைகளைப் பார்வையிட்டுள்ளனர், ஆனால் இதுவரை யாரும் இதில் இந்தியத் தொடர்பு இருப்பதை அடையாளம் காணவில்லை என்றும் ஒருவேளை தான் தவறாகப் புரிந்து கொண்டேனா என்று சார்லட்டிடமே கேட்டதாக ஸ்ட்ராச் கூறியுள்ளார். 

தமிழ்நாடு அரசு தொல்லியல் துறையின் கல்வி மற்றும் ஆராய்ச்சி ஆலோசகரான கே. ராஜன் கூறுகையில், பண்டைய தமிழகத்தின் மலபார் கடற்கரைக்கும் ரோமானியப் பேரரசுக்கும் இடையிலான வணிகத் தொடர்புகளை வெளிச்சம் போட்டுக் காட்டுவதால் இந்தக் கண்டுபிடிப்புகள் மிகவும் முக்கியத்துவம் வாய்ந்தவை என்று குறிப்பிட்டுள்ளார். மேலும் அவர் கூறுகையில், இதற்கு முன்பு எகிப்தில் மேற்கொள்ளப்பட்ட ஆய்வுகள் செங்கடல் துறைமுக நகரமான பெரெனிகேவை (Berenike) மையமாகக் கொண்டு பல ஆண்டுகளாக நடத்தப்பட்டன என்றும் ஆனால் தற்போது அந்த கவனம் நைல் நதிப் பள்ளத்தாக்கை நோக்கி நகர்ந்துள்ளதாகவும் தெரிவித்துள்ளார்.

Original article : Tamil Brahmi inscriptions found in Egypt’s Valley of the Kings shed light on ancient trade links. -N. Sai Charan

Read More →

ஒரு நாடாளுமன்ற உறுப்பினர் மற்றும் கட்சியின் செய்தித் தொடர்பாளர் மாநிலத்தைப் பிரதிநிதித்துவப்படுத்தும் சிறப்பு அரசு வழக்கறிஞராகவும் இருக்க முடியுமா? -சதாஃப் மோடக்

 மும்பை அமர்வு நீதிமன்றம், உஜ்வால் நிகாமின் சிறப்பு அரசு வழக்கறிஞர் (SPP) நியமனம் ஒப்பந்த ரீதியாகவும் தற்காலிகமாகவும் இருந்தது என்றும், அரசியலமைப்பின் பிரிவு 102 இன் கீழ் "இலாபம் பெறும் பதவி" (office of profit) அல்ல என்றும் தீர்ப்பளித்தது.

2025 செப்டம்பரில் கொலைக் குற்றம் சாட்டப்பட்ட ஒருவர், மாநிலங்களவை நாடாளுமன்ற உறுப்பினர் உஜ்வால் நிகாமை தனது விசாரணையில் சிறப்பு அரசு வழக்கறிஞராக (Special Public Prosecutor (SPP)) இருப்பதை நீக்கக் கோரி மும்பை அமர்வு நீதிமன்றத்தில் விண்ணப்பம் தாக்கல் செய்தார்.

2012-ம் ஆண்டு டெல்லியைச் சேர்ந்த தொழிலதிபர் ஒருவரைக் கொன்றதாகக் குற்றம் சாட்டப்பட்ட ஒரு விண்ணப்பதாரர், ஒரு நாடாளுமன்ற உறுப்பினர் மாநில அரசாங்கத்தை ஒரு சிறப்பு அரசு வழக்கறிஞராக (SPP) தொடர்ந்து பிரதிநிதித்துவப்படுத்த முடியுமா என்ற பிரச்சினையை எழுப்பினார்.

இருப்பினும், நீதிமன்றம் அவரது கோரிக்கை மனுவை நிராகரித்தது. இதனால்தான் நிகாம் தொடர்ந்து சிறப்பு வழக்கறிஞர் பதவியில் பணியாற்றலாம் என்று தீர்ப்பளித்தது.

மனு என்ன?

2012-ம் ஆண்டு தொழிலதிபரும் ஒரு சிறிய பாலிவுட் நடிகருமான அருண்குமார் திக்கு கொலை செய்யப்பட்ட வழக்கில் விஜய் பலாண்டே கொலைக் குற்றச்சாட்டுகளை எதிர்கொள்கிறார். 2012 முதல், நிகாம் இந்த வழக்கில் சிறப்பு அரசு வழக்கறிஞராக (SPP) பணியாற்றி வருகிறார். இதற்கான விசாரணை இன்னும் நடந்து வருகிறது. ஜூலை 2025-ல் மாநிலங்களவை நாடாளுமன்ற உறுப்பினராக பரிந்துரைக்கப்பட்டதிலிருந்து நிகாம் சிறப்பு வழக்கறிஞர் பதவியில் நீடிப்பதை விஜய் பலாண்டே சவால் செய்தார். ஏனெனில், அவர் அந்தப் பதவியில் நீடிக்க முடியாது என்று கூறினார்.

நாடாளுமன்ற உறுப்பினர் தகுதி நீக்கம் தொடர்பான பிரச்சினையைக் கையாளும் இந்திய அரசியலமைப்பின் பிரிவு 102-ஐ விஜய் பலாண்டே மேற்கோள் காட்டினார். அவர் குறிப்பாக பிரிவு 102(1)(a)-ஐ மேற்கோள் காட்டினார். அதில் கூறப்பட்டுள்ளதாவது, “ஒரு நபர் நாடாளுமன்றத்தின் எந்த அவையிலும் உறுப்பினராகத் தேர்ந்தெடுக்கப்படுவதற்கும், உறுப்பினராக இருப்பதற்கும் தகுதி நீக்கம் செய்யப்படுவார் என்று கூறுகிறது. இந்திய அரசு அல்லது எந்த மாநில அரசாங்கத்தின் கீழும், சட்டத்தால் நாடாளுமன்றத்தால் அதன் உரிமையாளரை தகுதி நீக்கம் செய்யக்கூடாது என்று அறிவிக்கப்பட்ட ஒரு பதவியைத் தவிர, அவர் நாடாளுமன்றத்தால் எந்த அவையிலும் உறுப்பினராகத் தேர்ந்தெடுக்கப்படுவதற்கும் தகுதி நீக்கம் செய்யப்படுவார்.”

குற்றவியல் நடைமுறைச் சட்டத்தின் (CrPC) பிரிவு 24-ஐ அரசு வழக்கறிஞர்கள் மீது பலாண்டே மேற்கோள் காட்டி, நிகாம் மாநில அரசால் நியமிக்கப்பட்டு பொது நிதியில் இருந்து ஊதியம் பெறுவதால், பிரிவு 102-ல் குறிப்பிடப்பட்டுள்ளபடி அவர் "இலாபம் தரும் பதவியை" வகித்து வருவதாகக் கூறினார். அதேநேரத்தில், ஆளும் பாஜகவின் அதிகாரப்பூர்வ செய்தித் தொடர்பாளராகவும் நிகாம் பிரதிநிதித்துவப்படுத்துவதால், வழக்கை தனக்கு சாதகமாக அமைக்க "தவறான செல்வாக்கு மற்றும் அதிகாரத்தை" அவர் பயன்படுத்தலாம் என்றும் மனுவில் கூறப்பட்டுள்ளது.

2024-ம் ஆண்டில், மும்பை வடக்கு மத்திய தொகுதியில் மக்களவைத் தேர்தலில் போட்டியிட பாஜக டிக்கெட் வழங்கப்பட்ட பின்னர், நடந்து வரும் 29 வழக்குகளில் நிகாம் சிறப்பு அரசு வழக்கறிஞர் (SPP) பதவியை ராஜினாமா செய்தார். பின்னர் அவர் தேர்தலில் தோல்வியடைந்தார். பின்னர் அந்த வழக்குகளில் SPP ஆக மீண்டும் நியமிக்கப்பட வேண்டும் என்று கோரி, உடனடியாக மீண்டும் நியமிக்கப்பட்டார். பின்னர், பலாண்டே ஒரு அரசியல் கட்சியின் உறுப்பினராக நிகாமின் மறு நியமனத்தை எதிர்த்து சவால் செய்தார். ஆனால், நீதிமன்றம் அவரது மனுவை நிராகரித்தது. அந்த அடிப்படையில் அவரை நீக்க எந்த சட்டப்பூர்வ ஏற்பாடும் இல்லை என்று நீதிமன்றம் கூறியது.

'லாபகரமான பதவி' வகிக்கும் நாடாளுமன்ற உறுப்பினர். : நீதிமன்றங்கள் முன்பு கூறியது

ஜெயா பச்சன் vs இந்திய ஒன்றியம் மற்றும் பிறர் வழக்கு-2006 (Jaya Bachchan vs Union of India and Others) உட்பட பல தீர்ப்புகளை பாலண்டே மேற்கோள் காட்டினார். அந்த வழக்கில், உத்தரபிரதேச திரைப்பட மேம்பாட்டு கவுன்சிலின் தலைவராக லாபம் ஈட்டும் பதவியை ஒரே நேரத்தில் வகித்ததன் அடிப்படையில், மாநிலங்களவை நாடாளுமன்ற உறுப்பினராக தனது தகுதி நீக்கத்தை பச்சன் எதிர்த்துப் போராடினார். அந்தப் பதவிக்கு எந்த பணப் பலனையோ அல்லது ஊதியத்தையோ பெறவில்லை என்று பச்சன் வாதிட்டார். மேலும், உச்சநீதிமன்றம் லாபம் ஈட்டும் பதவி என்பது “லாபம் அல்லது பண ஆதாயத்தை ஈட்டக்கூடியது” என்று கூறியது.

லாபம் தரும் பதவியாக எது கணக்கிடப்படுகிறது என்பதைத் தீர்மானிக்கும் போது, ​​நீதிமன்றம் முந்தைய தீர்ப்புகளைக் குறிப்பிட்டது. “பதவி சில ஊதியங்களைக் கொண்டிருக்கும் இடத்தில் அல்லது நியமன உத்தரவில் நியமிக்கப்பட்ட நபர் சில ஊதியங்களுக்கு உரிமையுடையவர் என்று கூறுகிறது. பின்னர் இது லாபம் ஈட்டும் பதவியாக இருக்கும். அந்தப் பதவியை வகிப்பவர் அத்தகைய ஊதியங்களைப் பெறவோ விரும்பவில்லை என்றாலும் கூட” என்பது நன்கு தீர்மானிக்கப்பட்டுள்ளது என்று கூறியது. "பதவி லாபம் அல்லது பண ஆதாயம் ஈட்ட முடியுமா என்பதுதான் பொருத்தமானது, அந்த நபர் உண்மையில் பண ஆதாயம் பெற்றாரா என்பது அல்ல".

வழக்கறிஞர்களாகப் பயிற்சி பெறும் நாடாளுமன்ற உறுப்பினர்கள் குறித்து, பலாண்டே வாதிட்டார். அவர்கள் தங்கள் தனிப்பட்ட முறையில் அவ்வாறு செய்யலாம் என்றும், மாநிலத்தைப் பிரதிநிதித்துவப்படுத்தக்கூடாது என்றும் வாதிட்டார். சிறப்பு அரசு வழக்கறிஞர் (SPP) பதவியை வகிக்கும் நாடாளுமன்ற உறுப்பினர் சம்பந்தப்பட்ட முந்தைய வழக்கில் குறிப்பிட்ட உத்தரவு அல்லது மேற்கோள் எதுவும் பிறப்பிக்கப்படவில்லை.

நிகாமின் வாதம்

"அரசு கடமைகள் மற்றும் செயல்பாடுகளை மேற்கொள்ள நீதிமன்றங்களை அழைக்க முடியாது. நீதிமன்றங்கள் பொதுவாக மாநிலத்தின் கொள்கை முடிவில் தலையிடக்கூடாது" என்று கூறிய மகாராஷ்டிரா மாநிலம் மற்றும் பிறர் vs பிரகாஷ் பிரஹ்லாத் பாட்டீல் மற்றும் பிறர்-2009 (State of Maharashtra and Others v. Prakash Prahlad Patil and Others) வழக்கை நிகாம் மேற்கோள் காட்டினார். ஸ்ரீமதி காந்தா கதுரியா vs மனக் சந்த் சுரானா (Srimati Kanta Kathuria v. Manak Chand Surana) என்ற மற்றொரு தீர்ப்பையும் அவர் மேற்கோள் காட்டினார். இந்த வழக்கு "அலுவலகம்" என்ற வார்த்தையின் அர்த்தத்தை விளக்கியது. ஒரு அலுவலகம் என்பது காலப்போக்கில் தொடரும் நிரந்தரப் பதவி என்றும், ஒன்றன் பின் ஒன்றாக வெவ்வேறு பதவிகளில் இருப்பவர்களால் நிரப்பப்படும் என்றும் அது கூறியது.

இந்திய குடியரசுத் தலைவரால் நாடாளுமன்ற உறுப்பினராக பரிந்துரைக்கப்பட்டதைத் தொடர்ந்து, குற்றவியல் நடைமுறைச் சட்டம் (CrPC) அல்லது அதற்குப் பதிலாக வந்த பாரதிய நாகரிக் சுரக்ஷா சன்ஹிதா, 2023-ல் உள்ள எந்த விதியும், சிறப்பு அரசு வழக்கறிஞராக தனது செயல்பாடுகளைச் செய்வதைத் தடுக்கவில்லை என்று நிகாம் கூறியிருந்தார். சிறப்பு அரசு வழக்கறிஞராக (SPP) தனது நியமனம் ஒப்பந்தத்தின் அடிப்படையில் அமைந்தது என்று அவர் மீண்டும் கூறினார். எனவே, அது தற்காலிகமானது. அவர் எந்த நிரந்தரப் பதவியையும் வகிக்கவில்லை என்றும் அவர் மீண்டும் வலியுறுத்தினார். மாநில அரசுக்கும் சிறப்பு அரசு வழக்கறிஞராக (SPP) தனக்கும் இடையே "மாஸ்டர்-சேவகன்" (master-servant) உறவு இல்லை. எனவே அதை "லாபகரமான பதவி" என்று கருத முடியாது என்று அவர் கூறினார்.

மாநில அரசு, அதன் சட்டம் மற்றும் நீதித்துறை மற்றும் வழக்குரைஞர் இயக்குநர் மூலம், பலாண்டேவின் மனுவை எதிர்த்தது, ஒரு வழக்கறிஞரை சிறப்பு வழக்கறிஞர் பதவியாக நியமிக்க உரிமை உண்டு என்றும், அது ஒரு நிரந்தர அலுவலகம் அல்ல என்றும் கூறியது.

பிரிவு 102 எந்த இடத்திலும் எந்தவொரு நபரும் சிறப்பு வழக்கறிஞர் பதவியில் இருப்பதற்காக தகுதி நீக்கம் செய்யப்பட மாட்டார்கள் என்று கூறவில்லை என்றும், பலாண்டே அந்த பிரிவின் விதிகளை "தவறாகப் புரிந்து கொண்டார்" என்றும் நீதிமன்றம் கூறியது. மேலும், எந்தவொரு நபரையும் சிறப்பு வழக்கறிஞர் பதவியாக நியமிக்க மாநில அரசுக்கு உரிமை உண்டு என்றும், நிகாம் மேற்கோள் காட்டிய தீர்ப்பில் குறிப்பிடப்பட்டுள்ளபடி மாநில அரசின் கொள்கை முடிவில் தலையிட முடியாது என்றும் நீதிமன்றம் கூறியது.

Original article : Can an MP and party spokesperson also be a special public prosecutor representing the State? -Sadaf Modak

Read More →

இறுதி SIR வாக்காளர் பட்டியலில் இருந்து உங்கள் பெயர் நீக்கப்பட்டிருந்தால் நீங்கள் என்ன செய்ய வேண்டும்? -தாமினி நாத்

 சனிக்கிழமை தொடங்கி, 12 மாநிலங்கள் மற்றும் ஒன்றியப் பிரதேசங்களில் சிறப்பு தீவிர திருத்தத்தின் (Special Intensive Revision (SIR)) இறுதி வாக்காளர் பட்டியல்கள் அடுத்த சில வாரங்களில் வெளியிடப்படும்.

கடந்த ஆண்டு அக்டோபரில் தொடங்கிய ஒன்பது மாநிலங்கள் மற்றும் மூன்று ஒன்றியப் பிரதேசங்களில் தேர்தல் ஆணையத்தின் சிறப்பு தீவிர திருத்தம் (SIR) செயல்முறை நிறைவடையும் தருவாயில் உள்ளது. சிறப்பு தீவிர திருத்தப் (SIR) பயிற்சியின் கீழ் தயாரிக்கப்பட்ட இறுதி வாக்காளர் பட்டியல்கள் சனிக்கிழமை (பிப்ரவரி 14) முதல் வெளியிடப்பட உள்ளன.

கடந்த இருபதாண்டுகளாக இது வழக்கமாக இருந்த வருடாந்திர மற்றும் தேர்தலுக்கு முந்தைய சிறப்பு சுருக்க திருத்தத்திற்கு (Special Summary Revision (SSR)) மாறாக, ஜூன் 2025-ல் நாட்டின் வாக்காளர் பட்டியல்களில் சிறப்பு தீவிர திருத்தத்தை (SIR) நடத்த தேர்தல் ஆணையம் முடிவு செய்தது. இந்த செயல்முறையின்கீழ், பெயர்களைச் சேர்ப்பது அல்லது நீக்குவது மட்டுமல்லாமல், ஆரம்பத்தில் இருந்தே வாக்காளர் பட்டியல்கள் தயாரிக்கப்பட்டன.

ஜூன் முதல் ஆகஸ்ட் வரை பீகாரில் இந்தப் பயிற்சி முதலில் மேற்கொள்ளப்பட்டது. விரைவில் மாநிலத்தில் சட்டமன்றத் தேர்தல்கள் திட்டமிடப்பட்டதால் இது செய்யப்பட்டது. அக்டோபர் 27, 2025 அன்று, தேர்தல் ஆணையம் 12 மாநிலங்கள் மற்றும் ஒன்றியப் பிரதேசங்களுக்கான (UT) அட்டவணையை அறிவித்தது. இது நாட்டின் பிற பகுதிகளிலும் இந்த நடைமுறையை உரிய நேரத்தில் தொடங்குவதாகக் கூறியது.

12 மாநிலங்கள் மற்றும் ஒன்றியப் பிரதேசங்களில் வசிப்பவர்கள் தெரிந்து கொள்ள வேண்டியது கீழே குறிப்பிடப்பட்டுள்ளது.

இறுதி வாக்காளர் பட்டியல்கள் எப்போது வெளியிடப்படும் என்று எதிர்பார்க்கப்படுகிறது?

பல நீட்டிப்புகளுக்குப் பிறகு, புதன்கிழமை (பிப்ரவரி 11) நிலவரப்படி இறுதி வெளியீட்டு தேதிகளை தேர்தல் ஆணையம் அறிவித்துள்ளது. அவற்றிற்கான தேதிகள்,

• பிப்ரவரி 14   : ராஜஸ்தான் மற்றும் புதுச்சேரி.

• பிப்ரவரி 17   : தமிழ்நாடு மற்றும் குஜராத்.

• பிப்ரவரி 21   : அந்தமான் & நிக்கோபார் தீவுகள், கேரளா, சத்தீஸ்கர் மற்றும் 

                      கோவா.

• பிப்ரவரி 23  : மத்தியப் பிரதேசம்.

• பிப்ரவரி 28  : மேற்கு வங்கம்.

• ஏப்ரல் 10      : உத்தரப் பிரதேசம்.

இறுதி வாக்காளர் பட்டியலில் உங்கள் பெயர் உள்ளதா என்பதை எவ்வாறு சரிபார்க்கலாம்?

டிசம்பர் மற்றும் ஜனவரி மாதங்களில் உங்கள் மாநிலத்தில் வெளியிடப்பட்ட வரைவு சிறப்பு தீவிர திருத்தம் (SIR) பட்டியலில் உங்கள் பெயர் இருந்தால், நீங்கள் தொடர்ந்து பட்டியலில் இருப்பதை உறுதிசெய்ய இறுதிப் பட்டியலைச் சரிபார்க்கலாம்.

உங்களிடம் EPIC எண் இருந்தால் : உங்கள் மாநிலத்தில் இறுதி வாக்காளர் பட்டியல் வெளியிடப்பட்டதும், electorsearch.eci.gov.in என்று இணையதளத்தில் உங்கள் வாக்காளர் புகைப்பட அடையாள அட்டை (Electors’ Photo Identity Card (EPIC)) எண்ணைப் பயன்படுத்தி உங்கள் விவரங்களைத் தேடுவதன் மூலம் உங்கள் பதிவைச் சரிபார்க்கலாம். உங்கள் வாக்காளர் பதிவில் முன்பு இணைத்திருந்தால் உங்கள் தொலைபேசி எண்ணைப் பயன்படுத்தியோ அல்லது உங்கள் பெயர் மற்றும் உறவினரின் பெயர் (தாய் அல்லது தந்தையின் பெயர், உங்கள் வாக்காளர் பதிவில் பதிவு செய்யப்பட்டுள்ள எதுவாக இருந்தாலும்) போன்ற பிற விவரங்களைப் பயன்படுத்தியோ விவரங்களைத் தேடலாம். தேடல் முடிவு (search result) உங்கள் விவரங்களைக் காட்டினால், உங்கள் பெயர் வாக்காளர் பட்டியலில் சேர்க்கப்பட்டுள்ளது என்று அர்த்தம்.

உங்களிடம் EPIC எண் இல்லையென்றால் : உங்களிடம் EPIC எண் இல்லையென்றால், voter.eci.gov.in என்று இணையதளத்திற்குச் சென்று “வாக்காளர் பட்டியலைப் பதிவிறக்கு” (​​download electoral roll) என்ற விருப்பத்தைக் கிளிக் செய்வதன் மூலம் உங்கள் மாநிலம், தொகுதி மற்றும் வாக்குச் சாவடியின் பட்டியலைச் சரிபார்க்கலாம்.

பின்வரும் பக்கத்தில், உங்கள் மாநிலத்தைத் தேர்ந்தெடுத்து, பின்னர் 2026-ம் ஆண்டை திருத்த ஆண்டாகவும், சிறப்பு தீவிர திருத்தம் (SIR) இறுதிப் பட்டியலைப் தேர்ந்தெடுக்கவும். பின்னர் நீங்கள் பதிவுசெய்யப்பட்ட மாவட்டம் மற்றும் சட்டமன்றத் தொகுதியைத் தேர்ந்தெடுக்கலாம்.

இது வாக்குச் சாவடிகளின் பட்டியலை உங்களுக்குக் காண்பிக்கும். நீங்கள் பதிவுசெய்யப்பட்ட வாக்குச் சாவடியைத் தேர்ந்தெடுக்கவும். பின்னர் பட்டியலில் உங்கள் பெயரைத் தேடுங்கள்.

இந்த செயல்முறை அதிக நேரத்தை எடுத்துக்கொள்ளும். இருப்பினும், உங்களிடம் EPIC எண் இல்லையென்றால் அல்லது அதைக் கண்டுபிடிக்க முடியவில்லை என்றால் அதுதான் ஒரே வழி.

இந்த விருப்பங்கள் தேர்தல் ஆணையத்தின் ECINET செயலியிலும் கிடைக்கின்றன.

உங்கள் பெயர் வாக்காளர் பட்டியலில் இல்லையென்றால் நீங்கள் என்ன செய்ய வேண்டும்?

மாவட்ட தேர்தல் அதிகாரியிடம் (DEO) மேல்முறையீடு செய்தல் : உங்கள் பெயர் வரைவுப் பட்டியலில் இருந்து இறுதிப் பட்டியலில் இடம் பெறவில்லை என்றால், இறுதி முடிவை எதிர்த்து மேல்முறையீடு செய்யலாம். இறுதிப் பட்டியல் வெளியிடப்பட்ட நாளிலிருந்து 15 நாட்களுக்குள் மாவட்ட நீதிபதியான மாவட்ட தேர்தல் அதிகாரியிடம் (DEO) மேல்முறையீடு செய்ய உங்களுக்கு அவகாசம் உள்ளது.

தலைமை நிர்வாக அதிகாரியிடம் (CEO) முறையீடு : மாவட்ட தேர்தல் அதிகாரியின் (DEO) முடிவில் நீங்கள் திருப்தி அடையவில்லை என்றால், அந்த முடிவை எதிர்த்து உங்கள் மாநிலத்தின் தலைமை தேர்தல் அதிகாரியிடம் மேல்முறையீடு செய்ய உங்களுக்கு 15 நாட்கள் அவகாசம் உள்ளது. நீங்கள் voters.eci.gov.in மூலம் உங்கள் மேல்முறையீட்டைச் சமர்ப்பிக்கலாம் அல்லது உங்கள் வாக்குச்சாவடி நிலை அதிகாரி (BLO), தேர்தல் பதிவு அதிகாரி (ERO) அல்லது மாவட்ட தேர்தல் அதிகாரியை (DEO) தொடர்பு கொள்ளலாம். இந்த அதிகாரிகளின் பெயர்கள் மற்றும் தொலைபேசி எண்கள் electoralsearch.eci.gov.in என்ற இணையதளத்தில் கிடைக்கின்றன. மேலும், உங்கள் EPIC எண் அல்லது பிற தேவையான விவரங்களை உள்ளிடுவதன் மூலம் அவற்றைக் கண்டறியலாம்.

படிவம் 6 பதிவு : உங்கள் இரண்டு மேல்முறையீடுகளும் நிராகரிக்கப்பட்டாலும், நீங்கள் தகுதியுடையவராக இருந்தால் மீண்டும் விண்ணப்பிக்கலாம். இதற்கான தகுதி பெற, நீங்கள் ஒரு இந்திய குடிமகனாகவும், குறைந்தபட்சம் 18 வயது நிரம்பியவராகவும், அந்தத் தொகுதியில் வழக்கமாக வசிப்பவராகவும் இருக்க வேண்டும். படிவம் 6-ஐ நிரப்புவதன் மூலம் நீங்கள் மீண்டும் விண்ணப்பிக்கலாம். படிவத்தை ECINET தரவுத்தளம் மற்றும் மொபைல் செயலியில் இணையவழி மூலம் நிரப்பலாம். உங்கள் வாக்குச்சாவடி நிலை அதிகாரி (BLO) அல்லது தேர்தல் பதிவு அதிகாரிக்கு (ERO) சமர்ப்பிக்கலாம். தேர்தல்கள் நடைபெற உள்ள மாநிலங்களில், வாக்களிக்கும் பட்டியலில் சரியான நேரத்தில் இடம் பெற, தேர்தலுக்கான வேட்புமனு தாக்கல் செய்வதற்கான கடைசி தேதிக்கு 10 நாட்களுக்கு முன்பு வரை படிவம்-6 ஐ சமர்ப்பிக்கலாம்.

Original article : What can you do if your name is deleted from the final SIR electoral roll? -Damini Nath

Read More →